Mateo 8
8
Sa Pagbulung Hu Sanglahen
(Mateo 8:1-4; Marcos 1:40-45; Lucas 5:12-16)
1Su tumubang en si Jesus duun ku bubungan madakel tungkay sa namanduma kandin. 2Amin daan sanglahen ha luminuhud diyà ta kandin daw hangyù, “Ginuu, ku mabayà ka ngaay bulungen a ikaw taini ha mahugaw ha dalu ku.”
3Dinampà hi Jesus su sanglahen daw ikagiyi, “Agkabayà a aman maulian ka.” Sagunà haena naulian. 4Dayun inikagiyan hi Jesus, “Harì ka manunultul hu bisan sin-u ba dumuun ka taena ha sinaligan hu paghalad ta daw masusi din ha naulian kad en. Maghalad ka sumalà hu Kasuguan hi Moises ta daw malimpyuwan ka daw matun-an hu mga etaw ha naulian kad en.”
Sa Pagbulung Hu Suluguen Hu Kapitan
(Mateo 8:5-13; Lucas 7:1-10)
5Su diyà en si Jesus ta Capernaum amin diyà kapitan hu sundalu ta Roma ha tuminalagbù ki Jesus daw hangyù, 6“Ginuu, agkatungkayan hu dalu sa suluguen ku diyà ta balay na harì en pakakayug-kayug daw agkasakitan gayed.”
7Tuminubag si Jesus, “Ahaen ku iman haena ta daw maulian.”
8Ba saena ha kapitan tuminubag, “Ginuu, agkagayhà a ku dumiyà ka ta balay ku aman bà nu dà ikagiya ha maulian en haena sa suluguen ku. 9Natun-an ku ha mahimu nu haini ta siak suluguen a daan hu agalen ku ha sundalu daw amin daan mga sundalu ha sakup ku. Ku ipahipanaw ku sidan agtuu gayed. Bisan inu sa igsugù ku hu suluguen ku agbuhaten din daan haena.”
10Su mapaliman haena hi Jesus nabeleng gayed daw inikagiyan din su mga etaw ha namanduma kandin, “Laus gayed sa ag-ikagiyen ku inyu ha hurà ku pa gayed naahà duun hu mga kaliwatan hi Israel ha agkailing taini sa pagtuu din. 11Ikagiyen ku inyu ha amin asem madakel ha mga etaw iling kandin ha kenà Judio ha maamul-amul daw makigsalu diyà ki Abraham daw ki Isaac daw ki Jacob duun hu tagharian hu Dios. 12Ba sa mga Judio ha iyan ngaay pigtaganahan taena ha tagharian hu Dios ilambeg paman duun hu kasukileman diyà ta guwà ha duun sidan makag-ulahuay hu kalugul daw magkakangget sa mga ngipen dan hu kasakitan.”
13Dayun inikagiyan hi Jesus haena sa kapitan, “Umulì kad en ta saena suluguen nu ha agkadaluwan maulian en tumenged hu pagtuu nu.” Aman sagunà dayun haena naulian.
Sa Pagbulung Hu Mga Etaw
(Mateo 8:14-17; Marcos 1:29-34; Lucas 4:38-41)
14Su sumeled en si Jesus diyà ta balay hi Pedro naahà din sa ugang ha bahi hi Pedro ha harì en pakabangun ta agkagenaw. 15Inibitan hi Jesus sa alima taena aman sagunà naulian. Dayun migbangun haena daw sinugbahan din say Jesus.
16Su madani en agpanukilem pinan-uwit hu mga etaw diyà ki Jesus sa mga pinanaguan en hu busaw, aman pinamugaw din sa mga busaw pinaagi hu mga lalang din daw naulian daan sa alan ha agkangadaluwan. 17Nabuhat din haena ta daw matuman sa inikagi hi Isaias sa prupita ha tagyanaen,
“Inawà din sa mga kaluyahen taw daw inuwit din sa mga dalu taw.”
Sa Agpamanduma Ngaay Ki Jesus
(Mateo 8:18-22; Lucas 9:57-62)
18Su maahà hi Jesus sa madakel ha mga etaw ha nangaamul-amul diyà ta kandin inikagiyan din sa mga tinun-an din ha lumayun sidan duun taena ha danaw. 19Amin manunudlù hu Kasuguan ha uminubay diyà ki Jesus ha minikagi, “Manunudlù, agduma a ikaw bisan hindu ka duun agpayanaen.”
20Ba tuminubag si Jesus, “Sa laku amin din tagtimaan daw sa mga tagbis amin dan daan mga dalagpuay, ba siak sa Batà hu Etaw hurà ku himlayà.”
21Amin pa daan sumusunud hi Jesus ha minikagi, “Ginuu, harì a pa makaduma ikaw iman ta iglebeng ku pa si Amay.”
22Ba inikagiyan haena hi Jesus, “Dumuma kad kanak ta su mga etaw ha hurà dan pa kinabuhì iyan en maglebeng hu mga minatay.”
Sa Pagbaldeng Hi Jesus Hu Kalamag
(Mateo 8:23-27; Marcos 4:35-41; Lucas 8:22-25)
23Si Jesus luminulan hu barutu daw sa mga tinun-an din luminulan daan. 24Su taglulan en sidan tigkan namagyu aman nataguan hu wahig haena sa barutu. Ba si Jesus tagtiduga hu kandin. 25Aman pinukaw ku mga tinun-an din daw ikagiyi, “Ginuu, luwasa kay ikaw ta agkalened kuy en.”
26Ba inikagiyan sidan hi Jesus, “Imbà kaw man agkangahaldek? Harì kaw ba diay agsalig kanak?” Dayun migbangun si Jesus daw baldenga sa kalamag daw mga baled aman sagunà migleneng.
27Sa mga tinun-an hi Jesus tungkay gayed nangabeleng ha tagyanaen, “Inu gid haini ha etawa ha bisan sa kalamag daw mga baled agtuu kandin?”
Sa Pagbulung Hu Mga Etaw Ha Tinaguan Hu Mga Busaw
(Mateo 8:28-34; Marcos 5:1-20; Lucas 8:26-39)
28Su makalayun en si Jesus daw sa mga tinun-an din diyà ta ubay ta Gadara amin diyà daruwa ha etaw ha nangapuun duun hu panlebengà ha tinaguan en hu mga busaw. Mga mabis-ay gayed sidan aman harì pakaagi sa mga etaw duun taena. Ba su masal-aw dan si Jesus 29nakapangulahì sidan ha tagyanaen, “Inu sa labet nu kanay sikaw sa Batà hu Dios? Agpasipalahan kay ba ikaw iman bisan ku kenà pa haini panahun?”
30Ubay diyà ta kandan sa madakel tungkay ha mga babuy ha tagpanuwalà 31aman pinagayukan hu mga busaw si Jesus hu kagi dan, “Ku agbugawen kay ikaw diyà kay ipaulì tayaa ha mga babuy.”
32Inikagiyan sidan hi Jesus, “Pamandiyà kaw en.” Aman sagunà guminuwà su mga busaw duun ku daruwa ha etaw daw namanagù duun ku mga babuy. Namamulaguy su mga babuy diyà ta alug daw nangakasabay sidan duun ku danaw dayun namamatay. 33Su mga etaw ha tagbantay ku mga babuy namamulaguy daan payanaen diyà ta banuwa daw intultul dan sa nahitabù ku mga babuy daw ku nainu-inu sa ingkaulii taena ha tinaguan hu mga busaw. 34Dayun inelegan si Jesus hu mga etaw. Su maahà dan haena pinagayukan dan ha umawà gayed duun taena ha lugar.
Àwon tá yàn lọ́wọ́lọ́wọ́ báyìí:
Mateo 8: bkd
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2015, Wycliffe Bible Translators, Inc. All rights reserved.
