ꠁꠘ꠆ꠎꠤꠟ ৩: ꠟꠥꠇ 7
7
ꠛꠤꠖꠦꠡꠤ ꠍꠥꠛꠦꠖꠣꠞꠞ ꠉꠥꠟꠣꠝꠞ ꠡꠤꠚꠣ
1ꠁꠍꠣꠄ ꠔꠣꠘ ꠛꠄꠀꠘ ꠡꠦꠡ ꠇꠞꠤꠀ ꠝꠣꠘꠡꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣꠉꠤ। 2ꠢꠤꠘꠅ ꠞꠥꠝꠣꠘ ꠍꠤꠙꠣꠁꠞ ꠄꠇ ꠍꠥꠛꠦꠖꠣꠞꠞ ꠉꠥꠟꠣꠝ ꠛꠦꠝꠣꠞ ꠙꠠꠤꠀ ꠝꠞꠣꠞ ꠙꠕꠤ ꠅꠁꠉꠦꠍꠤꠟ, ꠍꠥꠛꠦꠖꠣꠞ ꠍꠣꠛꠦ ꠁ ꠉꠥꠟꠣꠝꠞꠦ ꠈꠥꠛ ꠝꠣꠄꠀ ꠇꠞꠔꠣ। 3ꠔꠣꠁꠘ ꠁꠍꠣꠞ ꠈꠛꠞ ꠢꠥꠘꠤꠀ ꠇꠄꠎꠘ ꠁꠢꠥꠖꠤ ꠝꠥꠞꠛ꠆ꠛꠤꠞꠦ ꠁꠍꠣꠞ ꠉꠦꠍꠦ ꠙꠣꠑꠣꠁꠟꠣ, ꠔꠣꠘ ꠉꠥꠟꠣꠝꠞꠦ ꠜꠣꠟꠣ ꠇꠞꠔꠣ ꠡꠥꠙꠣꠞꠤꠡꠞ ꠟꠣꠉꠤ। 4ꠝꠥꠞꠛ꠆ꠛꠤ ꠅꠇꠟ ꠀꠁꠀ ꠁꠍꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤ ꠇꠁꠟꠣ, “ꠍꠣꠛ, ꠎꠦ ꠎꠘꠦ ꠀꠝꠞꠣꠞꠦ ꠀꠙꠘꠣꠞ ꠉꠦꠍꠦ ꠙꠣꠑꠣꠁꠍꠂꠘ ꠔꠣꠘ ꠉꠥꠟꠣꠝꠞ ꠟꠣꠉꠤ ꠝꠤꠘꠔ ꠇꠞꠔꠣꠝ, ꠄꠁꠘ ꠀꠍꠟꠦꠅ ꠖꠄꠀ ꠙꠣꠅꠀꠞ ꠟꠣꠈ। 5ꠔꠣꠁꠘ ꠛꠤꠖꠦꠡꠤ ꠅꠁꠟꠦꠅ ꠀꠝꠞꠣꠞ ꠁꠢꠥꠖꠤ ꠎꠣꠔꠤꠞꠦ ꠈꠥꠛ ꠝꠣꠄꠀ ꠇꠞꠂꠘ। ꠀꠝꠞꠣꠞ ꠝꠍꠤꠖ ꠈꠣꠘꠅ ꠔꠣꠁꠘ ꠛꠣꠘꠣꠁ ꠖꠤꠍꠂꠘ।”
6ꠁꠍꠣ ꠔꠣꠞꠣꠞ ꠟꠉꠦ ꠅꠁꠀ ꠞꠅꠀꠘꠣ ꠖꠤꠟꠣ, ꠔꠣꠁꠘ ꠍꠥꠛꠦꠖꠣꠞꠞ ꠛꠣꠠꠤꠞ ꠇꠣꠘ꠆ꠖꠣꠔ ꠀꠁꠔꠦꠃ ꠍꠥꠛꠦꠖꠣꠞꠦ ꠘꠤꠎꠞ ꠖꠥꠡ꠆ꠔ ꠅꠇꠟꠞꠦ ꠙꠣꠑꠣꠁꠀ ꠎꠣꠘꠣꠁꠟꠣ, “ꠢꠥꠎꠥꠞꠦ ꠀꠞ ꠇꠡ꠆ꠐ ꠇꠞꠂꠘ ꠘꠣ ꠎꠣꠘꠥ, ꠀꠙꠘꠣꠞ ꠝꠔ ꠎꠘꠦ ꠀꠝꠣꠞ ꠛꠣꠠꠤꠔ ꠔꠡꠞꠤꠚ ꠀꠘꠞꠣ, ꠀꠝꠤ ꠔ ꠁꠔꠣꠞ ꠟꠣꠈ ꠘꠣꠄ। 7ꠀꠙꠘꠣꠞ ꠍꠣꠝꠘꠦ ꠃꠛꠣꠘꠤꠞ ꠎꠁꠉ꠆ꠉ-ꠅ ꠀꠝꠤ ꠘꠣꠄ, ꠄꠞꠖꠣꠄ ꠀꠝꠤ ꠀꠁꠞꠣꠝ ꠘꠣ। ꠔꠦ ꠀꠙꠘꠦ ꠈꠣꠟꠤ ꠎꠛꠣꠘꠖꠤ ꠇꠁꠟꠦꠃ, ꠀꠝꠣꠞ ꠉꠥꠟꠣꠝꠞ ꠛꠦꠝꠣꠞ ꠡꠤꠚꠣ ꠅꠁꠎꠤꠛ। 8ꠀꠙꠘꠦ ꠔ ꠛꠥꠎꠞꠣ, ꠀꠝꠤ ꠀꠝꠣꠞ ꠇꠣꠝꠣꠘ꠆ꠒꠣꠞꠞ ꠢꠥꠇꠥꠝꠦ ꠌꠟꠤ, ꠅꠃꠟꠣ ꠀꠝꠣꠞ ꠍꠤꠙꠣꠁ ꠅꠇꠟꠅ ꠀꠝꠣꠞ ꠢꠥꠇꠥꠝꠦ ꠌꠟꠂꠘ। ꠀꠝꠤ ꠄꠞꠣ ꠄꠇꠎꠘꠞꠦ ꠀꠅ ꠇꠁꠟꠦ ꠀꠄ, ꠎꠣꠅ ꠇꠁꠟꠦ ꠎꠣꠄ, ꠀꠝꠣꠞ ꠉꠥꠟꠣꠝꠞꠦ ꠅꠃ ꠇꠣꠝ ꠇꠞꠅ ꠇꠁꠟꠦ, ꠢꠦ ꠇꠞꠦ। ꠔꠦ ꠀꠙꠘꠦꠅ ꠅꠟꠣ ꠈꠣꠟꠤ ꠝꠥꠈꠖꠤ ꠇꠁꠟꠦꠃ, ꠢꠇ꠆ꠇꠟꠔꠣꠄ ꠝꠣꠘꠛ।”
9ꠁꠈꠣꠘ ꠢꠥꠘꠤꠀ ꠁꠍꠣ ꠄꠇ꠆ꠇꠦꠞꠦ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ, ꠖꠟꠦ ꠖꠟꠦ ꠎꠔ ꠝꠣꠘꠥꠡ ꠔꠣꠘ ꠈꠞꠦ ꠅꠁꠀ ꠀꠅꠀꠔ ꠀꠍꠤꠟ, ꠄꠞꠣꠞ ꠛꠣꠄ ꠚꠤꠞꠤꠀ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠁ ꠍꠥꠛꠦꠖꠣꠞ ꠔ ꠛꠤꠗꠞ꠆ꠝꠤ ꠞꠥꠝꠣꠘ ꠝꠣꠘꠥꠡ, ꠅꠁꠟꠦ ꠀꠝꠣꠞ ꠛꠘꠤ ꠁꠍꠞꠣꠁꠟꠞ ꠝꠣꠎꠦꠅ ꠔ ꠅꠔ ꠝꠎꠛꠥꠔ ꠁꠝꠣꠘꠖꠣꠞ ꠀꠝꠤ ꠇꠥꠘꠥꠈꠣꠘꠅ ꠖꠦꠈꠍꠤ ꠘꠣ।” 10ꠢꠣꠍꠣꠃ ꠍꠥꠛꠦꠖꠣꠞꠦ ꠎꠣꠞꠣꠞꠦ ꠙꠣꠑꠣꠁꠍꠟꠣ, ꠔꠣꠞꠣ ꠊꠞꠅ ꠀꠁꠀ ꠖꠦꠈꠟꠣ, ꠢꠤ ꠉꠥꠟꠣꠝꠞ ꠛꠦꠝꠣꠞ ꠇꠝꠤꠉꠦꠍꠦ।
ꠢꠎꠞꠔ ꠁꠍꠣꠄ ꠝꠥꠞ꠆ꠖꠣꠞꠦ ꠎꠤꠘ꠆ꠖꠣ ꠇꠞꠟꠣ
11ꠕꠥꠠꠣ ꠇꠄ ꠖꠤꠘ ꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟ ꠀꠞ ꠀꠞꠅ ꠛꠃꠔ ꠝꠣꠘꠥꠡ ꠟꠁꠀ ꠘꠣꠄꠁꠘ ꠘꠣꠝꠞ ꠄꠇ ꠉꠣꠃꠔ ꠀꠁꠟꠣ। 12ꠔꠣꠁꠘ ꠎꠦꠛꠟꠣ ꠢꠃ ꠉꠣꠃꠔ ꠀꠁꠀ ꠢꠣꠝꠣꠁꠞꠣ, ꠅꠃ ꠡꠝꠄ ꠝꠣꠘꠡꠦ ꠈꠞꠣꠞꠅ ꠇꠞꠤ ꠄꠇ ꠝꠁꠅꠔ ꠟꠁꠀ ꠎꠣꠁꠞꠣ। ꠁ ꠝꠁꠅꠔ ꠀꠍꠤꠟ ꠄꠇ ꠠꠣꠠꠤ ꠛꠦꠐꠤꠞ ꠄꠇꠝꠣꠔ꠆ꠞ ꠙꠥꠀ। ꠉꠣꠃꠞ ꠛꠃꠔ ꠝꠣꠘꠥꠡ ꠅꠃ ꠈꠞꠣꠞꠞ ꠟꠉꠦ ꠀꠍꠟꠣ। 13ꠅꠃ ꠠꠣꠠꠤ ꠛꠦꠐꠤꠞꠦ ꠖꠦꠈꠤꠀ ꠁꠍꠣꠞ ꠖꠤꠟꠅ ꠖꠄꠀ ꠢꠣꠝꠣꠁꠟ, ꠔꠣꠁꠘ ꠇꠁꠟꠣ, “ꠅꠉ, ꠇꠣꠘ꠆ꠖꠤꠅ ꠘꠣ।” 14ꠇꠁꠀ ꠔꠣꠁꠘ ꠈꠞꠣꠞꠞ ꠇꠣꠘ꠆ꠖꠣꠔ ꠉꠤꠀ ꠈꠞꠣꠞꠅ ꠍꠁꠟꠣ, ꠔꠦꠃ ꠝꠁꠅꠔ ꠛꠁꠀ ꠘꠦꠅꠞꠣ ꠛꠦꠐꠣꠁꠘ ꠃꠛꠣꠁ ꠉꠦꠟꠣ। ꠁꠍꠣꠄ ꠇꠁꠟꠣ, “ꠅ ꠛꠦꠐꠣ, ꠀꠝꠤ ꠇꠁꠞꠣꠝ, ꠔꠥꠝꠤ ꠃꠑꠅ।”
15ꠔꠦꠃ ꠢꠤ ꠝꠥꠞ꠆ꠖꠣ ꠛꠦꠐꠣ ꠃꠑꠤꠀ ꠛꠁꠉꠦꠟ, ꠛꠁꠀ ꠝꠣꠔ-ꠇꠕꠣ ꠝꠣꠔꠤꠟ। ꠁꠍꠣꠄ ꠔꠣꠞꠦ ꠔꠣꠞ ꠝꠣʼꠞ ꠀꠔꠅ ꠡꠝꠎꠣꠁ ꠖꠤꠟꠣ। 16ꠁꠔꠣ ꠖꠦꠈꠤꠀ ꠢꠇꠟꠞ ꠜꠤꠔꠞꠦ ꠒꠞ ꠢꠣꠝꠣꠁꠉꠦꠟ। ꠔꠣꠞꠣ ꠇꠁꠟꠣ, “ꠍꠥꠛꠢꠣꠘ ꠀꠟ꠆ꠟꠣ, ꠄꠇꠎꠘ ꠝꠢꠣꠘ ꠘꠛꠤꠄ ꠀꠝꠞꠣꠞ ꠝꠣꠎꠦ ꠔꠡꠞꠤꠚ ꠀꠘꠍꠂꠘ, ꠀꠟ꠆ꠟꠣꠄ ꠝꠦꠢꠦꠞꠛꠣꠘꠤ ꠇꠞꠤꠀ ꠔꠣꠘ ꠛꠘ꠆ꠖꠣ ꠅꠇꠟꠞ ꠛꠣꠄ ꠌꠃꠈ ꠚꠤꠞꠣꠁꠍꠂꠘ।”
17ꠁꠍꠣꠞ ꠅꠃ ꠇꠦꠞꠣꠝꠔꠤꠞ ꠇꠕꠣ ꠀꠡ꠆ꠔꠣ ꠄꠢꠥꠖꠤꠀ ꠎꠤꠟꠣꠔ ꠀꠞ ꠀꠡ-ꠙꠣꠡ ꠢꠇ꠆ꠇꠟ ꠎꠣꠉꠣꠔ ꠝꠣꠡꠥꠞ ꠅꠁꠉꠦꠟ।
ꠢꠎꠞꠔ ꠁꠍꠣꠞ ꠖꠞꠛꠣꠞꠅ ꠄꠢꠤꠀ ꠘꠛꠤꠞ ꠡꠣꠉꠞꠤꠖ
18ꠄꠢꠤꠀ ꠘꠛꠤꠞ ꠡꠣꠉꠞꠤꠖ ꠅꠇꠟ ꠉꠤꠀ ꠅꠃ ꠢꠇ꠆ꠇꠟꠔꠣ ꠄꠢꠤꠀꠞꠦ ꠎꠣꠘꠣꠁꠟꠣ। 19ꠅꠃ ꠄꠢꠤꠀꠄ ꠔꠣꠘ ꠖꠥꠁꠎꠘ ꠡꠣꠉꠞꠤꠖꠞꠦ ꠁꠍꠣꠞ ꠉꠦꠍꠦ ꠙꠣꠑꠣꠁꠟꠣ। ꠔꠣꠞꠣ ꠀꠁꠀ ꠁꠍꠣꠞꠦ ꠇꠁꠔꠣ, “ꠢꠥꠎꠥꠞꠦ ꠇꠁꠍꠂꠘ ꠀꠝꠞꠣ ꠎꠣꠘꠤꠀ ꠎꠣꠁꠔꠣꠝ, ꠎꠦꠁꠘ ꠔꠡꠞꠤꠚ ꠀꠘꠣꠞ ꠇꠕꠣ, ꠀꠙꠘꠦꠃ ꠢꠦꠁꠘ ꠘꠤ? ꠘꠣ ꠀꠝꠞꠣ ꠀꠞ ꠇꠦꠃꠞꠞ ꠟꠣꠉꠤ ꠛꠣꠞ ꠌꠣꠁꠔꠣꠝ?” 20ꠔꠦꠃ ꠖꠥꠁꠅ ꠡꠣꠉꠞꠤꠖ ꠀꠁꠀ ꠁꠍꠣꠞꠦ ꠇꠁꠟꠣ, “ꠄꠢꠤꠀ ꠘꠛꠤꠄ ꠀꠝꠞꠣꠞꠦ ꠙꠣꠑꠣꠁꠍꠂꠘ, ꠀꠙꠘꠣꠞꠦ ꠎꠤꠇꠣꠁꠔꠣꠝ, ꠎꠦꠁꠘ ꠔꠡꠞꠤꠚ ꠀꠘꠣꠞ ꠇꠕꠣ, ꠀꠙꠘꠦꠃ ꠢꠦꠁꠘ ꠘꠤ? ꠘꠣ ꠀꠝꠞꠣ ꠀꠞ ꠇꠦꠃꠞꠞ ꠟꠣꠉꠤ ꠛꠣꠞ ꠌꠣꠁꠔꠣꠝ?”
21ꠑꠤꠇ ꠅꠃ ꠡꠝꠄ ꠁꠍꠣꠄ ꠛꠃꠔ ꠝꠣꠘꠡꠞꠦ ꠛꠦꠝꠣꠞ-ꠀꠎꠣꠞ ꠀꠞ ꠎꠤꠘ-ꠜꠥꠔꠞ ꠀꠍꠞ ꠕꠣꠇꠤ ꠜꠣꠟꠣ ꠇꠞꠟꠣ। ꠛꠃꠔ ꠀꠘ꠆ꠖꠣꠞꠦꠅ ꠖꠦꠈꠣꠞ ꠈꠦꠝꠔꠣ ꠖꠤꠟꠣ। 22ꠅꠔꠣ ꠇꠞꠤꠀ ꠢꠣꠞꠟꠦ ꠄꠢꠤꠀꠞ ꠖꠥꠁꠅ ꠡꠣꠉꠞꠤꠖꠞꠦ ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠎꠣꠅꠉꠤ, ꠔꠥꠝꠞꠣ ꠅꠘꠅ ꠀꠁꠀ ꠘꠤꠎꠞ ꠌꠃꠈꠦ ꠎꠦꠔꠣ ꠖꠦꠈꠟꠣꠄ ꠀꠞ ꠢꠥꠘꠟꠣꠄ, ꠅꠔꠣ ꠉꠤꠀ ꠄꠢꠤꠀꠞꠦ ꠎꠣꠘꠣꠅ। ꠔꠣꠘꠞꠦ ꠇꠁꠅ, ꠀꠘ꠆ꠖꠣꠄꠅ ꠌꠃꠈꠦ ꠖꠦꠈꠞꠣ, ꠟꠦꠋꠠꠣ ꠅꠇꠟꠦ ꠀꠐꠤꠞꠣ, ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠜꠣꠟꠣ ꠅꠁꠞꠣ, ꠈꠣꠟꠥꠀꠄꠅ ꠢꠥꠘꠞꠣ, ꠝꠥꠞ꠆ꠖꠣ ꠝꠣꠘꠥꠡ ꠎꠤꠘ꠆ꠖꠣ ꠅꠁꠞꠣ, ꠀꠞ ꠉꠞꠤꠛ ꠅꠇꠟꠞ ꠉꠦꠍꠦꠅ ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠞ। 23ꠀꠞ ꠄꠞꠣꠃ ꠇꠙꠣꠟꠤ ꠝꠣꠘꠥꠡ, ꠀꠝꠣꠞ ꠛꠦꠙꠣꠞꠦ ꠎꠦꠞꠣꠞ ꠖꠤꠟꠅ ꠇꠥꠘꠥ ꠛꠣꠗꠣ ꠘꠣ ꠙꠣꠄ।”
24ꠄꠢꠤꠀꠞ ꠡꠣꠉꠞꠤꠖ ꠅꠇꠟ ꠉꠤꠀ ꠢꠣꠞꠟꠦ, ꠄꠢꠤꠀꠞ ꠛꠦꠙꠣꠞꠦ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠔꠥꠝꠞꠣ ꠝꠞꠥꠜꠥꠝꠤꠔ ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠛꠣꠔꠣꠡꠦ ꠟꠠꠦ-ꠍꠠꠦ ꠅꠔꠣ ꠈꠣꠉꠠꠣ-ꠛꠘ ꠖꠦꠈꠣꠔ ꠉꠦꠍꠟꠣꠄ ꠘꠤ? 25ꠘꠣ, ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠡꠥꠘ꠆ꠖꠞ ꠇꠣꠙꠠ ꠚꠤꠘ꠆ꠘ ꠇꠥꠘꠥ ꠝꠣꠘꠡꠞꠦ ꠘꠤ? ꠎꠦꠞꠣ ꠖꠣꠝꠤ ꠖꠣꠝꠤ ꠇꠣꠙꠠ ꠚꠤꠘ꠆ꠖꠤꠀ ꠎꠣꠇ-ꠎꠝꠇ ꠇꠞꠦ, ꠀꠞ ꠡꠥꠈꠤꠞ꠆ꠔꠣ ꠖꠤꠘ ꠇꠣꠐꠣꠄ, ꠔꠣꠞꠣ ꠔ ꠞꠣꠎꠛꠣꠠꠤꠔ ꠕꠣꠇꠂꠘ। 26ꠔꠦ ꠔꠥꠝꠞꠣ ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠇꠥꠘꠥ ꠘꠛꠤꠞꠦ ꠖꠦꠈꠣꠔ ꠉꠦꠍꠟꠣꠄ ꠘꠤ? ꠅꠄ, ꠢꠣꠍꠣꠃ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠁ ꠄꠢꠤꠀ ꠔ ꠈꠣꠟꠤ ꠘꠛꠤ ꠘꠣꠄ, ꠘꠛꠤ ꠕꠣꠇꠤꠅ ꠛꠠ ꠎꠘ। 27ꠄꠁꠘ ꠔ ꠢꠃ ꠎꠘ, ꠎꠦꠘ ꠇꠕꠣ ꠀꠍꠝꠣꠘꠤ ꠇꠤꠔꠣꠛꠅ ꠟꠦꠈꠣ ꠀꠍꠦ,
ꠢꠥꠘꠅ, ꠔꠥꠝꠣꠞ ꠀꠉꠦ ꠛꠦꠎꠤꠀꠞ ꠀꠝꠤ
ꠀꠝꠣꠞ ꠙꠦꠉꠣꠝ꠆ꠛꠞ,
ꠄꠁꠘ ꠉꠤꠀ ꠑꠤꠇ-ꠑꠣꠇ ꠇꠞꠛꠣ
ꠔꠥꠝꠣꠞ ꠌꠟꠣꠞ ꠙꠕ।
28ꠔꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠡ꠆ꠔꠣ ꠖꠥꠘꠤꠀꠞ ꠇꠥꠘꠥ ꠀꠖꠝꠃ ꠄꠢꠤꠀ ꠕꠣꠇꠤ ꠛꠠ ꠘꠣꠄ। ꠅꠁꠟꠦ ꠀꠟ꠆ꠟꠣꠞ ꠛꠣꠖꠡꠣꠁꠞ ꠢꠇꠟ ꠕꠣꠇꠤ ꠢꠥꠞꠥ ꠎꠘꠅ, ꠄꠢꠤꠀ ꠕꠣꠇꠤ ꠝꠢꠣꠘ।”
29ꠡꠝꠣꠎꠞ ꠢꠇꠟ ꠗꠞꠘꠞ ꠀꠝ ꠝꠣꠘꠡꠦ ꠀꠞ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠅꠇꠟꠦꠅ ꠄꠢꠤꠀꠞ ꠔꠛꠟꠤꠉ ꠢꠥꠘꠟꠣ, ꠔꠣꠞꠣ ꠔꠃꠛꠣꠞ ꠉꠥꠍꠟ ꠇꠞꠤꠀ ꠀꠟ꠆ꠟꠣ ꠙꠣꠇꠞꠦ ꠢꠇ-ꠁꠘꠍꠣꠚꠇꠣꠞꠤ ꠢꠤꠡꠣꠛꠦ ꠝꠣꠘꠟꠣ। 30ꠅꠁꠟꠦ ꠚꠞꠤꠡꠤ ꠖꠟꠞ ꠝꠣꠘꠡꠦ ꠀꠞ ꠝꠃꠟꠣꠘꠣ ꠅꠇꠟꠦ ꠄꠢꠤꠀꠞ ꠉꠦꠍꠦ ꠔꠃꠛꠣꠞ ꠉꠥꠍꠟ ꠘꠣ ꠇꠞꠤꠀ, ꠔꠣꠞꠣꠞ ꠛꠦꠙꠣꠞꠦ ꠀꠟ꠆ꠟꠣ ꠙꠣꠇꠞ ꠎꠦ ꠈꠤꠀꠟ ꠀꠍꠤꠟ, ꠁꠐꠣꠞꠦ ꠇꠥꠘꠥ ꠖꠣꠝ ꠖꠤꠟ ꠘꠣ।
31ꠔꠦꠃ ꠁꠍꠣꠄ ꠢꠤꠞꠛꠣꠞ ꠇꠁꠟꠣ, “ꠇꠅ ꠌꠣꠁꠘ, ꠅꠈꠘ ꠁ ꠎꠝꠣꠘꠣꠞ ꠝꠣꠘꠡꠞꠦ ꠀꠝꠤ ꠇꠤꠔꠣꠞ ꠟꠉꠦ ꠔꠥꠟꠘꠣ ꠇꠞꠔꠣꠝ? ꠔꠣꠞꠣ ꠇꠣꠞ ꠟꠣꠈꠣꠘ? 32ꠔꠣꠞꠣ ꠔ ꠅꠝꠘ ꠢꠥꠞꠥꠔ꠆ꠔꠣꠞ ꠟꠣꠈꠣꠘ, ꠎꠦꠔꠣꠄ ꠛꠣꠎꠣꠞꠅ ꠛꠁꠀ ꠄꠇꠦ-ꠅꠁꠘ꠆ꠘꠞꠦ ꠒꠣꠇꠤꠀ ꠇꠄ,
ꠛꠣꠡꠤ ꠔ ꠛꠣꠎꠣꠁꠟꠣꠝ ꠖꠥꠡ꠆ꠔ ꠔꠥꠝꠞꠣꠞ ꠟꠣꠉꠤꠀ,
ꠔꠥꠝꠞꠣ ꠇꠦꠃ ꠘꠣꠌꠤꠟꠣꠄ ꠘꠣ ꠛꠣꠡꠤ ꠢꠥꠘꠤꠀ।
ꠝꠣꠔ꠆ꠔꠝꠞ ꠎꠣꠞꠤ-ꠉꠣꠘ ꠉꠣꠁꠟꠣꠝ ꠀꠝꠞꠣ ꠡꠛꠦ,
ꠇꠣꠘ꠆ꠖꠤꠟꠣꠄ ꠘꠣ ꠔꠥꠝꠞꠣ ꠇꠦꠃ ꠝꠣꠔ꠆ꠔꠝꠞ ꠡꠥꠞꠦ।
33ꠔꠦ ꠄꠢꠤꠀ ꠘꠛꠤ ꠀꠁꠀ ꠢꠣꠞꠤ ꠜꠣꠔ-ꠞꠥꠐꠤ ꠀꠞ ꠀꠋꠉꠥꠞꠞ ꠡꠞꠛꠔ ꠘꠣ ꠈꠣꠅꠀꠄ, ꠔꠥꠝꠞꠣ ꠇꠁꠟꠣꠄ ꠔꠣꠘꠞꠦ ꠜꠥꠔꠦ ꠗꠞꠤꠟꠤꠍꠦ। 34ꠀꠞ ꠛꠤꠘ-ꠀꠖꠝ ꠀꠁꠀ ꠈꠣꠘꠣ-ꠙꠤꠘꠣ ꠇꠞꠞꠣ ꠖꠦꠈꠤꠀ ꠔꠥꠝꠞꠣ ꠇꠁꠞꠣꠄ, ꠖꠦꠈꠞꠣꠄ ꠘꠤ, ꠁ ꠛꠦꠐꠣ ꠔ ꠙꠦꠐꠥꠀ ꠀꠞ ꠝꠖꠈꠥꠞ। ꠢꠦ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠘꠣꠚꠞꠝꠣꠘ ꠝꠣꠘꠡꠞ ꠟꠉꠦ ꠖꠥꠡ꠆ꠔꠤ ꠇꠞꠦ। 35ꠔꠣ-ꠅ ꠀꠈꠟ ꠈꠣꠐꠣꠁꠀ ꠎꠦꠞꠣ ꠌꠟꠦ, ꠔꠣꠞꠣꠞ ꠌꠣꠟ-ꠌꠟꠘ ꠕꠣꠇꠤꠃ ꠙꠞꠝꠣꠘ ꠝꠤꠟꠦ, ꠀꠈꠟꠃ ꠅꠁꠟ ꠈꠣꠐꠤ-ꠘꠤꠈꠥꠔ ꠌꠤꠎ।”
ꠈꠛꠤꠍ ꠛꠦꠐꠤꠞ ꠉꠥꠘꠣ ꠝꠣꠚ
36ꠚꠞꠤꠡꠤ ꠖꠟꠞ ꠄꠇꠎꠘ ꠝꠣꠘꠡꠦ ꠁꠍꠣꠞꠦ ꠔꠣꠘ ꠛꠣꠠꠤꠔ ꠈꠣꠘꠤꠞ ꠖꠣꠅꠔ ꠖꠤꠟꠣ, ꠁꠍꠣ ꠅꠃ ꠛꠣꠠꠤꠔ ꠉꠤꠀ ꠈꠣꠘꠤꠔ ꠛꠁꠟꠣ। 37ꠅꠁꠟꠦ ꠅꠃ ꠉꠣꠃꠔ ꠄꠇ ꠈꠛꠤꠍ ꠛꠦꠐꠤ ꠀꠍꠤꠟ। ꠁꠍꠣ ꠅꠘꠅ ꠖꠣꠅꠔꠅ ꠀꠁꠍꠂꠘ ꠢꠥꠘꠤꠀ ꠢꠃ ꠈꠛꠤꠍ ꠛꠦꠐꠤꠄ ꠖꠣꠝꠤ ꠄꠇ ꠙꠣꠔ꠆ꠔꠞꠞ ꠛꠂꠀꠝꠅ ꠇꠞꠤ ꠀꠔꠞ ꠟꠁꠀ ꠅꠘꠅ ꠀꠁꠟ। 38ꠀꠁꠀ ꠁꠍꠣꠞ ꠙꠤꠍꠘ ꠉꠣꠟꠣꠛꠣꠄ ꠔꠣꠘ ꠙꠣꠅꠞ ꠇꠣꠘ꠆ꠖꠣꠔ ꠃꠛꠣꠁꠀ, ꠇꠣꠘ꠆ꠖꠤꠀ ꠌꠃꠈꠞ ꠙꠣꠘꠤꠖꠤ ꠔꠣꠘ ꠙꠣꠅꠞ ꠙꠣꠔꠣ ꠜꠤꠎꠣꠁꠟꠤꠟ। ꠛꠣꠖꠦ ꠔꠣꠁꠞ ꠝꠣꠕꠣꠞ ꠌꠥꠟꠖꠤ ꠙꠣꠅ ꠚꠥꠍꠤꠀ ꠖꠤꠟ, ꠙꠣꠅꠞ ꠝꠣꠎꠦ ꠢꠥꠋꠉꠣ ꠖꠤꠔꠦ ꠖꠤꠔꠦ ꠀꠔꠞ ꠝꠣꠈꠣꠁꠟ।
39ꠁꠔꠣ ꠖꠦꠈꠤꠀ ꠁꠍꠣꠞꠦ ꠎꠦꠁꠘ ꠖꠣꠅꠔ ꠖꠤꠍꠟꠣ, ꠄꠁꠘ ꠝꠘꠦ ꠝꠘꠦ ꠇꠁꠟꠣ, “ꠁ ꠛꠦꠐꠣ ꠇꠥꠘꠥ ꠘꠛꠤ ꠅꠁꠟꠦ ꠔ ꠄꠝꠘꠦꠃ ꠛꠥꠎꠟ ꠅꠘꠦ ꠁ ꠛꠦꠐꠤ ꠇꠦꠉꠥ, ꠁꠉꠥ ꠇꠔ ꠛꠠ ꠈꠛꠤꠍ ꠉꠥꠘꠣꠉꠣꠞ ꠛꠦꠐꠤ।” 40ꠁꠍꠣꠄ ꠔꠣꠞꠦ ꠇꠁꠟꠣ, “ꠍꠣꠁꠝꠘ, ꠔꠥꠝꠣꠞ ꠟꠉꠦ ꠀꠝꠣꠞ ꠇꠤꠍꠥ ꠇꠕꠣ ꠀꠍꠦ।” ꠍꠣꠁꠝꠘꠦ ꠇꠁꠟꠣ, “ꠇꠃꠇ꠆ꠇꠣ ꠢꠥꠎꠥꠞ।”
41ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠝꠘꠦ ꠇꠞꠅ, ꠄꠇ ꠝꠣꠎꠘꠞ ꠉꠦꠍ ꠕꠣꠇꠤ ꠖꠥꠁꠎꠘ ꠝꠣꠘꠡꠦ ꠇꠤꠍꠥ ꠐꠦꠇꠣ ꠇꠞꠎ ꠘꠤꠍꠤꠟ, ꠄꠇꠎꠘꠦ ꠙꠣꠌ-ꠡ, ꠀꠞꠇ ꠎꠘꠦ ꠙꠁꠘ꠆ꠌꠣꠡ ꠖꠤꠘꠣꠞ। 42ꠔꠣꠞꠣꠞ ꠇꠦꠃꠞꠞꠃ ꠔꠣꠇ꠆ꠇꠔ ꠀꠍꠤꠟ ꠘꠣ ꠁ ꠐꠦꠇꠣ ꠚꠤꠞꠔ ꠖꠦꠅꠀ, ꠔꠦꠃ ꠝꠣꠎꠘꠦ ꠄꠞꠣ ꠖꠥꠁꠅꠎꠘꠞꠦ ꠝꠣꠚ ꠇꠞꠤ ꠖꠤꠟꠣꠁꠟꠣ। ꠅꠈꠘ ꠇꠅ ꠌꠣꠁꠘ, ꠄꠞꠣ ꠇꠥꠘ ꠎꠘꠦ ꠝꠣꠎꠘꠞꠦ ꠛꠦꠡꠤ ꠜꠣꠟꠣ ꠙꠣꠁꠛ?” 43ꠍꠣꠁꠝꠘꠦ ꠇꠁꠟꠣ, “ꠀꠝꠣꠞ ꠝꠘꠦ ꠇꠄ, ꠎꠣꠞ ꠛꠦꠡꠤ ꠐꠦꠇꠣ ꠝꠣꠚ ꠖꠦꠅꠀ ꠅꠁꠍꠦ।” ꠁꠍꠣꠄ ꠇꠁꠟꠣ, “ꠔꠥꠝꠤ ꠑꠤꠇꠃ ꠇꠁꠍ।”
44ꠔꠦꠃ ꠁꠍꠣꠄ ꠅꠃ ꠛꠦꠐꠤꠞ ꠛꠣꠄ ꠌꠣꠁꠀ ꠇꠁꠟꠣ, “ꠍꠣꠁꠝꠘ, ꠅꠃ ꠛꠦꠐꠤꠉꠥꠞ ꠛꠣꠄ ꠈꠤꠀꠟ ꠇꠞꠅ ꠀꠞ ꠢꠥꠘꠅ, ꠀꠝꠤ ꠔꠥꠝꠣꠞ ꠊꠞꠅ ꠀꠁꠀ ꠢꠣꠞꠟꠦ ꠔꠥꠝꠤ ꠔ ꠀꠝꠣꠞꠦ ꠙꠣꠅ ꠗꠅꠀꠞꠅ ꠙꠣꠘꠤ ꠖꠤꠍ ꠘꠣ, ꠅꠁꠟꠦ ꠔꠣꠁꠞ ꠌꠃꠈꠞ ꠙꠣꠘꠤꠖꠤ ꠀꠝꠣꠞ ꠙꠣꠅ ꠜꠤꠎꠣꠁꠀ, ꠝꠣꠕꠣꠞ ꠌꠥꠟꠖꠤ ꠚꠥꠍꠤꠀ ꠖꠤꠍꠦ। 45ꠔꠥꠝꠤ ꠔ ꠀꠝꠣꠞ ꠟꠉꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠢꠥꠋꠉꠣ ꠖꠤꠍ ꠘꠣ, ꠅꠁꠟꠦ ꠖꠦꠈꠞꠣꠄ ꠘꠤ ꠀꠝꠤ ꠔꠥꠝꠣꠞ ꠛꠣꠠꠤꠔ ꠢꠣꠝꠣꠘꠤꠞ ꠛꠣꠖ ꠅꠘꠦꠃ ꠔꠣꠁ ꠀꠝꠣꠞ ꠙꠣꠅꠔ ꠢꠥꠋꠉꠣ ꠖꠦꠅꠀꠔꠃ ꠀꠍꠦ। 46ꠔꠥꠝꠤ ꠇꠥꠘꠥꠎꠣꠔ ꠔꠣꠎꠤꠝ ꠇꠞꠤ ꠀꠝꠣꠞꠦ ꠀꠉꠥꠀꠁ ꠀꠘꠍ ꠘꠤ? ꠅꠁꠟꠦ ꠔꠣꠁ ꠀꠝꠣꠞ ꠙꠣꠅꠔ ꠀꠔꠞ ꠓꠣꠟꠤꠀ ꠔꠣꠎꠤꠝ ꠇꠞꠍꠦ। 47ꠔꠦ ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠔꠣꠁ ꠛꠦꠡꠤ ꠝꠣꠄꠀ ꠇꠞꠍꠦ ꠇꠞꠤ ꠛꠥꠎꠣ ꠎꠣꠞ, ꠔꠣꠁ ꠛꠠ ꠉꠥꠘꠣꠉꠣꠞ ꠅꠁꠟꠦꠅ ꠉꠥꠘꠣꠞ ꠝꠣꠚꠤ ꠙꠣꠁꠍꠦ। ꠎꠣꠞ ꠕꠥꠠꠣ ꠉꠥꠘꠣ ꠝꠣꠚ ꠇꠞꠣ ꠅꠄ, ꠢꠦ ꠕꠥꠠꠣ ꠝꠣꠄꠀ ꠇꠞꠦ।”
48ꠛꠣꠖꠦ ꠁꠍꠣꠄ ꠛꠦꠐꠤꠞꠦ ꠇꠁꠟꠣ, “ꠅꠉ, ꠔꠥꠝꠣꠞ ꠔꠣꠝꠣꠝ ꠉꠥꠘꠣ ꠝꠣꠚ ꠇꠞꠣ ꠅꠁꠍꠦ।” 49ꠎꠣꠞꠣ ꠁꠍꠣꠞ ꠟꠉꠦ ꠈꠣꠘꠤꠔ ꠛꠁꠍꠟꠣ ꠔꠣꠞꠣ ꠝꠘꠦ ꠝꠘꠦ ꠇꠁꠟꠣ, “ꠄꠁꠘ ꠇꠦ, ꠎꠦꠁꠘ ꠉꠥꠘꠣꠅ ꠝꠣꠚ ꠇꠞꠤꠟꠣꠁꠘ?”
50ꠁꠍꠣꠄ ꠢꠤ ꠛꠦꠐꠤꠞꠦ ꠇꠁꠟꠣ, “ꠅ ꠛꠦꠐꠤ, ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠘꠣꠎꠣꠔ ꠙꠣꠁꠟꠣꠄ, ꠅꠈꠘ ꠡꠣꠘ꠆ꠔꠤ ꠅꠁꠀ ꠛꠣꠠꠤꠔ ꠎꠣꠅ।”
Àwon tá yàn lọ́wọ́lọ́wọ́ báyìí:
ꠁꠘ꠆ꠎꠤꠟ ৩: ꠟꠥꠇ 7: sylN
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Ahle Kitab Society. All rights reserved.
