Luka 24
24
Kufufuka kwa Yesu
Matayo 28:1-10; Marko 16:1-8; Yohana 20:1-10
1Nsiku ya d̯ura ya ḍyuma, magura mapfema, hawaḍe wake wenda mbeerani. Watsukuya haya manunkanto weyoelekanya. 2Wepfofika, waḍiona hiḍi iwe ḍiperujwa-perujwa na hapfa mbeerani. 3Ndookomu wanjia. Ela ntawakuuona hu mwii wa Ḅwana Yesu. 4Hawaḍe wake wepfoḍanganika amaale, iyo saa wat̯upukijwa ni wantu wawii usoni yao, wavwaiyeo nguo nyeupe pee. 5Hawa wake wanjijwa ni oga muno na wagisa matso mutsangani. Hawaḍe wantu wawauza wawamba, “Kut̯i mwakumulachani kahi ya wafu muntu eye mojo? 6Hapfa nkapfo, kafufuka. Kumbukani hivi evyomwambia epfokuwa Galilaya. 7Kamwamba, ‘Ni had̯i *Mwana jwa Ad̯amu angizwe mikononi mwa wanabvise, apfatsikwe na nsiku ya hahu afufuke.’ ” 8Ndookomu hivi vyuuwo vya Yesu viwadzia hawaḍe wake ḅwaa! 9Wauja na wenda wawasumwiiya hawaḍe wanafund̯i kumi na mumodza, na wangine wonse haya mambo yonse yahendekeeyo. 10Hawa wake wewa ni Maria jwa mudzi wa Magid̯ala, Yoana na Maria mamajwe Yakobo. Wao na wake wangine wawasumwiiya hawa *ntumi haya mambo. 11Ela hawa ntumi ntawakuhikiza haya wambiijweyo ni hawa wake, koro weyaona dza upuudhi. 12Ela Pet̯ero kanuka kad̯arama mumpaka mbeerani. Na epfot̯ulama akitsungia, kaona hi sand̯a ya Yesu azikijweyo nayo t̯u. Ndookomu kauja nyumbani akiwa kumamat̯ani haya yahendekeeyo.
Yesu kawat̯upukia wanafund̯iwe wawii
Marko 16:12-13
13Iyo nsiku, wanafund̯i wawii wa Yesu wewa kwendani mudzi wa Emausi. Wiwa hat̯uwa ya jwenendo jwa masaa mawii kuyawa Yerusalemi. 14Wewa kusumwiiyanani dzuu ya haya mambo yonse yahendekeeyo. 15Wepfowakiḍaat̯iana amaale, Yesu kawafika hafufi na kagijana nao. 16Wamuona ela ntawakumuhambuya kwamba ni ga! 17Yesu kawauza kawamba, “Mwakunenani kintu ga mukiwa kwenendani?” Ao wasumama wakiyanga maso ya masikit̯iko. 18Mumodza jwao ahanijwe Kileopa, kamwambukuya kamwamba, “Ndiwe muntu wewe heket̯u jwa Yerusalemi asimanya mambo yahendekeeyo hizi nsiku za nyuma?” 19Yesu kamuuza kamwamba, “Ni mambo ga?” Wamwambukuya wamwamba, “Mambo yamuhendekeeyo Yesu jwa Nazareti. Ewa *nabii mukuu. Kanena na kuhenda mambo makuu usoni ya Muungu na wanaad̯amu. Hat̯a wantu wonse wewa wamuhikiza. 20Ela wakohani wakuu na wakuu wehu, wamuyavya ayagwe, na kapfatsikwa. 21Aswi hwiidzikwat̯ya kwamba ndiye adzeewapfonya wantu wa Isiraeli. Si t̯uu, yeo ni nsiku ya hahu hangu mambo haya yepfohendeka. 22Hawa wake wangine wa hichi kit̯aro chehu, wahumakisa. Wenda mbeerani magura mapfema, 23ela ntawakuuona hu mwiiwe. Ishinu wauja na wamba waona malaika wawambiyeo kwamba Yesu ka mojo. 24Wangine wehu wenda hukuḍe mbeerani na waona dza viviḍe vya hawa wake waneneyevyo, ela jeje ntawakumuona.” 25Makisa Yesu kawamba, “Nywinywi munaimuka ari? Mu wampompowe mwiwodze wa kuhikiza vyonse vya manabii waneneyevyo! 26Ntaikumala hat̯a kwamba ayu *Masiya aoneswe tsungu asidzanjia maremboni mwakwe?” 27Na Yesu kaweleza yonse yorejweyo matsoroni dzuu yakwe. Kaḍabva na hangu vyuo vya Musa mumpaka matsoro yonse ya manabii wangine. 28Wepfofika hafufi na Emausi, Yesu kadzihendeza dza kwamba kakuchiani usoni zaid̯i. 29Ela hawaḍe wantu wamuyomba wamwamba, “Ikaa naswi koro dzuwa ḍimaatswa na imaawa mioro muno.” Ndookomu kawauḅa. 30Wepfokaa kuḍyani, Yesu kauhwaa hu mukahe, kamushad̯a Muungu, makisa kauvunza na kawapfa hawaḍe wantu. 31Makisa mama zao ziwapfenuka na pfapfo wamuhambuya kwamba ni Yesu. Ela iyo saa kawaaria matsoni. 32Nao wambana, “Myojo yehu ntaikutsambauka epfoakinena naswi humu njiani na kuhweleza aya matsoro?” 33Mweedha mumodza wanuka na wauja Yerusalemi. Wenda wawat̯onga hawa wanafund̯i kumi na mumodza na wantu wangine weowakimuuḅa Yesu, wat̯ut̯aa pfantu pfamodza 34wakyamba, “Ḅwana kafufuka ḍugha! Kamut̯upukia Simioni!” 35Makisa hawa wowii wawasumwiiya haya yahendekeeyo humu njiani na hiviḍe wamuhambwiiyevyo Yesu epfouvunza hu mukahe.
Yesu kawat̯upukia hawa ntumi
Matayo 28:16-20; Marko 16:14-18; Yohana 20:19-23; Mahendo 1:6-8
36Wepfowakiwasumwiiya haya, iyo saa Yesu jeje mwenye kasumama kahi yao na kawamba, “Naghea iwe nanywi!” 37Wahuka, wat̯ara kwamba waona nkoma. 38Ela Yesu kawamba, “Kut̯i mwakuḍanganikani na kuwa na chichu? 39Niyowani hi mikono na maguu yangu, na munamanya kwamba ndimi haswa. Nihorani, nanywi munanihambuya, koro nkoma nka mifufa na nyama dza hizi nizonazo mimi.” 40Epfonena hivi kawayanga haya maguuye na mikonoye. 41Ela amaale ntawakuhikiza kwa tsekea na kimako wechokuwa nacho. Ndookomu kawauza kawamba, “Muna kantu kaḍekonse hapfa hapfa?” 42Nao wamumpa nofu ḍya nswi imbikijweyo. 43Kaḍihwaa, na kaḍiḍya wakiwa kumuyowani. 44Makisa kawamba, “Haya ndiyo mambo niyomwambia nipfokuwa pfamodza nanywi amaale. Niimwamba, yonse yorejweyo dzuu yangu Shariani mwa Musa, kwa matsoro ya manabii, na kwa chuo cha Zaburi, ni had̯i yat̯imiye.”
45Makisa Yesu kawapfenuya mat̯aro yao waimuke haya yorejweyo matsoroni. 46Kawamba, “Haya ndiyo yorejweyo: ‘Huyu Masiya ni had̯i afwe na nsiku ya hahu afufuke kuyawa kwa wafu.’ 47Na kwa sariḍye, haya Maagu ni had̯i yasumwiijwe kwa vyeet̯i vyonse vya lumwengu, yakiḍabva na Yerusalemi. Na haya maagu ni kwamba, wantu wapfyehuze mama na Muungu anawayatsia nabvise zao. 48Nywinywi mu mashaahiḍi wa haya haya mambo yonse. 49Nami mwenye namuhumia huyu Ruhu Mudheru jwa Baba amuahid̯iyee. Ela ikaani humu mudzini hat̯a mudzepfopfegwa nguvu kuyawa mbinguni.”
Yesu kapfaa mbinguni
Marko 16:19-20; Mahendo 1:9-11
50Makisa Yesu kawayongowa hawaḍe wamuuḅiyeo, wauyawa hu mudzi wa Yerusalemi, wenda hat̯a hafufi na Betania. Wepfofika huko, Yesu kanuya mikonoye dzuu na kawavodhya. 51Epfoakiwavodhya, kat̯ana nao huku akiwa kuhwajwani kwenda mbinguni dzuu. 52Makisa wamuvunzia nkuhi na wauja Yerusalemi na tsekea nkuu. 53Ndookomu wekyenda *Hekaluni kut̯wa na kumushad̯a Muungu.
Àwon tá yàn lọ́wọ́lọ́wọ́ báyìí:
Luka 24: pkb
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2004, Bible Translation and Literacy
