SAN MATEO 9
9
Ngua'ni Jesús jo'o ji'i̱ sca nu quicha nu nchcu̱' tyucuí̱ tyucui ña'a̱ yu
1Lo'o li' xa' ndyatí̱ Jesús ne' yaca ni'i̱ bi', cha' tyeje tacui lo tayu' cha' tya̱a̱ quichi̱ tyi. 2Lo'o ndyalaa quichi̱ bi', li' ñaa lo'o ngu' ji'i̱ sca nu quicha nu nchcu̱' tyucuí̱ tyucui ña'a̱ yu; ñaa ngu' slo Jesús cha' cua'ni jo'o ji'i̱ nu quicha bi'. Ntsiya nu quicha bi' ne' sca catya̱. Pana jlo ti' Jesús cha' jlya ti' ngu' bi' ji'i̱, bi' cha' nchcui' lo'o nu quicha ndi'ya̱:
―Ca tso'o nu'u̱, sñi' ―nacui̱ Jesús ji'i̱ nu quicha―. Cua ngua'ni clyu ti' na' ji'i̱ qui'ya nu ntsu'u jinu'u̱.
3Lo'o li' ngulacua xi ti' mstru cha' jo'ó nu ndu̱ cacua ti: “Cha' cuxi nchcui' nu qui'yu re cuentya ji'i̱ ycui' Ndyosi”. Jua'a̱ ngulacua ti' ngu'. 4Pana, ngua tii Jesús ji'i̱ lcaa lo cha' nu ntsu'u tyiquee ngu' bi'.
―¿Ni cha' chi̱i̱ nti' ma̱ ña'a̱ ma̱ 'na juani? ―nacui̱ Jesús ji'i̱ mstru bi'―. 5Ná ndiya ti' ma̱ si ñacui̱ na' ji'i̱ nu quicha re: “Cua ngua'ni clyu ti' na' ji'i̱ qui'ya nu ntsu'u hi̱”. ¿Ha tso'o la si chcui' na' lo'o nu quicha lacua: “Tyatu̱ nu'u̱, xa tu'ba catya̱ hi̱ cha' tyaa lo'o ji'i̱ ca to' tyi”? ―nacui̱ Jesús―. 6Ntsu'u cha' ca cuayá' ti' ma̱ cha' ntsu'u chacuayá' 'na cuentya ji'i̱ ycui' Ndyosi cha' cuityi̱ na' qui'ya nu ntsu'u ji'i̱ ñati̱ chalyuu, cha' nu cua nda Ni 'na lijya̱a̱ cha' caca̱ ñati̱. Ca cuayá' ti' ma̱ lo'o ña'a̱ ma̱ cha' tyaca tso'o nu quicha re juani.
Li' xa' nchcui' Jesús lo'o nu quicha bi':
―Tyatu̱ nu'u̱ ―nacui̱ Jesús ji'i̱―, xñi ji'i̱ catya̱ jinu'u̱ cha' tsaa lo'o ji'i̱ ca to' tyi.
7Hora ti ndyatu̱ nu quicha bi', ngusñi ji'i̱ catya̱ ji'i̱, ndu'u yu, ndyaa yu ca to' tyi yu. 8Quiña'a̱ tsa ñati̱ na'a̱ ji'i̱ cha' bi', ndyutsi̱i̱ tsa ngu' li'. Ngua'ni tlyu ngu' ji'i̱ ycui' Ndyosi li', cha' cua nda Ni chacuayá' ji'i̱ ñati̱ chalyuu cha' cua'ni cña tonu jua'a̱, ngua ti' ngu'.
Ngusi'ya Jesús ji'i̱ Mateo
9Ndu'u Jesús ndyaa, lo'o li' cua tyeje tacui ti to' ni'i̱ su ntucua Mateo nxñi cñi cña loo ngu'. Nchcui' Jesús lo'o nu Mateo bi' li':
―Tyu'u lca'a̱ nu'u̱ 'na ―nacui̱ Jesús ji'i̱.
Hora ti ndyatu̱ Mateo, nguxtyanu cña ji'i̱, ndyaa lca'a̱ ji'i̱ Jesús li'.
10Tiya' la li' nga'a̱ Jesús nde ne' ni'i̱ ji'i̱ Mateo, ntucua yu to' mesa cha' ndyacu yu. Lo'o li' quiña'a̱ la ñati̱ ndyalaa slo Mateo cha' cacu ngu' lo'o. Ndi'i̱ ngu' tya'a ndu'ni cña lo'o Mateo, lo'o xa' la ñati̱ nu nacui̱ ngu' ji'i̱ cha' ná tso'o ñati̱ bi', lo'o nu ngu' nu ndyaca tsa'a̱ ji'i̱ Jesús; stu'ba ti ndyacu lcaa ngu' bi'. 11Lo'o na'a̱ ngu' fariseo cha' ndyacu Jesús lo'o ngu' bi', hora ti nchcui' ngu' lo'o ngu' nu ndyaca tsa'a̱ ji'i̱ yu:
―¿Ni cha' stu'ba ti ndacu xu'na ma̱ lo'o ngu' nu ná tso'o, masi lo'o ngu' re nu laca msu ji'i̱ ngu' xa' tsu' nu cuiñi ti nxñi quiña'a̱ tsa cñi cña loo ji'i̱ ngu'? ―nacui̱ ngu' fariseo bi'.
12Pana ndyuna Jesús cha' nu nda ngu' bi', bi' cha' nchcui' ycui' yu lo'o ngu' li':
―Ngu' nu ná quicha ni, ná ntsu'u cha' caca jo'o ji'i̱ ngu' bi' ―nacui̱ Jesús ji'i̱ ngu'―. Sca ti ji'i̱ ñati̱ quicha ntsu'u cha' caca jo'o. 13Yaa clya ma̱ cua'a̱ jyaca̱ ma̱ ji'i̱ cha' nu nguscua jyo'o cusu' lo quityi, nu ndi'ya̱ nchcui': “Nti' na' cha' cua'ni tya'na ti' ma̱ ji'i̱ tya'a ñati̱ ma̱, nacui̱ ycui' Ni. Bi' nu tso'o la, masi ná ta ma̱ quiña'a̱ tsa msta̱ 'na; ni na'ni scu̱' ma̱, ná ndu'ni cha' ta ma̱ msta̱ 'na.” Jua'a̱ nscua lo quityi. Ná lijya̱ na' chalyuu cha' chcui' na' lo'o ñati̱ nu tso'o tsa ycui' ngu', nti' ngu'; cua lijya̱ na' chalyuu cha' chcui' na' lo'o ngu' nu jlo ti' cha' ntsu'u cha' cuxi tyiquee ngu', cha' caca tyuju'u ti' ngu' li'. Xtyanu ngu' ji'i̱ cha' cuxi bi' li'.
Ndacha' ngu' judío ji'i̱ Jesús si ná cua'ni tacati yu ji'i̱ tsa̱ nu ná ndacu ngu'
14Lo'o li' ndyalaa sca taju ñati̱ slo Jesús, la cui' ngu' nu ndyaca tsa'a̱ ji'i̱ Juan laja lo'o ntyucuatya ji'i̱ ngu' laca ngu' bi'. Li' nchcui' ngu' bi' lo'o Jesús:
―Ntsu'u tsa̱ nu ná ndacu cuare ―nacui̱ ngu'―, lo'o ntsu'u tsa̱ nu ná ndacu ngu' fariseo, xqui'ya cha' ndu'ni tacati ya tsa̱ bi'; pana nu'u̱, lo'o jua'a̱ ngu' nu ndyaca tsa'a̱ jinu'u̱, lcaa tsa̱ ndacu ma̱. ¿Ni cha' ta ndacu cu'ma̱ lcaa tsa̱ lacua?
15Li' nguxacui̱ Jesús cha' ji'i̱ ngu' bi':
―Lo'o caja clyo'o ngu' ni, ndacu ngu' nu ndya'a̱ lo'o cutsii; ná ndi'i̱ ngu' xñi'i̱ ti' ngu' tsa̱ bi' lo'o ndi'i̱ ngu' lo'o cutsii ―nacui̱ Jesús ji'i̱ ngu' li'―. Pana nu lo'o tyalaa tsa̱ li', nu lo'o tyaa lo'o ngu' ji'i̱ cutsii, li' ná cacu ngu' tya'a tso'o cutsii, cha' caca xñi'i̱ ti' ngu' li'. La cui' jua'a̱ chaa ti' tya'a tso'o na' juani, pana caca xñi'i̱ ti' ngu' re nde loo la.
16’Chaca cha' chcui' na' lo'o ma̱: ni sca ngu' ná cua'ni cho'o ngu' late' cusu̱ ji'i̱ ngu' lo'o sa yu'be late' cucui, cha' lo'o cua ndyaati̱ late' bi', tyatsii' late' cucui bi'; tyati̱' jlyacua̱ su ngalya late' bi' li'. 17La cui' ti cha', ná su'ba ngu' lcui nu chca ndyu'u ti ne' tyaca' cusu'. Si su'ba ngu' ji'i̱ ne' tyaca' cusu', yala ti catsu se'i̱ tyaca' bi'; ndye ngula'a tyaca' li', tye lcui tyalú li'. Ne' tyaca' cucui tyu'u lcui nu chca ndyu'u ti; jua'a̱ talo tyucuaa cha' bi', lo'o lcui lo'o tyaca' bi'. (Jua'a̱ ngulu'u Jesús ji'i̱ ngu' cha' ca cuayá' ti' ngu' cha' ná tso'o quixa' ngu' cha' cucui nu nclyu'u yu cuentya ji'i̱ ycui' Ndyosi lo'o cha' nu nguxtyanu jyo'o cusu' cha' cua'ni ngu'.)
Sñi' Jairo, lo'o nu cuna'a̱ nu ndyala' ste' Jesús
18Laja lo'o nchcui' Jesús lo'o ngu' bi', li' ndyalaa sca ngu' judío nu laca loo; ndatu̱ sti̱' yu slo Jesús li', cha' jña yu sca cha' clyu ti' ji'i̱:
―Cua ngujuii ca ti sca nu piti cuna'a̱ sñi' na' ―nacui̱ nu cusu' ji'i̱ Jesús―. ¿Ha ná tsaa nu'u̱ slo na' cha' sta ya' nu'u̱ lo nu piti bi'? ―nacui̱―. Jlo ti' na' cha' nchca jinu'u̱ cua'ni cha' tyu'ú nu piti chaca quiya'.
19Li' ndyatu̱ Jesús lo'o ngu' nu ndyaca tsa'a̱ ji'i̱, ndyaa ngu' lo'o nu cusu' bi'. 20Pana tyucui̱i̱ su ndyaa ngu' njyacua sca nu cuna'a̱ quicha ji'i̱ Jesús, lijya̱ nde chu̱' yu cha' cala' ma' quiya' ste' yu; cua tii tyucuaa yija̱ quicha nu cuna'a̱ bi', cha' ndyalú tañi. 21Ndi'ya̱ ngulacua ti' ma': “Masi cala' ti na' ste' Jesús, li' tyaca tso'o na'”. Jua'a̱ ti ngulacua ti' ma'. 22Lo'o li' nguxtyacui Jesús, nguxña'a̱ ji'i̱ nu cuna'a̱ bi':
―Cua'ni cho'o tyiquee nu'u̱, sñi' ―nacui̱ Jesús ji'i̱―. Jlya ti' nu'u̱ 'na, bi' cha' ndyaca tso'o nu'u̱ juani.
Lo'o hora ti ndyaca tso'o nu cuna'a̱ bi'.
23Lo'o li' ndyalaa Jesús ca to' tyi nu laca loo bi', na'a̱ cha' cua ndyalaa ngu' musca slo cha' nscua santo; nxi'ya tsa ngu' ndi'i̱ ngu' toni'i̱ ji'i̱ nu cusu' bi'. 24Nchcui' Jesús lo'o ngu' li':
―Tyaa ma̱ tso'o la ―nacui̱―. Na laja' ti nu piti re, si'i na ngujuii re.
Nxtyí lo'o tsa ngu' ji'i̱ Jesús li', 25pana ngulo'o Jesús ji'i̱ ngu' cha' caja su tyatí̱ ycui' yu ne' ni'i̱ ca slo nu piti bi'. Li' ngusñi yu ya' nu piti bi', ndaca'a̱ nu piti li'. 26Lo'o jua'a̱ ngua cha' nguañi cha' bi' lcaa quichi̱ su ndi'i̱ ngu' ca bi'.
Ngua'ni Jesús jo'o ji'i̱ tucua tya'a ngu' cuityi̱'
27Lo'o li' ndu'u Jesús ca ne' ni'i̱ bi' ndyaa yu, lo'o jua'a̱ ndya'a̱ lca'a̱ tucua tya'a ngu' cuityi̱' ji'i̱ yu. Ngusi'ya ngu' ji'i̱ Jesús li':
―Cua'ni tya'na ti' nu'u̱ ji'i̱ cua, cusu', nu'u̱ nu laca ñati̱ tya'a ji'i̱ jyo'o David ―ndu'ni ngu' ji'i̱.
28Lo'o cua ndyalaa Jesús ndyatí̱ ni'i̱ ji'i̱, lo'o nu ngu' cuityi̱' bi' lijya̱ ngu' cacua la slo yu. Nchcui' Jesús lo'o ngu' bi' li':
―¿Ha jlya ti' ma̱ cha' caca jna' cua'ni na' cha' tyaca tso'o ma̱? ―nacui̱ yu ji'i̱ ngu'.
―Jlya ti' ya, cusu' ―nacui̱ nu ngu' cuityi̱' bi' ji'i̱.
29Lo'o li' ndyala' Jesús cloo tyucuaa ngu' cuityi̱' bi':
―Tyaca tso'o ma̱ lacua. Caca bi' ji'i̱ ma̱ si jlya ti' ma̱ 'na ―nacui̱ Jesús ji'i̱ ngu' cuityi̱' bi' li'.
30Hora ti ngua tso'o si'yu cloo ngu', ña'a̱ tso'o ngu' li'. Lo'o li' lye nchcui' Jesús lo'o ngu' bi':
―Ná cacha' ma̱ ji'i̱ ni sca ñati̱, cha' ná caca cuayá' ti' ngu' ñi'ya̱ ngua cha' ngua tso'o cloo ma̱ ―nacui̱ Jesús ji'i̱ ngu' bi'.
31Pana ndu'u ngu' ndyaa ngu' li', ndacha' ngu' ji'i̱ lcaa ñati̱ ñi'ya̱ ngua cña nu ngua'ni Jesús lo'o ngu'; bi' cha' nguañi cha' bi' tyucui ña'a̱ loyuu jua.
Ngua'ni Jesús jo'o ji'i̱ sca nu cu'u̱
32Lo'o cua ndu'u ngu' bi' ndyaa ngu', li' ndyalaa chaca latya ñati̱, ya̱a̱ lo'o ngu' ji'i̱ sca yu cu'u̱; na cu'u̱ yu xqui'ya cui'i̱ cuxi nu ngusñi ji'i̱ yu. 33Lo'o ngulo Jesús cui'i̱ cuxi ji'i̱ nu quicha bi', li' ngua nchcui' yu, masi cu'u̱ yu tsa̱ la. Ndube tsa ti' lcaa ñati̱ nu ndu̱ ndacua li'.
―Bilya ña'a̱ na sca cha' tlyu jua'a̱ ―nacui̱ ngu' ji'i̱ tya'a ngu'―. Ná ntsu'u ñati̱ tyucui ña'a̱ nasiyu̱ Israel re nu caca cua'ni jo'o jua'a̱ ―nacui̱ ngu'.
34Pana xa' ña'a̱ nchcui' ngu' fariseo bi':
―Na nclyo nu Jesús jua ji'i̱ cui'i̱ cuxi nu ngusñi ji'i̱ ngu' xqui'ya nu xu'na cuiñaja nu nda chacuayá' cha' cua'ni yu jua'a̱ ―nacui̱ ngu' fariseo bi'.
Tya'na tsa ti' Jesús ji'i̱ ngu' quiña'a̱
35Lo'o li' ndyaa Jesús lcaa quichi̱ sube, lcaa quichi̱ tonu, cha' culu'u ji'i̱ ngu' ne' laa ji'i̱ ngu' judío; quiña'a̱ tsa cha' nda Jesús lo'o ñati̱ ñi'ya̱ tso'o caca lo'o laca ycui' Ni loo ne' cresiya ji'i̱ ngu'. Lo'o jua'a̱ ngua'ni jo'o ji'i̱ lcaa ngu' quicha, ji'i̱ lcaa ngu' nu ngunu'u̱ ti'. 36Tya'na tsa ti' Jesús ji'i̱ nu quiña'a̱ tsa ñati̱ nu ndya'a̱ lca'a̱ ji'i̱, cha' ná nchca ji'i̱ ngu' bi'; nga'aa jlo ti' ngu' ñi'ya̱ nu tyi'i̱ tso'o la ngu'. Ñi'ya̱ ndu'ni xlya' nu ná ntsu'u nu ña'a̱si̱i̱ ji'i̱ ni', jua'a̱ ndu'ni ngu' quiña'a̱ bi', ngua ti' Jesús. 37Li' nchcui' Jesús lo'o ngu' nu ndyaca tsa'a̱ ji'i̱, nda yu sca cui̱i̱ lo'o ngu' cuentya ji'i̱ ngu' quiña'a̱ bi'. Nacui̱ yu cha' bilya cuna tso'o ngu' cha' ji'i̱ ycui' Ndyosi, cha' ñi'ya̱ laca sca xtya̱ nu tso'o tsa ndyatsi cha' cua ngulala ti caca clacua, jua'a̱ laca ngu' bi'.
―Chañi cha' ntsu'u tsa cña re cha' chcui' na lo'o ñati̱ cha' xñi ngu' cha' nu nchcui' na' ―nacui̱ Jesús ji'i̱ ngu' bi'―. Lo'o jua'a̱, xti ti ngu' ntsu'u nu caca cua'ni cña re. 38Bi' cha' chcui' ma̱ lo'o Sti na' nu laca Xu'na cña re, cha' tya ta Ni xi xa' la tya'a ñati̱ nu taca ji'i̱ cua'ni cña re.
Currently Selected:
SAN MATEO 9: cta
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 1981, Wycliffe Bible Translators, Inc. All rights reserved.