LUKAS 21
21
Vulda vi cata duhulta
Mark 12:41-44
1Hay li ma Yesu cuk iram goyo, nam wi sa Farisena ka cuk vulda visiya hay Tempella. 2Nam wi cata duhulta ta hawta kaw, na' cuk gurju ta guray ma'. 3Nam di'e: Nan digi gasita, cata duhulta zawni cuk kayn suw segen kafe; 4Kay sum segen lakŋi cuk vulda visi hay timgil kayn kuɗ asta visiya, may na'a hay hawta va'a cuk sle ma ŋom ŋil tuwa' petna.
Ɦo-gaata vi Yerusalem hiɗi mata vi goora vi sana
Mat 24:1-5; Mark 13:1-37
5Hay li ma segen ka law kay Tempella ala nam koti hiɗi hiɗiy ma ŋaana, hiɗi sle ma sumun maram hay vulda kaw, Yesu di'e: 6Buura ma ma'a, hay buur namna ɗawni, hiɗiy ma nigi ɗuwum lakŋi, mara as hin kulo kay tuwam bay ɦo gaaɗi mayɗi.
7Nisi jobomu: Bum-yalla, slen kayni ma li lancitige? Hay li ma slen kayni hebawa goboyo, va ma ɗek goy kalamna mi mige? 8Yesu disiya: Ligi ŋali, hin sa ɗutgi goyɗi. Kay sumun ŋolo ma ma'a hay semda vanu, nisi ma di ala: Nanu mi namu, lebo liyn coowa goboyo. May nigi ma tap kuɗsiɗi. 9Hay li ma nigi hum labarawa kay duura hiɗi ɦilayta-kulota, ligi narɗi. Kay la linigekaw, slen kayni ma li goy jewe, may dabaŋ-gu'ta ma co kuɗum deɗi. 10Nam disiya: Jaf-sum sara'a ma yaw kulo'o kay jaf-sum sara'a, mulda tara'a ma fok kulo'o kay mulda tara'a kaw. 11Wiira-nagata ma li ŋolo, mayta hiɗi moy ma joona ma li tani, li ɗawn kaw, sle ma muɗ sumun nari ma li ŋolo, ɗekka ŋulota ma li hay dukalawna kaw. 12May jew slen kayni, nisi ma yawgiya, nisi ma lasgiya kaw; nisi ma vulgi goy tam sinagogayna, nisi ma cukgi daŋgaya, nisi ma nargi vok muliyana hiɗi guvernera kaw kuɗ semda vanu. 13Kayni ma vulgi liyna kay li di-goyta. 14Vigi goy kigi ala, nigi ma var goy jewe kay hot-dita ta nigi ma hota' tisitɗi, 15kay nan ma vulgi dita hiɗi yalla, ma sa gawt kigina as ci wayt hiɗi namɗi. 16sumaygiya, ɓosiyogina, sugolaygina hiɗi boniyogina ma vul segen jargi ŋolo goy tam cita-goyta. 17Sumun kaf ma ka gawt kigiya kay semda vanu. 18May ɗuŋus ma kigina kep kaw ma ba goyɗi. 19Sogi tuwgiya, nala nigi ma suɗ ciwta vigi goyo.
20Hay li ma nigi wi Yerusalem ŋuyi kay sojena, hay na'ta nigi ma wi ala ɓulakka va' ka goboyo.
21Hay na'ta nisi sa ka hay Yudiya ma pir jaŋ kulo kay hiɗiyna, nisi sa ka hay Yerusalem ma ŋay goyo, nisi sa ka goy hay sinena ma cuk kulo hay hoyok-ziynɗi. 22Kay kayni mi buura vi wurakŋa, kay sle ma ɗoy petna vunam ma hoba. 23Joot kay boy sa hayna hiɗi nisi sa guron digsiya hay buur namna ɗawni, kay lasta ma li ŋolo hay nagata, ɦiyda ma li kat sum nisina kaw. 24Nisi ma cuk gaa vok kew-gaferaŋa, nisi ma kalays goy gorvo'o jar jaf-sumuna kafe, sum sa waana ma tay Yerusalem gaa'a kuɗ sesiya, ta-ta liyna vi sa waana vunam ma hob tuwa.
25Ɗekka ma li hay fatta, hay tilla hiɗi mislekŋa; gaa'a kay nagata kaw, sumuna ma wi va ma nisi ma liɗi, hay li ma nisi hum suwana vi niy-lumna hiɗi billa; 26Narta ma ci sumuna hay li ma nisi cub slena ma min li hay nagata, kay donota vi dukalawna ma geɗa. 27Hay na'ta nisi ma wi goora vi sana co hay ɗugulla hiɗi gaŋeraŋa hiɗi gajijita ŋolo. 28Hay li ma slen kayni tun caw li'e, yawgi kulo'o, poŋgi yigi kulo'o, kay butta-goyta vigiya ka co goboyo.
29Nam disi law ma nir-niramna mara lo ala: ɗuwgi tam gu-gumna hiɗi guway hegen kaf. 30Hay li ma nam tun caw ɓo'o, nigi kay tuwgi wi ala menda ka goboyo. 31Nala nigi kaw, hay li ma nigi wi slen kayni ka co'o, nigi ma wi ala mulda-Lawna ka goboyo. 32Nan digi gasita, jaf-sumun kayni ma vat goy noŋɗi, ta-ta slen kayni pet li'e. 33Dukalawna hiɗi nagata ma vat goyo, may yoboyna vanu ma vat goy noŋɗi.
34Ligi ŋal mi tuwgiya, kay dikgi ma muɗ neke kay haramna vi slena hiɗi dolaynaɗi, kuɗ vaara kay slena vi nagatɗi kaw, kay a buur namna ma co kigi tukumu, 35ki dena naɗi, kay nam ma co'o kay sum sa gaa kay nagat kuɗulu'. 36May lakgi jigere, siɗawgi hay buura kaf, kay nigi ma fi dono'o kay hulot goy vun slen ma min li pete, kay nigi ma lak kulo'o vok goora vi sana.
37Hay falayta, Yesu ka hat hay Tempella, hay henjeta nam kal bur goy kay hiɗiyta Olive. 38Hay graw culum culum' kayni, sumun kal goy hay Tempella kay hum hatta valamu.
Currently Selected:
LUKAS 21: Massana
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
BIBALDA TA PELDETTA © L'Alliance Biblique du Cameroun, 2001