Jɛ́nɛ́sì 8
8
Ní-tòɔ̀ mánáín-hwɛ̀-hwɛ̀
1Sɔ̀ìn ɓóɛ gboɛɛ, Gèɖèpɔ́ɔ̀ poìn ma Nóà kè ɖɛ séín ɓéɖé fɛ̀ɛ̀ nì ma kà ɖé méèɔ̀ múɛɛ jè hwìɖǐi. Ké ɔ tò ma pìɔ̌, ké ɔ ɓaɖa ma ɓóɖó-kpàɔ̀ kɔ̃. Ké níɔ̀ dè ma ɓíɖíi muɛ gbɔ. 2Ké Gèɖèpɔ́ɔ̀ kã ma ní-dù ɓěɔ̀ kè dyɔɔ̀, ké níɔ̀ ɓɔ́ ma ɖaɓaa. 3Ké níɔ̀ gã̀ ma ɓíɖíi muɛń dyi tee, ké wé hɔ̃dɛ̀ɖɛ̀ kè kpáɖá-nyɔ sɔ̃́ ɓaɖa-bùè zi ma. 4Ɓó dɛ̀nɛ̀ɔ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè sè mɛ̀nɛ̌ìn-sɔ̃́ nììnɔ̀ ɓaɖaa, méèɔ̀ dè ma ɖé Àwáɖáwàɖà-tòɖò ɓěɔ̀ ɖò dú-hwìɛ̀ dyi. 5Ké níɔ̀ gã̀ ma ɓíɖíi muɛń dyi tee, ké ɔ dyɛ̀ìn ma dɛ̀nɛ̀ɔ̀ ɓaɖa-bùè nììnɔ̀. Ɓó dɛ̀nɛ̀ɔ̀ ɓaɖa-bùè nììnɔ̀ wé kĩ́ín-kĩ́ínɔ̀ ɓaɖaa, toɖo ɓěɔ̀ dú ɓěɔ̀ dè ma píé wóɖóɛ gbɔ.
6Sɔ̀ìn ɓóɛ gboɛɛ, wé kpáɖá-nyɔ sɔ̃́ zi ma, hwɛ̀ ké Nóà kaà ma ɔ méèɔ̀ wúɖɛ̀-wɔ̃̀ɔ̀. 7Ké ɔ síìn ma hwĩ́ín-hwã ɖò píé, ké hwĩ́ín-hwãɔ̀ gã̀ ma dyi vũàǔn dyi tee, ké níɔ̀ ma ma ɓóɖó-kpàɔ̀ kɔ̃in hwɛ̀. 8Hwɛ̀ ké ɔ síìn ma gbúɛ́ ɖò, ɓɛ́ ɔ kéɛ dyé kɛbì níɔ̀ ɖǎ ma ɓíɖíi dyi ma ní. 9Kɛɛ gbúɛ́ɔ̀ se ma kò-naín ɖò dyé, sepóɛɖé níɔ̀ dyíìn ma ɓóɖó-kpàɔ̀ kɔ̃in ke. Ɔ jèɛɛ, ɔ dyi ma ɖé Nóà gbo ɖe. Ké Nóà kpɔ̃ ma gbúɛ́ɔ̀, ké ɔ dyáìn ma ɔ ɖé méèɔ̀ mú ɖe. 10Ké ɔ fòìn ma, ké wé mɛ̀nɛ̌ìn-sɔ̃́ zi ma ɖe, hwɛ̀ ké ɔ síìn ma gbúɛ́ɔ̀ ɖe. 11Ti ɓɛ́ gbúɛ́ɔ̀ dyi ma ɖe ɓó hwìoɛɛ, gmɔ̀ nɔ̄, ɔ gbǎìn ma ɔ́ɖè-mì dyɔ̀ɔ̀ ɖò wĩín. Púɛɛ, Nóà dyuòɛ̀ ma dyí kà níɔ̀ ɖǎ ma ma kɛ. 12Ké ɔ fòìn ma, ké wé mɛ̀nɛ̌ìn-sɔ̃́ zi ma ɖe, hwɛ̀ ké ɔ síìn ma gbúɛ́ɔ̀ ɖe, kɛɛ tia múɛɛ, gbúɛ́ɔ̀ se ma ɔ gbo ɖe dyi fɔɔ cá.
13Ɓó Nóà zɔ̃ hɔ̃dɛ̀ɖɛ̀ mɛ̀nɛ̌ìn-ɖò kè dyúáɖò nììnɔ̀ dɛ̀nɛ̀ kĩ́ín-kĩ́ínɔ̀ wé kĩ́ín-kĩ́ínɔ̀ ɓaɖaa, ɓóɖóɔ̀ dè ma kɔ̃in maa gbɔ. Ké Nóà kaà ma méèɔ̀ ɖé kɔ̃in, ké gmɔ̀ nɔ̄, ɔ dyéɛ ma kà ɓóɖóɔ̀ nìǎ ma kɔ̃in mauń wɛ̃. 14Ɔ kéá ma dɛ̀nɛ̀ɔ̀ sɔ̃́ nììnɔ̀ wé kpáɖá-nyɔ sè mɛ̀nɛ̌ìn-sɔ̃́ nììnɔ̀ nyuɛɛ, ɓóɖó-kpàɔ̀ ɖǎ ma kɔ̃in dyɛ nɔ̀mɔ̀ dyíin cá.
15Hwɛ̀ ké Gèɖèpɔ́ɔ̀ cɛ̃ɛ ma Nóà gbo, ké ɔ ɖá, 16“M̀ mɛ sɔ̀ méèɔ̀ mú, m̀ kè nì gmààɔ̀ kè nì dyú-gàà ɓěɔ̀ kè wa nììn gmàà ɓěɔ̀. 17M̀ mɛ síìn ɖɛ séín ɓéɖé fɛ̀ɛ̀ ɓě mɔ̀à naà kè nimii kè ɓíɖíi-dyi-nà-ɖɛ̀ ɓě ɓɛ́ m̀ kè wa nìà ɖé méèɔ̀ múɛ, ɓɛ́ wa ké dúún zaìn, ɓɛ́ wa ké dyí vò.” 18Púɛɛ, Nóà kè ɔ gmààɔ̀ kè ɔ dyú-gàà ɓěɔ̀ kè wa nììn gmàà ɓěɔ̀ sí ma. 19Ké ɖɛ séín ɓéɖé fɛ̀ɛ̀ mɔ̀à nimii kè ɓíɖíi-dyi-nà-ɖɛ̀ kè naà ɓěɛɛ sɔ̀ ma ɖé méèɔ̀ mú kà wa dú kò-kò ɓěɔ̀ nyu ma nìɛ̀ kɛ.
Nóà zà sáa
20Hwɛ̀ ké Nóà po ma sáa-kɔ̃-zàìn-gbàà ɖò ɓó Bounɓoɔ̀ bìì. Ké ɔ ɖú ma nimii ɓě kè naà ɓě ɓɛ́ Gèɖèpɔ́ɔ̀ ɖá wa nɔ̀mɔ̀à dyíin ɓó sáa zàìn jè kè ɖi jèɛɛ ɖíɛ́ ɓě dyí, ké ɔ zàìn ma wa sáa ɓó gbààɔ̀ kɔ̃ dyììn ɖé wa fɔ̃-fɔ̃ mú. 21Ké Bounɓoɔ̀ wɔ̃́ ma sáa-zàìn-ɖɛ̀ɔ̀ nyɔ́ɔ̀, ké ɔ hwòɖǒ dè ma dyi. Ké ɔ cɛ̃ɛ ma ɖé ɔ hwòɖǒ bũ̌, ké ɔ ɖá, “Ḿ se ɓóɖó-kpàɔ̀ hwòɛ̌-wùɖù kɔ̃ poɛ́ mu ɖe dyììn ɖé ní-tò mú fɔɔ cá, kɛbì nyɔǔn-dyùɛ̀ hwòɖǒɛ̀-gbɔ-po-ɖɛ̀ mɛ nyìnììn kɔ̃in kánáá pū sɔ̀ìn ɖé wa dyú-tìǐn nyɛ, ké ḿ se ɖɛ séín ɓéɖé fɛ̀ɛ̀ kɛɛ mú gbɔɔ̌ mu ɖe kà ḿ nyuà kɛ. 22Kà ɓɛ́ ɓóɖó-kpàɔ̀ mu nììn keɛɛ, ɖɛ-ɓá-tì kè ɓáá-ɖɛ̀ɔ̀ ɓo-kpã́-tì mu nììn, ké sɔ̃̀ɔ̀-tì kè zùzù-tì mu nììn, ké dyóɖó-bà-tì kè ní-tì mu nììn, ké dyóɖóaún kè máaún mu nììn kánáá pū.”
Currently Selected:
Jɛ́nɛ́sì 8: ƁB02
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Bassa Bible © Bible Society Liberia, 2002.