Luuk 19

1Yeezu yaa ga jo Jeriko tɛŋka a va ka po a taam. 2Nuru ale jam boro wa yuei ale Zakiyos. Wa jam ka lampoo cheesirɔba kpagi a jigsi nna yegayega. 3Wa yaa jam a yaali ayen wa nya Yeezu alege wa an jam baga dii nyiŋla, wa jam gela kama ate nuru boanni a yaa jam lik wa. 4Wa yaa chali dɛ niŋ a ga jueli kiŋkaŋ ayen wa nya wa dii nyiŋla Yeezu jam va ka dula a taam. 5Yeezu ale jam paari dula jigini la, wa yaa zak nya wa weeni wa ayen, <<Zakiyos, nye nwuli a siŋ tɛŋ, dii nyiŋla, ku a fɛ kama ayen m goa fi yenni jinla.>> 6Wa yaa nye nwuli a siŋ a tuesi wa nalimnyiini. 7Nuru baai ale jam nya dila la, yaa jam a ŋuuni a weeni ayen, <<Wa jo ayen wa chim ka tuimbaata nyɔnɔwa de nichaanɔ.>> 8Zakiyos yaa yiri zaani a weeni Nyɔnɔwa Yeezu Kirisita ayen, <<Wom, m Nyɔnɔ Yeezu Kirisita, m le pai ŋan baai meena ate mi ta la geli a te ŋanjaksa, abe m daam dan velim tuesi nuru jaab, m le tuni wa jaab wala dekdega ku nɔi bunaansi.>> 9Yeezu yaa weeni wa ayen, <<Varibasika jam yenni de po jinla kama, wa ale maa ka Abrayam nidoabinni po wanyi la nyiŋ. 10Boan nyiŋŋa, Mi Saalɔbiika a jam ayen m gisi abe m vari baai ale bɛ la a basi.>>

11Nuruma ale jam wom wieŋa de la, wa yaa magsi wamagsini, dii nyiŋla wa jam moata Jerusalem tɛŋka kama, ate ba jam a poli ayen Wen naamu ale jam ka nwuli. 12Wa yaa weeni ayen, <<Nuru kpioŋ ale jam boro, a yaa yiri dai yeŋ a cheŋ satɛŋ nna niŋniŋa ayen ba bobi wa naam abe wa ŋman pilim jam. 13Wa yaa wi wa tomteerɔma po pi a chari ba wanyi wanyi ligra a soa si chaab la alege weeni ba ayen, <Ni pai ligraŋa de a gerim ate m cheŋ abe m pilim jam.> 14Wa tɛŋka demma a jam kisi wa kama, ate ba yaa tom nuruba ate ba saŋ wa ŋaaŋ a ga weeni ayen, <Ti kan yaali nuruwa de ayen wa chim ti naaba.> 15Ba yaa jam bobi nuruwa naamu ate wa pilim jam. Wa ale jam paari la, wa yaa wi wa tomteerɔma ayen ba jam ate wa bek ba nya ase ba gerim a nya ka boan nyuenta. 16Ba wanyi a yaa dɛ niŋ a jam weeni ayen, <Nyɔnɔ, fi ligraŋa vi ka ku nɔi pi a gum du.> 17Nuruwa yaa weeni wa ayen, <Fi nye wamaŋ, tomteerɔ. Fi ale ta wensie ale wie fiisa la nyiŋ ale soa ate mi a pai tɛŋ kpieŋsa pi a nyo fi nisima po ayen fi a nya si meena zuk.> 18Tomteerɔ waai ale pai a saŋ la a jam weeni wa ayen, <Nyɔnɔ, fi ligraŋa vi ka ku nɔi bunu.> 19Wa yaa weeni tomteerɔ wala mɛ ayen, <Fi soa ka tɛŋ kpieŋsa sinu zuk a nya.> 20Tomteerɔ wanyi mɛ a jam weeni wa ayen, <M nyɔnɔ, fi ligraŋa ale nna. Mi pai di a bobi ka lakki po a dueni fu. 21Mi a chali fu kama, dii nyiŋla, fi nyeka toa kama, fi a tuesi ka ŋan baai ale kan daa fi ŋanta la nuruba jigi ale a che ŋan baai mɛ ate fi an bori la.>

22<<Wa nyɔnɔwa yaa weeni wa ayen, <Fi ka tomteerɔ kaasuŋ, m le pai ka fidek biika a dak fi kaasuŋku a sak fu. Fi ale seba ayen mi nyeka toa, a tuesi ŋan baai ale kan daa m ŋanta la nuruba jigi ale a che jabuui ate mi an bori la. 23Be ka boa ale soa ate fi an pai m ligni a te nuru ate wa ta a tom ate diipo ate m le pilim jam la m nya nyuenta di po?> 24Wa yaa weeni nuru baai ale jam za dula la ayen, <Ni tuesi ligbinni ale bo wa jigi la a te tomteerɔ waai ale ta ligbie piwa la.> 25Ba yaa weeni wa ayen, <M nyɔnɔ, wa ta ka ligbie pi?> 26Mi a weeni ayen waai nisa po ale ta la, wala ale ŋman nya ŋanta ka nna yegayega a gum du, alege waai nisa po ale poom kan ta la, kula nyɔnɔwa ale poom ta dii maga la, wa ale jɔk bala mɛ kama a gum du. 27Alege mi dachaasaŋa, baai ale jam kan a yaali ayen mi chim ba Naab la, ta ba a jam dela a ko ba ate m nya.>>

28Yeezu ale biisi wanni de a nueri la, wa yaa dɛ niŋ a cheŋ Jerusalem tɛŋka.

29Wa ale jam moata tɛŋ fiisaŋa, Betfaaji ale Betani ate si moata Olivi Guuku la, Yeezu yaa tom wa ŋaaŋviirɔma po baye 30a weeni ba ayen, <<Ni cheŋ tɛŋ fiik kaai ale bo ni niŋ la. Ni dan ga jo ka po ni le nya boniŋ ate nuru waai an diem do ka nya la ale ka bobi za. Ni foli ka a ta jam dela. 31Nuru a dan bek ni jabuui nyiŋ ale soa ate ni a foli ka la, ni weeni wa ayen, <Ka Nyɔnɔwa Yeezu Kirisita ale a yaali.> >> 32Ba yaa cheŋ ga nya dii dek ate Yeezu weeni ba la. 33Ba ale jam boro a foli ka la, ka nyama yaa bek ba ayen, <<Ka boan nyiŋ ate ni a foli ka?>> 34Ŋaaŋviirɔma yaa tulisi ba ayen, <<Ka Nyɔnɔwa Yeezu Kirisita ale a yaali,>> 35ate ba yaa ta bonika a cheŋ Yeezu jigi a yaa yeeri ba kasaautaŋa a vi ka zuk a gomsi magsi ate Yeezu do. 36Wa ale jam a cheŋ la, nuruba yaa pai ba kasaautaŋa a pati dueni tɛŋka suiku po. 37Wa ale jam moata Jerusalem a yaa churinti nyini Olivi Guuku zuk a siŋ la, wa ŋaaŋviirɔma meena a piilim deri a te Wen pimpauk ate ku a jueli nna yegayega, ale ba ale jam nya wakperikaliik pagri sii meena la. 38Ba yaa a pak Wen a weeni ayen, <<Niaka a bo naab waai ale cheena Naawen yuenni nyiŋla. Suiyɔgni a bo Wen jigi, ale nalim a bo wenŋmazuk.>> (Yiila 118:26) 39Farisiiba gela ale jam maa bo nuru boanni po la, a yaa weeni Yeezu ayen, <<Ti sagrɔ, weeni fi ŋaaŋviirɔma ate ba goori.>> 40Wa yaa tulisi ayen, <<Mi a weeni ni kama, bade a dan poom nye diki, tintanaŋa ale nuem a pak mi.>>

41Wa ale jam moata tɛŋka nya ka la, wa yaa kum ka nyiŋ 42a weeni ayen, <<Ase ni dan poom seba ni le ni nye dii ate suiyɔgni a jam la ku ti zunchoŋ kama. 43Di danni cheena kama, ate ni dachaasaŋa a jo gilim ni jigi meena a basi suŋsuŋ. 44Ba ale kaasi ni tɛŋka abe ba ko ni ale ni bisaŋa meena. Ba kan basi tintain yeŋ mɛ la ate di dua di choa zuwa. Nyaŋa de meena le nye kama dii nyiŋla, diipo ate Wen jam ayen wa vari ni a basi la, ni jam zɛri kama.>>

45Yeezu yaa jo Wen yenni po a yiak baai ale jam bo di po a gerim la 46ale weeni ba ayen, <<Ba ŋmarisi kama ayen, Mi yenni ale chim ka puusa yeri. (Azaya 56:7) Alege nama a pai di a chim zueba boka jigi.>> (Jeremaya 7:11)

47Daa meena Yeezu a kasim jam a sak ka nuruba Wen yenni po. Kaabteerɔ kpaŋŋa ale Sinsak sagrɔma ale nuruma nisɔmma jam a yaali kama ayen ba ko wa 48alege ba an baga a nya suiwa, dii nyiŋla, nuruma meena a kasim jam a wom ka wa sinsaŋŋa. Ba kan jam a yaali ayen ba jɔk wa yeŋ la womka.

Àwon tá yàn lọ́wọ́lọ́wọ́ báyìí:

Luuk 19: BWU

Ìsàmì-sí

Pín

Daako