IINDUMISO 8
8
Ubungangamsha bukaThixo nokuxabiseka komntu
Kumongameli: ngolwaseGati. Umhobe kaDavide.
1Yehova, Nkosi yethu,
Hayi, ubungangamsha begama lakho ehlabathini lonke!
Wena uwambathise amazulu ngendili yakho.
2Emlonyeni wabantwana nabanyáyo useké amandla,
Ngenxa yababandezeli bakho,
Ukuze udambise utshaba nophindezelayo.
3Xa ndilikhangelayo izulu lakho, umsebenzi weminwe yakho,
Inyanga neenkwenkwezi ozimisileyo:
4Uyintoni na umntu lo, le nto umkhumbulelayo?
Unyana womntu, le nto umvelelayo?
5Umsilelise kancinane ebuThixweni,
Wamthi jize ngobuqaqawuli nangobungangamela.
6Umphathisé ubukhosi phezu kwemisebenzi yezandla zakho,
Zonke izinto ùzibeke phantsi kweenyawo zakhe:
7Impahla emfutshane, neenkomo zonke ziphelele,
Kwaneenyamakazi zonke;
8Iintaka zezulu, neentlanzi zolwandle,
Into ehamba ngeendlela zolwandle.
9Yehova, Nkosi yethu,
Hayi, ubungangamsha begama lakho ehlabathini lonke!
Currently Selected:
IINDUMISO 8: XHO75
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Bible Society of South Africa 1975. Used with permission. All rights reserved.