Baroma 11
11
Sishemo sa Mulimu kwa Maisilaele
1 #
Bafil 3.5
Cwale na buza, ni li, “Kikuli Mulimu u hanile batu ba hae, nji?” Batili! Na kasibili ni Muisilaele, muikulu wa Abrahama, wa lusika lwa Benjamine. 2Mulimu h'a si ka hana batu ba hae, b'a ketile i sa li kwa makalelo. Ha si mwa ziba se si ñozwi mwa Mañolo bakeñisa taba ya Elia, ha n'a itapelela ku Mulimu ka za Isilaele, h'a li, 3#1 Male 19.10, 14 “Mulena, ba bulaile bapolofita ba hao, mi ba shandauzi tutala twa hao. Ki na feela ni li nosi ya siyezi, mi ba bata ku ni bulaya.” 4#1 Male 19.18 Mulimu u mu alabile cwañi? U ize, “Ni ipulukezi batu ba likiti ze supile ba ba si ka lapela Baale, mulimu wa buhata.” 5Kwa swana ni ka nako ye. Ku na ni sitopanyana sa batu ba ba ketilwe ki Mulimu, kabakala sishemo sa hae. 6U ba ketile kabakala sishemo sa hae, isiñi kabakala ze ba ezize. Kabesicwalo, sishemo sa Mulimu ne si si ke sa ba sishemo sa niti.
7Cwale, ku bonahala kuli batu ba Isilaele ha ba si ka fumana se ne ba bata. Ki sitopanyana feela sa batu ba ba ketilwe ki Mulimu ba ba si fumani, mi haili buñata, ba ikeza bususu, Mulimu h'a ba biza. 8#Mul 29.4; Isa 29.10 Sina mo ku ñolezwi kuli, “Mulimu u unsufalize lipilu ni minahano ya bona. Ku t'o fita ku lona la kacenu le, ha ba koni ku bona ka meeto a bona, kamba ku utwa ka lizebe za bona. 9#Lipi 69.22-23 Davida u li,
“Kambe ne ba ka swalwa,
ba swasiwa mwa mikiti ya bona.
Ba we, mi ba fiwe mulatu!
10Kambe meeto a bona n'a ka kwaleha,
kuli ba si ke ba bona.
Ba kotobaniswe ki manyando
a bona kuya kuile.”
11Cwale, ni li, “Majuda ha ba wile, ne ba wile ku welela, nji?” Ha ku cwalo! Kono, ka mulatu wa bona, ku pilisizwe balicaba kuli Majuda ba ba shwele muna. 12Cwale, mulatu wa Majuda ha u tisize matohonolo a matuna mwa lifasi kamukana, mi ku kokobezwa kwa bona ha ku tiselize balicaba limbuyoti, i ta ba matohonolo a kuma kai Majuda kaufela ha ba ta balelelwa ni ba ba pilisizwe!
Ku piliswa kwa Balicaba
13Cwale ni bulelela mina balicaba. Ha ni sa li muapositola wa balicaba, ni ta ikuhumusa ka musebezi wa ka. 14Mwendi ni ka kenya muna ku bahesu, ni kone, ka mukwa wo, ku pilisa ba bañwi ku bona. 15Kakuli ku hanwa kwa bona ha ku file lifasi litohonolo la ku kutisana ni Mulimu, ku amuhelwa kwa bona bo, i ta ba nto ye cwañi? I ta ba bupilo ku ba ba shwile!
16Haiba siñomoto sa pili sa buhobe si fiwa Mulimu, buhobe kaufela ki bwa hae. Haiba mibisi ya kota i fitiswa ku Mulimu ni mitai cwalo ki ya hae. 17Sicaba sa Isilaele si swana ni kota ya olive ya mwa hae, ye limezwi hande, ni mo ku lemilwe mitai ye miñwi. Wena u si Mujuda, u swana ni mutai wa kota ya olive ya mwa naheñi o' til'o shangelwa kwateñi, mi cwale, ni wena u pila ka mezi a kota ya mwa hae. 18Kabakaleo, ha u na swanelo ya ku nyaziseza mitai ye pumilwe. N'o ka ikuhumusa cwañi? Wena u li mutai feela. Ha si wena ya tiisa mubisi. Mubisi ki ona o' tiisa.
19Mwendi u ta li, “Ee, kono mitai yeo i lemezwi kuli na ni shangelwe mwa sibaka sa yona.” 20Yeo ki niti. I lemilwe kakuli i tokwile tumelo, mi wena u mwa sibaka kakuli wa lumela. Cwale, u si ke wa kenelwa ki mihupulo ya buikuhumuso, kono u sabe. 21Kakuli Mulimu h'a si ka swalela Majuda ba ba swana ni mitai ye si ka shangelwa. Cwale, wena u ka ku swalela cwañi?” 22Fa, u lemuhe sishemo sa Mulimu fo si kuma ni tata ya hae. U eza ka maata ku ba ba wile, kono ku wena u na ni sishemo. U swanezi ku ba mwa sishemo sa hae. Hakusicwalo, ni wena u ta pumiwa inge mutai. 23Ni Majuda, haiba ba tuhela ku sa lumela kwa bona, ba ta shangelwa mo ne ba li teñi pili, kakuli Mulimu u na ni maata a ku ba shangela hape. 24Wena Mulicaba, u swana ni mutai wa kota ya olive ya mwa naheñi o' pumilwe, mi o' til'o shangelwa feela kwa kota luli ye cezwi. Majuda, bona ba swana ni mitai ya kota ye limezwi hande. Ku ta ba bunolo hahulu ku Mulimu ku shangela hape mitai yona yeo kwa kota ye n'e inzi ku yona pili.
Sishemo sa Mulimu kwa batu kaufela
25Banabahesu, ku na ni kunutu ya niti ye ni lakaza kuli mu i zibe. I ta mi tusa kuli mu si ke mwa ipona butali, mi ki ye. Mahañi a Maisilaele h'a na ku inelela cwalo. A ta ina feela ku fitela macaba a mañwi kaufela ha s'a pilisizwe. 26#Isa 59.20 Kihona mo ba ka pilisezwa Maisilaele kamukana. Sina mo ku ñolezwi kuli,
“Mupilisi u ta zwa mwa Sione,
mi u ta zwisa bumaswe kaufela
kwa baikulu ba Jakobo.
27 #
Jer 31.33-34
Ni ta iswala bulikani bo ni bona,
ha ni ta zwisa libi za bona.”
28Ha ku talimwa mo ba hanezi Litaba ze Nde, bona Majuda, ki lila za Mulimu bakeñisa mina balicaba. Kono ha ku talimwa mw'a ba ketezi Mulimu, ki balikani ba hae kabakala bo kukw'a bona. 29Kakuli Mulimu h'a fetuheli muhupulo wa hae bakeñisa y'a ketile kamba ku tohonolofaza. 30Haili ka mina balicaba, ne mu sa lumeli ku Mulimu ka linako ze felile. Kono cwale mu fumani sishemo ku yena, kabakala kuli Majuda ba hanile ku lumela. 31Kamukwaoswana, kabakala sishemo se mu fumani, Majuda cwale ba hana ku lumela ku Mulimu kuli ni bona cwalo ba kone ku fumana sishemo ku yena. 32Kakuli Mulimu u tuhelezi batu kaufela mwa sibi inge ba tamilwe ki ku sa lumela kwa bona, kuli a bonise sishemo sa hae ku bona kamukana.
Ku lumbwe Mulimu
33 #
Isa 55.8;
But 17.1
Bufumu bwa Mulimu ki bo buñata cwañi! Butali ni zibo ya hae li tungile hahulu! Ki mañi ya ka kona ku talusa likatulo za hae? Ya ka utwisisa milelo ya hae ki mañi? 34#Isa 40.13 Sina mo ku ñolezwi, kuli,
“Ki mañi ya ziba muhupulo wa Mulena?
Ki mañi ya kona ku mu fa kelezo?
35 #
Job 41.11
Ya kile a mu fa sika ki mañi,
kuli a te a si kutise?”
36 #
1 Bakor 8.6
Kakuli lika kaufela li zwa ku yena, mi ze li teñi kamukana li tisizwe ki yena mi li ezelizwe yena. Mulimu a lumbiwe kuya kuile! Amen.
Currently Selected:
Baroma 11: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.