यहून्ना 1

संसारा जो रचणे ले पैहले ही बचन था

1पुरे संसारा जो रचणे ले पैहले से था, जेस जो बचन बोल्या जाहाँ था, होर से परमेसरा साउगी था, होर सेई परमेसर था। 2पैहले ले ही से परमेसरा साउगी था। 3परमेसरे सभ कुछ तेसरे ज्रीए रच्या, होर जो कुछ रच्या गया, तेता मन्झा ले कोई भी चीज तेसरे बगैर नी रची गई। 4से सारी जिन्दगीया रा सोता था, होर सेई आ जेह्ड़ा सभ माह्णुं जो जोती देआ। 5होर जोत नह्यारे मन्झ चम्का ई; होर नह्यारा तेस जो नी बुझाई सकेया।

6परमेसरे एक माह्णुं भेजेया जेसरा नांऊँ यहून्ना था। 7से इधी कठे आया कि से जोती रे बारे मन्झ दसे, ताकि सभ तेसरी गुआही रे ज्रीए विस्वास करहे। 8यहून्ना आपु ता जोती नी था, पर तेस्सा जोती रे बारे मन्झ गुआही देणे रे कठे आया।

9होर से जे सच्ची जोती, हर एक माह्णुं जो प्रयासा देहां ईं संसारा मन्झ आऊणें वाली थी। 10से आपणे ही संसारा मन्झ आया था, जेस जो परमेसरे तेसरे ज्रीए रच्या, पर एस संसारा रे लोके से नी पछयाणेया। 11से आपणे ही लोका मन्झ आया होर तेसरे आपणे ही लोके से नी अपनाया। 12पर जिन्हें से अपनाया, जो तेस पर विस्वास रख्हा ऐं, तिन्हें तिन्हा जो परमेसरा रे बच्चे हूंणे रा हक दितेया। 13स्यों ना ता आपणे माऊ-बापू ले, ना सरीरा री इच्छा ले, ना लोका रे बच्चे जम्मणे री इच्छा ले, पर परमेसरा री इच्छा ले जम्मे।

14होर परमेसरा रे बचने माह्णुं रा रूप धारण कितेया, होर अनुग्रह होर सच्चाई किन्हें भर्ही किन्हें आस्सा मन्झ डेरा कितेया, होर आस्से तेसरी एह्ड़ी महिमा देखी, जेह्ड़ी बापू रे एकलौते मह्ठे री। 15यहून्ना बपतिस्मा देणे वाल़े तेसरे बारे मन्झ गुआही दिती होर चिंगी किन्हें बोल्या कि, “ये सेई आ, जेसरे बारे मन्झ मैं बोलिरा था, ‘जेह्ड़ा मेरे बाद आऊणें वाल़ा आ, से मेरे ले भी बढ़ी किन्हें आ, क्यूंकि से मेरे ले पैहले जिउंदा था।’” 16क्यूंकि तेसरे अनुग्रहा री भरपूरी ले आस्से सभीये अनुग्रहा पर अनुग्रहा हासल कितेया। 17इधी कठे कि मूसा री व्यवस्था मूसा रे ज्रीए मिली, पर अनुग्रह होर सच्चाई प्रभु यीसू मसीहा रे ज्रीए पूजे। 18परमेसरा जो केसिए कधी नी देख्या। पर एकलौते मह्ठे जो सच्चमुच परमेसर आ होर बापू रे सभी ले करीब आ, तिन्हें ई आस्सा जो परमेसर दसिरा।

यहून्ना बपतिस्मा देणे वाल़े री गुआही

(मत्ती 3:1-12; मरकु. 1:1-8; लूक. 3:1-18)

19यहून्ना बपतिस्मा देणे वाल़े री गुआही येई कि जेबे यरुस्लेम सैहरा रे यहूदी लोका रे याजक होर लेवी घराने रा जो तेस ले ये पुछणे रे कठे भेज्या कि तू कुणहां? 20होर तिन्हें साफ साफ बोली दिता कि, “हांऊँ से मसीह नी आ।” 21तेबे तिन्हें तेस ले पूछेया, “फेरी तू कुणहां? क्या तू एलिय्याह नबी आ?” तिन्हें बोल्या, “हांऊँ एलिय्याह नबी नी आं।” “ता क्या तू नबी आ?” होर तिन्हें जवाब दितेया, “नी।” 22तेबे तिन्हें तेस ले दबारा पूछेया, “फेरी तू कुणहां? ताकि आस्से आपणे भेजणे वाले जो जवाब देई सके। तू आपणे बारे मन्झ क्या बोल्हा?” 23यहून्ना बपतिस्मा देणे वाल़े आपणे बारे मन्झ से बोल्या, “जेह्ड़ा यसायाह नबिये तेसरे बारे मन्झ लिखिरा था कि, ‘बियाबान जगहा मन्झ एक हाका पाणे वाले री अवाज सुणह्या करहा ई कि, प्रभु रे कठे आपणे मन त्यार करा।’”

24स्यों फरीसी लोका री तरफा ले भेजे गईरे थे। 25तिन्हें तेस ले सुआल पूछेया कि, “अगर तू मसीह नी आ, होर ना तू एलिय्याह नबी आ, होर ना कोई दूजा नबी आ, फेरी तू बपतिस्मा कि देहां।” 26यहून्ना बपतिस्मा देणे वाल़े तिन्हा जो जवाब दितेया कि, “हांऊँ ता तुस्सा जो पाणी किन्हें बपतिस्मा देहां, पर तुस्सा मन्झ एक एह्ड़ा आदमी खड़ीरा, जेस जो तुस्से नी जाणदे। 27से मेरे बाद आऊणें वाल़ा आ, होर हांऊँ तेसरे बूटा रे तस्मे खोलणे रे लायक बी नी हाया।” 28ये सारी गल्ला यरदन दराऊआ ले पार बैतनिय्याह गांऊँआं मन्झ हुई, जेथी जे यहून्ना लोका जो बपतिस्मा देहां था।

यीसू परमेसरा रा छेलू

29दूजे ध्याड़े यहून्ना बपतिस्मा देणे वाल़े यीसू जो आपणी तरफ आऊंदे देखी किन्हें बोल्या, “देखा, ये परमेसरा रा छेलू आ, जो संसारा रे पापा जो चक्की लैहां। 30ये सेई आ, जेसरे बारे मन्झ मैं बोलिरा था कि, जो मेरे बाद आऊणें वाल़ा आ, से मेरे ले भी बढ़ी किन्हें आ, क्यूंकि से मेरे ले पैहले था। 31होर हांऊँ तेस जो नी पछयाणदा था कि से मसीहा, पर एता कठे हांऊँ पाणी किन्हें बपतिस्मा देंदा आया कि, इस्राएल देसा रे लोक जाणी ले से कुणहां।” 32होर यहून्ना बपतिस्मा देणे वाल़े ये गुआही दिती कि, “मैं पवित्र आत्मा जो कबूतरा रे रूपा मन्झ आसमाना ले उतरदे देख्या। होर से तेस पर रुकी गया। 33होर हांऊँ ता तेस जो पछयाणदा नी था, ‘पर जिन्हें मुंजो पाणी किन्हें बपतिस्मा देणे रे कठे भेजिरा, तिन्हें ई मुंजो बोलिरा कि जेस पर तू आत्मा उतरदे होर रूकदे देखे सेई पवित्र आत्मा किन्हें बपतिस्मा देणे वाल़ा आ।’ 34होर मैं देखी लईरा, होर हांऊँ तुस्सा किन्हें सच्च -सच्च बोल्हां कि सेई परमेसरा रा मह्ठा आ।”

यीसू रा पैहला चेला

35अगले ध्याड़े यहून्ना बपतिस्मा देणे वाल़े आपणे दो चेले साउगी तेथी दबारा हाजर था। 36होर यहून्ना बपतिस्मा देणे वाल़े यीसू जो जांदे देख्या होर बोल्या, “देखा, ये परमेसरा रा छेलू आ।” 37तेबे स्यों दूहें चेले तेसरी सुणी किन्हें यीसू रे पीछे-पीछे चली पये। 38यीसूए पीछे मुड़ी किन्हें स्यों आपणे पीछे आऊंदे देखे होर बोल्या, “तुस्से केस जो तोप्हा ऐं?” तिन्हें तेस किन्हें बोल्या, “हे गुरु, तू केथी रैंहयां?” यीसूए तिन्हा किन्हें बोल्या, “चला देखी लऊआ।” 39होर जेबे सांझ्के चार बजी गईरे थे तेबे तिन्हें आई किन्हें तेसरे रैहणे री जगहा देखी, होर स्यों तेस ध्याड़े तेथी रही गये। 40जिन्हें जे यहून्ना बपतिस्मा देणे वाल़े री गल सुणी होर यीसू रे पीछे चली पये, तिन्हा दुहीं मन्झा ले एक, समौन पतरसा रा भाई अन्द्रियास था। 41तिन्हें पैहले आपणे सगे भाई समौना किन्हें मिली किन्हें बोल्या कि, “आस्सा जो मसीह मिली गईरा।” 42अन्द्रियासे समौन यीसू वाले ल्यांदेया; यीसूए तेस जो देखी किन्हें बोल्या कि, “तू यहून्ना रा मह्ठा समौन आ, तू कैफा#1:42 अरामी भासा मन्झ कैफा रा मतलब आ सख्त चटान रा मतलब पतरस#1:42 यूनानी भासा मन्झ पतरसा रा मतलब आ चटान बोल्या जाणा।”

फिलिप्पुस होर नतनएला रा सादेया जाणा

43अगले ध्याड़े यीसूए गलील जिल्ले जो जाणा चाहेया, होर तिन्हें फिलिप्पुसा साउगी मिली किन्हें बोल्या, “आ मेरा चेला बण।” 44फिलिप्पुस, अन्द्रियास होर पतरस सभ के सभ गलील जिल्ले रे बैतसैदा गांऊँआं रे रैहणे वाले थे। 45फिलिप्पुसा जो नतनएल मिल्या होर तिन्हें तेस किन्हें बोल्या, “आस्सा जो से मिली गईरा, जेसरे बारे मन्झ मूसा री व्यवस्था मन्झ होर नबिया री कताबा मन्झ लिखिरा आ। से युसुफा रा मह्ठा यीसू आ जेह्ड़ा नासरत गांऊँआं मन्झ रैंहयां।” 46नतनएले तेस किन्हें बोल्या, “क्या कोई बांकी चीज भी नासरत गांऊँआं ले निकली सक्हा ई?” फिलिप्पुसे तेस किन्हें बोल्या, “चली किन्हें खुद देखी ले।”

47यीसूए नतनएल जो आपणी तरफ आऊंदे देखी किन्हें तेसरे बारे मन्झ बोल्या, “देखा, ये सच्चे इस्राएल देसा रे लोक आ: एस मन्झ पाखंड नी आ।” 48नतनएले तेस किन्हें बोल्या, “तू मुंजो किहाँ जाणहां?” यीसूए तेस जो जवाब दितेया, “एता ले पैहले कि फिलिप्पुसे तू सादेया, मैं तू देखी लईरा था जेबे तू अंजीरा रे डाला रे थाले था।” 49नतनएले तेस जो जवाब दितेया कि, “हे गुरु, तू परमेसरा रा मह्ठा आ; तू इस्राएल देसा रा माहराजा आ।” 50यीसूए तेस जो जवाब दितेया, “क्या तू इधी कठे विस्वास करहा कि, मैं जो तेरे किन्हें बोल्या कि, मैं तू अंजीरा रे डाला रे थाले देख्या था। तुध एता ले बी बडे-बडे काम देखणे।” 51फेरी यीसूए तेस किन्हें बोल्या, “हांऊँ तुस्सा किन्हें सच्च -सच्च बोल्हा कि, जिहां तुस्सा रे बापदादे याकूबे कई साल पैहले दर्सन देख्या था तिहां ईं तुस्सा स्वर्गा रा दुराजा खुलिरा होर परमेसरा रे स्वर्गदूत हांऊँ माह्णुं रे मह्ठे रे ऊपर, हेठ आऊंदे होर गास जांदे देखणे।”

Àwon tá yàn lọ́wọ́lọ́wọ́ báyìí:

यहून्ना 1: MJLNT

Ìsàmì-sí

Pín

Daako