Mateo 9
9
Sa Pagbulung Hu Piglantingan Ha Etaw
(Mateo 9:1-8; Marcos 2:1-12; Lucas 5:17-26)
1Luminulan si Jesus duun hu barutu daw uminulì duun hu banuwa din diyà ta layun. 2Amin mga etaw ha taglanting hu minatay en sa dibaluy ha lawa din daw inuwit dan haena diyà ki Jesus. Su matun-an hi Jesus ha adagi gayed sa pagsalig kandin taena ha mga etaw inikagiyan din su agkadaluwan, “Magmalipayen ka ta napasaylu en sa mga salà nu.”
3Amin daan diyà mga manunudlù, Kasuguan ha nakahenà-henà, “Saini ha etawa tagtameyes gayed hu Dios.”
4Ba saena ha mga henà-henà dan natun-an hi Jesus aman inikagiyan din sidan, “Imbà kaw taghenà-henaay hu madaet iling tayan? 5Inu diay sa malumu ha ikagiyen duun taini ha agkadaluwan? Iyan ba sa ‘Napasaylu en sa mga salà nu’ daw ku iyan ba sa ‘Bangun ka daw hipanaw kad en’? 6Ba iman igpaahà ku inyu ha siak sa Batà hu Etaw amin ku kagahem dini ta kalibutan hu pagpasaylu hu mga salà.” Aman inikagiyan din su etaw ha minatay en sa dibaluy ha lawa din, “Bangun kad, luluna sa banig nu daw ulì kad en.” 7Sagunà haena minangun daw ulì. 8Su maahà haena hu mga etaw tungkay sidan nangabeleng daw dinayè dan sa Dios tumenged ta in-ila din ki Jesus sa kagahem ha iling taena.
Sa Pag-umaw Ki Mateo
(Mateo 9:9-13; Marcos 2:13-17; Lucas 5:27-32)
9Su dumayun si Jesus naahà din sa tagpinuu ha tagpanukut hu buhis ha tagngaranan ki Mateo. Inikagiyan din haena, “Dumuma ka kanak” aman huminitindeg si Mateo daw duma kandin.
10Su tagkaen si Jesus diyà ta balay hi Mateo madakel ha mga manunukut hu buhis daw mga masinupaken sa nakigsalu kandin daw hu mga tinun-an din. 11Su maahà haena hu mga Parisiyu nanginginsà sidan duun hu mga tinun-an hi Jesus, “Imbà sa Manunudlù nuy pakigsalu ku mga limbungan ha manunukut hu buhis daw hu mga masinupaken?”
12Su mapaliman haena hi Jesus uminikagi, “Sa harì agkadaluwan harì daan tagpabulung, ba sa agkadaluwan tagkinahanglan hu mamumulung. 13Susiyen nuy ku inu sa kahulugan hu lalang hu Dios ha tagyanaen, ‘Magmahid-uwen kaw hu mga duma nuy ta iyan haini tungkay ku agkabayaan dì hu mga halad nuy.’ Ta sa pagdini ku kenà para hu mga matareng en ba sa tuyù ku iyan sa mga makasasalà.”
Sa Panginginsà Mahitenged Hu Pagsalang Hu Pagkaen
(Mateo 9:14-17; Marcos 2:18-22; Lucas 5:33-39)
14Amin mga sumusunud hi Juan Ha Tagpamautismu ha duminiyà ki Jesus daw panginginsà, “Imbà sikay daw sa mga Parisiyu tagsalang hu pagkaen ba sa ikaw ha mga tinun-an harì gayed tagsalang?”
15Tuminubag si Jesus, “Mabaluy ba diay ku amin kaamulan ha sa mga inimbita maglugul ku diyà pa ta kandan sa agpangasawa? Harì gayed haena mabaluy. Ba mauma sa panahun ha ipaawà en diyà ta kandan su agpangasawa daw human sidan agsalang hu pagkaen.
16“Hurà etaw ha agtapikan din hu bag-u pa sa daan en ha pinaksuy ta su bag-u ha manggad bà dà aglegkè daw su daan ha pinaksuy bà dà daan agkahigbit. 17Iling daan hu talaguay ha anis, ku daan en haena harì mabaluy ha taguan hu bag-u pa ha binu ta bà dà magbutu daw kahudhud su binu. Kinahanglan gayed ha sa bag-u pa ha binu duun dà daan itagù hu bag-u pa ha talaguay.”
Sa Minatay Ha Batà Daw Sa Bahi Ha Daluwanen
(Mateo 9:18-26; Marcos 5:21-43; Lucas 8:40-56)
18Su kamulu pa tag-ikagi si Jesus amin agalen ha nakauma daw luminuhud diyà ta kandin. Dayun minagayuk ki Jesus hu kagi din, “Daw pa minatay su laga-laga ku, ba ku dumiyà ka daw dampaen nu haena mabanhaw dà gayed.” 19Aman si Jesus daw sa mga tinun-an din duminuma ku agalen.
20Su diyà pa sidan ta dalan amin bahi ha sampulù en daw daruwa ha tuig sa kahudhud din. Saena uminubay diyà ta talikudan hi Jesus daw ibiti sa sagayadan hu pinaksuy taena 21ta nahenhenaan ku bahi, “Bisan ku bà a dà makaibit duun hu pinaksuy hi Jesus maulian a gayed.”
22Su lumingì si Jesus naahà din haena aman inikagiyan din, “Pandayai sa gahinawa nu ta sa ingkaulii nu iyan sa pagsalig nu kanak.” Sagunà naulian su bahi.
23Su sumeled en si Jesus duun hu balay ku agalen naahà din sa tagpamulalà daw sa madakel ha mga etaw ha ben kagulub en. 24Dayun inikagiyan din su mga etaw, “Paman-awà kaw dini ta saini ha batà hurà patay ba bà dà tagtiduga.” Ba bà dan dà agkapatawahi si Jesus. 25Su maman-awà en su mga etaw sumineled si Jesus daw ibiti sa alima ku batà aman nakabangun haena. 26Saini ha tultulanen nakalekep duun hu alan ha mga banuwa diyà.
Sa Pagbulung Hu Daruwa Ha Buta
27Su dumayun si Jesus amin daruwa ha buta ha luminupug kandin daw pangumaw, “Sikaw sa Kaliwat hi David, kahid-uwi kay gayed ikaw.”
28Su sumeled en haena duun hu balay uminubay diyà ta kandin su daruwa ha buta, aman ininsaan sidan hi Jesus, “Agtuu kaw ba ha mahimu ku ha maulian kaw?”
Tuminubag sidan, “Hee, Ginuu.”
29Dayun dinampà hi Jesus sa mga mata dan daw ikagi, “Sumalà hu pagtuu nuy maulian kaw en.” 30Sagunà sidan nakaindan. Ba binalaudan sidan hi Jesus, “Harì kaw gayed manunultul hu bisan sin-u mahitenged hu nahitabù inyu.” 31Ba su humipanaw en sidan bà dà sidan nasì nanunultul mahitenged ki Jesus, aman saena nakalekep duun hu alan ha mga banuwa diyà.
Sa Pagbulung Hu Naemaw
32Su maipus en su nakaindan ha mga buta amin daan etaw ha naemaw tumenged ta tinaguan hu busaw, saena inuwit hu mga etaw diyà ki Jesus. 33Su bugawen hi Jesus su busaw sagunà nakaikagi su emaw. Sa mga etaw diyà tungkay nangabeleng hu kagi dan, “Dini ta bugtà ta Israel daw pa gayed nahitabù sa iling taini.”
34Ba sa mga Parisiyu minikagi, “Agkabugaw din sa mga busaw pinaagi hu gahem taena ha agalen hu mga busaw.”
Sa Maluag Ha Legtayen
35Nalekep hi Jesus sa alan ha banuwa daw migtudlù duun hu mga simbahan hu Maayad ha Tultulanen mahitenged hu pagharì hu Dios daw naulian din daan sa alan ha mga dalu hu mga etaw. 36Su maahà din sa kaet-etawan nahid-uwan din gayed sidan ta agkailing sidan hu mga karniru ha agkangasamuk daw tagkangalaag ta hurà duun magbalantay. 37Dayun inikagiyan hi Jesus sa mga tinun-an din, “Maluag gayed sa legtayen daw napanday en nahinug ba atiyuay dà sa agpamanlegtay duun. 38Aman humangyù kaw duun hu Dios ha suguen din sa mamanlegtay taini ha uma din.”
Àwon tá yàn lọ́wọ́lọ́wọ́ báyìí:
Mateo 9: bkd
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2015, Wycliffe Bible Translators, Inc. All rights reserved.
