Nsaŋ 5
5
Yeesu singi langbanɔ falun vílɛ́iyo
1O kon kɔɔli, mí kafo Yuifia pum tiiya, mí Yeesu hel Yerusalɛm ciee. 2Mɛnndan ma pum ma va o Dio-n'saa ikɛi Yerusalɛm a tongolan tan ŋuɛɛnu, fonda mamɛn kon diolan o hebrei nin aa Betɛsda. 3Vanaa lanaa sɛ́lɔ́ɔ́ taw a va ihini o tongola lan nin: vanaa sumɛiya, namtaa, vanaa falun vílɛ́iya. [A va cumndo le mɛnndan biiŋɔnndo, 4kani mɛlɛkanɔɔ pum va tolɔɔ a telenndan lapum o mɛmma man nin le man biiŋoo. Vana-vana óò tol pɛ tase o mɛmma biiŋuamma man nin, ndóò sengu, mɛ̀ɛ́-mɛ̀ɛ́ naa kon ndóò va]. 5Langbanɔ pilɛ va lon, ndóò cii nin vɔsilan beleyaa a laŋɔmaa a nàá. 6Mɛɛ Yeesu ce ndu ihini lɛŋ, mó sina maa ndóò viow nin ndon. Mó ɲuna ndu aa: «A yeema mà sengu?» 7Mí vana nàà kon dimul ndu aa: «Maalii, i nɔ vana tuisi ya o mɛnndan nin telen mɛnndan ma co biiŋɔn-ndo le, i cɛn pɛ toosianndo le kɔlan, vana celen tol-la tase.» 8Mí Yeesu dimul ndu aa: «Cɔn, cua ɲɛ hinia nɔmndo ma kɔɛ!» 9Fɔ́ɔ́fɔ̀, mí langbanɔ kon siangu, mó cua ɲɛ hinia ndɔɔ, mó kɔa. 10Nduyɛ paale pɛngiaalen le va ɲinkon ni, o kon mí Yuifia dimul vana Yeesu singi kon-ndo aa: «Paale pɛngiaalen le co hau ni, a bɛnda ma siilun ɲɛ hinia nɔmndo le.» 11Mó mulul nda aa: «Vana singi ya-o dimul-la ni aa: ‹Cua ɲɛ hinia nɔmndo mà kɔɛ.›» 12Má ɲuna ndu aa: «Ɔ́ɔ̀ vana dimul nɔm kon aa: ‹Cua ɲɛ hinia nɔmndo mà kɔɛ-o?›» 13Kɛ langbanɔ Yeesu ndóò singi kon-ndo sina ndu le, kani Yeesu ndóò luɛinun nin sɛ́lɛ́ va lon-ndo tɛɛn.
14O kon kɔɔli, mí Yeesu kɔ saalun ndu o Cɛi-Hala-o nin, mó dimul ndu aa: «Mɛɛ n sɔla siongɔɔ nuaa yɛ, tosa lɛ haki le dɛ, yɔŋii dɛnɛ hiow hoo vɔwlen-ndo komal nɔm.» 15Mí langbanɔ kalaa kɔannun, mó kɔ dimul Yuifia maa Yeesu singi ndu ni. 16Cɔn o telen kon, mí Yuifia toal Yeesu kɔɔli le tùú o va dɛnnda lan tosaa o paale pɛngiaalen coo-o. 17Kɛ mí Yeesu dimul nda aa: «Haa hau, Fuɲa nuu co hiovɔɔ laci a vallo tosaa, ya bɛɛ i co vallo.» 18Le diom o dimi kon-ndo, mí Yuifia can nɛilan nuwviaa le ndu diyɔɔ, o co vɔ le tùú o va tɔŋ paale pɛngiaa tɛɛmbuuo-o le, kɛ le tùú o va dimio-o maa Hala co Fuɲa ndɔ kpeekpeiyo ni, mó va ndu pila siingɔnndo Hala-o.
Kpaaya Po Hala-o
19O kon mí Yeesu mulul nda aa: «I co niaa toɲaa dimul kpendekele, Poo nɔla ɲɛ-ɲɛ tosa a ba ndɔ le, fɔ ɲɛ o ce Fuɲaa tosaa-o. Ɲɛ-ɲɛ Fuɲaa tosa yɛ pɛ, ndu Poo bɛɛ tosa ni. 20Kani Fuɲaa kaola Poo, o cɔm ndu ɲɛ-ɲɛ o co tosaa, o cɔmnin ndu dɛnnda bɛndula hiow lan-ndan, haliko mi kɔndɔfillo bii niaa. 21Kani mɛɛ Fuɲaa tindi vanvílɛ́iya má muungu yoomu yɛ, lende koni Poo bɛɛ yɔngù vanà o yeema-o yoomoo ni. 22Hiovɔɔ o kon coo, Fuɲaa kilù vana-vana iyama le, kɛ Poo o ke dio le yaman kpow kiolɔɔ ni, 23haliko mi vannda kpow a biilu Poo mɛɛ nda co Fuɲaa biiloo yɛ. Vana biilu Poo le, mɛɛ o biilu Fuɲa vem ndu-o le.»
24Mí Yeesu hiaw laci a nda dimullo aa: «I co niaa toɲaa dimul kpendekele, vana-vana tuei pɛ sɔɛi nii mò laalan vana vem ya-o, vana kon ndu sɔla cinda fɛɛn-fɛɛndo, o sɔla yaala le, kɛ o fula o piɔ́mndo nin, mó muungu yoomu. 25I co niaa toɲaa dimul kpendekele, telen pum co tiiya, o tiiyaa koni o co yɛ nin nuaa ni, mì vanvílɛ́iya tuei Po Hala-o diom, nduyɛ vanaa tueinin ndu kan diom-nda a vanin yoomu. 26Kani mɛɛ Fuɲa nuu nɔ yoomoo niŋ yɛ, lende koni o cɛl ni mí Poo bɛɛ nɔ yoomoo. 27Mó ke ndu dio le yamɛi kiolɔɔ, kani Po vanacieo o co ni. 28Kɔndɔfili bii niaa le ken te, kani telen pum co hunɔɔ tiiya mì vanaa co o sɛilan nin-nda kpow a tuei diom ndɔɔ, 29mà fula. Vanaa tósa dɛnɛ kɛndɔɔ-a cannin mà muungu yoomu, mì vanaa tósa dɛnɛ vɔɔndo-a muungu yoomu le yamɛi ndɛi kiolɔɔ, mà yaala nda. 30Ya, i tiwbà ɲɛ-ɲɛ tosa a ba ni le, mɛɛ ya tuɛi yɛ, lende ya i kialu yamɛi ni. Nduyɛ yamɛi kɛ́-kɛ̀ ya i kelu pɛ, i sandu, kani o co hɛnan ni le ya co nuwviaa le, fɔ hɛnan vana vem ya-o.»
Seilen a Yeesu o kɔɔ
31«Te a ya pila o kɔɔ yáà va seilen timbio ni, seile nilen léè venin toɲa le. 32Kɛ vana celen co seilen timbio a ya o kɔɔ ni, nduyɛ i sina maa seile o co timbio a ya o kɔɔ len le co toɲa. 33Mí la viam kiilaa o Nsaŋ-ndo, mó timbi seile toɲalen. 34Ya ya, i hewba le seile vanaciee le, kɛ i co ken kpow dimio haliko mi la sɔla cindaa. 35Fitinaa va biyɔɔ mì ɲɔɔ va tengaa-o Nsaŋ yɔŋnun ni. Niáà yeema le ɲaaloo dɔwnɔnndo o ɲɛ-tengaa ndɔɔ le telen bingi. 36Nduyɛ ya, seile nilen le hiow polon a le Nsaŋ-nden, kani hali dɛnnda Pua cɛl-la le tosaa mì va lan tosaa lan bɛɛ la cɔm maa Pua vem ya ni. 37Pua vem ya-o bɛɛ timbi seilen a ya o kɔɔ. Kabi bɛɛ la tui diom ndɔɔ le, la ci hɔlaa ndɔa le, 38sɔɛi ndɔɛi co niaa o lakɔl te, kani la laalan vana o vem-ndo le. 39La co O-Sɛvanndo yaasiaa ɲɛkɛndɛi, kani la yiyan maa lenin niaa sɔlanin cinda fɛɛn-fɛɛndo ni. O-sɛvan kon-ndo kpeekpei co seile nilen timbio ni. 40Nduyɛ, la yeema mì la hin o ya lo le cindaa sɔlaa le.
41O co candula vanndacieea le ya co kɔɔli le. 42Mò va maa i sina masinaa niaa le! La nɔ kaola Hala-o o kɔl te. 43O diola Fuɲa nuu ya hin ni, nduyɛ la cɛl-la le. Te vana celen hin pɛ o diola ndɔla ndu pila lan, la cɛl ndu. 44Vɛ̀ɛ̀ niaa nɔla yɛnin laalanndo, la co niaa pila candanndo vellaa-velle, la co candɔɔla Hala lan kínɛí nuwviaa le? 45La yiyan maa i lɔalunin niaa o Pua lo le. Vana co niaa lɔlɔɔ-o co Moise ni, ndu niaa kɛsi kɔllo coo ni. 46Kani te la laalan pɛ Moise, mɛɛ ya bɛɛ la laalannin ya, kani a ya o kɔɔ o sɛva ni. 47Kɛ te la laalan sɔɔn o sɛva-on te, vɛ̀ɛ̀ niaa laalan yɛnin sɔɔn nun?»
Àwon tá yàn lọ́wọ́lọ́wọ́ báyìí:
Nsaŋ 5: BKG
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Alliance Biblique en Guinée
