Хьунухь 8
8
1Нуьгь ва адахъ галаз санал гимида авай вагьши ва кӀвалин гьайванар Аллагьди рикӀел хкана. Аллагьди чилел гар ракъурна ва ятар кьулухъди чӀугуна.
2КӀев хьана чӀехи деринрин сивер,
кӀев хьана цавун хилер,
ва марф къун акъваз хьана.
3Яд яваш-яваш чилелай алатиз хьана.
Вишни яхцӀурни цӀуд йикъалай яд ахцукьиз эгечӀна: 4ирид лагьай вацран цӀерид лагьай юкъуз гими Араратдин дагъларал акъваз хьана. 5Ци явашдиз кьулухъ чӀугуна, цӀуд лагьай вацран сад лагьай юкъуз дагъларин кукӀушар малум хьана.
6ЯхцӀур югъ алатна. Вичи туькӀуьрай дакӀар ачухна, 7Нуьгьа кӀвагъ къецел ахъайна; чил кьурадалди кӀвагъ гагь лув гуз физ, гагь элкъвена хквез хьана.
8Ахпа Нуьгьа яд акьалтун куьтягь хьанватӀа чирун патал къецел лиф ахъайна, 9амма лифрезни вичин кӀвач хкӀадай чка жагъанач ва элкъвена хтана, вучиз лагьайтӀа гьеле вири чил ци кьунмай. Нуьгьа гъил яргъи авуна, лиф гимидиз хкана. 10Ада ирид юкъуз гуьзетна ва лиф мад ахъайна. 11Ам няниз хтана – кӀуфа зейтун тарцин таза пеш аваз, ва Нуьгьаз яд ахцукьнавайди чир хьана. 12Ада мад ирид къуз гуьзетна, мадни лиф ахъайна. Амни – мад элкъвена адан патав хтанач.
Нуьгьан къурбандар ва Аллагьди гайи гаф
13Нуьгьан уьмуьрдин ругуд вишни са йис алукьайла, сад лагьай вацран сад лагьай юкъуз яд ахцукьна. Нуьгьа гимидин къав ахъайна ва адаз чилел яд аламачирди акуна.
14Кьвед лагьай вацран къанни ирид лагьай юкъуз, чилин винел пад кьуру хьайила, 15Аллагьди Нуьгьаз лагьана: 16«Папахъ, рухвайрихъ ва абурун папарихъ галаз санал гимидай экъечӀ. 17Вири гьайванарни акъуд – гьам ничхирар, гьам малар, гьамни чилел къекъведай чан алай вири куьлуь-шуьлуьяр: дуьнья тирвал чукӀурай, абуру бегьер гъурай ва кьадардиз гзаф хьурай».
18Нуьгь рухваяр, паб ва рухвайрин папарни галаз гимидай экъечӀна, 19гуьгъуьнал алаз вагьшияр, куьлуь гьайванар, ничхирар – чилел уьмуьр тухузвай кьван гьар са затӀ жинс жинсинин гуьгъуьна аваз эвичӀна.
20Нуьгьа Реббидиз къурбанган эцигна ва гьайванрин михьи вири жуьрейрикай ва михьи къушарикай кунуг авуна. 21Къурбандрин хуш ни чӀугваз, Реббиди вичи-вичиз элкъвена икӀ лагьана: «Абурун рикӀери лап жегьил чӀавалай эгечӀна писвилихъ ялзаватӀани, идалай кьулухъ мад За инсанар себеб яз чилиз лянет хъийидач. За жува халкь авур чан алай кьван вири затӀариз мад инад кьуниз рехъ гудач.
22Чил амай кьван эхир тахьурай:
цунин ва гуьнин,
мекьин ва зегьемдин,
гатун ва хъуьтӀуьн,
йикъан ва йифен».
Currently Selected:
Хьунухь 8: ЛезПК
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Институт перевода Библии, 2010-2024