Luka 18
18
Cikozyanyo camukamufu amubetesi
1Mpoonya Jesu wakabaambila cikozyanyo eeci, mukubaiisya kuti baleelede kukomba lyoonse cakutalengaana. 2Wakati, “Mumunzi umwi kwakali mubetesi, watakali kuyoowa Leza nikuba kulemeka bantu. 3Alimwi mumonya mumunzi ooyo kwakali mukamufu wakali kuboola kumubetesi ooyo akwaamba kuti, ‘Kondikosweda mulandu wangu asinkondoma uundikatazya!’ 4Kwaciindi cilamfu mubetesi ooyo wakali kukaka pele nicakaba ciindi, wakalyaambila lwakwe mwini kuti, ‘Nokuba kuti nsiyoowi Leza nikuba kulemeka muntu, 5pele nkaambo mukaintu ooyu wandipenzya, ndilamukosweda kaambo kakwe, kayi unooboola lyoonse akundikatazya!’”
6Ucimana Mwami Jesu wakati, “Amuswiilile mbwaamba ooyu mubetesi uutaluleme. 7Sena Leza takooyoobacitila ziluleme bantu bakwe basalidwe, bamukumbila sikati amasiku? Sena takafwambaani kubagwasya? 8Ndamwaambila kuti, uyoobacitila ziluleme cakufwambaana. Mwati Mwanaa Muntu uzoojana basyomeka aakuboola?”
Cikozyanyo ca Mufalisi asimutelo
9Alimwi Jesu wakaamba cikozyanyo eeci kubantu bakali kuyeeya kuti baliluleme kwiinda bamwi. 10Wakati, “Kwakali baalumi bobilo bakaya kuŋanda ya Leza kuyookomba. Umwi wakali Mufalisi, umwi wakali simutelo. 11Mufalisi wakaima wakomba kuti, ‘Ndakulumba Leza, kuti mebo nsili mbuli bantu boonse, bacengi, bataluleme, basimamambe, alimwi ndilakulumba kuti nsili mbuli ooyu simutelo. 12Mebo ndilaliimya kulya ziindi zyobilo mumvwiki yomwe, kwamana ndapa kwakkumi kuli zyoonse nzyejana.’
13“Pele simutelo wakaima kulaale, taakali kukonzya akulanga kujulu, wakalyuumauma acamba akuti, ‘Leza, kondeengelela mebo, ndesizibi!’” 14Mpoonya Jesu wakati, “Ndamwaambila kuti ooyu muntu wakabweeda kuŋanda yakwe kalulamikidwe, pele Mufalisi taakwe naakalulamikwa pe. Nkaambo kufumbwa muntu uulisumpula uyoofwiinsigwa, pele ooyo uulifwiinsya uyoosumpulwa.”
Jesu mbwaakaleleka bana
(Mateyo 19.13-15; Maako 10.13-16)
15Nkabela bantu bamwi bakaleta bana babo kuli Jesu kuti azoobaampe. Lino basikwiiya bakwe nibakabona bantu aabo, bakabakalalila. 16Pele Jesu wakaita bana aabo, akwaamba kuti, “Amubaleke bana baze kulindime, alimwi mutabakasyi pe, nkaambo bwami bwa Leza mbubwabo bali boobu. 17Ndamwaambila kasimpe, oonse uutatambuli bwami bwa Leza mbuli mwana, takooyoonjila mulimbubo pe.”
Mulombwana muvubi
(Mateyo 19.16-30; Maako 10.17-31)
18Umwi musololi wa Bajuda wakabuzya Jesu kuti, “Mwiiyi mubotu, ino ndeelede kucita nzi kuti nkajane buumi butamani?”
19Jesu wakati kulinguwe, “Nkaambo nzi ncondaamba kuti ndimubotu? Taakwe mubotu, ccita Leza alikke. 20Uliizi milawo yaamba kuti, ‘Utaciti bumambe, utajayi, utabbi, utabejelezyi, kolemeka uso abanyoko.’”
21Muntu ooyo wakati, “Milawo yoonse eeyi ndakaibamba kuzwa kubwana bwangu.”
22Jesu naakamvwa boobo, wakati kulinguwe, “Kucili cintu comwe buyo ciceede ncoelede kucita. Ukauzye lubono loonse ndojisi, mali aandulo ukaape bacete, eelyo uyooba alubono kujulu, omana uboole unditobele.” 23Muntu ooyo naakamvwa boobo wakausa, nkaambo wakalivubide kapati.
24Jesu naakamulanga wakati, “Nciyumu kapati kubantu bavubi kunjila mubwami bwa Leza! 25Ncitete kunkamela kunjila mukapulo kanyeleti kwiinda mbocibede kumuvubi kuti anjile mubwami bwa Leza.”
26Lino bantu bakamvwa Jesu bakabuzya kuti, “Ino nguni uukonzya kufutulwa?”
27Jesu wakati, “Eeci tacikonzeki kubantu, pele kuli Leza cilakonzeka.”
28Pita wakati, “Kolanga! Swebo twakasiya minzi yesu akutobela nduwe.”
29Jesu wakati kulimbabo, “Ncobeni ndamwaambila kuti kufumbwa muntu uuyoosiya ŋanda yakwe, naa mukaintu wakwe, nibaba bazyali bakwe, nibaba bana bakwe akaambo kabwami bwa Leza, 30uyootambula zinji kwiinda mubuumi bwaansi aano, kwamana uyoopegwa buumi butamani muciindi ciboola.”
Jesu mbwaakasinsima zyalufu lwakwe ciindi catatu
(Mateyo 20.17-19; Maako 10.32-34)
31Lino Jesu wakatola batumwa bakwe bali kkumi ababili kumbali akubaambila kuti, “Amulange! Lino tuya ku Jelusalemu, nkabela ooko ziyoocitika ncobeni zyoonse zyakalembwa abasinsimi zyaamba Mwanaa Muntu. 32Mwanaa Muntu uyooabwa mumaanza aabamasi, bayoomusabwida, bakamutukane akumuswida mate. 33Bayoomukwabbaula akumujaya, pele mubuzuba bwatatu uyoobuka.”
34Basikwiiya taakwe acomwe ncobakamvwa kumakani aazintu eezi. Majwi aaya tiibakaamvwisya, aboobo tiibakaziba cakali kwaamba Jesu.
Jesu mbwaakaponya moofu mukumbizi
(Mateyo 20.29-34; Maako 10.46-52)
35Jesu naakasika afwiifwi a Jeliko, wakajana muntu umwi moofu ulikkede kumbali aamugwagwa, kakumbila. 36Nkabela moofu ooyo naakamvwa bantu banji kabainda, wakabuzya cakali kucitika. 37Bakamwaambila kuti, “Jesu waku Nazaleta nguuinda.”
38Moofu ooyo wakoongolola wati, “Jesu, O Mwanaa Devedi! Ndibede aalwengelelo.” 39Bantu bakali kumbele bakamukalalila bamwaambila kuti, “Umuna,” walo wakoongololesya wati, “Akaka O Mwanaa Devedi ndibede aalweengelelo.”
40Aawo Jesu wakaima akulailila bantu kuti bamulete kulinguwe moofu. Naakasika afwiifwi, Jesu wakamubuzya wati, 41“Ino uyanda kuti ndikucitile nzi?” Moofu wakaingula kuti, “O Mwami, ndiyanda kubona alimwi.”
42Mpawo Jesu wakati kulinguwe, “Kobona! Lusyomo lwako lwakuponya.”
43Mpoonya wakakonzya kubona, watobela Jesu, akulumbaizya Leza. Abalo bantu nibakabona eeci, bakalumbaizya Leza.
Currently Selected:
Luka 18: Tonga96
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Tonga Bible © United Bible Societies, 1994.