ЛукӀа 15
15
Исади квахьайди жагъурун
(МатӀай 18:12-14)
1 Исадиз яб гун патал, харж кӀватӀдайбурни гунагькарар вири атана кӀватӀ хьанвай. 2Фарисейрини тавратдарри наразивал ийиз хьана:
– Ам гунагькаррихъ галаз алагъ-салагъда ава, гьатта абурухъ галаз санал ацукьна фуни незва.
3И чӀавуз Исади ихьтин кьиса ахъайна:
4– Виш хипекай сад квахьайла, кьудкъанни цӀекӀуьд хеб кьурумда туна, гьа квахьай садахъ къекъвез квекай вуж фидач? Хеб жагъун тавунмаз вуж элкъвена хкведа? 5Жагъайла, хеб шадвилелди къуьнерал вегьена хкида. 6КӀвализ хтайла, ада дустаризни къуншийриз эверна лугьуда: «Куьнени захъ галаз шадвал ая, заз зи квахьай хеб жагъун хъувуна». 7Идалди За квез лугьузва хьи, кьудкъанни цӀекӀуьд гьахъ-михьи касдилай са гунагькар Аллагьдин рекьел атун цавар патал чӀехи шадвал я.
8Я тахьайтӀа, цӀуд гимишдин пул авай са паб къачун, пуларикай сад адавай квахьайтӀа, гьам жагъидалди шемни куькӀуьрна ам кӀвал шуткуниз, мукьуфдалди кӀвалин са-са пӀипӀ тирвал къекъвез жедачни мегер? 9Ам жагъайла, дустаризни къуншийриз эверна ада лугьуда: «Куьнни захъ галаз шад хьухь, квахьай пул заз жагъун хъувуна». 10Гьа икӀ, лугьузва За квез, Аллагьдин рекьел атай са гунагькар акуртӀани, Аллагьдин малаикриз хвеши жеда.
Квахьай хцикай кьиса
11Исади мад лагьана:
– Са касдихъ кьве хва авай.
12Абурукай гъвечӀида бубадиз лагьана: «Я буба! Ви эменнидикай зал гьалтзавай пай зав вахце».
Бубадини эменни рухвайрин арада пайна. 13Са кьадар йикъар фейила, гъвечӀи хва вичин шейэр кӀватӀна, яргъал уьлкведиз фена. Гьанра ада, кефер чӀугваз, вичихъ авай мал-девлет гаралай авуна. 14Ада вичихъ авай-авачирди руфунай авадарна куьтягьайла, а вилаятда зурба каш хьана. Ам кӀеве гьатна. 15Ам фена кӀвалах це лугьуз а вилаятдин са касдал алахъна, адани ам вичин вакӀар хуьз чуьлдиз ракъурна. 16Адаз вакӀари незвай тӀуьналдини руфун ацӀуриз кӀанзавай, амма адаз гьам гудайдини авачир.
17Кьили ван авурла, ада вичи вичикди лагьана: «Зи бубадихъ гьакъидалди кӀвалахзавайбур гьикьван аватӀани, абур вири тухни я ва недайди абуруз амукьни ийизва, амма зун ина гишила рекьизва! 18Бубадин патав хъфида. „Чан буба! – лугьуда за. – Зун цаварин ва ви вилик гунагькар я, 19гила зун ви хва я лагьай тӀварцӀиз лайих яз амач. Зунни ваз кӀвалахзавайбурун арадиз кьабула, буба“».
20Ам къарагъна вичин бубадин патав хъфена. Бубадиз ам гьеле яргъа амаз акурла, адаз хцин язух атана; бубади, чукурна фена хцин гардан кьуна, адаз теменар гана.
21«Чан буба! – лагьана хци. – Зун цаварин ва ви вилик гунагькар я, ви хва я лугьудай тӀварцӀизни зун лайих яз амач.».
22Амма бубади вичин лукӀариз лагьана: «Лап хъсан пекер гъана адал алукӀ, адан тупӀухъ тупӀални акала, алукӀдай кӀвачин къапарни, 23хвенвай данани гъана тукӀукӀ. Нез, хъваз шадвилер ийин чна: 24зи и хва кьенвай, гила адал чан хтанва, ам завай квахьнавай, гила ам заз жагъун хъувунва». Абур шадвилер ийиз эгечӀна.
25ЧӀехи хва, лагьайтӀа, никӀе авай; ам хтана кӀвализ ахгакьайла, адаз манийрин ва инсанри кьуьлер ийизвай ванер атана. 26Ада кӀвалел алайбурукай садаз эверна, адавай хабар кьуна: «Ина вуч хьанва?» 27«Ви стха хтанва, – жаваб гана ада, – хва сагъ-саламат яз хтана акур ви бубадини хвенвай дана тукӀунва».
28Стхадиз хъел атана кӀвализ хквез кӀан хьанач. Бубади, кӀваляй экъечӀна, адаз хъша лагьана. 29Амма ада бубадиз жаваб гана: «И вири йисара за ваз къуллугъ ийиз, ви гафунал гаф эцигайди туш, амма вуна заз, жуван дустарихъ галаз кефер чӀугун патал, гьич бацӀини гайиди туш. 30Гьина ятӀани гьатнавай ва чӀуру рекье авай папарихъ галаз ви эменни гаралай авур ви и хва хтайла, вуна адаз хвенвай дана тукӀуна». 31«Чан хва! – лагьана бубади. – Вун датӀана захъ гала, захъ авай-авачирдини вири види я. 32Ви стха хтай чӀавуз шадвал тавуна гьикӀ акъвазда?! Ам кьенвай, гила – чан хтанва. Ам квахьнавай, гила – жагъун хъувунва».
Currently Selected:
ЛукӀа 15: ЛезПК
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Институт перевода Библии, 2010-2024