Simuluho 3
3
Ku wa kwa mutu
1 #
But 2.24;
Sin 12.9; 20.2 Noha i ne i fita lifolofolo z'a n'a ezize Mulimu Muñ'a Bupilo kwa butali. Noha yeo kiha i buza musali, ya li, “Kana ki niti luli kuli Mulimu u mi bulelezi kuli mu si ke mwa ca muselo wa kota ifi ni ifi ye mwa simu mo?”
2Musali a alaba, a li, “Lu ka ca muselo wa kota ifi ni ifi mwa simu mo. 3Kono ha lu koni ku ca muselo wa kota ye mwahal'a simu. Mulimu u ize lu si ke lwa ca muselo wa kota yeo, nihaiba ku i swala feela, kakuli ha lu ka eza cwalo, lu ka shwa.”
4Noha ya alaba, ya li, “Ku shwa! Batili, yeo ha si niti! Ha mu na ku shwa. 5Mulimu u bulezi cwalo kakuli wa ziba kuli ha mu ka i ca, mu ta ba ni kutwisiso, inge yena, mi mu ka ziba ze nde ni ze maswe.”
6Musali a bona bunde bwa kota yeo, a lemuha ku lakazeha kwa miselo ya yona, mi a hupula kuli ne i ka ba hande ku ba ni butali. Cwale, kiha s'a nga ye miñwi ya miselo yeo, mi a i ca. Ye miñwi a fa munn'a hae, mi ni yena a ca. 7Ha ba se ba cile, ba ba ni kutwisiso, mi ba ipona kuli ba mapunu. Cwale ba ngungahanya matali a kota ya feiga, mi ba itama ona.
8Manzibwana a lona lizazi leo, ba utwa Mulimu Muñ'a Bupilo a zamaya-zamaya mwa simu, kiha ba ipata mwa likota. 9Kono Mulimu Muñ'a Bupilo a biza munna, a li, “U inzi kai?”
10Munna a alaba, a li, “Ni ku utwile ha n'o li mwa simu, mi ne ni saba kakuli ne ni li mapunu. Kihona ha ne ni ipatile.”
11Mulimu Muñ'a Bupilo a mu buza, a li, “Ki mañi ya ku bulelezi kuli u inzi mapunu? Kana, kikuli u cile muselo wa kota ye ne ni ize u si ke wa u ca, nji?”
12Munna a alaba, a li, “Musali y'o ni ezelize, ki yena ya ni file kuli ni ce, kiha se ni ca.”
13 #
2 Bakor 11.3; 1 Tim 2.14 Mulimu Muñ'a Bupilo a buza musali, a li, “Kiñi ha u ezize cwalo?”
Yena a alaba, a li, “Ni pumilwe ki noha, mi ki yona ye ize ni ce.”
Sikuto sa Muñ'a Bupilo
14Cwale Mulimu Muñ'a Bupilo a li kwa noha,
“Ka s'o ezize, u ta fiwa mulatu.
U kutilwe mwahal'a lifolofolo kaufela.
Ku zwa hona fa, u ta hohoba ka mba,
mi liluli i ta ba sona sico s'o ta ca.
15 #
Sin 12.17
Wena ni musali mu ta toyana.
Peu ya hae ni ya hao ba ka toyana.
U ta pyata toho ya hao,
mi wena u ta mu luma kwa lisito.”
16Kih'a li ku musali,
“U ta nyanda ha u itwezi,
mi u ta utwa butuku hahulu ha u pepa.
Kono u ta lakaza hape munn'a hao,
mi u ta ku busa.”
17 #
Maheb 6.8
Cwale a li ku Adama,
“Wena u teelelize musal'a hao,
mi u cile muselo o ne ni ize
u si ke wa u ca.
Kabakala s'o ezize, lifasi li kutilwe!
U ta sebeza ka tata mwa bupilo
bwa hao kaufela
kuli lifasi li ku meliseze lico
ze likana.
18Li ta ku meliseza macacani
a miutwa ni liseto,
ha u nze u ca miselo ya mwa naheñi.
19U ta fufulelwa ni ku sebeza ka tata
kuli u fumane lico,
ku fitela f'o ta kutela mwa mubu
mo n'o zwisizwe.
N'o ezizwe ka mubu,
mi u ta kutela mwateñi hape!”
20Munna a beya musal'a hae libizo la Eva, kakuli ki yena m'ahe batu kaufela. 21Mi Mulimu Muñ'a Bupilo a ezeza bo Adama ni musal'a hae Eva liapalo za matalo a lifolofolo, mi a ba apesa.
Adama ni Eva ba zwiswa mwa simu
22 #
Sin 22.14
Mulimu Muñ'a Bupilo kih'a li, “Mutu cwale s'a swana ni luna, kakuli s'a ziba bunde ni bumaswe. A si ke a lumelelwa ku ca miselo kwa kota ya bupilo, kuli a pile kuya kuile.” 23Kabakaleo, Mulimu Muñ'a Bupilo a mu leleka mwa simu ya Edeni, mi a mu luma ku y'o lima mubu mw'a n'a zwisizwe. 24Mulimu a leleka mutu cwalo, mi fa munyako wa simu ya Edeni a beya kerubime ni sabule ye tuka mulilo, o n'o fetaulelwa mwa maneku kaufela, ku sabisa ufi ni ufi ku taha kwa kota ya bupilo.
Currently Selected:
Simuluho 3: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.