यहून्ना 19

मौता री सजा रा हुक्म होर मजाक डूआणा

(मत्ती 27:15-31; मरकु. 15:6-20; लूक. 23:13-25)

1तेबे पिलातुस हाकमे स्पाहीया जो हुक्म दितेया कि यीसू जो लई जाई किन्हें कोड़े लगाऊआ। 2होर स्पाहिये यीसू रे कठे काण्डे रा ताज गुन्धी किन्हें तेसरे मूंडा पर रख्या, होर बैंगणी चोगा पन्ह्याया। 3होर स्यों तेस वाले बार-बार आई किन्हें बोल्दे लगे, “हे यहूदी लोका रे राजे, नमस्ते! होर तिन्हें तेस जो थप्पड़ मारे।” 4पिलातुस हाकमे एक बारी दबारा बाहर आई किन्हें लोका किन्हें बोल्या, “देखा, मैं यीसू जो तुस्सा वाले दबारा बाहर ल्याहुंआं, ताकि तुस्से जाणी सको कि मैं तेस मन्झ कोई दोस नी पांदा।”

क्रूसा प्रयाल्हे चढ़ाणे रे कठे भेज्या

5तेबे यीसू जो काण्डे रा मुकट होर बैंगणी चोगा पन्ह्याई किन्हें बाहर ल्यान्देया। होर पिलातुसे तिन्हा किन्हें बोल्या, “एस आदमी जो देखा!” 6जेबे मुख्य याजके होर मन्दरा रे स्पाहिये से देख्या, ता तिन्हें चिंगी किन्हें बोल्या कि, “तेस जो क्रूसा प्रयाल्हे चढ़ाऊआ, क्रूसा प्रयाल्हे!” पिलातुस हाकमे तिन्हा किन्हें बोल्या, “तुस्से ई एस जो लई जाऊआ होर तेस जो क्रूसा प्रयाल्हे चढ़ाऊआ, क्यूंकि हांऊँ तेस मन्झ मौता री सजा रे लायक कोई गल नी पांदा।”

7यहूदी अगुवे तेस जो जवाब दितेया कि, “आस्सा रा भी एक व्यवस्था ई होर तेस व्यवस्था रे मताबक ये मारी देणे रे काबल आ, क्यूंकि इन्हें आपणे आपा जो परमेसरा रा मह्ठा बोल्या।” 8जेबे पिलातुस हाकमे ये गल सुणी ता से बौह्त ज्यादा डरी गया। 9होर से दबारा मैहला अंदर गया होर तिन्हें यीसू किन्हें बोल्या, “तू केथीरा आ?” पर यीसूए तेस जो कुछ भी जवाब नी दितेया। 10पिलातुस हाकमे तेस किन्हें बोल्या, “तू मेरे किन्हें कि नी गलान्दा लगिरा? क्या तू नी जाणदा कि तुजो छाडणे रा हक मेरे वाले आ होर तुजो क्रूसा प्रयाल्हे चढ़ाणे रा हक भी मेरे वाले आ।” 11यीसूए जवाब दितेया कि, “अगर तेरा हक मेरे गास आ ता ये हक तुजो परमेसरे दितिरा। इधी कठे जिन्हें जे हांऊँ पकड़वाया, तेसरा पाप ज्यादा बडा आ।”

12ये जबाब सुणी किन्हें पिलातुस हाकमे यीसू जो छाडी देणा चाहेया, पर यहूदी लोका री भीड़े चिंगी -चिंगी किन्हें बोल्या, “अगर तू एस जो छाडी देन्घा ता तू महाराजे रा दोस्त नी आ। हर कोई जो आपणे आपा जो राजा बणाहां से महाराजे रे खलाफ आ।” 13ये गल्ला सुणी किन्हें पिलातुस हाकमे यीसू बाहर ल्यान्देया होर तेस जगहा एक चबूतरा था जेस जो इब्रानी भासा मन्झ गब्ब्ता बोल्हा ऐं थे तेथी से न्याय री गद्दी पर बैठी गया। 14ये फसहा रे साजा रे हफ्ते रा त्यारी रा ध्याड़ा था जो अरामा रे ध्याड़े ले पैहले आहूँआं होर लगभग दप्हैरा रा टैम था। तेबे तिन्हें यहूदी लोका किन्हें बोल्या, “देखा, ये रह्या आ, तुस्सा रा राजा!” 15पर स्यों चिल्लाए, “मारी देआ! मारी देआ! होर तेस जो क्रूसा प्रयाल्हे चढ़ा!” पिलातुस हाकमे तेस किन्हें बोल्या, “क्या हांऊँ तुस्सा रे राजे जो क्रूसा प्रयाल्हे चढ़ाऊं?” मुख्य याजके जवाब दितेया कि, “महाराजे जो छाडी किन्हें होर कोई आस्सा रा राजा नी आ।” 16तेबे पिलातुस हाकमे यीसू तिन्हारे हाथा मन्झ सौंपी दितेया ताकि से क्रूसा प्रयाल्हे चढ़ाया जाई सके।

क्रूसा प्रयाल्हे चढ़ाए गये

(मत्ती 27:32-44; मरकु. 15:21-32; लूक. 23:26-43)

17तेबे स्पाही यीसू जो लई किन्हें गये। होर से आपणा क्रूस चकी किन्हें यरुस्लेम सैहरा रे बाहर तेस जगहा तक गया, जेस जो खोपड़ी री जगहा बोल्हा ऐं होर जेस जो इब्रानी भासा मन्झ गुलगुता बोल्हा ऐं। 18तेथी तिन्हें यीसू जो होर तेस साउगी दो कैदी जो क्रूसा प्रयाल्हे चढ़ाया, एकी जो ओरे होर दूजे जो परे, होर बीचा मन्झ यीसू जो। 19होर पिलातुस हाकमे एक दोस पत्र लिखी किन्हें क्रूसा प्रयाल्हे लगाया, होर जेस मन्झ ये लिखिरा था, नासरता रा यीसू, यहूदी लोका रा राजा। 20ये दोस पत्र बौह्त यहूदी लोके पढ़ेया क्यूंकि से जगहा जेथी जे यीसू जो क्रूसा प्रयाल्हे चढ़ाया था। होर से जगहा यरुस्लेम सैहरा ले नेडे थी होर ये दोस पत्र इब्रानी होर लतीनी होर यूनानी भासा मन्झ लिखिरा था। 21तेबे यहूदी मुख्य याजके पिलातुस हाकमे किन्हें बोल्या, यहूदी लोका रा राजा मत लिख पर ये लिख कि “तिन्हें बोल्या, हांऊँ यहूदी लोका रा राजा आ” 22पिलातुस हाकमे जवाब दितेया कि, “मैं जो लिखी दितेया, से लिखी दितेया।”

23जेबे स्पाही यीसू जो क्रूसा प्रयाल्हे चढ़ाई चुके, ता तेसरे कपड़े लई किन्हें चार हिस्से किते, होर चार स्पाहिये एक-एक हिस्सा लेई लितेया, होर कुरता भी लया पर कुरता उपरा ले हेठा तक बगैर सलाई रा था। 24इधी कठे स्पाहिये एक दूजे किन्हें बोल्या, “आस्सा ये नी छेकणा, पर एता रे कठे चिठ्ठी पाहें कि ये कुरता केस जो मिलणा?” ये इधी कठे हुआ कि, पवित्र सास्त्रा मन्झ लिखिरी गल पूरी हो कि,

“तिन्हें मेरे कपड़े आपु मन्झ बांडी लये।

होर मेरे कपड़े रे कठे तिन्हें चिठ्ठी पाई।”

स्पाहिये एह्ड़ा ई कितेया। 25पर यीसू रे क्रूसा वाले तेसरी माऊ होर तेसरी माऊआ री बैहण मरियम जेह्ड़ी क्लोपासा री लाड़ी थी, होर मगदल गांऊँआं री मरियम खड़ीरी थी। 26जेबे यीसूए आपणी माऊ होर चेले जो, जेस जो से प्यार करहा था खड़ीरे देख्या, यीसूए आपणी माऊआ किन्हें बोल्या, “हे माऊए, देख, ये रैंहयां तेरा मह्ठा।” 27तेबे तिन्हें तेस चेले किन्हें बोल्या, “ये तेरी माऊ ई, होर तेस ई टैम से चेला तेस्सा जो आपणे घरा लई गया होर आपणे वाले रखी।”

यीसू री मौत

(मत्ती 27:45-56; मरकु. 15:33-41; लूक. 23:44-49)

28एता ले बाद, यीसूए ये जाणी किन्हें कि ऐबे तेसरा सब काम पूरा हुई गया, होर इधी कठे कि पवित्र सास्त्रा मन्झ लिखिरी री गल पूरी हो, तिन्हें बोल्या, “हांऊँ सोखा आ।” 29तेथी एक सिरके किन्हें भरीरा भांडा रखिरा था, होर लोके से स्पंजा किन्हें सघ्हिरा जूफा डाल्आ रे पांगे पर रखी किन्हें तेसरे मुंहा पर लगाया। 30जेबे यीसूए सिरका सुआदेया, तेबे तिन्हें बोल्या, “पूरा हुई गया” होर मूंड झुकाई किन्हें तिन्हें आपणे प्राण छाडी दिते।

बरछे किन्हें यीसू री पसली छेदी

31होर ये त्यारी रा ध्याड़ा था, होर अगला ध्याड़ा फसहा रे साजे रा होर अरामा रा ध्याड़ा भी था। होर ये यहूदी लोका रे कठे खास ध्याड़ा था, होर स्यों नी चाहंदे थे तेस ध्याड़े केसी रा भी सरीर क्रूसा प्रयाल्हे लटकीरा रेह। इधी कठे तिन्हें पिलातुस हाकमे किन्हें अर्ज किती कि तिन्हारी टांगा तोड़ी दे ताकि स्यों जल्दी मरी जाये होर तिन्हारे सरीरा जो क्रूसा ले तुआरी सके। 32तेबे स्पाही आये होर पैहले कैदी री टांगा तोड़ी फेरी दूजे री, जो तेस साउगी क्रूसा प्रयाल्हे चढ़ाई रे थे। 33पर जेबे तिन्हें यीसू वाले आई किन्हें देख्या कि से मरी चुकिरा, ता तिन्हें तेसरी टांगा नी तोड़ी। 34पर स्पाहीया मन्झा ले एकिये बरछे किन्हें तेसरी पसली छेदी होर तेता मन्झा ले तिहां ईं खून होर पाणी निकल्या। 35जिन्हें माह्णुंऐ जे ये सब कुछ देख्या, तिन्हें ही एसरे बारे मन्झ गुआही दितिरी ताकि तुस्से भी यीसू पर विस्वास करी सको। तेसरी ये गुआही सच्ची ई, होर से जाणहां कि से सच्च बोल्हा। 36ये गल्ला इधी कठे हुई कि पवित्र सास्त्रा मन्झ लिखिरी गल पूरी हुई सके कि, “तेसरी कोई हड्डी नी तोड़ी नी जाणी।” 37फेरी एक होर गल पवित्र सास्त्रा मन्झ ये लिखिरा आ से पूरी हुई कि, “जिन्हें से छेदेया, तिन्हा से देखणा।”

यीसू रा दफनाया जाणा

(मत्ती 27:57-61; मरकु. 15:42-47; लूक. 23:50-56)

38इन्हा गल्ला ले बाद अरिमतियाह सैहरा रा युसुफ जो यीसू रा चेला था, पर यहूदी अगुवे रे डरा रे मारे से एस गल्ला जो ल्कोई किन्हें रख्हा था, तिन्हें पिलातुस हाकमे ले अर्ज किती कि, से यीसू री ल्हास लई जाऊँ। होर पिलातुस हाकमे तेसरी अर्ज सुणी लई, होर से आई किन्हें तेसरी ल्हास लई गया। 39नीकुदेमुस भी जो पैहले यीसू वाले राती गईरा था लगभग तेती किलो मिली-मलाईरा गन्धरस होर एलोविरा लई आया। 40तेबे तिन्हें यीसू री ल्हास नीती होर यहूदी लोका रे रुआजा रे मताबक तिन्हें तेसरी ल्हास खुस्बूदार चीजा ल्गाई किन्हें कफना मन्झ लपेटी। 41से जगहा जेथी जे यीसू जो क्रूसा प्रयाल्हे चढ़ाईरा था, तेथी नेडे एक बगीचा था, होर तेस बगीचे मन्झ एक नंऊँआं डुआर था, जेस मन्झ कधी केसी री ल्हास नी रखिरी थी। 42इधी कठे तिन्हें यीसू री ल्हास तेस डुआरा मन्झ रखी, क्यूंकि से डुआर नेडे था। होर से ध्याड़ा यहूदी लोका रे त्यारी रा ध्याड़ा था।

Àwon tá yàn lọ́wọ́lọ́wọ́ báyìí:

यहून्ना 19: MJLNT

Ìsàmì-sí

Pín

Daako