San Juan 2
2
Jesús güie atta betsá ná ca benni lheꞌesi te láni Caná
1Beyonna ubisa nna uca ttu laní betsá ná ca benni lheꞌesi lána Caná. Unnuha nna rena lo yu gue Galilea. Níaguaba du nan gue Jesús. 2Uxiguacana Jesús tsie atta utsá nácaniha lenie ca biꞌini rudheti ca tisa ruleꞌe. 3Atti chi bebisi vinuha nna unnetteba nan gue Jesús rábi:
—Lärga birua vinu te gue ca unní.
4Jesús becabie re:
—Nana, ¿biaca neti la rálu aná? Läga chi bisía ura quia.
5Nan gue Benniha nna ráttebabi ca nu beseꞌe aca mandadu gue laníha:
—¡Gualuni iyába nu inná Ben-ni!
6Nía seꞌe xxupa reꞌe ancacana leni iyya, ritaꞌa attiba ttu gayua litro inda lheꞌe ttuttucana. Lheꞌe ca unnuha nua rigaꞌa ca benni Israel inda rixuuquinna qui reacacana nu nari lo Tata Do Iyyabaaha, aníaba labicana runcana. 7Jesús re ca benni beseꞌe aca mandadu gue laníha:
—Gualodisá ca reꞌe-na inda.
Lacana nna bodisá ttittican ca nua inda. 8Jesús redee cana:
—Nnanna nna gualcuea saroꞌo gualsagüe nu anca sola-na.
Lacana nna aníaba bencana. 9Solaha nna bennixxittebana inda beaca vinuha, ttiaca ni lä yuna ga guaxxí ca unnuha vinuha. Suntterba ca benni beseꞌe aca mandadu gue laníha yucana, cumu laxacana utaꞌacana inda lheꞌe ca reꞌeha. Larcala nna uxitteba solaha unbiyuu rutsá nániha. 10Nianna rána unnuha:
—Iyába ca benni runi loesi laní-ni nna deꞌaxa vinu anca tseeruha rudácana. Dequide liba chi belin ca nu dia laníha uꞌuyacana vinu, lania liba rudácana vinu bittu tte anca tseeha. Ttiaca lu nna nnanna liba chi rudábalu vinu tsee.
11Unníba primer milagru beni Jesús lheꞌesi Caná nu re lo yu gue Galilea. Anía liba nna beleꞌe loe anque benni ra xxeni leni. Ca biꞌini rudheti ca tisa ruleꞌe nna güia lecabi guee.
12Dequide unnuha nna diattebe lheꞌesi Capernaum lenie nan gueha lhe ca betsie lhe ca biꞌini rudheti ca tisa ruleꞌe lhe. Níaba useꞌeque ttu chupa ubisa.
Jesús beríale ca benni seꞌe güettoꞌo lheꞌeliꞌa gue yotuha
(Mt. 21:12-13; Mr. 11:15-18; Lc. 19:45-46)
13De chi daa ribiga laní gue ca benni Israel, nu te láni Pascua. Jesús nna diattebe lheꞌe yiesi Jerusalén. 14Lheꞌeliꞌa gue yotuha guattiꞌe ca nu ruttoꞌo uꞌuna lhe carneꞌe lhe becha lhe níaguaba sia ca nu retsila belhi lhe. 15Jesús uluꞌu xicuattebe ttu tuu. Leni unnuha nna bebeattebe iyába ca unnuha lheꞌeliꞌa gue yotuha lencana ca uꞌuna guecaniha lhe ca carneꞌe guecaniha lhe. Ca nu retsila belhiha nna bedhittebe ca belhi guecaniha, atti berixxi lottebe ca mexa guecaniha lhe. 16Ca nu ruttoꞌo bechaha nna re cana:
—¡Gualebea ca unna ni! Bittu unle lisi tata quia yoꞌo raca iꞌiya lheꞌeni.
17Ca biꞌini rudheti ca tisa ruleꞌe Benniha nna bexxatteba lecabi nu rá lo ca tisa gue Tata Do Iyyabaaha: “Tata, de yatterba nu runia gue yoꞌo guelhi nna runna uyúa elha disa.”
18Ca nu anca nu lo gue ca benni Israel, seꞌe nía nna rácana:
—Beleꞌen riꞌitu ttu nu uni uleꞌe lo dequi gualí te derechu guelu unlu aná.
19Jesús becabie re cana:
—Gualuttapa yotu-ni, neti nna lheꞌe tsunna ubisaba nna elhidha na attu libe.
20Ca nu lo gue ca benni Israel nna rácana:
—Chua yuꞌu xxupa (46) ida bisá ca benni bedocabi yotu-ni, lu nna rálu dequi lheꞌe tsunna ubisaba elhidhalu na attu libe.
21Ttiaca Jesús nna läga gue yotuha ga nua rinnee, gue cuerpu guebe Benniha rinnee. 22Larcala nna dequide beacani Jesús beríe lheꞌe baa atta yuꞌu ca nu yatti-na, ca biꞌini rudheti ca tisa ruleꞌe nna bexxatteba lecabi nu chi rá Benniha, lania nna güia lecabi nu rá Benniha lhe nu rá lo ca sitsi gue Tata Do Iyyabaaha lhe.
23Ttu requiru Jesús lheꞌe yiesi Jerusalén laní Pascua ixeru benni güia lecani Benniha de biláquinna ca milagru runie. 24Ttiaca Jesús läga ria lee guecani dequi gualíquinna cumu chiba yuxeabe atti du lecani. 25Lägabi reasanie nuxa quixxiꞌenne gaxasná du le ca benni, cumu lee nna chiba yuxeabe gaxasná anca lhiꞌu lheꞌe lastoo ca benni.
Currently Selected:
San Juan 2: zaq
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2021, Wycliffe Bible Translators, Inc. All rights reserved.