Geenesis 1
1
Pueyaso Cortanijiosacari
1Shushajanaa mijiria casaa coteesacari, Pueyasoori jiya cajiniocua cortaniquiaari jiyajaajanio. 2Jiyacaritij, jiyari maja quenaaja jiya naata na niquishaanu quijia. Puetunujuanaari puereetuuca queroni mohuaca quijia, ninishiquitij. Pueyaso Sohuanuuri mohuacacaco jaaseyacojojua.
3Jiyacaritij Pueyasoori naa sequequiaari: “Cuhuashiqui cuaara mijiria quiiria.” Naacuatej, mijiriaari cuhuashiqui quiquii. 4Pueyaso niquishacari na shipinishano cuhuashiquiiri maninia quiriquiaa, ninishiquijiniji shiriquioquiaari cuhuashiquiiri. 5Na jiyaniquiriiri “juuca”. Ninishiqui jiyaniquiriijaariuhuaj “niucua”. Pueyasoori naa tucuataquiaari na miishano cuno coteenu juucatej; niniquiiri.
6Na nuhuaji, Pueyasoori na rupaa cumaacata naa sequequiaaritij: “Jiya cajiniocua cuaara quiiria juhua paatujua. Cunoori mohuaca coseriquiano jiyacojoria, mohuaca raquitiijiniuriajuhuaj.” Seetanujuanaa naa quiquiaariiri. 7Pueyasoori naa na paatu miiquiaari jiya cajiniocuatej mohuaca na raquiriojotanura. Naacuatej mohuacaari maninia raquitiijioquiaari. Tanacuhuari mijiria raquitiiquiaari jiyacua, jiyacojoria naajuhuaj. 8Pueyasoori na paatu jiyaniquiquiaari “jiya cajiniocua.” Pueyasoori jiyacari tari querajaa juuca poonijioriquiaa.
9Jiyacaritij, Pueyasoori naa sequeree: “Jiya cajiniocua cariquimiaji quiyano mohuaca cuaara jaateera jiya cacoji tamama na cajitianura. Naacuatej, jiyari muetanutaniya na joojequetanura.”
Naa quiquiaariiri taa Pueyaso sequequiaaricuajani. 10Mohuacajiniji muetano casaa jiyaniquiriiri “jiya.”
Naajuhuaj, tamama cajitiaano mohuaca jiyaniquiriiri “moo cajitiu.” Naa puetunu Pueyaso miishanojanaari nera maninia quiriquiaa. 11Naacuatej Pueyasoori naa sequequiaari: “Nio cua shipinishano jiyacua cuaara moritiaara puetunu casaajuhuanajaj. Cuaara moritiaara muetujuaca jiyasocua, muetujuaca nacuhuajaajanio.”
Naa seetanujuanaa quiquiaariiri. 12Jiyacua moritiaquiaariiri puetunu casaajuhuanajaj. Moritiaquiaariiri muetujuaca jiyasocua, muetujuaca nacuhuajuhuaj. Naacuatej, Pueyaso niquishacari puetunu na shipinishanojuanaa, puetunujuanaari maninia quiriquiaa nera. 13Naa Pueyaso poonijiosacaritij cunoori tari quiquiaari jiuujianaraca juuca.
14Jiyacaritij, Pueyasoori naa sequequiaari: “Jiya cajiniocua cuaara quiiriajuhuaj nunucojuaca casaa, mijiria cuhuatariquianoni. 15Jaara naa quiritij, cunoori maninia sojotariquiano juuca, niucuanio. Naacuatej na naata serojosaanu puetunu juucajanaa. Naacua niishishaanutaniyajaariuhuaj taacari marijia puequenutaniyani. Naajuhuaj naacua niishishaanutaniyari taacari shuniya quiniutianiyani, taacari tacareejonu quiniutianiyajaniuhuaj.”
Seetanujuanaa naa quiquiaariiri. 16Pueyasoori jiya cajiniocua puereetuuca nunucojua cortanijioree. Puereetuuca casaa juuca cuhuatariquiano, secaco naataja casaajuhuaj niucua cuhuatariquiano saniniuujia. Jiyacaritij, riya cortanijioreejaariuhuaj. 17Pueyasoori puetunu nio na cortanijiosano nunucojuaca casaajanaa niojoquiaari jiya cajiniocua, tiji nojori cuhuatanura jiya, juuca, niucuaqueyanio. 18Pueyasoori naa maninia jeenucuaquiaari na cortanijiosano casaatej. Juuca shiriquioquiaari ninishiquijinijiiri, naa tama nojori quiniuriajaajatej. Na niquishacari naa na shipinijiosanoniquitij, nera, puetunujuanaari maninia quiriquiaa. 19Pueyasoori nio cortanijioquiaari cuno cuarto juucajinia.
20Pueyasoori naa sequequiaarijuhuaj. “Mohuacajinia cuaara caneera puetunu moo cariquimia quijiaca casaajuhuanajaj. Cuaara quiiriajuhuaj jaacuatujuaca casaa.”
Naa quiquiaariiri. 21Pueyasoori queranacu moo cajitiujinia quijia puereetuuca pueresano casaa shipinijioquiaari, moojinia muetujuaca casaajuhuaj, puetunu moo cariquimia quijiaca casaajuhuanajaj. Puetunu jaacuatujuaca casaa shipinijioreejaariuhuaj.
Tama Pueyaso niquishacarijiaaja puetunu na shipinijiosano casaajanaani, neraari puetunujuanaa maninia quiriquiaa. 22Naacuatej, naa maninia rupaajinia sequeree na shipinijiosano casamiiri:
—Jiyanohua queraatia nia mueture, naajuhuaj jiyanohua queraatia nia tamuetoori nio moo cajitiujiniani. Naajuhuaj, puetunu jaacuatujuaca casaajanaa cuaara caneera puetunu jiyacajiniajanaa.
23Jiyacaritij cuno juucani, tari quiquiaariiri cinco juuca Pueyaso poonijiosacari.
24Na nuhuaji Pueyasoori naa sequereei: “Jiyacua cuaara caneera puetunu casaajuhuanajaj, seesano casaa, nacujiniaaco quijiaca, puetunu roshiyocuatujua casaajaajanio.”
Naa quiquiaariiri. 25Pueyaso shipinijionu nuhuaji puetunu canujuucuatujuaca casaajanaani, puetunujuanaari maninia quiquiaari nera.
26Jiyacaritij, Pueyasoori naa sequereei:
—Quiarijiani pueyano pa shipiniri juhua pajaniya quiriquianoori. Naacuatej nojuajaari puetunu pa shipinishano casaajanaa jiitiana quiriquiano: moojinia quijiaca, jaacuatujuaca, seesano casami, nacujiniaaco quijiaca, puetunu roshiyocuatujuaca casaajanaanio.
27Pueyaso jaara pueyano shipiniquiaari, juhua nojuaja na quiniuria na shipiniquiaariiri. Maaji shipiniquiaarijaariuhuaj. 28Naa nojori na shipininiu nuhuajitij, maninia rupaajinia nojori sequereeri:
—Jiyanohua queraatia nia mueture, tojetaarucuajanaa queraatiatej. Naa nia canere puetunu jiyacajiniajanaatej, jiyari puetunu tucuarejetamaajanaaquij. Naacuatej niocua tama na camaruhuajaaja quiriquia. Naajuhuaj, niaari puetunu moojinia quijiaca, jaacuatujuaca, roshiyocuatujuaca camaruhua quiriquiano.
29Na nuhuaji, Pueyasoori naa sequeree na shipinishano pueyano necotaja:
—Cua tojiri, janiya quiarijia nia niquitioya nio puetunu muetujua jiyasocuajanaani, puetunu muetujua nacuhuajaajanio. Puetunujuanaari niaarano. Jaara mueture, puetunu na jajaujanaari nia miasocoriquiano. 30Saniniuujia, jiyasocuaari puetunu cua shipinijiosano casami miaquesocoriquiano. Cunoori nacujiniaaco quijiacara, roshiyocuatujuacara, puetunu jaacuatujuaca casamiriajanaanio.
Seetanujuanaa naa quiquiaariiri. 31Pueyasoori niquiquiaari, puetunu na shipinijiosanojuanaari maninia quiquiaari nera. Cuno juucajani, jiyacari tari quiriquiaari seis juuca Pueyaso poonijiosacari.
Currently Selected:
Geenesis 1: arl
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 1986, 2008, Wycliffe Bible Translators, Inc. All rights reserved.