Luuk 18

1Yeezu yaa magsi wamagsini a sak wa ŋaaŋviirɔma. Wa weeni wamagsini kama ayen di deŋsi ba kpa ate ba kasim a puusi Wen. 2Wa weeni ayen, <<Tɛŋ kpieŋ po ate buteerɔ a jam boro waai ale kaa chali Wen yaase wa niŋ a bo nuru po. 3Pukɔgi mɛ ale jam bo tɛŋ kala po a kasim a cheŋ nuruwa de jigi a saalim wa ayen wa maari wa ate wa nye buusa ale wa dachiak. 4Ku jam beni ka nna yegayega alege wa jam zɛri wa maarika kama. Alege ku ŋaaŋnyiŋ wa weeni wadek ayen, <M seba ayen m kan chali Wen ya, m be kan zuli nurubiik mɛ 5alege, pukɔgini de ale kasim a daani mu diila, m le nya ku zuk ate wa nya wa ale a yaali diila. M dan kan nye dila, wa ale kasim a jam kama ate m ga jiak.> >> 6Nyɔnɔwa Yeezu Kirisita yaa weeni ayen, <<Ni wom buteerɔ bioku de ale weeni diila. 7Nama a poli ayen, Wen a kan vari wadek nuruma a basi, baai ale kaari a te wa kantueŋ ale yok la? Wa ale beni? 8Basi ate m weeni a sak ni ayen wa le bo buusa a te ba ka nna nwuli. Alege Mi Saalɔbiika a dan ŋman pilim jam tɛŋzuk de m le nya siaka nuruba jigiya?>>

9Yeezu yaa ŋman jam magsi wamagsini di choa a te nuru baai ale jam a poli ayen ba ka wayɔrisima nyam ale kan pai waai meena a chim nuru la. Wa yaa magsi wamagsini ayen, 10<<Nuruba baye ale jam Wen yenni po ayen ba puusi Wen. Ba wanyi a jam ka Farisii, wanyi mɛ lampoo cheesirɔ. 11Farisiiwa a yaa yiti zaani wadek wa nyiini a puusi Wen ayen, <Wen ya, mi a nye fi jiam, m daa nuru baai chaab ale a vari la, yaase baai ale kan ta wensie la, yaase kaboŋ nyeerɔba la. Mi a te fi jiam mɛ ayen m daa lampoo cheesirɔwa ale za dula la. 12Mi a bobi nɔi ka buye bakoai po, mi a labi m ŋantaŋa ka pi a pai bunyi a te Wen.> 13Alege lampoo cheesirɔwa a za niŋniŋ a kan poom a yaali ayen wa zak zuk a nya wenŋmazuwa, a nak wa suinummu weeni ayen, <Wen, ta jiirim ale mu diila, m ka wabaata nyɔnɔ.> 14Basi ate m weeni a sak ni ayen daa Farisiiwa alege ka lampoo cheesirɔwa de ate Wen vɔŋ wa wabaataŋa a te wa, alege ate wa yaa kuli yeri. Nuru waai ale a pai wadek a chim nuru kpioŋ la, ba le zaab wa alege waai ale a zaab wadek la, ale chim ka nuru kpioŋ.>>

15Nuru ba gela a yaa ta ba buluata a jam Yeezu jigi ayen wa pai wa nisa a vi ba zuk. Wa ŋaaŋviirɔma ale nya dila la, ba yaa toariŋ ba, 16alege Yeezu yaa wi ba ate ba jam wa jigi ayen, <<Ni basi ate bisaŋa jam mi jigi. Ni kan yiak ba, ale ka bala ale soa Wen naamu. 17Wensie ate mi a weeni ni, waai a dan kan tuesi Wen naamu ase biik la wa kan baga a jo bu po.>>

18Dai yeŋ ate kpagi dinyi a yaa bek Yeezu ayen, <<Sagrɔ maŋŋa, m nin nye se ale m nya nyuvuri dii ale kan ta kpeglimka la?>> 19Yeezu yaa weeni wa ayen, <<Ka boa ate fi a wi mu ayen nuru maŋŋa? Nuru maŋ a karo, ka Wen nyiini. 20Fidek a seba Sinsaŋŋa kama, ŋa weeni kama ayen, <Kan nye kaboŋsa, kan ko nuru, kan zu, kan chim seerɔ waai ale a velim la. Zuli fi ko ale fi ma.> >>#18:20 Nyinika 20:12-22 21Ate wa weeni ayen, <<Ŋade meena mi va ŋa kama a nyini m paalim po.>> 22Yeezu ale wom nna la, wa yaa weeni nuruwa ayen, <<Fi tali ka wayeŋ ate fi nye. Pai jaab meena ate fi ta la a da a pai ligraŋa a te ŋanjaksa ate fi nya jigsika wenŋmazuk. Fi dan nye dila, fi yaa va mi.>> 23Nuruwa ale wom nna la, wa sui a yaa deri kaasi dii nyiŋla, wa jam ka jigsirɔ. 24Yeezu ale nya ale wa sui kaasi la, wa yaa weeni ayen, <<Ku toa kama ate ŋanta nyam a baga a jo Wen naamu po. 25Ku ka moali ate laalaakomi a baga va garuk pein vɔrup po a nyini a gaam jigsirɔ a nin baga a jo Wen naamu po.>> 26Baai ale jam wom nna la a yaa bek ayen, <<Be ka wana ale wa nya varibasika?>> 27Alege Yeezu yaa weeni ba ayen, <<Dii ate nurubiik an baga nye la, Wen baga nye kama.>>

28Piita yaa weeni wa ayen, <<Nya, tama basi ti yeeŋa kama ale jam va fu.>> 29Yeezu yaa weeni ba ayen, <<Nuru waai a dan basi wa yeri ale wa pok ale wa suata ale wa ko ale wa ma yaase wa bisa Wen naamu nyiŋ, 30Wen ale te kula nyɔnɔwa ŋanta bala chaab nna yegayega gaam taam wa ale poom ta diila, ate chum diipo wa nya nyuvuri dii ale kan ta kpeglimka la.>>

31Wa yaa weeni wa ŋaaŋviirɔma pi ale bayewa ayen, <<Ni nya ti a cheŋ ka Jerusalem tɛŋka, ate Wen biisiteerɔma ale ŋmarisi dii meena a ta va Saalɔbiika la a chim wensie. 32Boan nyiŋŋa, ba le sum yik mu kama, a pai mu nyo nuru baai ale kan daa Juuba la nisima po ba ale la mu, a chesi tintueta a basi m nyiŋ 33ba ale miiri mu abe ba ko mu, alege daa ŋata dai, m le yiti kum po.>> 34Yeezu ale biisi nna la, wa ŋaaŋviirɔma an jam miŋ ku kiriya. Dii nyiŋla Wen an jam lak ku kiri a sak ba, ate ba an miŋ wa ale a biisi diila.

35Yeezu ale jam moata Jeriko tɛŋka la, yio ale jam kala suiku niŋ a juisi. 36Wa ale wom ale nuru boanni a va wa tɛŋ a taam la, wa yaa bek ayen, <<Ka boa ale la?>> 37Nuruma yaa tulisi wa ayen, <<Ka Yeezu Nazaret denɔwa ale a taam.>> 38Yiowa yaa kaari a weeni ayen, <<Yeezu, Deevid nidoabinni, ta jiirim ale mu.>> 39Nuruma ale jam dɛ niŋka la a yaa weeni wa ayen wa goori wa wanni alege wa zɛri ale a kaari nna yegayega a gum du a weeni wa ayen, <<Deevid Nidoabinni, ta jiirim ale mu.>> 40Yeezu yaa zaani a weeni ayen ba ta nuruwa a jam wa jigi. Wa ale jam paari la, Yeezu yaa bek wa ayen, 41<<Fi a yaali ayen m nye ka boa a te fu?>> Wa yaa weeni wa ayen, <<M Nyɔnɔ Yeezu Kirisita, mi a yaali ayen fi nye kama ate m ninaŋa a lagri a te mu.>> 42Yeezu yaa weeni wa ayen, <<Be a nya. Fi siaka a basi kama ate fi nya nyiŋyɔgsa.>> 43Yeezu ale weeni dila la, wa ninaŋa deri lagri ate wa a nya, ate wa yaa va Yeezu a te Wen pimpauk. Nuru boanni ale nya nna la, ba meena yaa te Wen pimpauk.

Àwon tá yàn lọ́wọ́lọ́wọ́ báyìí:

Luuk 18: BWU

Ìsàmì-sí

Pín

Daako