Luuka 15
15
Ishihwano sha nkholo yina yiyajile
(Mataayo 18:12-14)
1Ilijuva limonga, avatofya khoodi na vanansi avanji, vakhandi viiluta kwa Yeesu, kiija vamupuliise. 2Baheene aVafalisaayo na vamanyisaaji va ndaji sa Musa vayansa kingʼuula viija, “Mbona umuunu uyu, iikhala na vanansi ngaja ava! Khanji iilya na woope!”
3Baheene uYeesu wávajovela ishihwano ishi wáaja, 4“Umuunu yumonga mu shipuga sheenyu, nda ana nkholo ligana, inyaayimo yiyaje, asiigahe wuli? Shiyooli nikivajovela, asisileshe isinji sila mashumi gonja ni gonja seene na kiluta kiyitavikha yimo yila yina yiyajile, mbakha ayaaje. 5Nda ayaaje, asiyisumule mu mavega kwa wushendeefu, 6na kiwuya na yoope kukhaaya. Pina wáafikha kukhaaya, asivashemeele avamanyi na vashegamane vaakwe na kivajovela kiija, ‘Shendeevaji lumo noone, kwa kiiva inkholo yangu yina yikhandi yiyajile, lino nayaaga!’
7“Nikivajovela, shiisho ndeeno kukhava kuna wushendeefu wukhome kushaanya, pina umunansi yumo ilambiisila uwunansi waakwe. Uwushendeefu uwo, wukhava wukhome kishila uwushendeefu uwa kivashendevela avaanu avagolofu mashumi gonja ni gonja, vina vasisakula kilambiisila.”
Ishihwano isha hela yina yiyajile
8UYeesu wávajovela ishihwano ishinji, wáaja, “Tijove, uwashimaayi yumonga ana silinje lishumi, isilinje yimo#15:8 Isilinje yimo: Iyi yikhandi mahombo ga musenga nsengo kwa lijuva limo. nda yiyaje, asiigahe shishi? Hambi imulikha ulumuli, na kifyajila ilitembe lyona, asiyitavishe mbakha ayaaje. 9Pina wáyaaga, asivashemeele avamanyi na vashegamane vaakwe na kivajovela kiija, ‘Shendeevaji lumo noone, kwa kiiva isilinje yangu yina yikhayajile, nayaaga!’
10“Nikivajovela kiija, shiisho ndeeno, uNguluvi akhava nu wushendeefu pa vamalayikha vaakwe, pina umunansi yumo ilambiisila uwunansi waakwe.”
Ishihwano sha Daada umunya lusungu lukhome
11UYeesu wálogola ishihwano ishinji wáaja, “Akhandi akwali umuunu yumonga, yuna akhandi ana vaana vadiimi vavili. 12Umwanaakwe umunangʼana wáaluta kwa wiihe wáaja, ‘Wee wiheesu, nilomba unipeele uwuhaasi wangu.’ Baheene uwiihe wámuhaasa, shila muunu uwuhaasi waakwe.
13“Pina sashilile nsiku nyasilinga ndeeni, umunangʼana yula wákungaania ifiinu fyakwe fyona, wáwuukha wáaluta ku nyi ya kutali. Wáganile kifikha ukho, wáyansa kiilya wuvi uwusi waakwe mbakha kiwumala woona. 14Pina wámalile woona, injala inkhome yaagwa mu nyi yila, baheene umwene wáava asiina hata shiinu shoshoona. 15Baheene, wáaluta kwa muunu yumonga uwa nyi yila, wálomba insengo. Umuunu yula, wámutwala mu mugunda kiliisa ingubi#15:15 Ingubi: AVayahuudi vikisisalaga mandu ingubi. Indaji sa Vayahuudi sikhandi siijova kiija, ingubi nkhanu nshaafu. Kwa kiiva ya ndaji iyi, aVayahuudi vasikhandi viyiitikhwa kiilya inyama ya ngubi. Yimba mu litaafili lya Njowo sa Valaawi 11:7. Ndeeno aVayahuudi vikisisalaga ingubi na vaanu vina vikisidiimaga. saakwe. 16Umudiimi yula yamulumile injala, wáava idobokha kiilya amasigaso gina sikhandi siilya ingubi. Khanji akhandi akwasiina hata muunu, yuna wámupeelile ishakiilya shoshoona.
17“Paanyuma wáhiiva mu numbula yaakwe wáaja, ‘Mbona avasenga nsengo woona ava daada wangu viilya na kisigasa. Kwashi one niifwa apa ni njala! 18Lino hambi niitina kwa daada wangu, na kimujovela kiija, “Wee daada, namunanjila uNguluvi, nakunanjila na yuuwe. 19Lino nisikwiliile kiiva muswamu waakho, univiishe nive munyaayumo wa vasenga nsengo vaakho.” ’
20“Baheene wáwuukha iiwuya kwa wiihe. Pina ali nkholeela kifikha kukhaaya, uwiihe wámwaga kwa kutali, wámuwonela ulusungu. Wámusijila, wámuwaawusa na kimunoonela. 21Baheene umwana yula wámujovela uwiihe wáaja, ‘Wee daada, namunanjila uNguluvi, khanji nakunanjila na yuuwe. Nisikwiliile kiiva muswamuwo.’
22“Leelo uwiihe wávajovela avavanda vaakwe wáaja, ‘Leeti nyangu amenda amanofu mumufwase. Mufwasi nayi pete mu ludole, nasi ndaatu mu magulu.#15:22 Ifiinu fina uwiihe akhamufwasiise umuswamuve, fikhandi fiwonensa kiija wámuyanushila umuswamuve na asimuviikha kiiva muvanda. 23Yitooli ingʼombe yina yineneepe, muyibude, tiviishe ishiwungo. 24Kwa kiiva umuswamu wangu uyu, akhandi ayajile, lino wáwonekha. Akhandi ngaja afwile, lino muumi!’ Baheene avaanu vala woona vayansa kiwunga kwa wushendeefu.
25“Uluhaavi ulo, umuswamuve umukhome akhandi iiwuya kihuma ku mugunda. Pina ali nkholeela ni litembe, wápulikha avaanu viyeyema na kineena. 26Wámushemeela umuvanda yumonga, wámuposa wáaja, ‘Kuna shi?’ 27Wámujovela wáaja, ‘Umunangʼana waakho wáyinsa nayu wiiho wámubudila ingʼombe yina yineneepe, kwa kiiva wámwaga umuswamuve muumi.’ 28Umuswamuve umukhome yula wákhalala, wákhaana kiyinjila mu litembe. Baheene uwiihe wáahuma kunja, wáyansa kimubembelesa ayinjile. 29Leelo umwene wámuyankha uwiihe wáaja, ‘Puliisa! Amaakha goona aga nisenjile insengo pakhaaya apa, khanji kusiina hata lijuva limo lina nigabedaliile gina ukinilajisa! Leelo one usinanipeelaje hata nyana mene, kiija nishendeeve lumo na vamanyi vangu. 30Leelo pina wáyinsa umuswamuwo uyu, yuna aliile wuvi uwusi waakho lumo na vashemi, wamubudila ingʼombe inofu!’
31“Uwiihe wámujovela wáaja, ‘Muswamu wangu, owe uli noone nsiku soona, ifiinu fyona fina ninafyo fyakho. 32Lino, tisakulwa kishendeeva na kiviikha ishiwungo kwa kiiva umunangʼana waakho akhandi ayajile, lino wáwonekha, akhandi ngaja afwile, lino muumi!’ ”
Currently Selected:
Luuka 15: Shisangu
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2020, Wycliffe Bible Translators, Inc. All rights reserved.