Лука 17
17
17 бетӀер
ГӀисал цо-цо гӀакълаби
1Жиндирго муридазда ГӀисаца абуна:
– Инсан мунагьалъукье ккезавулеб жо дуниялалда лъугьинчӀого букӀунаро, амма кӀудияб балагьги гӀазабги – гьеб босун вачӀарав чиясе. 2Дида божулезда гьоркьоса цониги лъимер гӀадинав пулан мунагьалде цӀазегӀан, гьесие лъикӀаб букӀинаан, гьобоги горбода бухьун, ралъдалъе рехани.
3Ворегиха, нуж гьелдаса цӀуне. Вацас дуе квешлъи гьабуни, гьесие бадибчӀвай гьабе. Гьев рекӀекълъани, тӀасалъугьун те. 4Къода жаниб анкьго нухалъ гьес дуе квешлъи гьабуниги, анкьабго нухалъ духъе вачӀун, гьес жив рекӀекълъанилан абуни, – тӀасалъугьа гьесдаса.
5Гьебмехалъ чапарзабаз ТӀадегӀанав ГӀисада абуна:
– Нижер рекӀелъ божи цӀикӀкӀинабе, – ян.
6ТӀадегӀанав ГӀисаца абуна:
– Горчицаялъул хьодул мугьгӀанасеб божигун нужеца гьаб инжиралъул гъотӀода абуни, кьолболъа бахъун ун доба ралъдал бакьулъ чӀаян, нужер амру гьелъ тӀубазабилаан.
7Нужер цонигиясул цо лагъ вугилан те. Гьев векьарун свакан хуриса яги рохьдодаса вачӀун вугони, хехго кваназе гӀодов чӀаян абулищ гьесда? 8Гьелъул гӀаксалда, гьесда абуларищ хехго квен гьабеян ва дун квана-гьекъон вахъинегӀан дие хъулухъалъе чӀаян, цинги мунгоги квана-гьекъеян? 9Гьеб амру тӀубазабуралъухъ лагъасе баркала кьолебищ? 10Гьедин гьабула нужецаги: нужее амру гьабурабщинаб тӀубазабун хадуб, нужеца абула ниж ругин пайда гьечӀел лагъзал, нижеда абураб гурони гьабичӀин нижецаян.
ГӀисаца вацӀцӀад гьавула барасалъ унтарав анцӀго чи
11Иерусалималдехун валагьун Самариялъулги Галилеялъулги гӀорхъудасан унев вукӀана ГӀиса.
12Цо росулъе щолаго, гьесда дандеккана барасалъ унтарав анцӀго чи. РикӀкӀадегӀан чӀун, 13гьез ахӀулеб букӀана:
– Я, ГӀиса! НасихӀатчи! ГурхӀа нижеда! – ян.
14Гьел рихьараб мехалъ, ГӀисаца абуна:
– Рахъа нуж гьанже кашишзабазухъе а ва нужго рацӀцӀалъун рукӀин бихьизабе.
Гьениса унаго гьезул чурхдул барасалдаса рацӀцӀалъана. 15Живго сахлъун вукӀин бихьун, гьезул цояв, ахӀунго ахӀун Аллагьасе рецц гьабулаго, тӀадвуссун вачӀана. 16Цинги, ГӀисал хӀатӀазда цеве накалдаги чӀун, гьесие баркала кьуна. Гьевни Самариялдаса чи вукӀана. 17ГӀисаца гьесда абуна:
– Нужер анцӀавго сахлъичӀевищ? Дов ичӀавго кивеха арав? 18Унго, гьав чияр чиясда гурони, дир ракьалдаса цониги чиясда ракӀалде ккечӀебищха Аллагьасе рецц гьабизе?
19Цинги гьесда абуна:
– Вахъа тӀаде, а гьанже, дурго божи-иманалъ хвасар гьавунин мун.
«Аллагьасул ПарччахӀлъи кида букӀине бугеб?»
20Аллагьасул ПарччахӀлъи кида букӀине бугебилан фарисеяз гьикъидал, ГӀисаца абуна:
21– Аллагьасул ПарччахӀлъи гӀадамазда бихьичӀого бачӀина. Лъицаниги абиларо гьеб гьале гьаниб бугилан, яги доле доба бугилан. Гьале гьаниб нужелъин бугеб Аллагьасул ПарччахӀлъи.
22Гьес жиндирго муридазда абуна:
– ГӀадамил Лъимер нужеда цадахъ вугеб цо къогӀаги бихьизе нуж гӀащикълъараб заман бачӀина. Амма нужеда гьев вихьиларо. 23Нужеда абила гьале гьанив вугин, яги дова вугилан. ГӀенеккуге гьезухъ, унге гьезда хадур. 24Зобалазул цояб рахъалдаса цоги рахъалде паркъун унеб пири гӀадин вукӀина ГӀадамил Лъимер, гьев вачӀараб къоялъ. 25Амма цин гьес гӀемераб гӀазаб хӀехьезе ккезе буго, ва гьаб умматалъ гьесдаса инкар гьабизе буго.
26НухӀ аварагасул заманаялъ ккараб гӀадаб иш ккезе буго ГӀадамил Лъимадул заманаялъги. 27Квана-гьекъолел рукӀана, лъудби рачунел, россабазе унел рукӀана гӀадамал НухӀ гамида жаниве лъугьинегӀан. Цинги тӀупан тӀуна ва тӀолабго махлукъат лъадалъ гъанкъана.
28Гьебго жо ккана ЛутӀ аварагасул заманаялъги. Кваналел, гьекъолел, бичулел, хисулел, хурзал рекьулел, минаби ралел рукӀана гӀадамал ЛутӀ авараг Содом шагьаралдаса къватӀиве лъугьинегӀан. 29Цинги цӀадулги чӀабтӀилги цӀад бана зодисан, ва киналго хвана. 30Гьедин букӀине буго ГӀадамил Лъимер загьирлъараб мехалъги.
31Гьеб къоялъ тӀохда вугев чи жиндирго къайи-къоноялда хадув гъоркье рещтӀунгеян абе, хурив вугевги рокъоб хутӀаралда хадув тӀадвуссунгеян абе. 32ЛутӀ аварагасул чӀужуялъул ккараб иш ракӀалда чӀезабе#17:32 Мунагьазул цӀураб Содом шагьар Аллагьас щущазабилалде малаикас ЛутӀ аварагасда лъазабуна хъизангун цадахъ гьениса лъутайилан. Амма нухдасан нахъруссун ралагьугеянги абуна. Зодисан рещтӀараб цӀаялъ Содом бухӀулеб мехалъ нахъехун ялагьарай ЛутӀил лъади цӀамул хӀубиялде сверана. . 33Жиндирго гӀумру цӀунизеян лъугьарав чи гьелдаса махӀрумлъила; жиндирго гӀумруялдаса махӀрумлъизе разилъарас гьеб хвасар гьабила. 34Дица абулеб буго нужеда: гьеб сордоялъ цо боснор регун ругел кӀигоязул цояв вачина, цогидав хутӀила. 35ГӀатӀ ххенолей йигей кӀиго чӀужугӀаданалъул цояй ячина, цогидай хутӀила.
36-37Муридаз ГӀисада гьикъана:
– Я, БетӀерчӀахъад! Киб гьеб букӀине бугеб? – ан.
Гьес жаваб гьабуна:
– Жаназа бугеб бакӀалде чудкал ракӀарула, – ян.
Currently Selected:
Лука 17: АварАК
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Институт перевода Библии, 2005-2023