Nsaŋ 4
4
Yeesu nda vanalanɔ Samarinɔɔ
1Yeesu sinaa maa Faliisia tuei maa ndu Yeesu co hiovɔɔ kaandennda sɔlaa le nda yinɔɔ a Nsaŋ, 2nduyɛ o co ndu pila le va yinɔɔ le, kaandeŋaa ndɔa a va vannda yinɔɔ ni, 3mó faŋan Yuda mó muungu Kalile. 4Le kɔlan ndon yɛ, mɛɛ mì ndóò kei o tàndá Samari-o nin. 5Mó tiiya o kobio pum o tàndá kon nin, diolan Sikar, o yondo Yakɔb ndóò ke Yosɛf po ndɔ-o ikɛi. 6Lon soon-kólaa Yakɔb-o va ni. Yeesu sangaa a kɔlan, mó kɔ cal o soon-kólaa kon ikɛi. Paalen le va nin le tiiyaa o pol.
7Mí vanalanɔ Samarinɔɔ pum hun mɛnndan kɔndɔɔ, mí Yeesu dimul ndu aa: «Ke ya mɛnndan mì kol!» 8Kaandeŋaa ndɔa ndáà kɔɛ ciee le ɲɛdiaa piondɔɔ. 9Mí vanalanɔ kon dimul ndu aa: «Nɔm Yuifinɔɔ a piɛi ya mɛnndan le kolɔɔ, ya Samarinɔɔ?» Kani Yuifia nɔ mako a Samaria le. 10Mí Yeesu mulul ndu aa: «Te nɔm óò sina pɛ ke Hala-o, a vana co nɔm hoo dimullo aa: ‹Ke ya mɛnndan mì kol›-lo, nɔm va ndu mɛmma kolan piɛi ni, mì ndóò ke nɔm mɛmma yɔngu vana cindaa-an.» 11Mí cuaa mulul ndu aa: «Maalii, a nɔ ɲɛ kɔandaa mamɛn te, nduyɛ soon-kólaa yingila. Kuɛɛ nɔm óò fula yɛnin a mɛmma cindaama man? 12Mò va maa nɔm hiow Yakɔb fuɲa naa mama ke naa soon-kólaa ho-o ni? Ndu pila kol sindɛ mɛmma soondo ho nda poaa ndɔa a cɔlua ndɔa.» 13Mí Yeesu mulul ndu aa: «Vana-vana kol pɛ mɛnndan man, kolɔɔ bii vɛlɛ ndu, 14kɛ vana kol pɛ mɛmma ya co ndu yɔngu-an, kolɔɔ bii lɛnin ndu lɔ́ɔ́-lɔ́ɔ̀ le. Mɛmma ya co ndu man yɔngu-an ma siŋnunnin pee-lebollo ndu nin, mì mɛmma ndɔan ma kɔɛ háá o cinda fɛɛn-fɛɛndo nin.» 15Mí vuɛɛndo dimul ndu aa: «Maalii, ke ya mɛmma man, haliko kolɔɔ bii lɛ ya mì hin mamɛn kɔndɔɔ nanu le.»
16Mí Yeesu dimul ndu aa: «Kɔ veelu pɔnɔ nɔm mà muungu nanu.» 17Mí vuɛɛndo mulul ndu aa: «I nɔ pɔnɔ le.» Mí Yeesu dimul ndu aa: «A nɔ dí le dimio maa a nɔ pɔnɔ le. 18Kani a kei piaandua nda ŋuɛɛnu o ba. O n co sisa o ba-o, ndu bɛɛ co pɔnɔ nɔm te. Lelan taa dimi lende pɛ, a dimi toɲa.» 19Mí vuɛɛndo dimi aa: «Maalii, i ce maa vana-tɛɛngaa-diom Hala-o n co ni. 20O pembei he coo fuɲaa naa biilu Hala ni, kɛ niaa Yuifia co dimio maa Yerusalɛm nɛɛ biilaa Hala-a co ni.» 21Mí Yeesu dimul ndu aa: «Vuɛɛndo laalan ya, telenndo co tiiya, la biilu lɛnin Pua o pembei he coo te kon te Yerusalɛm te. 22Ɲɛ niaa sina loo niaa co biiloo ni, naa naa yɛ, ɲɛ naa n sina-o naa n co biiloo ni. Kani Hala Yuifia o ba cindaa fula ni. 23Kɛ telen co tiiya, o cuu yɛ nin bɛɛ tiiya, mì vanaa biilaa kpeekpeiya biilu Pua o kɔllo a o toɲaa nin, kani vanaa biilaa vaa lende Pua co nuwviaa ni. 24Kɔllo Hala co ni, lelan mɛɛ mì vanaa co ndu biiloo-a biilu ndu a kɔllo a o toɲaa nin.»
25Mí vuɛɛndo dimul ndu aa: «I sina maa vana Mɛlɛka hɛli-o co hunɔɔ, Krista pɛɛn. Telen o hunnin-ndo, o tɛɛsialnin naa dɛnndan kpow.» 26Mí Yeesu dimul ndu aa: «Ya kpeekpei co ndu ni, ya co hoo sɔɛi o nɔm ndo-o pɛɛn!»
27A lo suukan kon, mí kaandeŋaa ndɔa hun, mí kɔndɔfillo bii nda le ndu komallo sɔɛi nda vanalanɔɔ. Kɛ vana-vana ɲuna ndu le sɔɛi nda va nda cua kon-nde o kɔɔ le. 28Mí cuaa mal niko bonyii ndɔɛi, mó kɔa ciee, mó dimul vannda aa: 29«La hun tofa vɔ langbanɔɔ pum, o cii ya dɛnnda ya tosa lan kpede dimul, o kɛɛ va ndu le co Krista le!» 30Mí vanaa va o kobio nin-nda yom, má kɔa nɛɛ Yeesu va-a.
31O telen kon, kaandennda va Yeesu ɲɔɔloo aa: «Kɔɔfa, dio ɲɛdiaa!» 32Kɛ mó dimul nda aa: «I nɔ ɲɛdiaa nuu, o niaa sina loo.» 33O kon mí kaandennda va dimulanndo aa: «Mò va maa vanndo ke ndu ɲɛdiaa ni?» 34Mí Yeesu dimul nda aa: «Ɲɛdiaa nuu co hɛnan vana vem ya-o tosaa a vali ndɔɔ siowvo ni. 35Vɛ̀ɛ̀ nuaa le niaa co dimio le maa o lo paangon n'hiɔɔlu le kovɔɔlan tiiyaa. Kɛ ya, i co niaa dimul: la heelu vɔ hɔlla mì la tofa mɛɛ ciɛɔn vesa le kovɔɔ yɛ. 36Vana koavaa co nin bɛɛ salaa sɔlaa, mo va kullon cuungiaa le cinda fɛɛn-fɛɛndo, haliko mi vana saŋaa nda vana koavaa dɔwnun ɲaale latulu. 37Kani toɲaa sɔɛi taloo dimi-e co ni aa: ‹Hoo co saŋɔɔ, mì o pilɔɔ va kovɔɔ.› 38I vem niaa kovɔɔ o ciɛi niaa tosa baala le-i nin, nɛɛ vanaa celen a tosa baalaa-a pɛɛn, o baala nda sanga tosaa-o nin niaa luɛi nuaa ni.»
39Mí Samaria bɔɔ-bɔɔ laalan Yeesu o kobi kon nin le seile cua kon va timbio a ndu o kɔɔ-len aa: «O cii ya dɛnnda ya tosa lan kpede dimul.» 40O kon Samaria hunɔɔ o ndu lo, má tɛɛlun ndu le lou nda ndaa latulu. Mó tosa lon palɛi ndii ŋiin. 41Mí vannda laalan vɛlɛ taw le sɔɛi ndɔɛi, 42má va cuaa dimullo aa: «O co lɛ le ɲɛ n dimul naa-o le naa n laalan te, kani naa pila n tuei, nduyɛ n sina maa ndu co Vana ciindiaa ceendo lekɛ́ndɛi ni.»
Yeesu singi po simlacinɔ bɛndoo
43Palɛi ŋiiŋii ken hiovɔɔ, mí Yeesu faŋan ndon le kɔlan Kalile. 44Kani mí ndu pila ndóò timbi seilen aa: «Vana-tɛɛngaa-diom Hala-o sɔla biiloo o ndu lo le.» 45Ndóò tiiyaa Kalile, mí Kalilea bɔŋa ndu a ɲaaloo, kani ndáà ce nin ɲɛ-ɲɛ ndóò tosa Yerusalɛm o kafoo coo. Bau nda bɛɛ a va o kafo ndáà kɔɛ kon-ndo.
46O kon mí Yeesu muungu Kana o tàndá Kalile-o nin, nɛɛ ndóò mangala mɛnndan mɔiyan-nda. Simlacinɔ bɛndoo pum va Kapɛrnaum, po ndɔɔ va a nàá. 47Ndóò tuɛyɔɔ maa Yeesu cɛn Yuda mó hun Kalile, mó kɔa o ndu lo, mó tɛɛlun ndu le tolɔɔ Kapɛrnaum le po ndɔɔ singio piɔ́mndo o ba. 48Mí Yeesu dimul ndu aa: «Te o co mì la ce dɛnnda kɔndɔfiltan a kaamaalan te, la laalan dɔ́ɔ́ le!» 49Mí simlacinɔ bɛndu kon dimul Yeesu aa: «Maalii, keleŋa lakɔ yɔŋii pole nilen le vunnun.» 50Mí Yeesu dimul ndu aa: «Kɔ, po nɔmndo muungu yoomu.» Mí langbanɔ kon laalan a sɔɛi Yeesu dimul ndu-e, mó kɔannun. 51O lo o muungoo, má bɔŋan nda buɛyaa ndɔa. Má dimul ndu maa po ndɔɔ muungu yoomu. 52Mó ɲuna nda telen o yɛlɛma-o. Má dimul ndu aa: «A lɛɛlɛ tasoo o paale yɔngannden ciɛi kpafii dialun tuwvon mal ndu ni.» 53Mí fuɲa ndɔ sina dɔ́ɔ́ maa a telen kon kpeekpei Yeesu ndóò dimul ndu ni aa: «Po nɔmndo muungu yoomu.» O kon, mó laalan Yeesu nda vanaa va o ndu lo cɛinin-nda kpow. 54Ndu yɔŋnun dɛnɛ kɔndɔfili diinndɔ Yeesu tósa telen o mal Yuda, mó hun Kalile-o kɔɔli ni.
Àwon tá yàn lọ́wọ́lọ́wọ́ báyìí:
Nsaŋ 4: BKG
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Alliance Biblique en Guinée
