LUKU 8
8
1E SỌ wá jọ to enẹgodo wẹ e to yìyì lédo otodaho po gbeta le po pé bo to yẹwheho do, bo sọ to wendagbe áhọludu Jiwheyẹwhe tọn tọn hẹnwá: omẹ wiawe le sọ tin to e de. 2Podọ yọnnusi delẹ he yè ko henazọngbọna sọn gbigbọ ylankan lẹ po madogán lẹ po me, Malia he yè nọ ylọ Magdaleni, mẹhe mẹ aovi ṣinawe ko tọ́njegbonu yì sọn, 3Joana asi Kuza hònkonsi Hẹlọdi tọn tọn, Susana, po omẹ: susu devo po, he to dèvizonwa hlan en sọn onú yetọn lẹ mẹ.
4Whenuena agùndaho de wá plidopọ, bo wá e de sọn otòdaho lepo me, é dohó gbọn oló de me: 5Nudotọ de tọn jei nado yi do okun etọn: le é to okún do, delẹ flẹ́ jẹ alitó: yè sọ zin i dai, ohè aga tọn lẹ sọ sinyan en dù. 6Odelẹ sọ flẹ́ jẹ osé ji: le e tónkun jegbonu, é fiọ, na é ma mọ osìn wutu. 7Odelẹ flẹ́ jẹ owùn ṣẹnṣẹn; owun sọ wú po e po daga, bo sọ finyọn ẹn hù. 8Odelẹ sọ flẹ́ jẹ aigba dagbe ji, bo sọ wu jegbonu, bo sọ hẹn sinsẹ́n jẹgbonu wá kanweko donu kanweko de. Whenuena é sọ dọ onú helẹ vò, é dawhá dọmọ, Mẹhe tindo otọ́ nado sè, ni sè.
9Nuplọntọ etọn lẹ sọ kanbiọ ẹ dọmọ, Etẹwẹ yè na yón oló he na? 10E sọ dọmọ, Mìwlẹ we yè na hlan nado yón nudabla ahọludu Jiwheyẹwhe tọn tọn: ṣigba hlan pipotọ lẹ: to olo mẹ: na to mimọ mẹ, yé ni nọ ma mọ, na to sisè mẹ, yé ni nọ ma tunwun. 11Dinvie ehe wẹ oló lọ: Ọkún lọ wẹ ohó Jiwheyẹwhe 12Yé alihotó tọn lẹ wẹ yé he sè lẹ: whenẹnu wẹ lẹgba wá bo sọ yí ohó lọ sọn ayiha yetọn me, na yé ma nado yise, na yè ma nado whlẹn yé gán. 13Yé osé ji tọn lẹ wẹ yé he, whenuena yé sè, yé yí ohó lọ po ayajijẹ po: ehelẹ ma do adò, yé yise whenu vude, to whlepon whenu, yé joagò. 14Ehe flẹ́ jẹ owùn ṣẹnṣẹn le wẹ yé, whenuena yé sè vò, yé tọ́njegbonu yí, yè sọ yí vivẹnu po adọkun po, po gbẹdudu aihọn he ton lẹ po do finyọn ẹn hù, yé ma sọ sọgan sén biapa. 15Ṣigba ehe to aigba dagbe ji lẹ wẹ yé, he yí ayiha nugbo po dagbe po do sè ohó lọ, bo yí i hẹn, bo sọ yí homẹmimiọn do hẹn sinsẹ́n jegbonu wá.
16Mẹde ma tin, whenuena é ko tá zogbán vò, bo na yí ozẹ́n ṣinyọn do e, kavi bọ é na yí i do adózan glọ: adavo ni ze e do zogbántin ji, na ye he to whégbè biọ lẹ nido mo hinhọ́n. 17Na nude ma tin to nuglọ, he yè ma na dehia; mọwẹ núde ma sọ whlá; bọ yè ma na yọnẹn, bọ é ma na tọ́n jẹ gbangba. 18Enewutu na mì ni payi lè mì to sisè do go: na mẹdepope hé tindo éwọ wẹ yè na na hlan; mẹdepope he ma tindo si wẹ yè na yí onu he é lẹn dọ é tindo sọn.
19Whenẹnu wẹ onọ etọn, po mẹmẹsunnu etọn le po wá e de, yé ma sọ sọgan sepó ẹ na tẹnjinjan wutu. 20Omẹ delẹ sọ dọ hlan en, dọ; Onọ towe po mẹmẹsunnu towe le po site to gbonu, yé jlo na mọ we. 21E sọ gblọn bo dọ hlan yé, dọ, Onọ ṣie po mẹmẹsunnu ṣie lẹ po wẹ ehelẹ he sè ohó Jiwheyẹwhe tọn, bo sọ yí wà i.
22Dinvie e sọ wá jọ, to dopo azán nẹlẹ tọn gbè, é biọ vàtlẹ de mẹ po nuplọntọ etọn lẹ po: é sọ dọ hlan yé, dọmọ, Mì gbọ mí ni juyì awà awetọ tándo tọn ji. Yé sọ sunhún do. 23Ṣigba le yé to yìyì, é damlọn; jẹhọn daho sọ jete, é to yìnyìn to tándo ji; é sọ hen yé gó na osìn, yé sọ tin to owù mẹ. 24Yé sọ wá e de, bo fọ́n en, dọmọ, Mẹplọntọ, Mẹplontọ, mí dòn. Whenenu wẹ é fọ́n, bo sọ wọhẹ jẹhọn po zingidi osìn tọn po: yé sọ huwhé, bo sọ nabọẹ tó 25E sọ dọ hlan yé, dọ, Fie wẹ yise mìtọn te? Yínyín avosatọ e jawu do yé, yé to didọ hlan yénọzo dọ, Be menu wẹ ehe! bọ é degbèdo yèdọ jẹhọn po osìn po, bọ yé sọ yí i se.
26Yé sọ wá óto Gadaleni lẹ tọn mẹ hẹ pànnukọn Galili. 27Whenuena é sọ jẹ age, dawe de pé e to gbonu otòdaho lọ tọn, mẹhe ko do aovi lẹ, bọ é ko dẹn bo ma nọ sìnyọn avọ̀, mọwẹ é ma nọ sinai to owhé de gbè, adavo to oyòwhó lẹ mẹ. 28Whenuena é mo Jesu, é dawhá, bo sọ jẹklo to ewọ nukọn, bo yí ogbe leié do, dọmọ, Etẹ wẹ yẹn tindo nado wa to de we, Jesu, hiẹ Ovi Jiwheyẹwhe Gigogan tọn? Yẹn vẹ we, a doyana mi blo. 29(Na é ko degbẹdo gbigbọ mawe lọ nado tọn jẹgbonu sọn dawe lọ go wutu. Na whepoponu wẹ é nọ jẹ e ji; yè sọ yí ogàn po afọgan po do sín in: winwen ogàn lọ, é nọ yín yinyan gbọn aovi de biọ zùngbo mẹ.) 30Jesu sọ kanse e dọmọ, Etẹwẹ oyín towe? E sọ dọmọ, Legionì: na aovi susu wẹ biọ ewọ mẹ. 31Yé sọ vẹ̀ ẹ dọ, é do yé hlan dogbó mẹ blo. 32Apó ohàn susu tọn sọ tin to finẹ bo to núdù to osé ji; yé sọ vè ẹ ni gbọ yé ni yì biọ yé mẹ. E sọ dikena yé. 33Whenẹnu wẹ aovi lẹ tọ́n jegbonu sọn dawe lọ go, bo sọ yì biọ ohan lẹ mẹ: ohanpomẹ hozin bo sọ họnwezun gbọn agbadò tó yì biọ tándo mẹ, bo sọ siọ do osìn mẹ 34Whenuena yé he to yé yìn lẹ mọ onú he jọ, yé hòn, bo yì, bo sọ dọ e to otodaho me podọ to aigba lọ ji. 35Whenenu wẹ ye tón yì nado pọ́n onú he jọ, bo sọ wá Jesu de, bo mọ dawe mehe go yè yan aovi lẹ jegbonu sọn sinai to afọ Jesu tọn go, é ṣinyọn avọ̀, ayiha etọn wai: obu sọ di yé 36Yé he sọ mọ ẹn lẹ dọ hlan yé, le é wà do bọ yè do hẹn ewọ he do aovi le je gángán 37Whenẹnu wẹ gbẹtọ Gadalẹni tọn lẹpo sọ vẹ̀ ẹ dọ ni yì sọn yé de; na obu di yé susu; é sọ biọ vàtlẹ de mẹ bo sọ gò do godo. 38Dawe lọ mehe go aovi lẹ tón sọn vẹ̀ ẹ dọ ni nò he ẹ: ṣigba Jesu do e hlan, dọmọ, 39lẹgò yì owhé towe gbè, bo yí onú he Jiwheyẹwhe wà hlan we hia, le é klo sọ. E sọ yì, bo to didọ pé otòdaho lẹpo mẹ, le Jesu wà onú daho do.
40Podọ le Jesu lẹgò, agùndaho lọ kẹalọyl i: na yé omẹ pó wẹ to mukundo e. 41Bo do ayi e go, dawe de he yè nọ ylọ Jailu wá, dopo to ogán sinagọgu tọn lẹ mẹ, è jẹklo to afọ Jesu tọn go, bo vẹ̀ ẹ nado wá biọ owhé etọn gbè: 42na é tindo viyọnnu dopo akan, he yì owhè wiawemẹ, é mlọnai to okú dònu. Ṣigba le é jei, gbẹtọ lẹ to tẹnjan ẹn.
43Nawe he do azọ̀n ozẹntin ohùn tọn de, sọn owhè wiawe gbọn, bo zán Onú he é tindo lẹpo na bokọnọ lẹ, mọwẹ yè ma sọgan hẹnazọ̀ngbọ nẹ̃ gbọn mẹde de. 44E gbọn godo etọn wá, bo do alọ okẹ̀yẹ̀ awù etọn tọn go: plaun wẹ asisahùn etọn sọ gbò. 45Jesu sọ dọmọ, Mẹnu wẹ do alọ ogo e? Whenuena yé omẹ pó mọnu, Pita po yé he tin to e de lẹpo po dọmọ, Mẹplọntọ, gbẹtọ lẹ to tẹnjan we, bo to agbali we, hiẹ sọ dọmọ, Mẹnu wẹ do alọ ogo e? 46Ṣigba Jesu dọmọ, Mẹde do alọ ogo e: na yẹn mọ hlan dọ huhlọn jẹgbonu yì sọn ogo e. 47Whenuena nawe lọ mọ dọ ewọ ma yín whiwhla, é wá, bo to sisọsisọ, é jẹklo to nukọn etọn, é sọ dọ to gbẹtọ lẹpo nukunmẹ, na onú he wutu é doalọ e go, podọ le yè hẹnazọ̀ngbọ nẹ̃ to tẹndoponẹmẹ do. 48E sọ dọ hlan en, dọ, Oviyọnnu, dotu, yise towe ko whlẹn we gán; to yìyì to jijọho mẹ.
49Le é so to didọ, mẹde sọn owhé ogán sinagọgu tọn gbè wá, dọmọ, Oviyọnnu towe ko kú; a dotukla Mẹplọntọ ba blo. 50Ṣigba whenuena Jesu sè, é gblọn dọ hlan ẹn, dọ, A dibu blo: sà ko yise kẹdẹ, yè na sọ hẹn ẹn jẹgangan. 51Whenuena é biọ owhé gbè, é ma sọ dikena mẹde nado biọ họmẹ po e po, adavo Pita po Jakobu po, po Johanu po, podọ otọ oviyọnnu lọ tọn po onọ etọn po kedẹ. 52Omẹ pó to avivi, bo sọ to avihan etọn do, é sọ dọ hlan yé, dọ, Mì viavi ba blo: é ma kú gba, amlọn é dọ. 53Yé sọ vlẹ ẹ ko, yínyọnẹn dọ, é ko kú. 54E sọ yàn yé omẹ pó jẹgbonu, é hẹn alọ nẹ, bo dọmọ, Oviyọnnu, tite 55Gbigbọ etọn sọ lẹgò, é sọ fọ́n plaun; é sọ degbè dọ yé ni na núdùdù i. 56Avò vò mẹjitọ etọn lẹ: ṣigba é dosénna yé dọ, yé dọ onu he jọ na mẹde blo.
Àwon tá yàn lọ́wọ́lọ́wọ́ báyìí:
LUKU 8: BWL23
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Holy Bible in Gun-Alada © Bible Society of Benin and Bible Society of Nigeria, 1923.
