Mata 21
21
Yesuw a da a Yeruzalem
Markus 11:1-11; Luka 19:28-40; Yuhana 12:12-19
1I dəba ŋa ya, gà Yesuw nda gà ɓəzla mazazama ŋgat ti de a a Yeruzalem. Ti ndze a kwite Betfedze, tàa à mendze bise nda Yeruzalem, aà sik kwite duwa tə zalar kwite Ndzendzebire. I fataya ka, Yesuw a slər gà ɓəzla mazazama ŋgat sula aka miɗ. 2A gwaɗa a tar: «Dum a kwite aaka ika miɗ kwa ya tə̀ma. Kàa ndzwimaha aà gùva kwite ata ka, ki lwimehe a aà gà hezweŋe duwa a riŋ nda kəla ŋgar madànà ŋa aà dizl. Kà pə̀lumara, dite ka dum dərra a faha ya. 3Na wura aka gwaɗa a kurum: <Aàmala na ki pìlwim a hezweŋe ŋa ya> ka, gwaɗumar: <Əbay na a wiz a.> Tsam ka, wele ata a milek a kurum dər tsara, ki dwim a dərra.» 4Kamala taŋa ya, a ge a ba ka, kalkal biy mala məma à guma Mbulum ana akahər ata ya. 5A gwa:
«Mbulum a gwa ka, dumaha, gwaɗumaha
a gà mburma ana i Yeruzalem a ka,
araha, Əbay kurum naha,
a dehe a a təv kurum.
Ama a dehe a ka, nda ndzəɗa tsa,
nda mahə̀nà à gər a bəɗ,
aɗaba ŋgat a tsil a aka hezweŋe ata
nda gà kəla ihər a.»*fa*
6Dite i dəba ŋa ya, gà ɓəzla mazazama ŋgat ata sula a slər tar a, ta mah ba, tə da. Tə daha ka, ta ge dər kamala ana Yesuw a tsik a tar a. 7Tə daha, ta gəsara hezweŋe ata kəla ihər a, tə dzaya aaka gà petek tar, dite Yesuw a tsəl aaka kuɗa. 8Gà asiŋ gà mburma hinne, ta fatala gà petek tar aka bàrama ana Yesuw a de a dər a. Gà biy ŋgiɗ ibam, ta haɓa aaka gà slàmbah, aà mazlə̀bà à ŋgat mbaŋa. 9Dite gà asiŋ gà mburma ana ika miɗ Yesuw a, nda gà na i dəba ŋgar ti zezem a ŋgat tserdze ya ka, tə dza ba aà mazlə̀bà à ŋgat nda Mewideye ŋgəlakəkka. Ta gwaɗawa:
«Zlə̀bakwa à kəla gà gwala Dawda.
Mbulum mi pise ahəm a wele ana a slərra ya.
Zlə̀bakwa à Mbulum Batsah ŋa ana
i gər ŋa ya.»*fb*
10Zàkwayiya ka, Yesuw a ndze a Yeruzalem. A ndzeha a fata ka, gà mburma ana i huɗ batsah kwite ata ya tserdze, gər a wise a tar. Ta mà akaba à bazlam. Ta gwa: «Weke na naha a dere a a huɗ kwite kamala taŋa ya?» 11Ama mayahaba gər gà mburma ata tə dəɗ aakaha ya, ta gwaɗa a tar: «Naha ka, Yesuw, mala məma à guma Mbulum ana a dara i Nazaret, ika ahəɗ Galile ya.»
Yesuw i ga Mbulum batsah ŋana
Markus 11:15-19; Luka 19:45-48; Yuhana 2:13-17
12Aləka i dəba ŋa ya, Yesuw ka, a daha, a pəts a ga Mbulum batsah ŋana. A ta medeha ka, a leha aɗəm aà gà mburma a riŋ ti sekeme a gà duwa. Gà asiŋ ŋa ti dzewe a ter a à gà duwa. Gà asiŋ ŋa ibam, ta mbìrwìɗ a siŋgwe. A ŋgat a tar kamala taŋa ya ka, a daha, a dalawara iɗəm tar a bəra ya. A mbaɗa à gà tabəl gà ɓəzla məmbùrùɗà siŋgwe aaha a bəɗ gwits gwits nda siŋgwe ŋa dze. Dite a ŋguyutswa à gà kwerse gà ɓəzla madzàwà à maadagwar aaha. 13A gwaɗa a tar: «Aɗaba a riŋ mewetse ŋa i wakita, Mbulum a gwa ka: <Ga gà ka, biy gà mburma ana ta hemiŋ a iɗəm a.> Ama kurum kà nwim dər i kurum ka, sləlak mandza aɗəm dukw gà ɓəzla akəl.»*fb*
14Dite i dəba ŋa ya, gà ɓəzla guluf nda gà ɓəzla magàha a bəɗ, tə dara a təv Yesuw a ga Mbulum batsah ŋa ata ya. A mbala à tar. 15Aləka gà bàba gà ɓəzla mandəva kuɗa a Mbulum, nda gà bàba gà ɓəzla medzeŋge məpala ahəm Mbulum, ta ŋgat a dukw mene aà mburma ana Yesuw a ge ya ka, a tsəɓ a tar hinne. Aɗaba gà ɓəza tekeɗe, tì zlibe a à Yesuw hinne nda magala i ga Mbulum batsah ŋa ata. Ta gwa: «Zlə̀bakwa à kəla gà gwala Dawda.» 16Gà mburma ata ta gwaɗa a Yesuw: «Kàa tsaraka dukw ana gà ɓəza aaha ti tsik a ya ya?» Yesuw a gwaɗa a tar aaka: «Haya, Yàa tsaraka. Ama kurum ana, kàa dzeŋgwim dukw ana i wakita Mbulum a tsik a ti tsiye? A gwa aà iye ka: <Kər kà ndzək gà ɓəza, ku mege gà na ti se a awah mba ya, na tì zlibe a à kər a ya.> «*fc* 17A tsik a tar kataya ka, a hitsera i liwiŋ tar a. A dara i huɗ batsah kwite ata ya, a da ndàra a Betaniya, a həna riŋ i fata.
Yesuw a vəl mezelme a dizl ɗaf duwa a ndza kamala gùrùv a
Markus 11:12-14,20-25
18Ndidwe ŋana i mèkwède hedwe, gà Yesuw tə dara i Betaniya ya, ta mbìɗ a gər a Yeruzalem a ka, may a wir ahər a hinne. 19Aləka a ŋgataha a dizl dukw duwa ndàhàk à gər ŋgar, a ndza kamala gùrùv a, aà gùva vatwa. A da aà huɗ ŋa. A ta medeha ka, mawà ŋa tsa. A ŋgataha ka, a slàmbah ŋa ɗekɗek pəra. A vəl mezelme a dizl ɗaf ata tsara. A gwaɗar: «Ki ta we a ilik asa tsidze, daga à kinehe ya haa aà biybiy.» Yesuw a tsiker kataya tsara ka, dizl ɗaf ata suraŋ a kula.
20I fataya ka, gà ɓəzla mazazama ŋgat riŋ tàa ŋgatar mbaŋa. Dukw ana Yesuw a tsik a dizl ɗaf ata ya ka, a ge aà tar kamala dukw mene aà mburma ya. Ta gwa: «Meme na dizl ɗaf aaha a kula kataya tsara ya?» 21Yesuw a gwaɗa a tar aaka: «Iye ihər i tsik a kurum a nda ndzer, pàrsa iɗəm tsa: Na kàa gəsum iye nda gəzləŋ kurum lele, madzala gà gər kurum wàkit wàkit tsəka, dukw ana i ge nda dizl ɗaf aaha ya ɗekɗek tsa na ki gwim a ya. Ku mege kwite aaha kinehe ya tekeɗe, ki gweɗwimer a: <Hitse i faha ya ka, da, tə dəɗ a duluv aaka> ka, a de a kaɗəŋ. 22Aɗaba na kàa gəsum iye nda gəzləŋ ilik, dukw ana ki wizwim a aà Mbulum nda meheme tserdze ya ka, ki ŋgetwimiŋa.»
Weke na a vəl ndzəɗa a Yesuw aà mege duwa pampam a
Markus 11:27-33; Luka 20:1-8
23I dəba ŋa ya, gà Yesuw ti ndzeha a Yeruzalem asa ka, a daha, a pəts a ga Mbulum batsah ŋa ata. A daha, a dza ba aà metsìkè bazlam Mbulum a mburma. Zàmma tsəka, gà Əbay gà ɓəzla mandəva kuɗa a Mbulum nda gà bàba gà mburma ana ta kwere a gà Yahuda ya, tə daha a təv ŋgar. Tə daha ka, ta gwaɗar: «Ki ge a duwa kamala taŋa ya ana, nda ndzəɗa weke? Weke na a slərra kər, a vəlak ndzəɗa ŋa dze ya?»
24I dəba ŋa ya, Yesuw a gwaɗa a tar aaka: «Iye tekeɗe ka, i wiz aà kurum a duwa ilik mbaŋa te. Na kàa sirwimiŋ aakaha ka, dite iye tekeɗe, i ɗif a kurum a dər, nda ndzəɗa weke na i ge a gà dukw aaha ya.» 25A gwaɗa a tar: «Weke na a slərra Yuhana aà metsìlwìɓè à mburma a yam a? A dara ana, i ŋga ya? Wànà Mbulum a, na a slər ahər ŋgat a, tsəna, mburma ya?» Gà mburma ata tə dza akaba bazlam ika magər tar. Ta gwaɗaba: «Na kù gwaɗakwar kinehe ka, Mbulum na a slər ahər ŋgat a ka, a gweɗekwe a: <Dite aàla na kə̀ gəsum bazlam ŋgar tsiye?> 26Ama na kù gwaɗakwar: Gà mburma na tə slər ahər ŋgat a ka, a ge a ba tsa asa. Aɗaba gà asiŋ gà mburma hinne ika magər kwa aaha, ta gwa, Yuhana ka, mala məma à guma Mbulum, ta miyek a à kwa tsa asa.» 27I dəba ŋa ya, ta gwaɗar: «Mì sər tsa.» Dite Yesuw a gwaɗa a tar kuɗa: «Yawwa, iye tekeɗe ka, i tsik a kurum a wur ana a slərra iye, a viliŋ ndzəɗa aà megeye gà dukw aaha tserdze ya ɓav tsa mbeete.»
Bazlam minew aka gər gà ɓəza wele duwa sula
28Aləka i dəba ŋa ya, Yesuw a gwaɗa a gà mburma ata asa: «Kinehe kà dzalum dze ana, meme? Aɗaba wele duwa a riŋ, gà ɓəza ŋgar sula, a da a təv kəla ŋgar malahalah ŋana. A daha ka, a gwaɗar: <Dəm gà, mbakum ka, i slir a kər. Da aka megemir a gùvàh ga.> 29Ama kəla ata a gwaɗar: <I de a tsa.> Zàkwayiya ka, kə̀rə̀zl a mbəɗ à madzala gà gər ŋgiɗ asa, a da a dala ata. 30I dəba ŋa ya, tsir tar ata a da a təv kəla ŋgar aaha masula ŋa ya. A daha, a tsiker kataya mbaŋa asa. Ama kəla ata a gwaɗar: <Iye ka, i diŋa, dede ga.> I dəba ŋa ya ka, aka da asa tsa, a niw.» 31A gwaɗa a tar: «Weke na i liwiŋ gà ɓəza ata sula ya, na a ge dukw ana tsir tar a waya ya?» Ta gwaɗar aaka: «Kəla aaha ndeɗiŋa malahalah ŋa ya.» Yesuw a gwaɗa a tar aaka mbaŋa: «Kinehe ka, iye ihər i tsik a kurum a nda ndzer: Gà ɓəzla duwan nda gà məkəs ana ti dzewe a à ba tar a ka, tì lèh a kurum a a mekwere Əbay Mbulum ana a ta kwere a mba ya. 32Aɗaba Yuhana metsìlwìɓè à mburma a yam, a dara a təv kurum a, a ɗif a kurum à vatwa ana ŋgwal ŋa ya ka, kàa gəsum bazlam ŋgar tsa. Say na a gəs guma ŋgar ata ka, gà ɓəzla duwan, nda gà məkəs ana tə dzawuwa à ba tar a ɗekɗek. Ama kurum ka, ku mege kàa ŋgatumar nda are kurum, na gà mburma ata ta gəs bazlam ŋgar ata ya tekeɗe, kà mbəɗum à madzala gà gər kurum, dite kwets, kə̀ gəsum bazlam ŋgar ata ɓav tsa.»
Bazlam minew gà ɓəzla makàslà gà dizl ɗaf duwa hinne
Markus 12:1-12; Luka 20:9-19
33I dəba ŋa ya, Yesuw a gwaɗa a tar: «Tsarakum, i tsik a kurum a bazlam minew ŋgiɗ pam asa. Wele duwa a riŋ, ŋgat ka, mala ga. A sàs gùvàh. A dzava aɗəm dizl ɗaf hinne, a zlàzl ahər tits lele. A làmbaɗa aɗəm tùgùɗ a magər ŋa, aà meɗwitsewa aɗəm mawà dukw ata. A nduŋ aɗəm dzègwèle i magər ŋa ata aà makàslà ŋa.*fd* I dəba ŋa ya, wele ata a da a təv ŋa diriŋ aka ahəɗ ŋgiɗ. Gùvàh dizl ɗaf ŋgar ata à mìtehiŋa. A dza aɗəm gà mburma aà məfə̀rà ahər, dite aləka ta vəlar dukw gùvàh ŋgar i ŋgal na aka màra ya. 34Aləka mawà dizl ɗaf ata a nah ka, wur ana a dzava ya, a sləraha gà mburma ŋgar a təv gà ɓəzla megemir dizl ɗaf ŋgar ata, dite ta vəlaraha dukw gùvàh ŋgar ata kuɗa. 35Ama gà ɓəzla megemir ŋgar ata ta ŋgat a gà ɓəzla meslire wele ata a sləraha tar a ka, ta gasa tar. Biy ŋgiɗ ilik ka, ta gə̀zl lehhè. Biy ŋgiɗ asa ka, ta kəɗ fit a biye. Məmakər ŋana ka, ta kalawa ŋgat nda kur. 36I dəba ŋa ya asa ka, mala dizl ɗaf ata a sləraha gà ɓəzla meslire ŋgiɗ pam, a sə̀kàhəha à tar. Tə daha ka, ta ge à tar kamala gà taŋa ya mbaŋa. 37I dəba gà mburma ata ya ka, a sləraha kəla ŋgar a təv tar. Ŋgat a gwa i gər ŋgar ka: <Tàa ŋgat a kəla gà aaha ka, ta gìser a zìrìwe te.> 38Ama gà ɓəzla megemir dizl ɗaf ata ta ŋgat a kəla ata, a daha a təv tar a tsara ka, ta mà akaba à bazlam ika magər tar. Ta gwaɗaba: <Naha ka, kəla ŋgar ana dizl ɗaf aaha a ta mìtser a mba ya, dumara, kə̀ɗakwa iɗəm a, dite dizl ɗaf aaha ma ne biy kwa.> 39Ta gəs kəla ata, fakw ti yàra iɗəm a bəra ya. Tə dara, ta kəɗ ŋgat fit a biye.»
40Aləka i dəba ŋa ya, Yesuw a ndəv à bazlam ŋgar ata ka, a tsam aà tar. A gwaɗa a tar: «Mala dizl ɗaf aaha dze ana, a ge a ana, meme na nda gà ɓəzla megemir ŋgar ata ya, na aləka aka təv ana aka daha ya?» 41Gà mburma ata ta gwaɗar aaka: «A dzeye a iɗəm à tar a sleɗik, a bets a gà mburma ata gà ŋgwal ŋa tsiye, dite à vile a gùvàh ŋa a ahər a gà mìsle ŋgiɗ pam, gà na ta ge a megemir ŋa ka, ta vilerehe a nuba gùvàh ŋgar tits a tə̀vəməŋa ya.» 42Yesuw a gwaɗa a tar asa: «Kàa dzeŋgwim bazlam ana i wakita Mbulum a ti tsiye? A gwa ka:
<Kur ata gà ɓəzla mazlazla ga tə zla,
ti yà iɗəm a dala ya ka,
tsaatsa ŋgwal kur te ibam.
Na a ne madəŋ kur ivaɗ ka, taŋa.
Dukw ata a ne à kwa
kamala dukw mene à mburma ya ka,
Əbay BATSAH kwa ŋa na a ge taŋa ya.>*fe*
43Aɗaba taŋa iye ihər i tsik a kurum ŋa: Kurum ka, ti zle a à kurum *mekwere Mbulum a, ta vile a a gà gwala ŋgiɗ ana ta gis ahər a ahəm a, dite na a ger a ŋgulum a.» 44{Yesuw a gwaɗa a tar asa mbaŋa: «Ama na wur ana aka dəɗ aka kur ata ya ka, ŋgə̀slàf à ses a ikaba ŋgat a fit. Ama na kur ata aka dəɗ aka wur a ka, a ŋgesl a ŋgat slìrets slìrets asa mbaŋa.»}
45Aləka i dəba ŋa ya, gà bàba gà ɓəzla mandəva kuɗa a Mbulum nda gà *Farisa, tə tsaraka gà bazlam minew ŋgar ata ka, tə sər dər, a tsik gà bazlam ŋgar ata ka, aka gər tar. 46I fataya tsara ka, ti yaha vatwa aà magəsa Yesuw. Ama ka, magəɗa a ge a tar aà magəsa ŋa. Aɗaba gà mburma a riŋ hinne i fata, ta fə̀r aà ŋgat ka, mala məma à guma Mbulum ndzer. e
Currently Selected:
Mata 21: gnd
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc. All rights reserved.