Locya 24
24
Meyvangon si Yeso apo do heseb na
(Matay 28:1-10; Make 16:1-8; Yowani 20:1-10)
1Madagdag do niciyo am palolwen da na no mavavakes ang o nipeysinsinmo da mahangno a haneng a mangay do nipakakasan da si Yeso. 2Makaranes sira am to da cita o rako a vato a aneb na a nimalolog. 3Somdep sira am abo rana o kataotao ni Yeso. 4Naknakmen da o akman sang a vazay am to ngyan so rarwa ka tinsi a maniray so ayob a meytatanek do katangked da. 5So nikanyahey da ambengbeng so moing da. Maniring o rarwa ka tinsi jira am, “Ikongo nyo ipeykala so mavyay a tao do yanan no nimawakwak a tao. 6Yaji ngyan do jya, ta yana nimavyay. Naknakmen nyo an o mina ciring na jinyo do Cyadidi an. Ta maniring asyo am, 7‘Iya rana am itoro da do lima no ji manaralay a tao a kapadket da sya do jyojika a kavyay na rana do ikatlo na araw.’ ” 8Am ori o nipakanakman da rana sya no mavavakes so mina ciring na ni Yeso, 9a kakaro da rana do dang a mangay manci nya do asa so ikakarwan a macinanao ji Yeso a kano aro a tao so nimacita da vazay. 10O ngarangaran da no mavavakes am Matelyan Madiya kani Yeanna kano ina na ni Yake a meyngaran si Madiya kano karwan da mavakes. 11Am o mina ciring da jira no mavavakes am ji da nganoyngi no nipamnekan na ni Yeso a omlivolivon no ciriciring na, ta ala da to ngamaoga a ciring, kwan da. 12Si Pite am mina to malalayo a mangay do nipakakasan da sya a kapeylologod na tomita sya. Am o nivaovaod da rana sya milakayob o nimacita na. Am ori o nioli na a somavasavak no nimacita na vazay.
Mapacita si Yeso do rarwa ka tao
(Make 16:12-13)
13Do araraw no kano nang am amyan so rarwa ka tao a meypangay do asa ka ili. O ngaran no ili ori am Imao. O karairai na no ili ori do Yelosaleng am atlo a ka vatvatek o yalam sya. 14Sira rana ori do nyalaman da am malavat da o mina vazay do araraw no nang. 15Kapyahen da meysirisiring am macisngen si Yeso jira a kapacihza na jira omalam. 16Macita da si Yeso am ji da na tovili. 17Maniring jira am, “Ikongo nyo malavat ang.” Mamizing da am mina to neyked sira a marahet nya so onowned. 18O asa ka tao jira meyngaran so Kelopa a mapacici si Yeso. Maniring am, “Manngwa, mo pa jya nimamizing o vazay do Yelosaleng a yamiseysan do dang?” 19Maniring si Yeso am, “Ikongo a vazay.” Maniring sira am, “Vazay na ni Yeso a tao do Nasale. Iya rana am panoyonoywan na so ciring ni Ama ta do to, tey mowyat so ciriciring do tangain ni Ama ta do to a kano aro a tao. 20Iya rana ori am da todey ngapa no panipanirsirngen no mapatanatanang so nakem ta si Ama ta do to a kano aro a panipanirsirngen a wakwaken a kapadket da rana sya do jyojika. 21Namen nipanci ya a nimai a mapatastas so Isedi a tao. Am yajyakman sang, ta ikatlo na araw ya no akman sang a vazay. 22Da nipaogto yamen no yamakanateng a mavavakes, ta sira niomhep a yanimangay do nipakakasan da sya. 23Am yada jya nimacita do dang o kataotao na. Am ori o da nipeysinaoli a manci no, ‘Yamyan so namen nimacita a tinsi, na kapanci nya jyamen so na kanimavyay rana ni Yeso.’ 24Yamangay sira o karwan jyamen do nipakakasan da sya a tomita sya am yajyalas o ciring da no mavavakes, ta yabo rana si Yeso.” 25Maniring si Yeso jira am, “Manoyong kamo a yajyateteneng a tao an. Ta ikongo nyo ji nganoyngi do ciring da no panoyonoywan na so ciring ni Ama ta do to no kakwa. 26Manngwa, nyo jyatenngi o kangay no akman sang a alalaw no Misayya a kai na rana no azwazway na?” 27Meyratateng am pangozayan na o nivatvatkan ni Moyse a kano panoyonoywan na so ciring ni Ama ta do to a kaononong na rana do mina ciring da sya do Seysyo a omagaz do kataotao na.
28Masngen rana kapakaranes da do angayan da a ili am to mangonong pa si Yeso. 29Meyratateng am ipanci da si Yeso a macisan jira, ta makeykai rana o kahep na. Am ori o nionotan na jira ni Yeso. 30Amhezsad a macihanghang jira si Yeso am ahapen na o myanpaw kasaray na nya ji Ama ta do to a kapeyketeb na sya a itoro na jira. 31Meyratateng am mina todeywangi o mata da. Am ori o nipakasingkadan da ji Yeso. Am todabo rana si Yeso. 32Maniring sira do kadwan jira am, “Yanimacisirsiring jyaten do ta pangonongan a na kapangononong jyaten so Seysyo no kano nang am ta mina todeyrasi so onowned a yamasaray a omamizing sya!”
33So nikakeykai da nimeysinaoli do Yelosaleng. Makaranes sira do dang am macita da o asa so ikakarwan a macinanao ji Yeso a kano aro a kararay da a malovot do dang, 34a makalavat so kanoyong ni Yeso a nimeyvangon rana a kanimapacita na rana ji Simong. 35O rarwa ori am malavat da o mina vazay da do rarahan no kapeypangay da do Imao a kapakalavat da so kanimapeyketeb na ni Yeso so myanpaw a itoro na jira. Am ori o nipakatovilan da rana jya. Ori o mina ciring da do aro a tao no rarwa ori.
Mapacita si Yeso do macinanao jya
(Matay 28:16-20; Make 16:14-18; Yowani 20:18-23; Nimlivolivon 1:6-8)
36Malavat da o aro a vazay am to meytatanek si Yeso do tangain da a manci nya jira so, “Kokay kamo.” 37Am ori o niogtwan da nya a mapatolin sya do anito. 38Maniring si Yeso jira am, “Ikongo nyo ikanyahey a ji meyhanhan nyaken. 39Cittey kamo o lima ko a kano ai ko so ika yaken na. Beken a kadwan. Pinaney kamo yaken. Ori o ipakateneng nyo jya, ta ji sira meyyasisi. Ji sira meytotowang o anito. Cittey kamo. Ta yamyan so asisi ko a kano totowang ko!” 40Meyratateng am ipacita na jira o lima na kano ai na. 41Am katenngan da o kasaray da am ipeyzokab da. Am ori o ji da pa nganoyngi jya. So peycirngan na jira so, “Yamyan so kanen nyo do jya?” 42Meyratateng am mangap sira so asa cilad a nisazaban a among a patodahen jya. 43Todahen na jira kakan na rana sya do tangain da.
44Meyratateng am maniring jira si Yeso am, “O aro a vazay rana ya am nimalavat ko na jinyo no kakwa pa. O nivatvatkan ni Moyse a kano panoyonoywan na so ciring ni Ama ta do to a kano nivatvatkan a Anwanood a yaomagaz jyaken am yarana nimangononong.” 45Ori o icyakma dey mababa so nakenakem. So ipakateneng da do Ciriciring no Seysyo. 46Maniring pa jira am, “O nivatvatkan da do Seysyo a ciriciring am amyan so alalaw ni Kizisto. Ikatlo na araw am mirwa pa mavyay. 47Am ori o papwen sya do Yelosaleng a meylimwang no mamlis a kano manvonas so raraten a ciriciring a kangay na do peycyamahamahatawan na. 48Inyo o yongkad no vazay ko a nidomket do Seysyo, do mina kapakacita nyo so akman sya a vazay a nimangononong rana. 49Tovoin ko jinyo o Seyzi a nipanci na a itoro na jinyo ni Ama. Am to kamo ngyan do ili eya amnanala sya mangay no si parawaten na jinyo o oyowyat apo do teyngato.”
Meysinaoli mangay do teyngato si Yeso
(Make 16:19-20; Nimlivolivon 1:9-11)
50Meyratateng am palolwen na sira ni Yeso a mangay do meyngaran so Potani a ili. Amyan sira do dang am ipanlanlag na sira no lima na. 51Ipanlanlag na sira am karwan na rana sira a meycyakavat a mangay do teyngato. 52Ori o niraralayan da nya masasaray so onowned a meysinaoli do Yelosaleng. 53So nikasangib da rana do rako a panaralayan a omazwazway si Ama ta do to.
Currently Selected:
Locya 24: snt
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The Bible Society in Taiwan