योहान 2
2
गेलीलान काना गावा माय वाराड़
1तीसरे दिह गेलीलान काना गावा माय एक वाराड़ एतो। एने यीशुन आहख बी ता एती, 2यीशु एने तान चेला बी ता वाराड़ा माय हादेल एता। 3जेवी अंगुरान रूह निवरी गीयो, तेवी यीशुन आहख ताह केयी, “न्या फाय अंगुरान रूह नाह सुतो।”
4यीशु तीह जापाप आप्यो, “एय बाय, माहु काय केरनु हे तो माहु मा केय, काहाकाय एवी मारो टेम नाह आयेल सुतो।”
5यीशुन आहख पावराह केयी, “जो काय तो तुमूह केय तोस किरज्यो।”
6ताहरी यहुदि माणहान चोखो एणेन रितीन गेत आथ पाय दोवणेन देगड़ान सोव डोसरा एता, जा माय दुय दुय तीन तीन मोण पाणी होमातालो। 7यीशु पावराह केयो, “डोसरा माय पाणी बोर दिवो।” ता डोसराह टाकाटाक बोर देना। 8तेवी यीशु ताह केयो, “एवी पाणी काड़ीन खाणान मुखी फाय ली जावो।” तेवी ता ली गीया, 9जेवी खाणान मुखी तो पाणी साक्यो, जो अंगुरान रूह बोण जायेल एतो, एने नाह जाणतालो काय ज्यो अंगुरान रूह कारीन आयेल हे, पुण जा पावोर पाणी काड़ेल एता ता जाणताला; ते खाणान मुखी वोवड़ाह हाद्यो 10एने केयो, “काल्लो बी माणुह पेल हाजालो अंगुरान रूह आपणे, एने जेवी माणहे पिन साक जातेह, तेवी तोलो हाजो नाह आपणे। पुण तु ते हाजालो अंगुरान रूह एवी वोर मेल रिनोह!”
11यीशु गेलीलान काना गावा माय तान ज्यो पेल्लो चोमेत्कार देखाड़ीन तान बोड़ाय देखाड्यो; एने यीशुन चेला ता पोर बुरहो केऱ्या।
12 #
मत्ती 4:13
तान पासाण यीशु एने तान आहख, तान बाहख, एने तान चेला कफरनहूम हेयरा माय गीया, एने ताहरी थोड़ाह दिह रेना।
यीशुन मोंदिर माय जाणो
(मत्ती 21:12-13; मरकुस 11:15-17; लुका 19:45-46)
13यहुदि माणहान फसहान तिवार आहने ईतो, एने यीशु यरूशलेम माय गीयो। 14तो मोंदिर माय बोयलाह, मेंड्राह, एने पेरवाह वेचणारे, एने पोयशा बोदेलनाराह पाटला हेऱ्यो बोहीन वेपार केरतालो दिख्यो। 15तेवी यीशु दोयड्युन हापाटो बाणावीन आखा मेंड्राह, एने बोयलाह मोंदिर माय रेन काड़ दिनो; एने पोयशा बोदेलनारान पोयशा फाकरी दिनो एने पाटलाह उलटाव दिनो; 16एने पेरवाह वेचणाराह केयो, “न्याह न्या रेन ली जावो! मारा आबाख ने गेराह बाजारान गेर मा बाणावो!” 17तेवी यीशुन चेलाह एर आवी काय पुस्तेक माय लिखेल हे, “तार गेरान बोक्ती माहु आक्ठान गेत हेलगाड़ देय#बजन 69:9।”
18ता पोर रेन यहुदि आदिकारी यीशुह सावाल फुशा, “तु आमुह ओहलो काल्लो चोमेत्कार देखाड़ सिकेह, जाकेरीन चोमेत्कार केरनेन आदिकार पाको किरेह?”
19 #
मत्ती 26:61; 27:40; मरकुस 14:58; 15:29 यीशु ताह जापाप आप्यो, “ज्या मोंदिराह तुमू ओदार दिवो, एने मी ज्याह तीन दिह्याम पुशो उबो केर देह?”
20यहुदि आदिकारी यीशुह केया, “ज्या मोंदिराह बाणावणेन चालीह ने सोव वोरह्या लागेल हेते। एने काय तु ज्याह तीन दिह्या माय खेरीच पुशो उबो केर दिहे?”
21पुण यीशु तान सेरीरान मोंदिरान बाराम कियेल ईतो। 22जेवी यीशु मुरेल माय रेन जीव उठनो, तेवी तान चेलाह एर आवी काय यीशु ज्यो कियेल ईतो, एने ता चोखाली पुस्तेक एने जो यीशु जो कियेल ईतो, ता सोबदा पोर बुरहो केऱ्या।
यीशु माणहान मोनाह जाणेह
23जेवी यीशु यरूशलेम माय फसहान नावान तिवारान टेम ईतो, ते जुलूम माणहे ता चोमेत्कार जा तो देखाड़तालो, तो देखीन तान नावा पोर बुरहो केऱ्या। 24पुण यीशु सोताह तान बोरहा पोर नाह सोड्यो, काहाकाय तो आखाह जाणतालो। 25एने ताह गिरेज नाह एती काय माणहान बाराम ईखेह गोवाय देय, काहाकाय यीशु सोताच जाणतालो काय माणहान मोनाम काय हे।
Ekhethiweyo ngoku:
योहान 2: NTNii2020
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020