ꠁꠘ꠆ꠎꠤꠟ ৩: ꠟꠥꠇ 8
8
ꠢꠎꠞꠔ ꠁꠍꠣꠞ ꠈꠦꠎꠝꠔꠅ ꠛꠦꠐꠤ ꠝꠣꠘꠥꠡ
1ꠛꠣꠖꠦ ꠁꠍꠣꠄ ꠅꠃ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠟꠁꠀ ꠉꠣꠃꠄ ꠉꠣꠃꠄ, ꠐꠣꠃꠘꠦ ꠐꠣꠃꠘꠦ ꠊꠥꠞꠤꠀ ꠀꠟ꠆ꠟꠣꠞ ꠛꠣꠖꠡꠣꠁꠞ ꠔꠛꠟꠤꠉ ꠇꠞꠣꠔ ꠞꠁꠟꠣ। 2ꠔꠣꠞꠣꠞ ꠟꠉꠦ ꠇꠄꠎꠘ ꠛꠦꠐꠤꠘꠅ ꠀꠍꠟꠣ। ꠅꠃ ꠛꠦꠐꠤꠘ ꠎꠤꠘꠞ ꠀꠍꠞ ꠀꠞ ꠛꠃꠔ ꠎꠣꠔꠞ ꠛꠦꠝꠣꠞ ꠕꠣꠇꠤ ꠜꠣꠟꠣ ꠅꠁꠀ ꠔꠣꠘ ꠟꠉ ꠗꠞꠍꠟꠣ। ꠄꠞꠣꠞ ꠘꠣꠝ ꠅꠁꠟ: ꠝꠉꠖꠤꠟꠤꠘꠤ ꠝꠞꠤꠅꠝ, ꠄꠘ ꠉꠦꠍ ꠕꠣꠇꠤ ꠡꠣꠔꠉꠥ ꠎꠤꠘ ꠍꠣꠠꠣꠁꠟ ꠅꠁꠍꠤꠟ; 3ꠞꠣꠎꠣ ꠢꠦꠞꠥꠖꠞ ꠃꠎꠤꠞ ꠇꠥꠎꠣꠁꠞ ꠛꠃ ꠍꠥꠢꠣꠘ꠆ꠘꠣ; ꠍꠥꠍꠣꠘ꠆ꠘꠣ; ꠀꠞ ꠀꠞꠅ ꠛꠃꠔ ꠛꠦꠐꠤꠘ ꠀꠍꠟꠣ। ꠅꠃ ꠛꠦꠐꠤꠘ꠆ꠔꠦ ꠔꠣꠞꠣꠞ ꠘꠤꠎꠞ ꠍꠣꠝꠣꠘꠣ ꠖꠤꠀ ꠁꠍꠣ ꠀꠞ ꠔꠣꠘ ꠡꠣꠉꠞꠤꠖ ꠅꠇꠟꠞ ꠈꠞꠌ-ꠙꠣꠔꠤ ꠌꠣꠟꠣꠁꠔꠣ।
ꠉꠤꠞꠡ꠆ꠔꠤ ꠇꠣꠝꠞ ꠟꠉꠦ ꠁꠝꠣꠘꠞ ꠔꠥꠟꠘꠣ
4ꠛꠣꠖꠦ ꠎꠦꠛꠟꠣ ꠘꠣꠘꠣꠘ ꠎꠣꠉꠣ ꠕꠣꠇꠤ ꠛꠃꠔ ꠝꠣꠘꠥꠡ ꠀꠁꠀ ꠁꠍꠣꠞ ꠉꠦꠍꠦ ꠖꠟꠣ ꠅꠁꠟꠣ, ꠅꠃ ꠡꠝꠄ ꠔꠣꠁꠘ ꠄꠇ ꠇꠤꠌ꠆ꠍꠣ ꠢꠥꠘꠣꠁꠟꠣ। 5ꠔꠣꠁꠘ ꠇꠁꠟꠣ, “ꠄꠇ ꠉꠤꠞꠡ꠆ꠔꠦ ꠗꠣꠘꠞ ꠎꠣꠟꠣ ꠛꠣꠁꠘ ꠖꠦꠅꠀꠔ ꠉꠦꠟ। ꠉꠤꠀ ꠛꠣꠁꠘ ꠖꠦꠅꠀꠞ ꠛꠣꠟꠣ ꠇꠤꠍꠥ ꠎꠣꠟꠣ ꠀꠁꠟꠞ ꠝꠣꠎꠦ ꠙꠠꠤꠉꠦꠟ, ꠝꠣꠘꠡꠦ ꠙꠣꠅꠖꠤ ꠃꠠꠤꠀ ꠁ ꠎꠣꠟꠣ ꠘꠡ꠆ꠐ ꠇꠞꠤꠟ꠆ꠟ, ꠀꠞ ꠙꠣꠈꠤꠘ꠆ꠔꠦꠅ ꠀꠁꠀ ꠈꠣꠁꠟꠤꠟ। 6ꠉꠤꠞꠡ꠆ꠔꠞ ꠇꠤꠍꠥ ꠎꠣꠟꠣ ꠢꠥꠇꠘꠣ-ꠡꠇ꠆ꠔ ꠝꠣꠐꠤꠞ ꠃꠙꠞꠦ ꠙꠠꠟ, ꠁꠔꠣꠄ ꠀꠟꠤ ꠛꠣꠞ ꠅꠁꠟꠦꠅ ꠢꠦꠡꠦ ꠞꠡ ꠘꠣ ꠙꠣꠁꠀ ꠢꠥꠇꠣꠁꠀ ꠝꠞꠤꠉꠦꠟ। 7ꠇꠤꠍꠥ ꠎꠣꠟꠣ ꠛꠘ-ꠎꠋꠟꠣꠞ ꠝꠣꠎꠦ ꠙꠠꠟ, ꠁ ꠎꠣꠟꠣꠄ ꠀꠟꠤ ꠚꠥꠐꠟꠦꠅ ꠁꠔꠣꠞꠦ ꠛꠘ-ꠎꠋꠟꠣꠄ ꠎꠣꠔꠤꠀ ꠗꠞꠟ। 8ꠅꠁꠟꠦ ꠇꠤꠍꠥ ꠎꠣꠟꠣ ꠜꠣꠟꠣ ꠎꠝꠤꠘꠅ ꠙꠠꠟ, ꠁ ꠎꠣꠟꠣꠄ ꠜꠣꠟꠣ ꠗꠣꠘ ꠅꠁꠟ, ꠀꠞ ꠄꠇ-ꠡ ꠉꠥꠘ ꠛꠦꠡꠤ ꠗꠣꠘ ꠗꠞꠟ।”
ꠅꠃ ꠇꠤꠌ꠆ꠍꠣ ꠇꠁꠀꠃ ꠔꠣꠁꠘ ꠎꠥꠞꠦ ꠎꠥꠞꠦ ꠇꠁꠟꠣ, “ꠎꠣꠞ ꠇꠣꠘ ꠀꠍꠦ, ꠢꠦ ꠢꠥꠘꠃꠇ।”
9ꠡꠣꠉꠞꠤꠖ ꠅꠇꠟꠦ ꠀꠞꠎ ꠇꠞꠟꠣ, “ꠢꠥꠎꠥꠞ, ꠁ ꠇꠤꠌ꠆ꠍꠣꠞ ꠝꠣꠘꠤ ꠇꠤꠔꠣ?” 10ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁꠞ ꠉꠥꠙꠘ ꠞꠢꠁꠡ꠆ꠡ ꠎꠣꠘꠣꠞ ꠡꠥꠎꠥꠉ ꠈꠣꠟꠤ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠦ, ꠅꠁꠟꠦ ꠛꠣꠇꠤ ꠝꠣꠘꠡꠞ ꠉꠦꠍꠦ ꠔ ꠁꠔꠣ ꠇꠤꠌ꠆ꠍꠣꠞ ꠟꠣꠈꠣꠘ ꠇꠁꠞꠣꠝ, ꠎꠣꠔꠦ ꠔꠣꠞꠣ ꠖꠦꠈꠤꠀꠅ ꠘꠣ ꠖꠦꠈꠦ, ꠢꠥꠘꠤꠀꠅ ꠘꠣ ꠛꠥꠎꠦ।
11“ꠔꠦ ꠁ ꠇꠤꠌ꠆ꠍꠣꠞ ꠝꠣꠘꠤ ꠅꠁꠟ, ꠁ ꠗꠣꠘꠞ ꠎꠣꠟꠣ ꠅꠁꠟ ꠀꠟ꠆ꠟꠣꠞ ꠇꠣꠟꠣꠝ। 12ꠀꠁꠟꠞ ꠝꠣꠎꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠦ, ꠛꠣꠖꠦ ꠁꠛꠟꠤꠍꠦ ꠀꠁꠀ ꠔꠣꠞꠣꠞ ꠖꠤꠟ ꠕꠣꠇꠤ ꠁꠔꠣ ꠇꠣꠠꠤꠀ ꠘꠦꠄꠉꠤ। ꠁꠛꠟꠤꠍꠦ ꠌꠣꠄ ꠘꠣ ꠝꠣꠘꠡꠦ ꠁꠝꠣꠘ ꠀꠘꠤꠀ ꠘꠣꠎꠣꠔ ꠢꠣꠍꠤꠟ ꠇꠞꠃꠇ। 13ꠀꠞ ꠢꠥꠇꠘꠣ-ꠡꠇ꠆ꠔ ꠝꠣꠐꠤꠞ ꠃꠙꠞꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠣꠞꠣ ꠁ ꠇꠣꠟꠣꠝ ꠛꠦꠡ ꠈꠥꠡꠤ ꠅꠁꠀ ꠢꠥꠘꠦ, ꠅꠁꠟꠦ ꠇꠣꠟꠣꠝꠦ ꠔꠣꠞꠣꠞ ꠖꠤꠟꠅ ꠜꠣꠟꠣꠝꠘ꠆ꠔꠦ ꠎꠠ ꠇꠞꠦ ꠘꠣ। ꠄꠞꠖꠣꠄ ꠁ ꠁꠝꠣꠘ ꠕꠥꠠꠣ ꠇꠄꠖꠤꠘ ꠐꠤꠇꠦ, ꠇꠥꠘꠥ ꠙꠞꠤꠇ꠆ꠇꠣꠔ ꠙꠠꠟꠦꠃ ꠔꠣꠞꠣꠞ ꠁꠝꠣꠘ ꠈꠥꠀꠁꠟꠣꠄ। 14ꠛꠘ-ꠎꠋꠟꠣꠔ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁꠝꠣꠘꠞ ꠖꠣꠅꠔ ꠢꠥꠘꠦ, ꠅꠁꠟꠦ ꠖꠥꠘꠤꠀꠛꠤ ꠗꠣꠘ꠆ꠖꠣꠔ ꠙꠠꠤꠀ ꠗꠘ-ꠍꠣꠝꠣꠘꠣꠞ ꠟꠣꠟꠌ, ꠀꠞ ꠀꠞꠣꠝ-ꠀꠄꠄꠡꠞ ꠛꠣꠄ ꠌꠣꠁꠀ ꠁꠔꠣ ꠚꠣꠃꠞꠤꠟꠣꠄ। ꠄꠞꠖꠣꠄ ꠔꠣꠞꠣꠞ ꠎꠤꠘ꠆ꠖꠦꠉꠤꠔ ꠇꠥꠘꠥ ꠜꠣꠟꠣ ꠚꠟ ꠗꠞꠦ ꠘꠣ। 15ꠜꠣꠟꠣ ꠎꠝꠤꠘꠅ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠢꠇ ꠀꠞ ꠍꠢꠤ ꠖꠤꠟꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠦ, ꠢꠥꠘꠤꠀ ꠘꠤꠎꠞ ꠖꠤꠟꠅ ꠜꠣꠟꠣꠝꠘ꠆ꠔꠦ ꠉꠣꠕꠤꠀ ꠞꠣꠈꠦ, ꠀꠞ ꠁꠝꠣꠘꠦ ꠝꠎꠛꠥꠔ ꠞꠁꠀ ꠎꠤꠘ꠆ꠖꠦꠉꠤꠔ ꠜꠣꠟꠣ ꠚꠟ ꠗꠞꠦ।
16“ꠇꠥꠘꠥ ꠝꠣꠘꠡꠦ ꠟꠦꠝ ꠎꠣꠟꠣꠁꠀ ꠢꠣꠞꠤ ꠌꠇꠤꠞ ꠔꠟꠦ ꠕꠄ ꠘꠤ ꠛꠣ ꠐꠥꠇꠞꠤꠖꠤ ꠉꠥꠞꠤꠟꠣꠄ ꠘꠤ? ꠘꠤꠌꠄ ꠘꠣ, ꠔꠣꠞꠣ ꠉꠣꠍꠣꠞ ꠃꠙꠞꠦ ꠕꠄ, ꠎꠣꠔꠦ ꠊꠞꠞ ꠜꠤꠔꠞꠦ ꠚꠞ ꠖꠦꠈꠣ ꠎꠣꠄ। 17ꠔꠦ ꠁꠟꠣ ꠉꠣꠁꠛꠤ ꠇꠥꠘ꠆ꠔꠣꠃ ꠘꠣꠁ ꠎꠦꠔꠣ ꠎꠣꠁꠞ ꠅꠁꠔ ꠘꠣꠄ। ꠁꠟꠣ ꠟꠥꠇꠣꠁꠟꠅ ꠇꠥꠘ꠆ꠔꠣ ꠘꠣꠁ ꠎꠦꠔꠣ ꠇꠦꠃ ꠢꠥꠘꠔ ꠘꠣꠄ ꠛꠣ ꠎꠣꠘꠔ ꠘꠣꠄ। 18ꠄꠞꠖꠣꠄ ꠔꠥꠝꠞꠣ ꠇꠤꠟꠣ ꠢꠥꠘꠞꠣꠄ ꠈꠤꠀꠟ ꠇꠞꠤꠅ, ꠎꠣꠞ ꠀꠍꠦ ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ, ꠀꠞ ꠎꠣꠞ ꠘꠣꠁ, ꠔꠣꠞ ꠎꠦꠔꠣ ꠀꠍꠦ ꠛꠟꠤꠀ ꠢꠦ ꠝꠘꠦ ꠇꠞꠦꠞ, ꠅꠔꠣꠅ ꠘꠦꠅꠀ ꠅꠁꠎꠤꠛ।”
ꠢꠎꠞꠔ ꠁꠍꠣꠞ ꠝꠣ ꠜꠣꠁ ꠇꠦ
19ꠄꠞꠝꠣꠎꠦ ꠁꠍꠣꠞ ꠝꠣ ꠀꠞ ꠜꠣꠁꠀꠁꠘ ꠔꠣꠘ ꠉꠦꠍꠦ ꠀꠁꠀ ꠀꠎꠤꠟꠣ, ꠅꠁꠟꠦ ꠜꠤꠠꠞ ꠟꠣꠉꠤ ꠔꠣꠞꠣ ꠇꠣꠍꠣꠔ ꠀꠁꠔꠣ ꠙꠣꠞꠟꠣ ꠘꠣ। 20ꠔꠦꠃ ꠄꠇꠎꠘ ꠝꠣꠘꠡꠦ ꠀꠁꠀ ꠁꠍꠣꠞꠦ ꠇꠁꠟꠣ, “ꠀꠙꠘꠣꠞ ꠝꠣ ꠀꠞ ꠜꠣꠁꠀꠁꠘ ꠀꠙꠘꠣꠞ ꠟꠉꠦ ꠖꠦꠈꠣ ꠇꠞꠣꠔ ꠀꠁꠀ ꠛꠣꠞꠦ ꠃꠛꠣꠁ ꠞꠁꠍꠂꠘ।” 21ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠣꠞ ꠝꠣ-ꠜꠣꠁ ꠔ ꠄꠞꠣꠃ, ꠎꠦꠞꠣ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠂꠘ ꠀꠞ ꠀꠝꠟ ꠇꠞꠂꠘ।”
ꠢꠎꠞꠔ ꠁꠍꠣꠄ ꠀꠅꠞꠞ ꠔꠥꠚꠣꠘ ꠛꠘ꠆ꠖ ꠇꠞꠟꠣ
22ꠄꠇꠖꠤꠘ ꠁꠍꠣ ꠀꠞ ꠔꠣꠘ ꠍꠣꠢꠣꠛꠤ ꠅꠇꠟ ꠉꠤꠀ ꠘꠣꠅꠅ ꠃꠑꠟꠣ, ꠃꠑꠤꠀ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠅ, ꠀꠝꠞꠣ ꠀꠅꠞꠞ ꠢꠙꠣꠞꠅ ꠎꠣꠁ।” ꠔꠦꠃ ꠍꠣꠢꠣꠛꠤ ꠅꠇꠟꠦ ꠘꠣꠅ ꠜꠣꠡꠣꠁꠟꠣ। 23ꠘꠣꠅ ꠌꠟꠔꠤꠞ ꠝꠣꠎꠦ ꠁꠍꠣ ꠊꠥꠝꠣꠁ ꠉꠦꠟꠣ। ꠀꠈꠔꠣꠃ ꠀꠅꠞꠞ ꠝꠣꠎꠦ ꠅꠝꠘ ꠔꠥꠚꠣꠘ ꠀꠁꠟ, ꠔꠥꠚꠣꠘꠦ ꠘꠣꠅꠔ ꠙꠣꠘꠤ ꠢꠣꠝꠣꠁꠀ ꠜꠞꠤꠎꠣꠞ, ꠔꠣꠞꠣ ꠖꠦꠈꠟꠣ ꠛꠠ ꠝꠍꠤꠛꠔ ꠀꠁꠍꠦ। 24ꠍꠣꠢꠣꠛꠤ ꠅꠇꠟ ꠁꠍꠣꠞ ꠗꠣꠞꠅ ꠉꠤꠀ ꠔꠣꠘꠦ ꠢꠎꠣꠉ ꠇꠞꠤꠀ ꠇꠁꠟꠣ, “ꠢꠥꠎꠥꠞ, ꠢꠥꠎꠥꠞ, ꠀꠝꠞꠣꠘꠥ ꠝꠞꠤꠎꠤꠞꠣꠝ।” ꠁꠍꠣ ꠃꠑꠤꠀ ꠙꠣꠘꠤꠞ ꠓꠦꠃ ꠀꠞ ꠛꠣꠔꠣꠡꠞꠦ ꠗꠣꠝꠇꠤ ꠖꠤꠟꠣ। ꠟꠉꠦ ꠟꠉꠦꠃ ꠓꠦꠃ ꠀꠞ ꠔꠥꠚꠣꠘ ꠕꠣꠝꠤꠀ ꠢꠇꠟꠔꠣ ꠕꠤꠞ ꠅꠁꠉꠦꠟ। 25ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅꠃ ꠅꠔꠣ ꠘꠤ ꠔꠥꠝꠞꠣꠞ ꠁꠝꠣꠘ?” ꠔꠣꠞꠣ ꠒꠞꠣꠁꠀ ꠔꠣꠁꠎ꠆ꠎꠥꠛ ꠅꠁꠀ ꠄꠇꠦ-ꠅꠁꠘ꠆ꠘꠞꠦ ꠇꠁꠟꠣ, “ꠄꠁꠘ ꠀꠍꠟꠦ ꠇꠦ, ꠖꠦꠈꠞꠣꠄ ꠘꠤ ꠛꠣꠔꠣꠡꠦ ꠀꠞ ꠙꠣꠘꠤꠄꠅ ꠔꠣꠘ ꠢꠥꠇꠥꠝ ꠝꠣꠘꠦ?”
ꠎꠤꠘꠦ ꠗꠞꠣ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣ
26ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟ ꠟꠁꠀ ꠉꠣꠟꠤꠟ ꠀꠅꠞ ꠙꠣꠞ ꠅꠁꠀ ꠎꠦꠞꠣꠍꠤꠘꠤ ꠄꠟꠣꠇꠣꠔ ꠉꠦꠟꠣ। 27ꠉꠤꠀ ꠢꠣꠞꠤ ꠔꠣꠁꠘ ꠘꠣꠅ ꠕꠣꠇꠤ ꠟꠣꠝꠟꠣ, ꠅꠃ ꠡꠝꠄ ꠢꠃ ꠉꠣꠃꠞ ꠎꠤꠘꠞ ꠀꠍꠞ ꠀꠟꠣ ꠄꠇ ꠛꠦꠐꠣ ꠔꠣꠘ ꠉꠦꠍꠦ ꠀꠁꠟ। ꠎꠤꠘꠞ ꠙꠣꠟꠦ ꠀꠍꠞ ꠇꠞꠣꠄ ꠢꠦ ꠛꠃꠔ ꠖꠤꠘ ꠗꠞꠤ ꠟꠦꠝꠐꠣ ꠀꠞ ꠇꠥꠘꠥ ꠛꠣꠠꠤ-ꠊꠞꠅ ꠞꠁꠔ ꠘꠣ, ꠈꠣꠟꠤ ꠇꠛꠞꠡ꠆ꠕꠣꠘꠅ ꠞꠁꠔ। 28ꠁꠍꠣꠞꠦ ꠖꠦꠈꠤꠀꠃ ꠢꠦ ꠌꠤꠟ꠆ꠟꠣꠁꠀ ꠃꠑꠟ, ꠔꠣꠘ ꠍꠣꠝꠘꠦ ꠙꠠꠤꠀ ꠎꠥꠞꠦ ꠎꠥꠞꠦ ꠇꠁꠟ, “ꠅ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠀꠙꠘꠦ ꠇꠦꠘꠦ ꠀꠝꠣꠞ ꠁꠘꠅ ꠔꠡꠞꠤꠚ ꠀꠘꠟꠣ? ꠝꠦꠢꠦꠞꠛꠣꠘꠤ ꠇꠞꠤ ꠀꠝꠣꠞꠦ ꠍꠣꠔꠣꠁꠘ ꠘꠣ ꠎꠣꠘꠥ।”
29ꠁꠈꠣꠘ ꠇꠅꠀꠞ ꠇꠣꠞꠘ ꠅꠁꠟ, ꠁꠍꠣꠄ ꠢꠤ ꠎꠤꠘꠞꠦ ꠢꠥꠇꠥꠝ ꠖꠤꠍꠟꠣ ꠅꠃ ꠛꠦꠐꠣꠞꠦ ꠍꠣꠠꠤꠀ ꠎꠣꠅꠀꠞ ꠟꠣꠉꠤ। ꠁ ꠎꠤꠘꠦ ꠔꠣꠞꠦ ꠛꠃꠔ ꠖꠤꠘ ꠕꠣꠇꠤ ꠀꠍꠞ ꠇꠞꠍꠤꠟ, ꠛꠦꠐꠣꠞꠦ ꠒꠣꠘ꠆ꠒꠣ-ꠛꠦꠠꠤ ꠀꠞ ꠡꠤꠇꠟꠖꠤ ꠛꠣꠘ꠆ꠖꠤꠀ ꠞꠣꠈꠟꠦꠅ, ꠢꠦ ꠁꠔꠣ ꠍꠤꠠꠤꠟꠤꠔ, ꠢꠃ ꠎꠤꠘꠦ ꠔꠣꠞꠦ ꠘꠤꠞꠣꠁ ꠎꠣꠉꠣꠔ ꠘꠤꠔꠉꠤ। 30ꠁꠍꠣꠄ ꠔꠣꠞꠦ ꠎꠤꠇꠣꠁꠟꠣ, “ꠔꠞ ꠘꠣꠝ ꠇꠤꠔꠣ?” ꠢꠦ ꠇꠁꠟ, “ꠚꠃꠎ ꠙꠣꠟ” ꠇꠣꠞꠘ ꠔꠣꠞꠣ ꠛꠃꠔ ꠎꠤꠘ ꠄꠇꠟꠉꠦ ꠀꠍꠤꠟ। 31ꠔꠦꠃ ꠢꠤ ꠚꠃꠎ ꠙꠣꠟꠦ ꠁꠍꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠇꠁꠟꠣ, ꠔꠣꠁꠘ ꠎꠣꠘꠥ ꠔꠣꠞꠣꠞꠦ ꠞꠡꠣꠔꠟꠦ ꠘꠣ ꠉꠣꠠꠂꠘ।
32ꠢꠤꠘꠅ ꠙꠣꠠꠞ ꠄꠇ ꠉꠣꠟꠣꠔ ꠛꠠ ꠄꠇ ꠡꠥꠅꠞꠞ ꠙꠣꠟ ꠀꠍꠤꠟ। ꠚꠃꠎ ꠙꠣꠟꠦ ꠔꠣꠘꠞꠦ ꠝꠤꠘꠔ ꠇꠞꠤꠀ ꠇꠁꠟꠣ, ꠔꠣꠞꠣꠞꠦ ꠢꠃ ꠡꠥꠅꠞꠞ ꠜꠤꠔꠞꠦ ꠢꠣꠝꠣꠘꠤꠞ ꠁꠎꠣꠎꠔ ꠖꠤꠔꠣ। ꠔꠣꠁꠘ ꠁꠎꠣꠎꠔ ꠖꠤꠟꠣ। 33ꠅꠃ ꠔꠣꠞꠣ ꠢꠤ ꠛꠦꠐꠣꠞꠦ ꠍꠣꠠꠤꠀ ꠡꠥꠅꠞꠞ ꠜꠤꠔꠞꠦ ꠉꠤꠀ ꠢꠣꠝꠣꠁꠟ, ꠄꠔꠦ ꠡꠥꠅꠞꠞ ꠙꠣꠟ ꠙꠣꠠꠞ ꠓꠣꠟꠦꠖꠤ ꠖꠃꠠꠤꠀ ꠉꠤꠀ ꠀꠅꠞꠞ ꠙꠣꠘꠤꠔ ꠛꠥꠠꠤꠀ ꠝꠞꠟꠣ।
34ꠁꠔꠣ ꠖꠦꠈꠤꠀ ꠡꠥꠅꠞꠞ ꠞꠣꠈꠣꠟ ꠅꠇꠟ ꠖꠃꠠꠤꠀ ꠉꠤꠀ ꠐꠣꠃꠘꠅ ꠀꠞ ꠉꠣꠃꠄ ꠉꠣꠃꠄ ꠈꠛꠞ ꠖꠤꠟ। 35ꠈꠛꠞ ꠙꠣꠁꠀ ꠌꠣꠁꠞꠅꠛꠣꠄ ꠕꠘꠦ ꠝꠣꠘꠥꠡ ꠀꠁꠟꠣ, ꠀꠁꠀ ꠖꠦꠈꠟꠣ, ꠎꠦ ꠛꠦꠐꠣꠞ ꠟꠉ ꠕꠣꠇꠤ ꠚꠃꠎ ꠙꠣꠟ ꠛꠣꠞ ꠅꠁꠀ ꠉꠦꠍꠂꠘ, ꠢꠦ ꠙꠥꠞꠣꠙꠥꠞ ꠜꠣꠟꠣ ꠅꠁꠀ ꠇꠣꠙꠠ-ꠌꠥꠙꠠ ꠚꠤꠘ꠆ꠖꠤꠀ ꠁꠍꠣꠞ ꠙꠣꠅꠞ ꠇꠣꠘ꠆ꠖꠣꠔ ꠛꠁꠞꠁꠍꠦ। ꠖꠦꠈꠤꠀ ꠔꠣꠞꠣ ꠌꠝꠇꠤ ꠉꠦꠟꠣ। 36ꠀꠞ ꠅꠃ ꠊꠐꠘꠣ ꠊꠐꠤꠔꠦ ꠎꠦꠞꠣ ꠖꠦꠈꠍꠤꠟ, ꠔꠣꠞꠣ ꠢꠇꠟ ꠝꠣꠘꠡꠞꠦ ꠢꠥꠘꠣꠁꠟꠣ, ꠁ ꠛꠦꠐꠣ ꠇꠤꠟꠣ ꠜꠣꠟꠣ ꠅꠁꠍꠦ। 37ꠢꠥꠘꠤꠀ ꠎꠦꠞꠣꠍꠤꠘꠤ ꠄꠟꠣꠇꠣꠞ ꠢꠇꠟ ꠝꠣꠘꠥꠡ ꠒꠞꠣꠁꠉꠦꠟꠣ। ꠒꠞꠞ ꠌꠥꠐꠦ ꠔꠣꠞꠣ ꠁꠍꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠇꠁꠟꠣ, ꠔꠣꠁꠘ ꠔꠣꠞꠣꠞ ꠉꠦꠍ ꠕꠣꠇꠤ ꠔꠡꠞꠤꠚ ꠘꠤꠔꠣꠉꠤ। ꠔꠦꠃ ꠁꠍꠣ ꠘꠣꠅꠅ ꠃꠑꠤꠀ ꠢꠤꠞꠛꠣꠞ ꠉꠣꠟꠤꠟꠅ ꠀꠁꠟꠣ। 38ꠅꠁꠟꠦ ꠎꠦ ꠛꠦꠐꠣꠞꠦ ꠎꠤꠘꠦ ꠗꠞꠍꠤꠟ, ꠢꠦ ꠀꠞꠎ ꠇꠞꠟ ꠔꠣꠘ ꠟꠉꠦ ꠞꠁꠛꠣꠞ ꠟꠣꠉꠤ। ꠁꠍꠣꠄ ꠔꠣꠞꠦ ꠅꠈꠣꠘ ꠇꠁꠀ ꠛꠣꠠꠤꠔ ꠙꠣꠑꠣꠁ ꠖꠤꠟꠣ, 39ꠇꠁꠟꠣ, “ꠔꠥꠝꠤ ꠔꠥꠝꠣꠞ ꠛꠣꠠꠤꠔ ꠎꠣꠅ, ꠀꠞ ꠀꠟ꠆ꠟꠣꠄ ꠔꠥꠝꠣꠞ ꠟꠣꠉꠤ ꠎꠦ ꠇꠥꠖꠞꠔꠤ ꠇꠣꠝ ꠇꠞꠍꠂꠘ, ꠅꠔꠣ ꠉꠤꠀ ꠇꠅ।” ꠔꠦꠃ ꠢꠦ ꠉꠦꠟꠉꠤ, ꠉꠤꠀ ꠐꠣꠃꠘꠞ ꠢꠇꠟ ꠝꠣꠘꠡꠞꠦ ꠎꠣꠘꠣꠁꠟ, ꠁꠍꠣꠄ ꠔꠣꠞ ꠟꠣꠉꠤ ꠅꠔ ꠛꠠ ꠇꠣꠝ ꠇꠞꠍꠂꠘ।
ꠄꠇ ꠝꠞꠣ ꠙꠥꠠꠤ ꠀꠞ ꠛꠦꠝꠣꠞꠤ ꠛꠦꠐꠤ
40ꠁꠍꠣ ꠉꠣꠟꠤꠟꠅ ꠀꠁꠀ ꠢꠣꠞꠟꠦ ꠢꠤꠘꠞ ꠝꠣꠘꠡꠦ ꠈꠥꠡꠤ ꠅꠁꠀ ꠔꠣꠘꠞꠦ ꠇꠛꠥꠟ ꠇꠞꠟꠣ, ꠔꠣꠞꠣ ꠔꠣꠘ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠤꠟ। 41ꠅꠃ ꠡꠝꠄ ꠎꠣꠄꠁꠞ ꠘꠣꠝꠦ ꠝꠍꠤꠖ ꠇꠝꠤꠐꠤꠞ ꠄꠇ ꠝꠔꠟ꠆ꠟꠤ ꠀꠁꠀ ꠁꠍꠣꠞ ꠙꠣꠅ-ꠅ ꠙꠠꠤꠀ ꠝꠤꠘꠔ ꠟꠣꠉꠣꠁꠟꠣ, ꠢꠥꠎꠥꠞꠞꠦ ꠔꠣꠘ ꠛꠣꠠꠤꠔ ꠘꠤꠛꠣꠞ ꠟꠣꠉꠤ। 42ꠇꠣꠞꠘ ꠔꠣꠘ ꠄꠇꠝꠣꠔ꠆ꠞ ꠙꠥꠠꠤ ꠍꠞꠈꠣꠔꠅ ꠀꠍꠤꠟ, ꠙꠥꠠꠤꠞ ꠛꠄꠅꠡ ꠛꠣꠞꠅ ꠛꠍꠞ। ꠁꠍꠣ ꠎꠦꠛꠟꠣ ꠅꠃ ꠛꠣꠠꠤꠔ ꠎꠣꠁꠛꠣꠞ ꠟꠣꠉꠤ ꠞꠅꠀꠘꠣ ꠖꠤꠟꠣ, ꠝꠣꠘꠡꠦ ꠀꠁꠀ ꠔꠣꠘ ꠌꠣꠁꠞꠅꠛꠣꠄ ꠜꠤꠠ ꠇꠞꠤꠀ ꠑꠦꠟꠣꠑꠦꠟꠤ ꠟꠣꠉꠣꠁꠟꠣ।
43ꠜꠤꠠꠞ ꠝꠣꠎꠦ ꠄꠇ ꠛꠦꠐꠤ ꠝꠣꠘꠥꠡꠅ ꠀꠍꠟꠣ, ꠄꠁꠘ ꠛꠣꠞꠅ ꠛꠍꠞ ꠗꠞꠤꠀ ꠝꠣꠡꠤꠇ ꠛꠦꠝꠣꠞꠤ। ꠔꠣꠘ ꠢꠇꠟ ꠗꠘ-ꠍꠣꠝꠣꠘꠣ ꠒꠣꠇ꠆ꠔꠞꠞ ꠔꠟꠦ ꠈꠥꠀꠁꠀꠅ ꠜꠣꠟꠣ ꠅꠁꠔꠣ ꠙꠣꠞꠍꠂꠘ ꠘꠣ। 44ꠔꠣꠁꠘ ꠁꠍꠣꠞ ꠈꠞꠦꠖꠤ ꠀꠁꠀ ꠁꠍꠣꠞ ꠌꠣꠖ꠆ꠖꠞꠞ ꠇꠥꠘꠣꠔ ꠍꠅꠀꠞ ꠟꠉꠦ ꠟꠉꠦꠃ ꠔꠣꠘ ꠛꠦꠝꠣꠞ ꠇꠝꠤꠉꠦꠟ। 45ꠔꠦꠃ ꠁꠍꠣꠄ ꠎꠤꠇꠣꠁꠟꠣ, “ꠀꠝꠣꠞꠦ ꠇꠦ ꠍꠁꠟ?” ꠇꠦꠃ ꠡ꠆ꠛꠤꠇꠣꠞ ꠘꠣ ꠇꠞꠣꠄ ꠙꠤꠔꠞ ꠀꠞ ꠔꠣꠘ ꠟꠉꠞ ꠝꠣꠘꠡꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠌꠣꠁꠞꠅꠛꠣꠄ ꠇꠔ ꠝꠣꠘꠡꠦ ꠑꠦꠟꠣꠑꠦꠟꠤ ꠇꠞꠤꠀ ꠀꠙꠘꠣꠞ ꠉꠣ’ꠔ ꠟꠣꠉꠦꠞ।” 46ꠅꠁꠟꠦ ꠁꠍꠣꠄ ꠇꠁꠟꠣ, “ꠇꠦꠃ ꠀꠝꠣꠞꠦ ꠍꠁꠍꠦ, ꠇꠣꠞꠘ ꠀꠝꠤ ꠛꠥꠎꠞꠣꠝ, ꠀꠝꠣꠞ ꠜꠤꠔꠞ ꠕꠣꠇꠤ ꠉꠣꠁꠛꠤ ꠛꠟ ꠛꠣꠞ ꠅꠁꠍꠦ।” 47ꠅꠃ ꠛꠦꠐꠤꠄ ꠎꠦꠛꠟꠣ ꠖꠦꠈꠟ ꠗꠞꠣ ꠙꠠꠤꠉꠦꠍꠦ, ꠔꠣꠁ ꠇꠣꠙꠤ ꠇꠣꠙꠤ ꠁꠍꠣꠞ ꠍꠣꠝꠘꠦ ꠀꠁꠀ ꠔꠣꠘ ꠙꠣꠅ-ꠅ ꠙꠠꠤꠀ ꠢꠇꠟꠞ ꠍꠣꠝꠘꠦꠃ ꠇꠁꠟ, ꠇꠦꠘꠦ ꠔꠣꠁ ꠁꠍꠣꠞꠦ ꠍꠁꠍꠤꠟ ꠀꠞ ꠇꠤꠟꠣꠘ ꠟꠉꠦ ꠟꠉꠦꠃ ꠜꠣꠟꠣ ꠅꠁꠉꠦꠍꠦ। 48ꠁꠍꠣꠄ ꠛꠦꠐꠤꠞꠦ ꠇꠁꠟꠣ, “ꠝꠣꠁ ꠉ, ꠔꠥꠝꠤ ꠄꠇꠤꠘ ꠇꠞꠍ ꠇꠞꠤ ꠜꠣꠟꠣ ꠅꠁꠍ। ꠅꠈꠘ ꠡꠣꠘ꠆ꠔꠤꠄ ꠛꠣꠠꠤꠔ ꠎꠣꠅ।”
49ꠁꠍꠣꠄ ꠅꠔꠣ ꠝꠣꠔꠤꠞꠣ, ꠅꠝꠘ ꠡꠝꠄ ꠝꠍꠤꠖꠞ ꠝꠔꠟ꠆ꠟꠤꠞ ꠛꠣꠠꠤ ꠕꠣꠇꠤ ꠈꠛꠞꠤꠀ ꠀꠁꠀ ꠔꠣꠘꠞꠦ ꠇꠁꠟ, “ꠍꠣꠛ, ꠀꠙꠘꠣꠞ ꠙꠥꠠꠤ ꠖꠥꠘꠤꠀ ꠕꠣꠇꠤ ꠉꠦꠍꠂꠘꠉꠤ, ꠔꠦ ꠢꠥꠎꠥꠞꠞꠦ ꠀꠞ ꠇꠡ꠆ꠐ ꠖꠤꠛꠣꠞ ꠇꠣꠝ ꠘꠣꠁ।” 50ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠒꠞꠣꠁꠅ ꠘꠣ, ꠈꠣꠟꠤ ꠄꠇꠤꠘ ꠇꠞꠅ। ꠖꠦꠈꠛꠣꠄꠘꠦ, ꠔꠣꠁ ꠜꠣꠟꠣ ꠅꠁꠎꠤꠛ।” 51ꠁꠍꠣ ꠢꠃ ꠛꠣꠠꠤꠔ ꠉꠦꠟꠣ, ꠉꠤꠀ ꠙꠤꠔꠞ, ꠢꠣꠘ꠆ꠘꠣꠘ, ꠁꠀꠇꠥꠛ ꠀꠞ ꠙꠥꠠꠤꠞ ꠝꠣ-ꠛꠣꠚ ꠍꠣꠠꠣ ꠅꠁꠘ꠆ꠘ ꠇꠦꠃꠞꠞꠦ ꠊꠞꠞ ꠜꠤꠔꠞꠦ ꠢꠣꠝꠣꠁꠔꠦ ꠖꠤꠟꠣ ꠘꠣ। 52ꠢꠇꠟꠦ ꠎꠦꠛꠟꠣ ꠙꠥꠠꠤꠞ ꠟꠣꠉꠤ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠞꠣ, ꠅꠃ ꠡꠝꠄ ꠁꠍꠣꠄ ꠇꠁꠟꠣ, “ꠇꠣꠘ꠆ꠖꠤꠅ ꠘꠣ ꠞꠦ, ꠔꠣꠁ ꠔ ꠝꠞꠍꠦ ꠘꠣ, ꠊꠥꠝꠣꠞ।” 53ꠁꠈꠣꠘ ꠢꠥꠘꠤꠀ ꠔꠣꠞꠣ ꠔꠣꠘꠞꠦ ꠍꠤꠠꠣꠁꠟꠣ। ꠔꠣꠞꠣ ꠢꠇꠟꠦꠃ ꠎꠣꠘꠔ ꠙꠥꠠꠤ ꠝꠞꠤꠉꠦꠍꠦ। 54ꠔꠦꠃ ꠁꠍꠣꠄ ꠙꠥꠠꠤꠞ ꠀꠔꠅ ꠗꠞꠤꠀ ꠒꠣꠇ ꠖꠤꠟꠣ, “ꠝꠣꠁ ꠉ, ꠃꠑꠅ।” 55ꠟꠉꠦ ꠟꠉꠦꠃ ꠙꠥꠠꠤꠞ ꠎꠣꠘ ꠚꠤꠞꠔ ꠀꠁꠟ। ꠔꠣꠁ ꠃꠑꠤꠀ ꠛꠁꠉꠦꠟ। ꠁꠍꠣꠄ ꠇꠁꠟꠣ, ꠙꠥꠠꠤꠞꠦ ꠇꠥꠘ꠆ꠔꠣ ꠈꠣꠁꠛꠣꠞ ꠖꠤꠔꠣ। 56ꠙꠥꠠꠤꠞ ꠝꠣ-ꠛꠣꠚ ꠄꠇ꠆ꠇꠦꠞꠦ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ। ꠛꠣꠖꠦ ꠁꠍꠣꠄ ꠇꠁꠟꠣ, “ꠢꠥꠘꠅ, ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
Àwon tá yàn lọ́wọ́lọ́wọ́ báyìí:
ꠁꠘ꠆ꠎꠤꠟ ৩: ꠟꠥꠇ 8: sylN
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Ahle Kitab Society. All rights reserved.
