LUKU 19
19
1JESU sọ biọ otò mẹ, bo sọ jugbọn Jẹliko ṣẹnṣẹn. 2Bo dayi e go, dawe de tin, he yè nọ ylọ Zasé, mẹhe yín ogánde to tòkuẹsinyantọ lẹ mẹ, ewọ sọ yín adọkunnọ. 3E sọ din nado mọ Jesu mẹhe é yín; bo ma sọ sọgan mọ ẹn na tẹnjinjan watu, podọ é yín omẹ gli wutu. 4E sọ dowezun yì nukọn, bo hé atin sikomoli de ji nado mọ ẹn, na é na jugbọn finẹ. 5Whenuena Jesu jẹ ofi lọ, é zé nukun do aga, bo dọ hlan ẹn, dọmọ, Zasé yawu, bo jẹte wá, na yẹn na jẹ owhé towe gbè to egbé. 6E sọ yawu, bo jẹte bo sọ yí, i po homẹhùnhùn po. 7Whenuena yé mọ ẹn, yé omẹ pó to hunhlun, dọ, E yì le owhé omẹ he yín ylandonọ tọn gbè. 8Zasé sọ fọ́n site, bo dọ hlan Oklunọ, dọmọ, Pọ́n, Oklunọ, odá onú he yẹn tindo lẹpo tọn yẹn jo hlan wamọnọ lẹ; eyín yẹn sọ yí agòjijẹ do yí nude sọn mẹdepope de, yẹn gò jo dó donu ẹnẹ ji. 9Jesu sọ dọ hlan ẹn, dọmọ, Egbé wẹ whlẹngan biọ owhé he gbè, sọle ga ewọ yín ovi Ablaham ton de. 10Na Ovi gbẹtọ tọn wa nado din, podọ nado whlẹn enẹ he yin bubu gan.
11Whenuena ye to onú helẹ sè, é sọ yí ohó dogó, bo sọ dọ olo de, na é tin sẹpọ́ Jelusalẹm wutu, podọ yé to linlẹn dọ ahọludu Jiwheyẹwhe tọn na sọawúhia to afọdoponẹji wutu. 12Enẹwutu é dọmọ, Dawe aglosu de yí biọ oto dindẹn de mẹ, nado yí ahọludu de na ede, podọ nado lẹ́gọ̀. 13E sọ ylo afànumẹ etọn ao bo na mina ao yé, bo dọ hlan yé, dọmọ, Mì yí ehe do wà, jo, kaka yẹn na do gò. 14Ṣigba otòvi etọn lẹ gbewan nẹ, bo do mẹdagun de hlan to godo etọn, dọmọ, Mìwlẹ ma jlo na dawe he ni duahọlu do mí ji gba. 15E sọ wá jọ, whenuena é yí ahọludu bo lẹgò, we e degbe ye ni ylọ afànume nẹlẹ wá, ye mehe e-ko na mina, na é nido yón ale nẹmu medopodopo dù gbon ajọwiwà dali. 16Mẹtintan wá nukọn etọn, dọmo, Okluno mina towe basi mina ao dogo 17E sọ dọ hlan ẹn, dọmo, Yè wa dagbe, hie afanumẹ dagbe; na ye mọ hiẹ yín nugbonọ to onú pẹvi siun me wutu, tindo asè do oto daho ao ji, 18Awetọ sọ wá dọmọ, Oklunọ, mina towe ko basi mina atọn. 19Ẹ sọ dọ hlan ẹn ga, dọmo, Hie ga ni tin to otò daho atọn ji 20Devo so wá, dọmọ, Okluno, pọ́n mina towe tin to ofì, he yẹn sọ whla do duku de mẹ: 21na yẹn nọ dibuna we, na hie yín gbẹtọ fifietọ wutu; hie nọ yí onú he hiẹ ma sọ dai, bo sọ nọ gbọ̃n onú he hie ma do. 22E sọ dọ hlan ẹn, dọmo, Son onù hiẹlọsu tọn mẹ wẹ yẹn na dawhena we, hie afànumẹ ylan-kan. Hie yonen dọ gbẹtọ fifiẹtọ de wẹ yẹn, yẹn nọ yi onu he yẹn ma sọ dai, bo sọ nọ gbọ̃n onú he yen ma do: 23be etẹwutu hiẹ ma ka yí ahue ṣie do akuehọtẹn, bọ yen to gigò ṣie mẹ nido ko kàn ẹn biọ po ale po? 24E so dọ hlan mẹhe site to finẹ lẹ, domo Mì yí mina; lọ sọn e si, bo yí i na mehe tindo mina ao. 25(Yé sọ dọ hlan en, dọmọ, Oklunọ, e tindo mina ao.) 26Yẹn dọ hlan mì, Mẹdepope he tindo we yè na na; podọ sọn ewo he ma tindo si, we ye na yí yèdọ onu he é tindo sọn. 27Ṣigba kèntọ ṣie nẹlẹ, he ma jlò dọ yẹn ni dugán to yé ji lẹ, mi hẹn yé wá ofi, bo hù yé to nukọn ṣie.
28Whenuena é dọ le vò, é to yìyì nukon heji jei Jelusalẹm.
29E sọ wá jọ, whenuena é dọn sẹpọ́ Bettagi po Bẹtani po, to osó he yè nọ ylọ Olivie ji, é do ome awe son nuplontọ lẹ me hlan, 30dọmọ, Mì yi gbeta he pannukọn mì me; ehe me le mì to bibiọ, mì na mo kẹteketevu de to sínsín, ehe ji gbẹtọ de ma sinai te gbède: mì tún in, bo hẹn en wá. 31Eyín mẹde sọ kanbiọ mì domo, Etẹwutu wẹ mì to túntún in? le wẹ mi na do, dọmọ, Oklunọ do onú na yi i do wà 32Yé he yè dohlan lẹ sọ yì, bo mọ kẹdẹ dile é dọ hlan yé do. 33Le ye sọ to kẹteketevu lọ tún, Oklunọ eton lẹ do hlan yé, domọ, Etẹwutu wẹ mì to kẹteketevu lọ tún? 34Yé so dọmọ, Okluno do onú na yí i do wà. 35Ye sọ hen ẹn wá Jesu de: yé sọ zé avọ̀ yetọn le dlẹn ketekẹtevu lọ ji, bo zé Jesu do e ji 36Podo le e to yiyi, ye dlọn avọ̀ yetọn lẹ do aliho ji. 37Le é to dindọn sepo dinvie, yèdọ ofi he dokòdo osó olivie tọn dali, agùndaho nuplọntọ lẹ tọn lepo sè ayaje, bo sọ yí ogbè lélé de do to Jiwheyẹwhe pa na azón daho he yé mọ lepo, 38dọmọ, Donanọ wẹ Ahọlu he ja to oyín Oklunọ tọn mẹ: Jijoho to olọn mẹ, po gigo po to agapetepete. 39Mẹdelẹ to Falesi lẹ mẹ to agùndaho lọ mẹ, dọ hlan ẹn, dọmọ, Mẹplọntọ, wọhe nuplọntọ towe lẹ. 40E sọ gblọn bo dọmọ, Yẹn dọ na mì, dọ, Eyín ehelẹ na nabọẹ, ozannu lẹ na dawhá jẹgbonu.
41Whenuena é sọ dọ́n sẹpọ́, é mọ otodaho lọ, bo viavi do e ji, 42dọmọ, Eyín hie ko yọnẹn, to azán he gbè yèdọ hiẹlọ, onú he yín jijọho towe tọn! ṣigba dinvie, yè whlá yé sọn nukun towe mẹ. 43Na azán na wá oji we, whenuena kènto towe lẹ na kùn doko lédo we, bo nasọ lédo we pó, bo nasọ glọn we do whégbè to awà popo ji, 44bo nasọ hó we do odo jẹ aigba, po ovi towe lẹ po to ohò towe mẹ; yé ma to na jo ozannu dopo dai to awetọ ji; na hiẹ ma yọ́n ojlẹ dlapọ́n towe tọn wutu.
45E sọ biọ tẹmpli mẹ, bo sẹ̀ yé he to núsà to e me, po yé he to hihò lẹ po yàn jegbonu; 46bo didọ hlan yé, dọmọ, Yè wlanwe do, Ohọ̀ odẹ̀ tọn de wẹ ohọ̀ sie, e na yín; ṣigba mìwlẹ ko yí i do basi odò ajotọ lẹ tọn de.
47E sọ to meplón to tẹmpli mẹ egbesọegbeso Ṣigba ogán yewhenọ lẹ ton po wekantọ lẹ po, po omẹ gangan gbeto lẹ ton lẹ po sọ to dindìn na hù i sudo. 48Ye ma sọ sọgan mọ onú he ye dọ wa na gbẹtọ lẹpo wẹ pla do e go, to hósè.
Àwon tá yàn lọ́wọ́lọ́wọ́ báyìí:
LUKU 19: BWL23
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Holy Bible in Gun-Alada © Bible Society of Benin and Bible Society of Nigeria, 1923.
