Kĩambĩrĩria 15
15
Kĩrĩĩkanĩro kĩa Ngai na Aburamu
1Thuutha wa maũndũ macio Aburamu nĩagĩire na kĩoneki akĩigua MWATHANI akĩmwĩra atĩrĩ, “Aburamu, ndũkaae gwĩtigĩra. Nĩngũkũgitĩra kuuma ũgwatiinĩ na ngũhe kĩheeo kĩnene mũno.”
2No Aburamu, agĩcookia atĩrĩ, “MWATHANI Ngai, kĩrĩa ũkũũhe gĩkũng'una na kĩ amu ndikĩrĩ ciana? Mũndũ ũrĩa ũkaangaya nĩ Eliezeri wa kuuma Damasiki. 3Wee ndũrĩ wahe ciana, na ĩmwe ya ngombo ciakwa nĩyo ĩkaangaya.”
4Ningĩ nĩaiguire MWATHANI akĩmwarĩria akĩmwĩra atĩrĩ, “Ngombo ĩyo yaku ĩĩtagwo Eliezeri tiyo ĩgaakũgaya; mũũrũguo kũna nĩ we ũgaakũgaya.” 5#Aro 4.18; Ahib 11.12 Agĩcooka akĩmuumia nja akĩmwĩra atĩrĩ, “Tatiira maitho, ũgerie gũtara njata; ũkaagĩa na njiarwa nyingĩ ta ũguo.”
6 #
Aro 4.3; Agal 3.6; Jak 2.23 Aburamu agĩĩtĩkia MWATHANI, na nĩ ũndũ wa ũguo MWATHANI agĩkenio nĩ we na akĩmũtua mũthingu.
7Ningĩ MWATHANI akĩmwĩra atĩrĩ, “Nĩ niĩ MWATHANI ũrĩa wakũrutire Uru bũrũriinĩ wa Babilonia, ngũhe bũrũri ũyũ ũtuĩke waku.”
8No Aburamu akĩũria atĩrĩ, “MWATHANI Ngai, ingĩmenya atĩa atĩ bũrũri ũyũ nĩũgaatuĩka wakwa?”
9Naake akĩmũcookeria atĩrĩ, “Ndeehere moori, harika, na ndũrũme; o nyamũ ĩkorwo ĩ ya mĩaka ĩtatũ, na ũndeehere ndutuura, na ndirahũgĩ.” 10Naake Aburamu akĩreehere Ngai nyamũ icio, agĩcitinangia icunjĩ igĩrĩ, agĩciiga mĩhari ĩĩrĩ iringaine, no nyoni ndacitinangirie. 11Nderi igĩũka irĩe nyama icio, no we agĩciriĩra.
12 #
Ayub 4.13,14 Na rĩĩrĩ, riũa rĩgĩthũa, Aburamu akĩnyiitwo nĩ toro mũnene mũno, akĩigua guoya na akĩmaka. 13#Tha 1.1-14; Atũ 7.6 Naake MWATHANI akĩĩra Aburamu atĩrĩ, “Njiarwa ciaku nĩigaatuĩka ageni bũrũriinĩ mũgeni, na nĩigaatuĩka ngombo kuo na inyamaario mĩaka magana mana (400). 14#Tha 12.40-41; Atũ 7.7 No rĩĩrĩ, nĩngaaherithia bũrũri ũcio ũgaacitua ngombo, na ikiuma bũrũri ũcio wa ũgeni, nĩigaakuua ũtonga mũingĩ. 15No wee-rĩ, ũgũtũũra nginya ũkũrũinĩ, na ũgaakua na thaayũ, na ũthikwo. 16Njiarwa ciaku igaacooka gũũkũ rũciaroinĩ rwa kana, amu ngaingata Aamori maagana ũguo atĩ, no mũhaka maherithio.”
17Narĩo riũa rĩathũa kwagĩa na nduma, mwaki warĩ nyũngũ watoogaga na kĩmũrĩ kĩarĩrĩmbũkaga igĩũka o rĩmwe ũkĩhĩtũkĩra gatagatĩ ka icunjĩ icio cia nyama. 18#Atũ 7.5 O hau MWATHANI agĩthondeka kĩrĩĩkanĩro na Aburamu akiuga atĩrĩ, “Nĩndahe njiarwa ciaku bũrũri ũyũ wothe, kuuma mũhaka wa Misiri nginya rũũĩ rwa Farati, 19o ũndũ ũmwe na bũrũri wa Akeni, Akenizi, Akadimoni, 20Ahiti, Aperizi, Arefai, 21Aamori, Akanaani, Agirigashi, na wa Ajebusi.”
Àwon tá yàn lọ́wọ́lọ́wọ́ báyìí:
Kĩambĩrĩria 15: GKN
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Gikuyu Common Language Bible with DC © Bible Society of Kenya, 2014, 2018.