UYOHANE 4:27-54
UYOHANE 4:27-54 IZIBHALO EZINGCWELE (XHO75)
Kwathi kwangoko bafika abafundi bakhe, bamangaliswa kukuba athethe nomntu oyinkazana; noko ke akubangakho namnye owathi. Ùfuna ntoni na? nowathi, Yini na ukuba uthethe nayo? Yawushiya ngoko umphanda wayo intokazi, yemka yaya ekhaya; ithi ebantwini, Yizani, nibone umntu ondixelele izinto zonke endakha ndazenza; lo akangebi nguye uKristu• yini na? Baphuma ke ekhaya, baye besiza kuye. Ke kaloku, kweso sithuba abafundi babemthandaza, besithi, Rabhi,• yidla. Uthe ke yena kubo, Mna ndinokudla endikudlayo, eningakwaziyo nina. Babethetha bodwa ngoko abafundi, besithi, Ingaba kukho omziseleyo na ukudla? Athi uYesu kubo, Okwam ukudla kukuba ndenze ukuthanda kowandithumayo, ndiwufeze umsebenzi wakhe. Anitsho na nina ukuthi, Iinyanga zisené, kuze kufike ukuvuna? Yabonani, ndithi kuni, Waphakamiseni amehlo enu, niwakhangele amasimi; ngokuba aselemhlophe ukuba kuvunwe. Novunayo wamkela umvuzo, abuthele iziqhamo ebomini obungunaphakade, ukuze nalowo uhlwayelayo avuye, kunye nalowo uvunayo. Kuba likulé nto ilizwi eliyinyaniso, eli lithi, Omnye uyahlwayela, nomnye avune. Mna ndanithuma ukuvuna oko ningabulalekanga kuko nina; abanye babulalekile, naza nangena nina ekubulalekeni kwabo. Ke kaloku, kwakholwa kuye into eninzi yamaSamariya kuloo mzi, ngenxa yelizwi lentokazi leyo, yangqinayo yathi, Úndityele izinto zonke endakha ndazenza. Akufika ngoko kuye amaSamariya, amcela ukuba ahlale nawo; wahlala khona ke imihla emibini. Into eninzi yakholwa ngakumbi ngenxa yelizwi lakhe. Kanjalo babesithi kwintokazi leyo, Asisakholwa ngenxa yokuthetha kwakho, kuba sizivele thina ngokwethu, sazi ukuba, inyaniso, lo unguye uMsindisi wehlabathi, uKristu•. Ke kaloku, emveni kwemihla emibini leyo, waphuma khona, wemka waya kwelaseGalili. Kuba uYesu ngokwakhe wangqina, ukuba umprofeti akanambeko kowabo. Xenikweni ngoko wafikayo kwelaseGalili, bamamkela abaseGalili ababezibonile zonke izinto awazenzáyo eYerusalem emthendelekweni; kuba babeyile nabo emthendelekweni. Wabuya ngoko weza uYesu eKana yelaseGalili, apho amanzi ebewenze iwayini. Kwaye kukho igosa lakomkhulu elithile, elinyana wayesifa eKapernahum. Lithe lakuva lona ukuba uYesu uphumile kwaYuda, wafika kwelaseGalili, laya kuye, lamcela ukuba ehle amphilise unyana walo, kuba ebeza kubhubha. Wathi ngoko uYesu kulo, Ukuba anithanga nibone imiqondiso nemimangaliso, anisayi kukha nikholwe. Lithi kuye igosa lakomkhulu, Nkosi, yihla, engekabhubhi umntwana wam. Athi uYesu kulo, Hamba uhambe; unyana wakho uhleli. Wakholwa umntu lowo lilizwi awalithethayo uYesu kuye, wahamba ke. Ke kaloku, akubon' ukuba uselesihla, izicaka zakhe zamhlangabeza, zambikela zisithi, Umntwana wakho uhleli. Wabuza ngoko kuzo ilixa aqale ukuchacha ngalo; zathi kuye, Izolo, ngelixa lesixhenxe, yamyeka icesina. Wazi ngoko uyise, ukuba bekukwangelo lixa abethe ngalo uYesu kuye, Unyana wakho uhleli; wakholwa, yena nendlu yakhe iphela. Lo mqondiso ke wesibini wawenza uYesu, eselephumile kwelakwaYuda, weza kwelaseGalili.
UYOHANE 4:27-54 Contemporary Xhosa Bible 2024 (CXB24)
Kwathi kwangoko bafika abafundi bakhe, bamangaliswa kukuba athethe nomntu oyinkazana; noko ke akubangakho namnye owathi. Ufuna ntoni na? okanye, Yini na ukuba uthethe nayo? Yawushiya ngoko umphanda wayo intokazi, yemka yaya ekhaya; Yizani, nibone umntu ondixelele izinto zonke endakha ndazenza; lo akangebi nguye uKristu yini na? Baphuma ke ekhaya, baye besiza kuye. Ke kaloku ngelo xesha abafundi babemthandaza, besithi, Rabhi, yidla. Uthe ke yena kubo, Mna ndinokudla endikudlayo, eningakwaziyo nina. Babethetha bodwa ngoko abafundi, besithi, Ingaba kukho omziseleyo na ukudla? Athi uYesu kubo, Okwam ukudla kukuba ndenze ukuthanda kowandithumayo, ndiwufeze umsebenzi wakhe. Anitsho na ukuthi, Kusele iinyanga ezine, kuvunwe? Yabonani, ndithi kuni, Waphakamiseni amehlo enu, niwakhangele amasimi; ngokuba aselemhlophe ukuba kuvunwe. Novunayo wamkela umvuzo, abuthele iziqhamo ebomini obungunaphakade, ukuze nalowo uhlwayelayo avuye, kunye nalowo uvunayo. Kule nto liyinyaniso iqhalo elithi, Omnye uyahlwayela, nomnye avune. Mna ndanithuma ukuvuna oko ningabulalekanga kuko nina; abanye babulalekile, naza nangena nina ekubulalekeni kwabo. Ke kaloku, kwakholwa kuye into eninzi yamaSamariya kuloo mzi, ngenxa yelizwi lentokazi leyo, yangqinayo yathi, Undityele izinto zonke endakha ndazenza. Akufika ngoko kuye amaSamariya, amcela ukuba ahlale nawo; wahlala khona ke imihla emibini. Into eninzi yakholwa ngakumbi ngenxa yelizwi lakhe. Wayesithi kwintokazi leyo, Asisakholwa ngenxa yokuthetha kwakho, kuba sizivele thina ngokwethu, sazi ukuba, inyaniso, lo unguye uMsindisi wehlabathi, uKristu. Ke kaloku, emveni kweentsuku ezimbini, waphuma khona, wemka waya kwelaseGalili. Kuba uYesu ngokwakhe wangqina, ukuba umprofeti akanambeko kowabo. Xenikweni ngoko wafikayo kwelaseGalili, bamamkela abaseGalili ababezibonile zonke izinto awazenzayo eYerusalem emthendelekweni; kuba babeyile nabo emthendelekweni. Wabuya ngoko weza uYesu eKana yelaseGalili, apho amanzi ebewenze iwayini. Kwaye kukho igosa lakomkhulu elithile, elinyana wayesifa eKapernahum. Lithe lakuva lona ukuba uYesu uphumile kwaYuda, wafika eGalili, laya kuye, lamcela ukuba ehle amphilise unyana walo, kuba ebeza kubhubha. Wathi ngoko uYesu kulo, Ukuba anithanga nibone imiqondiso nemimangaliso, anisayi kukha nikholwe. Lithi kuye igosa lakomkhulu, Nkosi, yihla engekabhubhi umntwana wam. Athi uYesu kuyo, Hamba uhambe; unyana wakho uhleli. Wakholwa umntu lowo lilizwi awalithethayo uYesu kuye, wahamba ke. Ke kaloku, akubon’ ukuba usehla, izicaka zakhe zamhlangabeza, zambikela zisithi, Unyana wakho uhleli. Wabuza ngoko kuzo ilixa aqale ukuchacha ngalo; zathi kuye, Izolo, ngelixa lesixhenxe, yamyeka icesina. Wazi ngoko uyise, ukuba bekukwangelo lixa abethe ngalo uYesu kuye, Unyana wakho uhleli; wakholwa, yena nendlu yakhe iphela. Lo mqondiso waphinda wawenza uYesu, ekuphumeni kwakhe kwelakwaYuda, wafika kwelaseGalili.
UYOHANE 4:27-54 IBHAYIBHILE (XHO96)
Kwathi ngelo xesha bafika abafundi bakaYesu, bamangaliswa kukuba ethetha nomntu obhinqileyo. Noko akubangakho namnye owathi: “Ufuna ntoni na kuye?” okanye owathi: “Kutheni na ukuba uthethe naye?” Umfazi lowo ke wayishiya ingqayi yakhe, waya edolophini, wathi ebantwini: “Yizani nibone; nanku umntu ondixelele zonke izinto endakha ndazenza. Akangebi *nguKrestu na?” Baphuma ke edolophini, baya kuYesu. Ngeli thuba abafundi bakaYesu babembongoza besithi: “Mfundisi, nantsi into etyiwayo!” Kodwa yena wathi kubo: “Mna ndinokutya eningakwaziyo nina.” Baza abafundi babuzana besithi: “Ngaba kukho mntu umzisele ukutya na?” UYesu wathi kubo: “Ukwenza ukuthanda kwalowo undithumileyo kukutya kwam, ndide ndiwufeze umsebenzi wakhe. “Anitsho na ukuthi: ‘Kusele iinyanga ezine, kuvunwe’? Niyabona, ndithi kuni, inene, wakhangeleni kakuhle amasimi; nophawula ukuba akulungele ukuvunwa. Umvuni seleza kwamkela umvuzo wakhe, evuna isivuno esingabantu abamkela ubomi obungonaphakade. Ngako oko ohlwayelayo uvuya kunye nalowo uvunayo. Kungoko liyinyaniso iqhalo elithi: ‘Kuhlwayela lo, kuvune lowa.’ Ndinithume ukuvuna oko ningabulalekanga kuko. Kwabulaleka abanye, naza nina natya kwimveliso yabo.” Into eninzi yamaSamariya aloo dolophu yakholwa kuYesu, yakuva intetho yaloo mfazi ethi: “Undixelele zonke izinto endakha ndazenza.” Athe ke amaSamariya akufika kuYesu, ambongoza ukuba ahlale nawo; waza wahlala khona apho iintsuku zambini. Baba baninzi ngakumbi abo bâkholwáyo ngenxa yamazwi kaYesu, baza bathi kumfazi lowo: “Asisakholwa ngenxa yokuthetha kwakho. Thina sikholwa kuba sizivele ngokwethu, saqonda ukuba ngenene lo nguye uMsindisi wehlabathi.” Emva kweentsuku ezimbini uYesu wemka apho, waya eGalili. UYesu ngokwakhe wayetshilo ukuthi *umshumayeli akenzelwa mbeko kowabo, kodwa akufika eGalili abantu balapho bamamkela. Babezibonile zonke izinto awazenzáyo kwitheko *lePasika eJerusalem, kuba nabo babeyile kweso sidlo. Waphinda uYesu wahambela eKana kwelaseGalili, apho wawaguqulayo amanzi aba yiwayini. Kwakukho igosa elithile lakomkhulu apho elaligulelwa ngunyana walo eKapernahum. Lakuva ukuba uYesu ufikile eGalili, evela kwelakwaJuda, laya kuye, lambongoza okokuba ehle aye eKapernahum, aphilise unyana walo owayegulela ukufa. UYesu wathi kulo: “Nina aningekhe nikholwe ukuba anithanga nabona imiqondiso nemimangaliso!” Igosa lakomkhulu ke lathi kuye: “Nkosi, nceda uze engekabhubhi umntwana wam.” UYesu wathi kulo: “Goduka; unyana wakho uphilile.” Indoda leyo yakholwa ngamazwi kaYesu, yahamba. Kwathi isesendleleni yahlangatyezwa zizicaka zayo, zathi: “Unyana wakho uphilile!” Yabuza ke ukuba uqale nini na ukuchacha, zaza zathi: “Uchache izolo ngentsimbi yokuqala emva kwemini kuloo mkhuhlane.” Wakhumbula ke uyise ukuba kwakungêlo xesha kanye uYesu awatsho ngalo kuye ukuthi: “Unyana wakho uphilile.” Lakholwa ke igosa lakomkhulu, yakholwa nendlu yalo yonke. Lo mqondiso wawenzayo uYesu wawungowesibini emva kokufika kwakhe eGalili evela kwelakwaJuda.
UYOHANE 4:27-54 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
Bati pezu kwoku bafika abadisipile bake, bati nqa ukuba ebeteta nomfazi: kodwa noko bekungeko owatshoyo ukuti: Ufuna nto nina? umhlaumbi ukuti: Yinina ukuba utete naye? Wandula umfazi washiya umpanda wake, wemka waya esixekweni, wati ebantwini: Yizani, nibone umntu, owandixelelayo zonke izinto endike ndazenza: lo unguye u‐Kristu na? Bandula bapuma esixekweni, beza ukuza kuye. Kekaloku pakati kwoku abadisipile bake bebemtandaza, besiti: Rabi! yidla. Koko wati kubo: Mna ndinokutya ndikudle, eningakwaziyo nina. Bebesiti ngoko abadisipile omnye kwomnye: Kuko omziseleyo into yokudla na? Wati u‐Yesu kubo: Ukutya kwam kokokuba ndiyenze intando yonditumileyo, nokuba ndiwufeze umsebenzi wake. Anitsho na ukuti: Kuseko inyanga ezine, kwandul’ ukufika ukuvuna? bona ke, nditi kuni: Pakamisani amehlo enu, nikangele amasimi, ukuba asel’ emhlope kuvunwe. Uti novunayo uwamkele umvuzo, azibute izixakato zibe zezobomi obungunapakade; ukuze kwa nohlwayelayo novunayo bavuye kunye. Nakuko oku siyazalisekiswa esositeto esiyinyaniso sokuti: Kuko omnye ohlwayelayo, nomnye ovunayo. Ndanituma ukuvuna oko ningakusebenzelanga; abanye basebenzile, nani ningenile emisebenzini yabo. Kekaloku ama‐Samariya amaninzi akwesosixeko akolwa kuye, ngenxa yelizwi lomfazi obenqi̔na ngokuti: Wandixelela zonke izinto endike ndazenza. Kwa njalo xeshekweni ama‐Samariya atika kuye, ebemtandaza ukuba ahlale kuwo; waza wahlala kona intsuku zambini. Aza amanye amaninzi ngakumbi akolwa ngenxa yelizwi lake, ati kumfazi: Akusengenxa yokuteta kwako sikolwayo; ngokuba sivile tina ngokwetu, sazi nokwazi ukuba lo unguye ngenyaniso umsindisi welizwe, u‐Kristu. Wati kekaloku emveni kwezontsuku mbini wapuma kona, wemka waya e‐Galili. Ngokuba u‐Yesu ngokwake ebenqi̔nele ukuba umprofite akanakubekwa emzini wakowabo. Xeshekweni ke wafika e‐Galili, ati ama‐Galili amamkela, ezibonile nje zonke izinto wazenzayo e‐Yerusaleme emtendelekweni: ngokuba nawo ebeye emtendelekweni. Kwa njalo u‐Yesu wabuya weza e‐Kana yase‐Galili, apo abewenzile amanzi iveyine. Kwabekuko inkosana etile unyana wayo ebesifa e‐Kapenayume. Yati yona le yakuva ukuba u‐Yesu ebepumile e‐Judeya wafika e‐Galili, yaya kuye, yamtandaza ukuba ehle ampilise unyana wayo: ngokuba ebeza kufa. Wandula wati u‐Yesu kuyo: Xeshekweni ningaboni imiqondiso nemimangaliso, anisayi kukolwa. Yati inkosana kuye: Nkosi! yihla engekabubi umntwana wam. Wati u‐Yesu kuyo: Hamba; unyana wako upilile. Waza umntu lowo wakolwa lilizwi abelitetile kuye u‐Yesu, wahamba. Kekaloku nxa ebesehla, izicaka zake zamkaulela, zashumayela zisiti: Umntwana wako upilile. Wandula wabuza kuzo iyure waqilipala ngayo. Zaza zati kuye: Izolo ngeyure yesixe̔nxe icesine lamyeka. Wazi ngoko uyise ukuba bekungaleyo iyure abetshilo u‐Yesu kuye ngayo ukuti: Unyana wako upilile. Waza wakolwa yena, nendlu yake yonke. Lo kanjako ummangaliso wesibini wawenza u‐Yesu, akuba ebevele e‐Judeya wafika e‐Galili.