UYOHANE 6:1-21
UYOHANE 6:1-21 IZIBHALO EZINGCWELE (XHO75)
Emveni kwezi zinto, wemka uYesu, waya phesheya kolwandle lwaseGalili, lwaseTibheriya. Wayelandelwa ke sisihlwele esikhulu, ngokuba babebona imiqondiso yakhe, abeyenza kwababesifa. Ke kaloku, wenyuka uYesu waya entabeni, wahlala phantsi khona nabafundi bakhe. Yaye ke ikufuphi ipasika,• umthendeleko wamaYuda. Ewaphakamisile ngoko uYesu amehlo akhe, ebone isihlwele esikhulu sisiza kuye, wathi kuFilipu, Sozithenga phi na izonka, ukuze badle aba? Úbesitsho ke emlinga; kuba ubeyazi yena into abeza kuyenza. UFilipu wamphendula wathi, Izonka zeedenariyo• ezimakhulu mabini azibanele, ukuze elowo athabathe intwana. Athi kuye omnye kubafundi bakhe, uAndreya, umzalwana kaSimon Petros, Kukho nkwenkwana apha, inezonka ezihlanu zerhasi neentlanzi ezimbini; kodwa ke ziyintoni na ezo kwabangakanana? Uthe ke uYesu, Bahlaliseni phantsi abantu. Kwaye ke kukho utyani obuninzi kuloo ndawo. Ahlala phantsi ngoko amadoda, engathi amawaka mahlanu inani. Wazithabatha ke izonka uYesu, wathi akubulela wababela abafundi, bathi ke abafundi bábela abo babehleli phantsi, kwaba kwanjalo nakwiintlanzi, ngangokuthanda kwabo. Bakuhlutha ke, uthi kubafundi bakhe, Buthani amaqhekeza aseleyo, ukuze kungonakali nto. Babutha ngoko, bazalisa izitya zalishumi elinazibini ngamaqhekeza abesele kubo ababedlile, ezonkeni ezihlanu zerhasi. Ngoko abantu aba, bakuwubona umqondiso awawenzayo uYesu, bathi, Lo nguye inyaniso umprofeti lowo uzayo ehlabathini. Uthe ngoko uYesu, esazi ukuba bahlalele ukuza kumbamba ngamandla, bamenze ukumkani, wabuya wemka, waya entabeni yena yedwa. Ke kaloku, kuthe kwakuhlwa, behla abafundi bakhe, baya elwandle. Bengenile ke emkhombeni, baluwela ulwandle, besiya eKapernahum; kwakusekumnyama, waye uYesu engafikanga kubo. Lwaye nolwandle lusilwa, kananjalo kuvuthuza umoya omkhulu. Bakuba ngoko begweqile izitadiya• ezingathi zimashumi mabini anazihlanu, nokuba mathathu, bambona uYesu ehamba phezu kolwandle, esiza kubo kufuphi nomkhombe; basuka boyika. Athi ke yena kubo, Ndim; musani ukoyika. Babethanda ngoko ukumamkelela emkhombeni; waza kwaoko umkhombe waba semhlabeni lowo babesiya kuwo.
UYOHANE 6:1-21 IBHAYIBHILE (XHO96)
Kwathi emva koko uYesu waya ngaphesheya koLwandle lwaseGalili, olo lukwabizwa ngokuba luLwandle lwaseTibheriya. Wayelandelwe sisihlwele esikhulu, kuba abantu babeyibonile imiqondiso awayenzayo ngokuphilisa abagulayo. UYesu wenyuka endulini, waza wahlala phantsi nabafundi bakhe. Lalisondela itheko lamaJuda ekuthiwa yiPasika. Kwathi uYesu akukhangela, wabona isihlwele esikhulu sisiza kuye, waza wathi kuFilipu: “Ngaba sinokusithenga phi na isonka esaneleyo sokutyisa le ndimbane?” Esitsho nje, wayevavanya uFilipu, kuba yena wayekwazi oko aza kukwenza. Waphendula uFilipu, wathi: “Ngathi nesonka samakhulu amabini eerandi asingekhe sanele okokuba wonke okhoyo afumane iqhekezana.” Omnye wabafundi bakaYesu, uAndreya, umntakwabo-Simon Petros, wathi kuye: “Kukho inkwenkwana apha enezonka ezihlanu zerhasi, neentlanzi ezimbini; kodwa kuyintoni na oko kule nginginya yabantu?” Waza uYesu wathi: “Bahlaliseni phantsi abantu.” Kwakukho ibala elikhulu elinengca apho, baza bahlala phantsi. Inani lamadoda lalikumawaka amahlanu. Wazithatha ke uYesu ezo zonka, wabulela kuThixo, wababela abantu ababehleli phantsi. Wenjenjalo nakwiintlanzi, baza batya banela. Bakuhlutha abantu, uYesu wathi kubafundi bakhe: “Qokelelani okuseleyo. Makungabikho nentwana emoshakalayo.” Bawaqokelela ke amaqhekeza aseleyo ezo zonka zihlanu zerhasi, kwazala iingobozi ezilishumi elinambini. Bakuwubona abantu lo mqondiso uYesu awenzileyo, bathi: “Ngenene, kuthe kanti nguye lo *umshumayeli obekade elindelwe!” Waqonda uYesu okokuba bazimisele ukuza kumthatha bamenze ukumkani, waza wemka, waya entabeni eyedwa. Kwathi kwakuhlwa abafundi bakaYesu behla baya elwandle, bakhwela isikhitshana, baluwela ulwandle, besiya eKapernahum. Nangona kwakusebusuku uYesu wayengekho kubo. Amanzi olwandle ayesilwa, kuba kwakuvuthuza umoya. Kwathi, bakuba begqibe iikhilomitha ezintlanu okanye ezintandathu bebheqa isikhitshana, babona nanko uYesu ehamba phezu kwamanzi olwandle, esondela. Boyika ke, kodwa uYesu wathi kubo: “Ndim; sanukoyika.” Bamamkela ke esikhitshaneni, kwathi kwangoko isikhitshana safika kuloo ndawo babesiya kuyo.
UYOHANE 6:1-21 Contemporary Xhosa Bible 2024 (CXB24)
Emveni kwezi zinto, wemka uYesu, waya phesheya kolwandle lwaseGalili, lwaseTibheriya. Wayelandelwa yindimbane enkulu, kuba yayiyibona imiqondiso yakhe abeyenza kwabafayo. uYesu wenyuka intaba, waza wahlala phantsi nabafundi bakhe. Yaye ke ikufuphi ipasika, umthendeleko wamaYuda. Ewaphakamisile ngoko uYesu amehlo akhe, ebone isihlwele esikhulu sisiza kuye, wathi kuFilipu, Sozithenga phi na izonka, ukuze badle aba? Ubesitsho ke emlinga; kuba ubeyazi yena into abeza kuyenza. uFilipu wamphendula wathi, Izonka zeedenariyo ezimakhulu mabini azibanele, ukuze elowo athabathe intwana. Athi kuye omnye kubafundi bakhe, uAndreya, umzalwana kaSimon Petros, Kukho nkwenkwana apha, inezonka ezihlanu zerhasi neentlanzi ezimbini; kodwa ke ziyintoni na ezo kwabangakanana? Uthe ke uYesu, Bahlaliseni phantsi abantu. Kwaye ke kukho utyani obuninzi kuloo ndawo. Ahlala phantsi ke amadoda, engathi amawaka mahlanu inani. Wazithabatha ke izonka uYesu; wathi akubulela wababela abafundi, bathi ke abafundi babela abo babehleli phantsi, kwaba kwanjalo nakwiintlanzi, ngangokuthanda kwabo. Bakuhlutha ke, wathi kubafundi bakhe, Buthani amaqhekeza aseleyo, ukuze kungonakali. Babutha ngoko, bazalisa iingobozi zalishumi elinazibini ngamaqhekeza abesele kubo ababedlile, ezonka ezihlanu zerhasi. Ngoko abantu abo, bakuwubona umqondiso awawenzayo uYesu, bathi, Lo nguye inyaniso umprofeti lowo uzayo ehlabathini. Uthe ngoko uYesu, esazi ukuba bahlalele ukuza kumbamba ngamandla, bamenze ukumkani, wabuya wemka, waya entabeni Yena yedwa. Ke kaloku, kwakuhlwa, behla abafundi bakhe, baya elwandle. Bengenile emkhombeni, baluwela ulwandle, besiya eKapernahum, kwakusekumnyama, waye uYesu engafikanga kubo. Lwaye nolwandle lusilwa, kananjalo kuvuthuza umoya omkhulu. Bakuba ngoko begweqile izitadiya ezingathi zimashumi mabini anantlanu, nokuba zimashumi mathathu, bambona uYesu ehamba phezu kolwandle, esondela ngasemkhombeni; Athi ke yena kubo, Ndim; musani ukoyika. Bathanda ke bona ukumamkela emkhombeni
UYOHANE 6:1-21 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
EMVENI kwezizinto wemka u‐Yesu waya pesheya kwolwandle lwase‐Galili, kwolwase‐Tiberiyasi. Kwaye kumlandela isihlwele esikulu, kuba bebebona imimangaliso yake abeyenza pezu kwababesifa. Waza u‐Yesu wenyukela entabeni apo, wahlala pantsi kona ndawonye nabadisipile bake. Kekaloku ipasika, umtendeleko wama‐Juda, ibikufupi. Wandula u‐Yesu wapakamisa amehlo ake, wabona ukuba isihlwele esikulu siyeza kuye, wati ku‐Filipi: Siya kutenga pina izonka, ukuze batye aba? (Kuloko wayesitsho emlinga: ngokuba ebesazi yena oko ebeza kukwenza.) Wati u‐Filipi ukumpendula: Izonka ezimelwa zidenari zimakulu mabini azibanele, ukuze bonke ngabanye batabate intwana. Wati kuye omnye wabadisipile bake, u‐Andreya umninawe ka‐Simone Petrosi: Kuko umfana apa, onezonka zeṙalasi zihlanu nentlanzi zimbini; koko ezi ziyinto nina pakati kwabaninzi kangaka? Waza wati u‐Yesu: Yenzani abantu bahlale pantsi. Kekaloku bekuko utyani obuninzi kulondawo. Andula ahlala pantsi amadoda, anga angamawaka mahlanu inani lawo. Waza u‐Yesu wazitabata izonka, wati akuba ebebulele wababela abadisipile, nabadisipile bababela abo babehleli pantsi; benje njalo nangentlanzi njengokutanda kwabo. Xeshekweni ke bebehluti, wati kubadisipile bake: Butani amaqezu aseleyo, ukuze kungalahleki nto. Babuta ke, bazalisa izitya zalishumi linazibini ngamaqezu kwezozonka zeṙalasi zozihlanu, abesele kubo ababedlile. Bandula abantu abo, bakubona ummangaliso abewenzile u‐Yesu, bati: Lo unguye ngenyaniso umprofite ozayo elizweni. Wati ngoko u‐Yesu, esazi ukuba bebeya kuza bamsuse ngamandla, ukuze bamenze ukumkani, wabuya wemkela entabeni yena ngokwake yedwa. Kwati kwakuba kuhlwile, behla abadisipile bake baya elwandle, bangena enqanaweni, bahamba bewela ulwandle ngase‐Kapenayume. Kwabesekumnyama ke, waye u‐Yesu ebengekafikile kubo. Kanjalo ulwandle belusilwa, umoya omkulu uquta nje. Kwandul’ ukuti, bakuba bebequ̔bile ngemipini izitadiya zanga zimashumi mabini anazihlanu umhlaumbi zimashumi matatu, babona u‐Yesu ehamba pezu kwolwandle, esiza kufupi nenqanawa: basuka boyika. Kodwa wati kubo: Ndim, musani kwoyika. Bebetanda ngoko ukumamkela enqanaweni; yaza kwa oko inqanawa yabako ngakulomhlaba abebehambela kuwo.