Lüüka 1
1
1Kadu kadhabbu karigiri tumma ma eema tiya agalinggo adene kaja ka söödö ya. 2Eege karigiri eema yïïdï ka taföönyö ka kadu tanno adïnö ka eema tiya ka dhidha ya, kadagalinggo ada a Yasu no. 3Ïkïrï aꞌa ka tagïïrï tumma na miini no tekere afa meene ka tafüꞌdüdene ka dhidha nyeꞌdꞌde kungngo, nagiri nunggu oꞌo no Tiyafilos na ömöꞌdï ya adho ka fïïnï dhorro ya, 4amang küdü tussu aꞌda ka dhorro tumma nüüdü ka taföönyö no.
Tadiridene ma teenedene ma Yühanna ya tatambeese ya
5Ka ürüünü ma tauugaara tanno Hirüdüs, ka anya ma Yahüüdiya, aganna taꞌboge kide ana eere aꞌda Sakariya ama ꞌbügöörï tiya Abiya nja aka tammo iini mana eere aꞌda Alisabet ꞌbandaada ma Harüün. 6Sakariya nja Alisabet kümmü tumma ma Masala ana eedi dhorro kaafa kide dhindho. 7A eege ka ndakidhindharu a laala titaalo kene kudumma Alisabet ka tamele.
8Ïkïrï uuru ma linggo tanno Sakariya nja kadu tanno iini ka ndöꞌdö, ïkïrï ka co talinggo ka Masala kidha. 9Tafiigi ma linggo ma kaꞌboge ïkïrï tamuduru ka ꞌdïnggö kini ma taꞌdꞌdïgï kondho kuꞌbu. Ïkïrï ka co la ma Masala. 10Aꞌda kadu kungngo kürö kadhabbu kafara ka Masala aꞌda ma dhïïgö kondho.
11A tadhangga ma Masala tatele oona ndama nïïsö ma kuri ma füꞌdeene ma kondho ka tadhïïgö kide mo. 12Ïkïrï Sakariya ka tasala tadhangga asïnï koꞌdo a riꞌba tümmü iꞌi. 13A tadhangga tiki iini, “Sakariya, fa tariꞌba, maföönyö Masala fara yüüdü, aka müüdü Alisabet mara tagüröönö ma teene ꞌbiiꞌbala nanangnga eere iini aꞌda Yühanna. 14Oꞌo taꞌdeema a kadu tadhodho kadhabbu ka teenedene tanno iini. 15Kudumma iini ka tïdhïndhï kidha ma Uugaara. Taalo ara tooye ngeeli nja eema tiya üüfü ya, adigine a Koronggore tiya Insili ya aꞌda aleefe ka nïïmö ka feelü. 16Afada a kadu ma Israyil kadhabbu unggu eege ka nafïïnï tiya Uugaara Masala meene mo. 17Ara tunggeene ka Masala kidha, a koronggore tiya Ïliya a türü tanno iini, tafada a kafaafa uuraana eege koona nja laala, a kadu na oroko no talinggo eema ya adho ka fïïnï ma taꞌdara ya, amang kene tindinaana kadu ka Uugaara kuꞌbu.”
18A Sakariya tiki a tadhangga, “Ara aꞌa tussu tumma no nya? Sa aꞌa tadharu aka meede manda dharu afeꞌde.”
19A tadhangga tapadaga tumma iini iki, “Aꞌa na Jibrayiil, naꞌdïngnge ka Masala kidha. Oogo magürünü aꞌa aꞌda nadirina tumma na oꞌo. 20A ꞌbïtïngngö ya ara onggoꞌdo müüdü timiꞌdidene nitaalo nara tussu ka teema idhi a ꞌbiiꞌbala teenedene kudumma üüdü taalo namma ka tumma tanno eede ara oꞌo tütü nggeege idhi a tumma neede töꞌdö timinꞌda.”
21A kadu takamoodo kuꞌbu kürö ma tïndhïgï Sakariya kadhere kini ka tütügü co la ma Masala. 22Kini ka ööꞌdö kürö, taalo ussu ka teema nja kadu, kïkïrï ka tussu aꞌda iꞌi asala nïïmö ya efe ya ka la ma Masala eema nja eene ana iisine itaalo alneege a nïïnö.
23Ka Sakariya ka ndatïïmö füngngö ma linggo tanno iini ya, ïkïrï ka tapadaga co ꞌdï kita iini. 24Ndama naganuuru tanno miini no aka miini Alisabet tagüröönö maküdhü eyi yoono ma tagiidi nagatereene kïïdümmü, miki, 25“Uugaara magüünï tumma no ana aꞌa ka naganuuru tanno oono ka tassa kede mabbü modolo kede ka oona ka kadu ka teene.”
Teenedene na Yasu
26Nagatereene ma tagüröönö tanno Alisabet ka ndöꞌdö ka ïïdümmü kafünü unggodho ya, mïkïrï Masala ka kürünü tadhangga Jibrayiil ka anya minggide mana eere aꞌda Nasira ka Jaliil, 27ka ꞌbadaada minggide ma tölömü mana eere aꞌda Mariyom, ömöꞌdï inggide agümmünü oogo kuꞌbu, ana eere aꞌda Yüüsïf a ꞌbandaada ma Dawud.#1.27 Matta 1.18 28A tadhangga co kono, iki oono, “Aꞌa nööjülü oꞌo, natengese oꞌo ka kadu ka teene unggodho oꞌo kungngo! Uugaara taneene nja oꞌo.”
29A riꞌba tümmü oogo ma tagesenana eedi kuꞌbu miki aꞌda tööjülü öjö eege kungngo ꞌbïtïngngö. 30Ïkïrï tadhangga ka tiki oono, “Mariyom, fa tariꞌba, naduna oꞌo taꞌdiila ka Masala kidha. 31Ara oꞌo tagüröönö neene ꞌbiiꞌbala nanangnga eere iini aꞌda Yasu. 32Ara tïdhïndhï ara tana eere aꞌda ꞌBiiꞌbala ma Masala tammo koꞌdo mo, a Masala Uugaara mara tanangnga iꞌi ka tauugaara tanno pupa tiya iini Dawud. 33A tauugaara ma ꞌdï tiya Yaguub taꞌbilli a tauugaara niini taalo kara titaalo.”
34A Mariyom tiki a tadhangga, “Ara tumma no töꞌdö nya aꞌda taalo aꞌa nussu ömöꞌdï ya miide ya?”
35A tadhangga tapadaga tumma oono iki, “Koronggore ya Insili ya ara tadigi küdü ka oona, a türü ma Masala tammo ka ꞌdotomboꞌdo mo taküdhü oꞌo ka oona ka tanangnga tagüröönö oꞌo, a ꞌbiiꞌbala yüüdü ka teene ya a tana eere aꞌda ꞌBiiꞌbala ma Masala ya Insili ya. 36Münda Alisabet ma siliga ma oꞌo manda dharu mo mungngo magüröönö a nagatereene miini ka ndïïdümmü kafünü unggodho, aꞌda kiki kadu aꞌda mamele. 37Kudumma nïïmö ma takilinigi Masala co kungngo itaalo.”
38A Mariyom tiki, “Aꞌa na madasaga tammo Uugaara, a tumma nüüdü ka tiraana no, fa kene küünïdene ana aꞌa.” Ïkïrï tadhangga ka tunggeene.
Mariyom meefe tassa ka Alisabet
39Mïkïrï Mariyom ka tunggeene ka naguuru tanno miini no mareere maco anya ma ka naꞌdikinya ma Yahüüdiya. 40Malla maco kita a Sakariya mööjülü Alisabet. 41Ka Alisabet ka taföönyö tööjülü na Mariyom no, a ꞌbiiꞌbala tafiri koꞌdo kono ka feelü, a Alisabet tadigini a Koronggore tiya Insili ya. 42Maꞌdili koꞌdꞌdo miki, “Manangnga Masala baraka oꞌo ka iiya ka söödö nyeꞌdꞌde kungngo, manangnga baraka oꞌo ma ꞌbiiꞌbala tiya üüdü ka feelü ya. 43Aꞌa na mada a nïïmö ma Uugaara tiya eede töꞌdö tassa kede. 44Kede ka taföönyö tööjülü nüüdü, a ꞌbiiꞌbala tafiri koꞌdo kede ka feelü a dhodho. 45Aꞌdiila nja oꞌo küdü ka tamma tanno öꞌdö nja oono no ndama Uugaara kara talinggo adene.”
Tüüsü ma Mariyom
46A Mariyom tiki,
“Eedi yeede ïndhïgï Uugaara koꞌdo,
47a koronggore yeede tadhodho ada Masala tammo oolona aꞌa mo.
48Kudumma oono ka tagïïrï tiicolo ma eedi tiya madasaga tammo oono.
Ndama uuru tanno ara sere ïnꞌdïlï tïndhïgï aꞌa koꞌdo.
49Kudumma ma eema tiya ïdhïndhï ya Masala tammo ana türü mo kadagalinggo ada aꞌa ya
eere yoono aꞌda ma insili.
50Mana ꞌbangnga ma kadu tanno ariꞌba oono no,
mosso ka sere tiya maco ka tiya.
51Magalinggo a türü ma nïïsö tanno oono,
maparsaana kadu na ꞌdinigi oona neene cooꞌdo no
magaꞌda tumma neene ka nanggeedi no.
52Muurugu naguugaara keere ka tauugaara tanno eene,
mara ka taꞌdiniga kadu na iicolo ka nanggeedi no koꞌdo.
53Manangnga na ïïre kagu eege no ka tüüsü
mara ka tuuru kadu na üüsü no ka tino ana iisine ꞌdöngngönyö.
54Oogo mafa ka tumma tanno oono ka tadirina a kafaafa ma angnga no,
oogo mandööꞌdö takinyigi tasaga yoono Israyil,
magïïgï ꞌbangnga miini.
55Afa moono ka tadirina Abrahiim nja kadaada miini,
aꞌda ara oogo tafa kene taꞌbilli.”
56A Mariyom taganeene nja Alisabet a nagatereene kiidoona massa ndapadaga co ꞌdï kita oono.
Teenedene na Yühanna tatambeese
57Ka uuru ma teene tanno Alisabet ka ndöꞌdönja oono ya, mïkïrï ka tageene ꞌbiiꞌbala. 58A siliga moono nja kadu tanno akete kono no taföönyö aꞌda Uugaara ala ꞌbangnga miini ma dhabbu mo, kïkïrï ka ööꞌdö kadhodho nja oono.
59A Alisabet tïïyü füngngö ïïdümmü afünü iidoona ya, a kadu töꞌdö ma tara ꞌbiiꞌbala kanangnga eere ma pupa tiya iini iini aꞌda Sakariya. 60Mïkïrï nïïmö ka anu miki aꞌda, “Ara tana eere aꞌda Yühanna.”
61A kadu tiki oono, “Taalo ömöꞌdï ka siliga tiya üüdü ana eere nggeege.” 62Ïkïrï kadu ka tageꞌde pupa ma ꞌbiiꞌbala kindini iꞌi, “Ara oꞌo tanangnga eere a ꞌbiiꞌbala aꞌda mada?”
63Yungngo a Sakariya ka tarangnga maraayo, ikiri eere kide aꞌda Yühanna, a kadu tadhere nyeꞌdꞌde kungngo. 64A Sakariya tadhe koꞌdo atinggildhe ka onggoꞌdo alneege ana tumma anangnga taꞌdiila a Masala. 65A kadu nyeꞌdꞌde kungngo tasïnï koꞌdo a riꞌba tümmü eege. A tumma no tadhala kuꞌbu a kadu teema iini ka naanya ma Yahüüdiya ka oona ꞌdo. 66A kadu na föönyö tumma no tadhere ka indineene, “ꞌBiiꞌbala ya ꞌdee ara ta minna?” Kudumma a türü tanno Masala kungngo iini ka oona.
Sakariya amana taꞌdiila a Masala
67A Koronggore ya Insili ya tadigi ka pupa tiya Sakariya ka oona eema taꞌdiila a Masala iki,
68“Aaga nangnga taꞌdiila Uugaara, Masala ma Israyil,
kudumma oono ka ööꞌdö ka toolona kadu noono.
69Magürünü tatoolona ya ïdhïndhï ya kaja
ndama ꞌbügöörï tiya tasaga tiya oono Dawud.
70Afa moono ka tageema a nagonggoꞌdo ma naganeꞌbi tanno oono na insili no ꞌbilli,
71mara toolona angnga ka diidi ma angnga,
nja tanno akïrïmï angnga no nyeꞌdꞌde kungngo.
72Mara tala ꞌbangnga a kafaafa ma angnga,
magïïgï tumma noono ka tamiꞌdaana na insili no,
73tumma noono ka tamiꞌdaana nja pupa tiya aja Abrahiim no,
74aꞌda ara oogo toolona angnga ka diidi ma angnga,
amang kaja tafa tariꞌba, angnga tagümmü oogo a nanggeedi dhorro.
75A angnga taga kadu tanno aꞌdiila kinsili ka nanggeedi kidha moono,
a naganuuru ma tefe ka ꞌdï tanno aja nyeꞌdꞌde kungngo.
76Oꞌo ꞌbiiꞌbala, ara oꞌo ta neꞌbi tiya Masala tammo koꞌdo mo,
na oꞌo tooso ka Uugaara kidha na oꞌo co tindinaana fïïnï iini kuꞌbu,
77na oꞌo talaana kadu noono amang kene tussu fïïnï ma toolonadene,
ma taꞌduga tatoroko eene ka oona,
78Masala maaja mana ꞌbangnga mana muuyu,
mara taꞌdara töyeene ma toolonadene ma takara kaja ka oona ndama fïïnï ma ndanaaya.
79Öyeene ada ka kadu tanno emmi ka talüllü
nja koronggore ma inde,
ara ka talaala angnga ka fïïnï tiya aꞌdiila ya.”
80A ꞌbiiꞌbala taginggiridene ka tuuꞌda nja koronggore, ada kananaga co dhïïle assa ka ndadele oona Israyil.
Currently Selected:
Lüüka 1: Katcha
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active), Wycliffe Bible Translators, Inc. All rights reserved.