मत्ती 22
22
मदा अन भोजन इन उदाहरण
(लूका १४:१५-२४)
1यीशु मात्त आंदुर से उदाहरणगोळ दा अनली कुरतुन, 2“स्वर्ग इन राज्य आ राजा अन घाई आद, जो तान पार उन मदा अन भोजन कोट्टुन. 3अदिक आव तान दासगोळी ईद अनकु कळुदुन कि आमन्त्रित लॉकुरी मदा दा ऊमली कारी; लेकीन आंदुर बरोद चाहासीदिल. 4बाक आव मात्त दासगोळी ईद अनकु कळुदुन, ‘आमन्त्रित लॉकुरी अनेतीर: नोळी ना ऊमोद तयार माळ कोंडीन, नान वस्ता अदिक नानव पालस्दव जनावर कडुकु आदव, अदिक सब कुछ तयार आद; मदा अन्द भोज दा बरी.’ 5लेकीन आंदुर ध्यान कोटीदील अदिक तान हादी इक होटोदुर: यावारा तान केई दा रा यावारा तान व्यापार इक. 6दुसरा लॉकुर जो मिक्कु ईरोर आऊन दासगोळी हुडुकु आंदुर्द अपमान माळदुर अदिक आंदरी कोंद बुटुर. 7आग राजा अक सिट्ट बत्त, अदिक आव तान सेना अक कळुकु आ कोन्नावाळेर्द नाश माळदुन, अदिक आंदुर्द नगर इक होताक बुट्टुन.”
8“आग आव तान दासगोळ से अंदुन, ‘मदा अन्द भोज रा तयार आद लेकीन निमंत्रित लॉकुर आ लायक ईला ईरोर. 9इदुरसाटी हादी इन किनारा मा होगी अदिक यास लॉकुर नीमी सिक्यार, सप्पा लॉकुरी मदा अन्द भोजन दा कारूकु तरी.’ 10इदुरसाटी आ दासगोळ हादी इन किनारा मा होगकु जो भी वळ्लेर या बेकार लॉकुर आंदरी सिकदुर जमा माळदुर; अदिक मदा अन्द मान्ना पावनागोळ देल तुम्मेत.”
11“याग राजा पाऊनागोळी नोळली बंदुन, रा आव अल ऊंद मंळसा अक नोळदुन, जो मदा अन्द कपळा हाक्कु ईला ईरोन. 12राजा आऊन से केळदुन, ‘हे संगी; नी मदा अन्द कपळा हाग्द बिना इल यती बंद्या?’ आऊन बाय बंद आगेत. 13#मत्ती ८:१२; २५:३०; लूका १३:२८आग राजा नवकरगोळ से अंदुन, ‘ईऊन कय-काल कटकु ईऊक व्हार्या अंधार दा हाक बुळी, अल वोरलोद अदिक हल्ल कच्चोद आदीत.’ 14यतिकी कारदोर रा हापाळ आर लेकीन नीवळुसदोर थ्वाळासा अच आर.”
कर कोळोद बारा दा प्रश्न
(मरकुस १२:१३-१७; लूका २०:२०-२६)
15आग फरीसीगोळ होगकु आपस दा विचार माळदुर कि यीशु उक याता प्रकार देल मातगोळ दा फसुसेव. 16इदुरसाटी आंदुर तान चेलागोळी हेरोदिया अन सांगुळ आऊन हात्ती ईद अनली कळुदुर, “हे गुरु, नाव जान्सतेव कि नी खरा आय, अदिक परमेश्वर उन हादी सच्चाई देल कल्सत्या, अदिक यारदु परवा माळाल, यतिकी नी मंळसागोळ्द मार्रा नोळकु मातगोळ माळाल. 17इदुरसाटी नामी हेळ नी येन सोचत्या? रोमी सरकार उक कर कोळोद उचित आद कि हैलेच.”
18यीशु आंदुर्द कपट पन नोळकु अंदुन, “हे कपटीगोळा, नानी येती परखुसेतीर? 19नानी अद ऊंद दीनार तोर्स, यदुर देल कर कोटकु आगतद.”
आग आंदुर आऊन हात्ती ऊंद चाँदी इन सिक्का तंदुर. 20आव आंदुर से केळदुन, “ईद छाप अदिक हेसुर यार्द हुन?”
21आंदुर यीशु से अंदुर, “कैसर सरकार उन हुन.” आग आव आंदुर से अंदुन, “जो कैसर सरकार उन हुन, अद कैसर सरकार उक; अदिक जो परमेश्वर उन हुन, अद परमेश्वर उक कोळी.”
22ईद केळकु आंदुर अचम्भित आदुर, अदिक आऊक बिटकु होटोदुर.
पुनरूत्थान इन बारा दा प्रश्न
(मरकुस १२:१३-१७; लूका २०:२०-२६)
23 #
प्रेरितगोळ २३:८
अदा दिन सदूकी जो पुनरूत्थान इक मान्सालुर, यीशु उन हात्ती बंदुर अदिक आऊन से केळदुर, 24“हे गुरु, मूसा अंदिदुन कि अगर यावारा मंळसा बिन औलाद सोतोदान, रा आऊन वार्ट आऊन हिंग्स उन सांगुळ मदा माळकु तान वार्ट उन साटी औलाद पैदा माळ्यान. 25ईग नाम मान्या येळ वार्टुर ईरोर; पयला मदा माळकु सोतोदुन, अदिक औलाद ईला आगदुर कारण तान रांड्या हिंग्स उक तांद वार्ट उन साटी बिट्ट बुटुन. 26ईदा प्रकार देल दुसरा अदिक तिसरा भी माळदुन, अदिक येळु वार्टुर ताका हिंग अच आत. 27आखरी दा सप्पा मुंदुर्द बाद्दा आ आर्त भी सोतोदुर. 28इदुरसाटी जित्ता आगदुर मा आ आर्त येळु दा टु यारोर हिंग्स आदार? यतिकी आक सप्पा मुंदुर्द हिंग्स आगिदुर.”
29यीशु आंदरी उत्तर कोट्टुन, “नीव पवित्रशास्त्र अदिक परमेश्वर उन महिमा जान्सालीर; ई कारण नीव भूल दा बिदकु आईर. 30यतिकी जित्ता आगदुर मा आंदुर न मदा माळ्यार अदिक न मदा दा कोटकु आदार लेकीन स्वर्ग दा परमेश्वर उन स्वर्गदूतगोळ घाई आदार. 31लेकीन सोत्त मंळसा अन्द जित्ता आगोद बारा दा येन नीव ईद वचन वाचुसीदील जो परमेश्वर नीम से अंदुन: 32‘ना अब्राहम उन परमेश्वर, अदिक इसहाक उन परमेश्वर, अदिक याकूब उन परमेश्वर हुईन?’ आव सोत्त मंळसा नव आलच? लेकीन जित्ता लॉकुर्द परमेश्वर हुन.”#निर्गमन ३:६–१५:१६
33ईद केळकु लॉकुर आऊंद उपदेश देल चकित आदुर.
सब से धोळ्द आग्या
(मरकुस १२:२८-३४; लूका १०:२५-२८)
34याग फरीसीगोळ केळदुर कि यीशु सदूकीगोळ्द बाय बंद माळ बुट्टुन, रा आंदुर जमा आदुर. 35आंदुर दा टु ऊंद यहूदी व्यवस्था अन शिक्षक यीशु उक परखुसोर साटी आऊक केळदुन, 36“हे गुरु, व्यवस्था दा यातोद आग्या सब से धोळ्द आद?”
37यीशु आऊन से अंदुन, “नीव परमेश्वर तान प्रभु से तान पुरा मन अदिक तान पुरा जीव अदिक तान पुरा बुद्धी इन सांगुळ प्यार ईट. 38सब से धोळ्द अदिक मुख्य आग्या रा ईदा हुन. 39अदिक अदुर्दा घाई ईद दुसरा आग्या भी आद कि नी तान मान्ना हातळोर से तान घाई प्यार ईट. 40#लूका १०:२५-२८ईवा येढ्ढ आग्यागोळ पुरा व्यवस्था अदिक भविष्यवक्तागोळ्द आधार आद.”
मसीह यार पार हुन?
(मरकुस १२:३५-३७; लूका २०:४१-४४)
41याग फरीसी लॉकुर जमा ईरोर, रा यीशु आंदुर से केळदुन, 42“मसीह अन्द बारा दा नीव येन सोचतीर? आव यार औलाद हुन?”
आंदुर यीशु उक अंदुर, “दाऊद ईनव.”
43यीशु आंदुर से केळदुन, रा दाऊद आत्मा दा ईत्तकु आऊक प्रभु यती अनतान?
44“प्रभु, नान प्रभु से अंदुन,
नान ऊम्मा कय दी कुर,
यागासताका कि नाव नींद दुश्मनगोळी नींद काल इन ल्यालमा तंदकोमालेव.”#भजन संहिता ११०:१
45“याग दाऊद आऊक प्रभु अनतान, रा आव आऊन पार ह्यांग आदान?” 46इदुर्द उत्तर दा याऊ भी ऊंद मात अन सकिदील. आ दिन टु यारीकु बाक आऊन से येनु केळोद हिम्मत आगीदील.
Currently Selected:
मत्ती 22: NTHaa20
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020