UMARKO 10:1-31
UMARKO 10:1-31 IZIBHALO EZINGCWELE (XHO75)
Esukile apho, uzé kungena emideni yakwaYuda, ecanda kweliphesheya kweYordan. Kubuya kuhlanganiselane izihlwele kuye; ubesithi ke, njengoko ebeqhele ngako, abuye azifundise. Bafika abaFarisi, bambuza ukuba kuvumelekile na ukuba indoda imale umfazi wayo; batsho bemlinga. Waphendula ke wathi kubo, UMoses waniwisela mthetho mni na? Bathi bona, UMoses wakuvumela ukubhala incwadi yokwahlukana, nokumala. Waphendula uYesu wathi kubo, Ngokuba lukhuni kwentliziyo yenu, wanibhalela loo mthetho; kodwa kwasekuqalekeni kokudalwa, uThixo wabenza bayindoda nenkazana. Ngenxa yoko umntu uyakushiya uyise nonina, anamathele emfazini wakhe; baze abo babini babe nyama-nye. Ngako oko, àbasebabini, banyama-nye. Oko ke ngoko uThixo akumanyileyo, makungahlulwa mntu. Endlwini abafundi bakhe babuya bambuza ngayo loo nto. Athi kubo, Othe wamala umfazi wakhe, wazeka omnye, uyakrexeza kulowa. Nokuba umfazi uthe wayala indoda yakhe, wendela kwenye, uyakrexeza. Baye bezisa abantwana kuye ukuze abachukumise; basuka abafundi babakhalimela abo babazìsayo. Ke kaloku ekubonile oku uYesu, wacaphuka, wathi kubo, Bavumeleni abantwana beze kum, ningabaleli: ngokuba ubukumkani bukaThixo bubobabo banjalo. Inene ndithi kuni, Othe akabamkela ubukumkani bukaThixo njengomntwana, akayi kukha angene kubo. Waza wabawola, wazibeka izandla phezu kwabo, wamana ebasikelela. Akubon' ukuba uyaphuma, uya endleleni, kweza othile ngokubaleka, wawa ngamadolo kuye, wambuza esithi, Mfundisi ulungileyo, ndénze ntoni na, ukuze ndibudle ilifa ubomi obungunaphakade? Uthe ke uYesu kuye, Yini na ukuba uthi ndilungile? Akukho ulungileyo, mnye kwaphela — nguThixo. Uyayazi imithetho: Musa ukukrexeza, musa ukubulala, musa ukuba, musa ukungqinela ubuxoki, musa ukulumkisa, beka uyihlo nonyoko. Uphendule ke yena wathi kuye, Mfundisi, zonke ezo zinto ndazigcina, kwasebuncinaneni bam. Uthe ke uYesu, ondele kuye, wamthanda, wathi kuye, Kukho nto-nye uyisweleyo: hamba uye kuthengisa ngeento zonke onazo, uphe amahlwempu, woba nobutyebi ke emazulwini; yiza ke undilandele, uwuthwele umnqamlezo. Wathi ke khunubembe ngelo zwi, wemka ebuhlungu; kuba ebenemfuyo eninzi. UYesu esingasingile, wathi kubafundi bakhe, Hayi, ukuba ngenkankulu ukuya kungena kwabo banobutyebi ebukumkanini bukaThixo! Ke bathi qhiphu umbilini abafundi ngamazwi akhe. Aphinde ke uYesu, aphendule athi kubo, Bantwana, hayi, ukuba ngenkankulu ukuthi abo bakholosé ngobutyebi bangene ebukumkanini bukaThixo! Kulula ukuba inkamela iphumele entunjeni yenaliti, kunokuba isityebi singene ebukumkanini bukaThixo. Baye bekhwankqiswa ke ngokuncamisileyo, besitshono ukuthi, Ngubani na ongásindiswayo? Óndele ke kubo uYesu, uthi, Kubantu akunakwenzeka; kuye yena uThixo akunakuba kungenzeki; kuba zonke izinto zinako ukwenzeka kuye uThixo. Waqala uPetros ukuthi kuye, Uyabona, thina sishiye iinto zonke, sakulandela. Waphendula uYesu wathi, Inene ndithi kuni, akukho namnye ushiye indlu, nokuba ngabazalwana, nokuba ngoodade, nokuba nguyise, nokuba ngunina, nokuba ngumfazi, nokuba ngabantwana, nokuba ngamasimi, ngenxa yam nangenxa yeendaba ezilungileyo ezi, ongayi kuthi amkeliswe kalikhulu: ngoku ngeli xesha, izindlu, nabazalwana, noodade, noonina, nabantwana, namasimi, ndawonye neentshutshiso; nakwelizayo iphakade, ubomi obungunaphakade. Ke baninzi abokuqala abaya kuba ngabokugqibela, nabokugqibela abaya kuba ngabokuqala.
UMARKO 10:1-31 Contemporary Xhosa Bible 2024 (CXB24)
Esukile apho, uze kungena emideni yakwaYuda, ecanda kweliphesheya kweYordan. Wabuya wabafundisa ngokwesiqhelo. Beza kuye abaFarisi, bambuza ukuba kuvumelekile na ukuba indoda imale umfazi wayo? emlinga. Waphendula ke wathi kubo, Waniwisela mthetho mni na uMoses? Bathi ke bona, uMoses wakuvumela ukubhala incwadi yokwahlukana, nokumala. Waphendula uYesu wathi kubo, Ngokuba lukhuni kwentliziyo yenu, wanibhalela loo mthetho; Kodwa kwasekuqalekeni kwendalo, uThixo wabenza baba yindoda nenkazana. Ngenxa yoko ke, umntu womshiya uyise nonina, anamathele emfazini wakhe; baze abo babini babe nyama-nye. Ngako oko, abasebabini, banyama-nye. Oko ke ngoko uThixo akumanyileyo, makungahlulwa mntu. Endlwini abafundi bakhe babuya bambuza ngayo loo nto. Athi kubo, Othe wamala umfazi wakhe, wazeka omnye, uyakrexeza kulowa. Nokuba umfazi uthe wayala indoda yakhe, wendela kwenye, uyakrexeza. Kwaye bezisa abantwana kuye ukuze abachukumise; basuka abafundi babakhalimela abo babazisayo. Ke kaloku ekubonile oku uYesu, wacaphuka, wathi kubo, Bavumeleni abantwana beze kum, ningabaleli: ngokuba ubukumkani bukaThixo bubobabo banjalo. Inene, ndithi kuni, Othe akabamkela ubukumkani bukaThixo njengomntwana, akayi kukha angene kubo. Waza wabawola, wabeka izandla phezu kwabo, wabasikelela. Ephumile ke, uya endleleni, kweza othile ngokubaleka, wawa ngamadolo kuye, wambuza esithi, Mfundisi ulungileyo, ndenze ntoni na, ukuze ndibudle ilifa ubomi obungunaphakade? Uthe ke uYesu kuye, Yini na ukuba uthi ndilungile? Akukho ulungileyo, mnye kwaphela, nguThixo. Uyayazi imithetho: musa ukukrexeza, musa ukubulala, musa ukuba, musa ukungqina ubuxoki, musa ukulumkisa, beka uyihlo nonyoko. Uphendule ke wathi kuye, Mfundisi, zonke ezo zinto ndazigcina, kwasebuncinaneni bam. Uthe ke uYesu, ondele kuye wamthanda, wathi kuye, Kukho nto-nye uyisweleyo: hamba uye kuthengisa ngeento zonke onazo, uphe amahlwempu, woba nobutyebi ke emazulwini; yiza, uwuthabathe umnqamlezo, uwulandele, mna. Wathi ke khunubembe ngelo zwi, wemka ebuhlungu; kuba ebenemfuyo eninzi. uYesu esingasingile, wathi kubafundi bakhe, Hayi, ukuba ngenkankulu ukuya kungena kwabo banobutyebi ebukumkanini bukaThixo! Bakhwankqiswa ke abafundi ngamazwi akhe. Wabuya waphendula ke uYesu, wathi kubo, Bantwana, hayi, ukuba ngenkankulu ukuthi abo bakholose ngobutyebi bangene ebukumkanini bukaThixo! Kulula ukuba inkamela iphumele entunjeni yenaliti, kunokuba isityebi singene ebukumkanini bukaThixo. Baye bekhwankqiswa ke ngokuncamisileyo, besitshono ukuthi, Ngubani na ongasindiswayo? Ondele ke uYesu, wathi kubo, Kubantu akunakwenzeka; kuye yena uThixo akunakuba kungenzeki; kuba zonke izinto zinako ukwenzeka kuye uThixo. Waqala uPetros ukuthi kuye, Uyabona, thina sishiye iinto zonke sakulandela. Waphendula uYesu wathi, Inene, ndithi kuni, Akukho namnye ushiye indlu, nokuba ngabazalwana, nokuba ngoodade, nokuba nguyise, nokuba ngunina, nokuba ngumfazi, nokuba ngabantwana, nokuba ngamasimi, ngenxa yam nangenxa yeendaba ezilungileyo ezi, ongayi kuthi amkeliswe kalikhulu: ngoku ngeli xesha, izindlu, nabazalwana, noodade, noonina, nabantwana, namasimi, ndawonye neentshutshiso; nakwelizayo iphakade, ubomi obungunaphakade. Ke baninzi abokuqala abaya kuba ngabokugqibela; nabokugqibela abokuqala.
UMARKO 10:1-31 IBHAYIBHILE (XHO96)
Emkile apho, uYesu waya kwelakwaJuda naphesheya kweJordan. Kwabuya ke kwahlanganisana izihlwele ngakuye, waza wathi ngokwesiqhelo sakhe wazifundisa. Bafika *abaFarasi, bathi ngokumlinga bambuza ukuba kuvumelekile na ukuba indoda imale umfazi wayo. Waphendula wathi kubo: “UMosis waniwisela mthetho mni na?” Bathi bona: “UMosis uyayivumela indoda ukuba ibhale incwadi yokuqhawula umtshato, ize ke imale umfazi wayo.” Waphendula uYesu wathi kubo: “Wanibhalela lo mthetho ngenxa yokuba lukhuni kweentliziyo zenu, kodwa kwasekuqalekeni kokudalwa ‘uThixo wabenza bayindoda nomfazi. Yiyo ke loo nto indoda ishiya uyise nonina nje, inamathele kumkayo, baze bamanyane.’ Ngako oko ke àbasebabini; banye. Abo ke ngoko uThixo abamanyileyo mabangahlulwa mntu.” Endlwini abafundi bakhe babuya bambuza uYesu ngayo loo nto. Wathi ke kubo: “Othe wamala umfazi wakhe, wazeka omnye, uyakrexeza. Nokuba umfazi uthe wayala indoda yakhe, wendela kwenye, uyakrexeza.” Kwathi xa kwakuziswa abantwana kuYesu ukuba abachukumise, basuka abafundi babakhalimela abo babazisayo. Ke kaloku ekubonile oku uYesu, wakhathazeka, wathi kubo: “Bayekeni abantwana beze kum, ningabanqandi, kuba ábalawulwa nguThixo ngabanjengabo. Ndithi kuni, inene, othe akakuthobela njengomntwana ukulawulwa nguThixo, soze abuve ubuncwane bolo lawulo.” Waza wabasingatha abantwana, wabasikelela ebabeka izandla. Xa wayephuma uYesu ehamba, umntu othile weza ebaleka, waguqa phambi kwakhe, wambuza esithi: “Mfundisi olungileyo, ndingenza ntoni ukuze ndibudle ilifa ubomi obungunaphakade?” UYesu ke wathi kuye: “Kutheni usithi ndilungile nje? Akukho mntu ulungileyo. Mnye kuphela olungileyo: nguThixo. Uyayazi le mithetho ithi: ‘Uze ungabulali; uze ungakrexezi; uze ungebi; uze ungangqini ubuxoki; uze ungaqhathi; beka uyihlo nonyoko.’ ” Waphendula yena wathi kuye: “Mfundisi, zonke ezo zinto ndazenza kwasebuncinaneni bam.” UYesu wathi akumondela, weva emthanda, wathi kuye: “Kukho nto inye uyisweleyo: hamba uye kuzithengisa zonke izinto onazo, uyiphe amahlwempu imali leyo; woba nobutyebi ezulwini; uze kum ke, undilandele.” Wadana akukuva oko, wemka ebuhlungu, kuba wayesisinhanha. UYesu ke esinga-singile, wathi kubafundi bakhe: “Hayi ubunzima bokuba izityebi zikuxhamle ukulawulwa nguThixo!” Ke abafundi bakhe bamangaliswa ngala mazwi akhe. Waza uYesu waphinda wathetha nabo, wathi kubo: “Bantwana bam, hayi ubunzima bokuxhamla ukulawulwa nguThixo. Kungálula ukuba inkamela iphumele entunjeni yenaliti, kunokuba isityebi sixhamle ubuncwane bokulawulwa nguThixo.” Bamangaliswa kunene, bathi omnye komnye: “Ngubani ke onokusindiswa?” Ondele kubo, uYesu wathi: “Kubantu oku akunakwenzeka, kodwa kuThixo akunakungenzeki, kuba zonke izinto zinokwenzeka kuThixo.” Waza uPetros wathi kuye: “Khangela, thina sishiye zonke izinto sakulandela.” Waphendula uYesu wathi: “Ndithi kuni, inene, akukho namnye ushiye indlu, nokuba ngabantakwabo, nokuba ngoodade wabo, nokuba ngunina, nokuba nguyise, nokuba ngabantwana, nokuba ngamasimi, ngenxa yam nangenxa yeendaba ezimnandi, ongayi kuthi amkele kalikhulu: izindlu, nabantakwabo, noodade wabo, noonina, nabantwana, namasimi, zikunye neentshutshiso kweli phakade; aze ke athi kwelizayo iphakade amkele ubomi obungunaphakade. Baninzi ke phofu abaya kuthi bengabokuqala babe ngabokugqibela, nabokugqibela abaya kuba ngabokuqala.”
UMARKO 10:1-31 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
KEKALOKU esukile apo, weza emideni yase‐Judeya, ngecala elingapesheya kwe‐Yoredane: zati izihlwele zabutela kuye kanjako; waza wazifundisa kanjako, njengokuba ebeqelile ukwenje njalo. Kweza kuye nabafarisi, bambuza ukuba kufanelekile endodeni na ukulahla umfazi, bemlinga. Wapendula wati kubo: Ubeniyalele nto nina u‐Mosesi? Bati ke: u‐Mosesi ubevumela ukuba kuba̔lwe incwadi yokwahlukanisa, nokuba kulahlwe. Waza wapendula u‐Yesu wati kubo: Ngenxa yobulukuni bentliziyo zenu waniba̔lela lomyalelo; kodwa kwa sekuqaleni kwokudalwa, UTIXO wabenza indoda nomfazi. Ngenxa yoku umntu uya kushiya uyise nonina, anamatele emfazini wake, baze abo babini babe yinyama nye. Ngako oko abasebabini, bayinyama nye. Ngoko ke, oko UTIXO akubandakanyileyo, makungahlulwa mntu. Bati endlwini ke abadisipile bake babuya bambuza ngaleyondawo. Waza wati kubo: Osukuba elahla umfazi wake, aze azeke omnye, uyaṙexeza ngakuye. Kanjalo ukuba umfazi uyalahla indoda yake, aze ende kwenye, uyaṙexeza naye. Kwaza kwaziswa kuye abantwana, ukuze abacu̔kumise; koko abadisipile babebatetisa abo babebazisa. Kodwa akubona oko u‐Yesu, waqumba kakulu, wati kubo: Vumelani abantwana ukuza kum, ize ningabaleli; ngokuba ubukumkani BUKATIXO bubobabanjalo. Ngokwenene nditi kuni: Osukuba engamkeli ubukumkani BUKATIXO njengomntwana, akasayi kuza angene kubo. Waza wabasingata ngengalo, wabeka izandla pezu kwabo, wabatamsanqelisa. Kekaloku akupumela endleleni, kweza umntu otile ngokubaleka, waguqa pantsi kuye, wambuza, esiti: Mfundisi olungileyo! ndiya kwenza nto nina ukuze ndidle ilifa lobomi obungunapakade? Wayesiti u‐Yesu kuye: Yinina ukuba uti ndingolungileyo? akuko olungileyo, kupela umnye, o NGUTIXO. Imiyalelo uyayazi: Akuyi kuṙexeza; akuyi kubulala; akuyi kuba̔; akuyi kunqi̔na ubunqi̔na obubuxoki; akuyi kulumkisa; beka uyihlo nonyoko. Wapendula wati kuye: Mfundisi! ezizinto zonke ndizibambile kwa sebutsheni bam. Waza u‐Yesu emkangele wamtanda, wati kuye: Inye into uyisweleyo: hamba, uye utengise ngako konke onako, upe amahlwempu, wauya kuba nendyebo ezulwini; uze ke, yipate ikuruse, ulandele mna. Kodwa wati kunubembe ngelozwi, wemka elusizi; ngokuba ebe enazo imfuyo ezininzi. Waza wasingasinga u‐Yesu, wati kubadisipile bake: Kungento enqabileyo kangakananina ukuba abo banobutyebi baya kungena ebukumkanini BUKATIXO! Bati kekaloku abadisipile batela nqa amazwi ake. Kodwa u‐Yesu wabuya wapendula, wati kubo: Lusapo! kunqabile kangakananina ukuba abo batembela ebutyebini bangene ebukumkanini BUKATIXO! Kulula ukuba inkamela ipumele entunjeni yesinalite, pezu kwokuba isityebi singene ebukumkanini BUKATIXO. Babemangaliswa ngakumbi ke, besiti pakati kwabo: Ngubanina kanti ongasindiswayo? Koko u‐Yesu ebakangele wati: Ebantwini akwenzeki oku, kodwa akukokungenzekiyo KUTIXO; ngokuba zonke izinto zisenzeka KUTIXO. Waza waqala u‐Petrosi ukuti kuye: Bona ke, tina sikushiyile konke, salandela wena. Wapendula u‐Yesu wati: Ngokwenene nditi kuni: Akuko mntu oshiyileyo indlu, umhlaumbi abaninawe, umhlaumbi odade, umhlaumbi uyise, umhlaumbi unina, umhlaumbi umfazi, umhlaumbi abantwana, umhlaumbi amasimi, ngenxa yam nangenxa yevangeli, ongayi kuti kaloku nje kwelixesha amkele ngekulu, izindlu, nabaninawe, nodade, nonina, nabantwana, namasimi, kunye nazo intshutshiso, nakwelolizwe lizayo obomi obungunapakade. Kodwa baninzi abangabokuqala abaya kuba ngabokugqibela, nabangabokugqibela abaya kuba ngabokuqala.