KWABASEROMA 11:1-21
KWABASEROMA 11:1-21 IZIBHALO EZINGCWELE (XHO75)
Ngoko ke ndithi, UThixo ubagibile na abantu bakhe? Nakanye! Kuba nam lo ndingumSirayeli wasembewini ka-Abraham, wesizwe sikaBhenjamin. UThixo akabagibanga bona abantu bakhe, abebazi ngenxa engaphambili. Okanye aniyazi na indawo ethetha ngoEliya esibhalweni, ukumangalela kwakhe amaSirayeli kuThixo, esithi, Nkosi, abaprofeti bakho ábabulele, nezibingelelo zakho ázichithile; mna ndisele ndedwa; afuna ke ubomi bam? Sisuka esikaThixo isihlabo sithini na kuye? Sithi, Ndizishiyele amadoda angamawaka asixhenxe, angagobanga dolo kuBhahali• wona. Ngokunjalo ke ngoko, nakweli xesha lakalokunje, kukho amasalela ngokonyulo lobabalo. Ukuba ke kungobabalo, akusengamisebenzi; okanye ubabalo alungebi saba lubabalo. Kuthiweni na ngoko? Kuthiwe, Khona oko akungxameleyo amaSirayeli akakufumananga; ke abanyuliweyo bakufumana, bathi ke abanye baqaqadekiswa; njengokuba kubhaliwe kwathiwa, UThixo ubanike umoya wokuqoba, amehlo okuba bangaboni, neendlebe zokuba bangeva, kwada kwaba yimini yanamhla. Kanjalo uDavide uthi, Isithebe sabo masibe sisibatha, nesihogo sokubambisa, Nesikhubekiso, nesiphindezelo kubo: Makenziwe abe mnyama amehlo abo, ukuba bangàboni; Nomhlana wabo wugobe amaxa onke. (INdum. 69:2223) Ndithi ngoko, Bakhubeka ukuze bawe na? Nakanye! Kuthe ngesiphoso sabo, usindiso lwafika kuzo iintlanga, ukuze zibakhweletise. Ukuba ke isiphoso sabo siba bubutyebi behlabathi, nokuncipha kwabo kuba bubutyebi beentlanga, yobeka phi na inzaliseko yabo? Kuba ndithetha kuni, zintlanga. Ekubeni okunene mna ndingumpostile• weentlanga, ndiyaluzukisa ulungiselelo lwam; ukuba ndingáde ndibakhweletise abenyama yam, ndisindise inxenye yabo. Kuba xa ukulahlwa kwabo kuluxolelaniso lwehlabathi, koba yintoni na ukwamkelwa kwabo? Akububomi obuphuma kwabafileyo, yini na? Ukuba ke intlahlela ingcwele, ikwanjalo nentlama; ukuba ke ingcambu ingcwele, akwanjalo namasebe. Ke ukuba inxenye yamasebe yaxhuzulwa, wathi ke wena, úngumnquma wasendle nje, wamiliselwa phakathi kwawo, waba lidlelane nengcambu nokutyeba komnquma: musa ukuwaqhayisela amasebe; ke ukuba ùyawaqhayisela, yazi ukuba asinguwe oyithweleyo ingcambu; yingcambu ethwele wena. Ùya kuthi ngoko, Áxhuzulwa amasebe, ukuze mna ndimiliselwe. Utyaphile; áxhuzulwa ngokungakholwa, ke wena umi ngokholo; musa ukukratsha, yoyika. Kuba, xa uThixo angawaconganga awasemvelweni amasebe, lumka hleze angakucongi nawe lo.
KWABASEROMA 11:1-21 IBHAYIBHILE (XHO96)
Ngaba uThixo ubalahlile na abantu bakhe amaSirayeli? Nakanye! Nam ngokwam ndingumSirayeli, ndiyinzala ka-Abraham, ndingowendlu kaBhenjamin. UThixo akabalahlanga abantu bakhe awabanyula mhlamnene. Kaloku niyayazi *eziBhalweni indawo apho uEliya awamangalela khona kuThixo amaSirayeli, esithi: “Nkosi, amaSirayeli ababulele *abashumayeli bakho, namaqonga akho amadini awadilizile. Ndim ndodwa oseleyo, kwaye nam afuna ukundibulala.” Limphendula njani ke ilizwi likaThixo? Lithi: “Ndizishiyele amadoda angamawaka asixhenxe angamnqulanga *uBhali.” Kanti nangoku ke kukwanjalo. Lisekho iqaqobana elichongwe nguThixo ngokwesisa sakhe. Lona lachongwa nguThixo ngokwesisa sakhe, elibabala, engalinyuli ngenxa yezenzo zalo. Kaloku ukuba uThixo wayenyula abantu ngokwezenzo zabo, isisa sakhe asingebi saba sisisa. Kúthiweni ke ngoko? Makuthiwe amaSirayeli akayifumananga into awayeyizondelele. Kodwa iqaqobana elichongwe nguThixo layifumana, aza ke wona amanye aqaqadekiswa, njengoko iziBhalo zitshoyo ukuthi: “UThixo ubenze badengeka, baza àbabona ngamehlo, àbeva ngeendlebe; ibe ke unangoku basenjalo.” UDavide naye uthi: “Mababanjwe, bavingcelwe kumatheko abo; mabakhubeke, beve impindezelo. Mabamfanyekiswe, bangaboni, babandezeleke maxa onke.” Ngaba isiwo samaSirayeli sawazisela intshabalalo? Nakanye! Kwathi ngesi siwo sawo usindiso lwazifikela iintlanga, khon' ukuze ziwavusele ikhwele. Esi siphoso samaSirayeli saluphathela intaphane yeentsikelelo uluntu; ngoko ke ukoyisakala kwawo kwaba yinzuzo enkulu ezintlangeni. Zobeka phi na ke ukusikeleleka iintlanga akuba amaSirayeli ezinikele ngokupheleleyo kuThixo! Ngoku mandithethe nani, zintlanga. Okunene ekubeni mna ndingulowo *uthunywe kuzo iintlanga, ndizimisele ukuwenza ubalasele umsebenzi wam, ndide ndivusele amawethu ikhwele, ndiyisindise inxalenye yawo. Kaloku xa ukulahlwa kwawo kuxolelanise ihlabathi noThixo, koba njani ukwamkelwa kwawo? Kofana novuko lwabafileyo! Ukuba isonka sokuqala sentlama singcwalisiwe ngokwenziwa umnikelo, kwangokunjalo zingcwele zonke ezinye ezenziwe ngaloo ntlama. Ukuba iingcambu zomthi zingcwele, kwangokunjalo namasebe angcwele. Inxalenye yamasebe omnquma yaqhuzulwa kwamiliselwa amasebe omnquma wasendle esiqwini sawo. Nina ke, zintlanga, ningaloo masebe omnquma wasendle. Nanikwa inxaxheba kwincindi yeengcambu eziphilileyo zomnquma. Musa ke ukuziphakamisa kunamanye amasebe. Kakade ke wena ungaqhayisa ngantoni? Asinguwe kaloku othwele iingcambu, ziingcambu ezithwele wena! Kodwa wena uya kuthi: “Aqhuzulwa amasebe, ukuze kumiliselwe mna.” Unyanisile, aqhuzulwa ngenxa yokuba engakholwa, ke wena umi apho umiliselwe khona ngenxa yokuba ukholwa. Musa ke ukuba nekratshi, koko yoyika. Engawasindisanga nje kaloku uThixo amasebe omthi endalo, angákusindisa njani wena?
KWABASEROMA 11:1-21 Contemporary Xhosa Bible 2024 (CXB24)
Ngoko ke ndithi, uThixo ubagibile na abantu bakhe? Makube lee oko. Kuba nam ndingumSirayeli, wembewu ka-Abraham, wesizwe sikaBhenjamin. uThixo akabagibanga bona abantu bakhe, abebazi ngenxa engaphambili. Aniyazi na into esiyithethayo isibhalo ngoEliya? ukuba awangxengxezeleyo kuThixo ngoSirayeli, esithi, Nkosi, abaprofeti bakho ababulele, nezibingelelo zakho azichithile; mna ndisele ndedwa; afuna ke umphefumlo wam. Lithini na ke ilizwi likaThixo kuye? Ndizishiyele amadoda angamawaka asixhenxe, angaguqanga dolo kuBhahali. Ngokukwanjalo ke ngoko, nakweli xesha lakalokunje, kukho amasalela ngokonyulo lobabalo. Ukuba ke kungobabalo, akusengamisebenzi; okanye ubabalo alungebi saba lubabalo. Ukuba ke kungokwasemisebenzini, akuselubabalo; okanye umsebenzi awusengumsebenzi. Kuthiweni na ke ngoko? uSirayeli akakufumananga oko abekufuna; ke abanyuliweyo bakufumana, bathi ke abanye baqaqadekiswa njengokuba kubhaliwe kwathiwa, uThixo ubanike umoya wobuthongo, amehlo okuba bangaboni, neendlebe zokuba bangeva, kwada kwanamhlanje. Uthi ke uDavide, Isithebe sabo masibe ngumgibe, nesirhintyelo, nesikhubekiso, nembuyekezo kubo; Makabe mnyama amehlo abo, ukuba bangaboni; Nomhlana wabo wugobe ngamaxesha onke. Ndithi ngoko, Bakhubeka ukuze bawe na? Nakanye! Ngesiphoso sabo usindiso lwafika kuzo iintlanga, ukuze zibakhweletise. Ukuba ke isiphoso sabo saba bubutyebi behlabathi, nokuncipha kwabo kwaba bubutyebi beentlanga; Kobeka phi na ke inzaliseko yazo? Kuba ndithetha kuni, zintlanga. Ekubeni okunene mna ndingumpostile weentlanga, ndiyaluzukisa ulungiselelo lwam; ukuba ndingade ndibakhweletise abenyama yam, ndisindise inxenye yabo. Kuba xa ukulahlwa kwabo kuluxolelaniso lwehlabathi, koba yintoni na ukwamkelwa kwabo? Akububomi obuphuma kwabafileyo, yini na? Ukuba ke intlahlela ingcwele, ikwanjalo nentlama; ukuba ke ingcambu ingcwele, akwanjalo namasebe. Ukuba inxenye yamasebe yavuthululwa, wathi ke wena, ungumnquma wasendle, wamiliselwa phakathi kwawo, wabelana nawo ngeengcambu nasekutyebeni komnquma; Musani ukuwaqhayisela amasebe; ke ukuba uyawaqhayisela, yazi ukuba asinguwe oyithweleyo ingcambu; Uya kuthi ngoko, Axhuzulwa amasebe, ukuze mna ndimiliselwe. Ke; aqhuzulwa ngenxa yokungakholwa, ke wena umi ngokwaselukholweni; musa ukukratsha, yoyika; Kuba, xa uThixo angawaconganga awasemvelweni amasebe, lumka hleze angakucongi nawe lo.
KWABASEROMA 11:1-21 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
NDITI ngako: UTIXO wabalahla na abantu bake? Kwanga kungebe njalo! Ngokuba nam ndingum‐Sirayeli, kwinzalo ka‐Abrahame, kwisizwe sika‐Benjamine. UTIXO akabalahla abantu bake obebazi kwa pambili. Anikwazi na oko sikutsho isiba̔lo kuyo imbali ka‐Elija, — okokuba uyakalazela KUTIXO ngo‐Sirayeli, esiti: YEHOVA! abaprofite bako bababulele, nezibingelo zako bazici̔tile; sendisele mna ndedwa, nobomi bam bayabufuna? Noko iti nina kuye impendulo KATIXO? Ndizisalisele amadoda amawaka asixe̔nxe, lawo angagobanga dolo ku‐Bali. Kwa njalo ke nakwelixesha lakaloku nje kuko isisalela ngokwoqasho lwofefe. Kodwa ukuba kungofefe, akusengayo imisebenzi; okanye ufefe alubi selulo ufefe: kodwa ukuba kungayo imisebenzi, akuseko ufefe; okanye umsebenzi awusenguwo umsebenzi. Yinina pofu? Oko bakufunayo o‐Sirayeli, oku abakuzuzanga; kodwa abaluqashwa bakuzuza; bati abaseleyo baba lukuni, (njengokuba kuba̔liwe ukuti: UTIXO wabanika umoya wokwozela, amehlo okuba bangaboni, nendlebe zokuba bangeva;) kwada kwayimini yanamhla. Naye u‐Davide uti: Isitebe sabo masenziwe umgibe, nesibata, nesixakaniso, nempindezelo kubo: amehlo abo makenziwe mnyama, baza bangaboni; nomhlana wabo uwugobe pantsi futi. Nditi ngako: Baku̔beka na ukuze bawe? Kwanga kungebe njalo! koko ngesiposo sabo usindiso luze kubo abaheyideni, ize bavuselwe ubukwele. Kodwa ukuba isiposo sabo sibubutyebi belizwe, nokuba ukuncipa kwabo kububutyebi babaheyideni, kwoba njalo kangakananina ngakumbi ukuzaliseka kwabo? Ngokuba nditeta kuni bangabaheyideni: ngendawo yokuba ndingumpostile wabaheyideni, ubukonzi bam ndiyabudumisa; ukuba kungati ndingabavusela ubukwele abayinyama yam, ndize ndisindise inxenye kubo. Ngokuba ukulahlwa kwabo ukuba kukukuxoliswana kwelizwe, kwoba yinto nina ukwamkelwa kwabo, kupela bubomi buvuka ekufeni? Kanjalo ukuba isiqalo sentlama singcwele, linjalo nesimba layo; nokuba ingcambo ingcwele, anjalo namasebe. Kodwa ukuba inxenye yamasebe yapulwa, nawe, ungumnquma wasendle nje, wamiliselwa pakati kwawo, waza wabelwa kwingcambo nakukutyeba kwomnquma kunye nawo, ungaqa̔yiseli amasebe. Kodwa ukuba uyawaqa̔yisela, asi nguwe oxasa ingcambo, yingcambo exasa wena. Woti ngako: Amasebe apulwa, ukuze mna ndimiliselwe. Kulungile ke: ngenxa yokungakolwa kwawo apulwa wona, nawe umi ngokukolwa kwako. Ungaqanqalazi, uti woyike: ngokuba lawo angamasebe ngemvelo ukuba UTIXO akayekanga wona, lumka hleze kungati angayeki nawe.