LUKU 12
12
1TO ojlẹ de mẹ, whenuena gbẹtọ gegé madohihia agùndahọ lọ tọn plidopọ, sọmọ bọ yé to yénọzo ji hẹ, é sẹ̀ didọ hlan nuplọntọ eton lẹ nukọnjẹ na popo, domọ, Mì payi otọn Falesi lẹ tọn go, he yin yenuwiwà. 2Na nude ma tin he ye ṣinyọn nudo, bọ ye ma na dè hia; kavi ehe whlá, bọ yè ma na yọn ẹn. 3Enewutu nudepope mì dọ to zinvlu me, yè na sè to hinhọn mẹ; podọ onu he mì sọ do do otọ́ me to abò mẹ wẹ yè na dawhá do dọ tó ohọta. 4Yẹn sọ dọ hlan mì hontọn ṣie lẹ, Mì dibu blo na yé he nọ hù agbasa, to enegodo, ye ma sọ do nude bo sọ sogan wà ba. 5Ṣigba yẹn na navàse mí mẹhe mìwlẹ na dibusi: Mì dibusi ewọ, whenu é hù vò sọ tindo aṣẹ̀ nado dọn dlẹn olonzo mẹ: mọwe yẹn dọ hlan mì, Mì nọ dibusi i. 6Be oblenọ atọn ma wẹ yè nọ sa yín abọgan-kuẹ flínflín awe, ode to yé mẹ ma yín winwọn to Jiwheyẹwhe nukọn gba? 7Ṣigba yèdọ odà he tin to ota mìtọn lẹpo wẹ yè hia. Enewutu mì dibu blo: mì doale hú oblenọ susu 8Yẹn sọ dọ hlan mì ga, Mẹdepope he na yigbè ṣie to gbẹtọ lẹ nukọn, Ovi gbeto tọn na yigbè etọn to angẹli Jiwheyẹwhe tọn lẹ nukọn: 9Ṣigba mẹhe mọn mi to gbẹtọ lẹ nukọn, ye nasọ mọn ẹn to angẹli Jiwheyẹwhe ton lẹ nukọn. 10Mẹdepope he na dọhó de do Ovi gbẹtọ tọn go, yè na jona ẹn. Ṣigba hlan ewọ he zannù do Gbigbo Wiwe go, yè ma to na jo e nẹ gba. 11Whenuena ye hẹn mì wá sinagọgú lẹ po ogán lẹ po, po asẹnọ lẹ po nukọn, mì yín whlẹndono blo dọ, nawẹ, kavi onú tẹwẹ mì na gblọn, kavi etẹwẹ mì na dọ blo: 12Na Gbigbọ Wiwe na plọ́n onú he mì na dọ mì to ojlẹ lọ me.
13Dopo to agùndaho he pli lọ mẹ sọ dọ hlan ẹn, dọmọ, Meplọntọ, degbèdo nọvisunnu ṣie ni má ogu lọ hẹ mi. 14E sọ dọ hlan ẹn, dọ, Dawe, mẹnu wẹ yí mi do basi whedatọ de, kavi numatọ de do mì ji? 15E sọ dọ hlan yé, dọmọ, Mì ho mìde, bo sọ payi do nukunkẹn: to ogégé gbẹtọ tọn de mẹ ma wẹ ogbè etọn nọte te sọn onú he ewọ tindo le mẹ gba. 16E sọ dọ oló de hlan ye, dọmọ, Aigba dawe adọkunno de tọn hẹn sinsẹ́n susu jẹgbonu: 17E sọ lẹn to ede home dọ, Etẹ yẹn na wà, na yẹn ma tindo otẹn ofi he yen na be sinsẹ́n ṣie pli do? 18E sọ dọmọ, Ehe wẹ yẹn na wà; yẹn na họ̀ zinhọ ṣie liai, bo dó klohu; finẹ yẹn na bẹ sinsẹ́n ṣie lẹ, po adọkun ṣie lẹ po pli do. 19Yen nasọ dọ hlan ayiha ṣie, do, Ayiha, hiẹ tindo agbàn susu he yè bépli na owhè susu: yí awúbọ towe, to dùdù, to nùnù, bo to ayajẹ. 20Ṣigba Jiwheyẹwhe dọ hlan ẹn, dọmọ, Hiẹ nulunọ, ozán he mẹ yè na kàn ogbè towe biọ sọn de we: be mẹnutọn wẹ onú hẹ hie wleawu etọn dai hele na yín? 21Mọkẹdẹ wẹ ewọ he bé adọkunnu pli na ede, bo ma yin adọkunnọ gbọn Jiwheyẹwhe dali.
22E sọ dọ hlan nuplontọ etọn lẹ, dọmọ, Enẹwutu wẹ yẹn to didọ hlan mì, dọmọ, Mì yín whlẹndonọna ogbè mìtọn blo, dọ, Etẹ mì na dù: kavi na awutu mìtọn, etẹ mì na ṣinyọn. 23Ogbè hú núdùdù, agbasa sọ hú avọ. 24Mì lẹn ohón le tọn pọ́n: yé ma nọ do bo ma sọ nọ gbẹn; yé ma do agbanhọ, kavi zĩnhọ̀: Jiwheyẹwhe sọ to yé yìn; be nẹmunẹmu wẹ mìwlẹ yín nuhọakuẹ hú ohè lẹ? 25Podọ mẹnu wẹ to mì mẹ gbọn yínyín whlẹndọnọ sọgan yí awagba dopo dogó ogbèzan etọn? 26Enẹwutu eyín mì ma sọgan basi onú he yín pevi gbahú, be etẹwutu wẹ mì yín whlẹndọnọ na gbọn pipotọ tọn dali? 27Mì sọ lẹn li lẹ ton pọ́n, le yé to whinwhẹn: yé ma nọ wàzón, yé ma nọ gbensekan; gãnṣo yẹn dọ hlan mì, yè ma doasona Sọlomọni to gigo etọn lepo mẹ di dopo to ehelẹ mẹ gba. 28Sọmọ, eyín Jiwheyẹwhe doasọna ogbé he tin tò odanji to egbé, to osọ bọ yè sọ zé dlọn ozokán mẹ: be nẹmunẹmu wẹ é na doasọna mì, mì yisepẹvinọ? 29Mì din etẹ mì na dù, kavi etẹ mì na nù blo, mì sọ yín nuhatọ ayiha tọn blo. 30Na onú helẹ pó wẹ akọta aihọnmẹ tọn lẹ to dindin pé: Otọ́ mìtọn sọ yọnẹn dọ mìwlẹ ma sọgan nọ ma tindo onú helẹ gba. 31Ṣogán mì din ahọludu Jiwheyẹwhe tọn; onú helẹ pó wẹ yè na yí dogó na mì. 32Mì dibu blo, lẹngbọpa pevi; na homẹvivi Otọ mìton tọn wẹ nado yí ahọludu na mì. 33Mì sa onú he mì tindo, bo na nunina lẹblanu tọn: mì basi apo he ma nọ dohó dai na mìde, adọkunnu de to olọn lẹ mẹ, ehe ma nọ gbodò, fie ajotọ ma sogan sẹpọ́, podọ ofi owán ma nọ dùsudo te. 34Na fie adọkunnu nútọn te, finẹ ayiha mìtọn na tin te ga.
35Mì bla gbaja mìtọn, na miyon mìtọn ni sọ to jiji; 36Na mìwlọsu ni tin jijlẹ do yé he to nukundo Oklunọ yetọn go le, whenuena é na lẹgò sọn alọwle hùnwhẹ kọn; dọ whenuena e wá, bo huhúhọn, na yé nido hùn in nẹ to afọdoponeji. 37Donanọ wẹ afanume nẹlẹ, mehe klunọ, whenuena e wa, mọ to alihó nugbo yẹn dọ hlan mì, dọ é na bla gbaja na ede, bo nasọ hen yé jagla nado dùnú, bo nasọ wá bo to yé sèn. 38Podọ eyín é wá to zanhiho awetọ me, podọ eyín é yín to atọntọ mẹ bo mọ ye domọ, donanọ wẹ devi nẹlẹ yín. 39Ṣigba ehe wẹ mì yọnẹn dọ, eyín owhénọ yón ojle he mẹ ajotọ ja, é na ko hóali, é ma do dikena yè ni kùn adó etọn luntọn gba. 40Enẹwutu na mì ni wleawu ga: na Ovi gbẹtọ tọn ja to ojlẹ he mẹ whenuena mì ma donukun in.
41Whenẹnu wẹ Pita dọmọ, Oklunọ, be hie dọ oló he hlan mìwlẹ kẹdẹ, kavi hlan ome popo? 42Oklunọ sọ dọmọ, Mẹnu wẹ honkọnsi nugbonọ, nuyọnẹntọ lọ, mẹhe Oklunọ etọn na do basi ogán do owhé etọn ji, nado na nudùdù sọha yetọn ye to ojle etọn mẹ? 43Donanọ wẹ afanumẹ lọ, mẹhe Oklunọ etọn, whenuena é wá, é na mọ to mọ wà. 44Nugbo wẹ yẹn dọ hlan mì, dọ, é na yí i do basi ogán do onú he é tindo lẹpo ji. 45Ṣigba eyín afanumẹ lọ dọ to ayiha etọn mẹ, dọmọ, Oklunọ ṣie hẹn gigọ etọn dote; bo sọ to nuli devi sunnu po devi yọnnu lẹ po, bo sọ sè dùdù, bo to nùnù; podọ nado yín nunùmúnọ; 46Oklunọ afànume lọ tọn na wá to azán he gbè é ma donukun in te podọ to ojlẹ whenuena é ma yọnẹn mẹ, bo nasọ saya nẹ, bo sọ dè tẹnmẹ etọn nẹ̃ po mawànugbonọ lẹ po. 47Afànumẹ lọ he yón ojlo klunọ etọn tọn, bo ma wleawu, bo ma wà kẹdẹdi ojlo etọn wẹ yè na yí obá susu do hò. 48Ṣigba ewọ he ma yọnẹn, bo sọ wà onú he jẹ na hihò, wẹ yè na yí obá pẹvide do hò. Na mẹdepope he yè na susu, é si wẹ yè na kàn susu biọ te. Mẹhe gbẹtọ yí susu na, ẹ si we yé na kàn susu biọ te.
49Yẹn wá nado fiọ miyọn do aihọn ji; be etẹ yẹn to jijlo, eyín yè ko fiọ ẹ dote? 50Ṣigba yẹn do baptẹm de he yè na do baptizi mi, nawẹ awusinyẹn mi sọ kaka é na do klita! 51Be mì lẹn dọ jijọho wẹ yẹn hẹn wá do aihọn mẹ? Yẹn dọ hlan mì, dọ, Lala; sigbayè ni gbọ bo dọ kinklan: 52Na sọn dinvie gbẹtọ atón na tin to owhé dopo gbè yè na klán atọ̀n do awe ji, awe do aton ji. 53Otọ́ na klán do ovi etọn sunnu ji, ovisunnu do otọ́ ji; onọ do ovi etọn yọnnu ji, oviyọnnu do onọ eton ji; asunọ do asi ovi etọn tọn ji, podo ovisi do asúnọ eton ji.
54E sọ do hlan gbẹtọ lẹ ga, dọmọ, Whenuena mìwlẹ mọ aslọ de, bọ é suyu to wheyìho dali, mi no dọ to afọdoponeji, dọmọ, Jikun katakata ja; é sọ nọ yín mọ. 55Whenuena mì sọ mọ jehon hùwaji tọn to yìnyìn, mì nọ dọmọ, Oyózo na tin; é sọ no di 56Mì yẹnuwàtọ, mì sọgan dọtadena jinukunmẹ po aigba tọn po; ṣigba nawẹ mì ma yon ojlẹ helẹ do? 57Kavi etewùtu we mìlọsu ma dawhè yèdọ na mìde onú he jlo tọn? 58Whenuena hie to yìyì po mẹglatọ towè po jei whẹdatọ de, le hiẹ to aliho, wleawu na yè nido whlen we sọn e si: vlavo é nikã yí we jo na whẹdatọ, whẹdatọ ma nado yí we jo na ahọludemẹ, ewọ bo nasọ yí we do ogànhọ mẹ. 59Yẹn ni dọ na we, dọmo, Hiẹ ma to na tọ́n sọn fine, kaka hiẹ na do suahọ abọgan-kuẹ dopo he po tọn.
Àwon tá yàn lọ́wọ́lọ́wọ́ báyìí:
LUKU 12: BWL23
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Holy Bible in Gun-Alada © Bible Society of Benin and Bible Society of Nigeria, 1923.
