Эклц 1
1
Делкән үүдәлт
1Түрүләд Бурхн теңгр һазр хойриг үүдәв. 2Һазр эҗго, дүрсн уга бәәҗ. Йорал уга гүн һазр деер харңһу бәәҗ. Усн деерәһүр Бурхна Сәкүсн деләд нисҗәҗ.
3Тиигәд Бурхн келв:
– Герл ортха!
Герл орв. 4Герлтә болсиг сән гиҗ Бурхн үзәд, герлиг харңһуһас салһв. 5Герлиг Бурхн «өдр» гиҗ нерәдв, харңһуг – «сө» гив.
Тиигәд асхн болв, өрүн болв. Эн түрүн өдрнь.
6Бурхн келв:
– Усиг уснас салһдг заг усн хоорнд һартха.
7Бурхн тер заг үүдәһәд, деерк усиг дор бәәх уснас салһв, тиигәд тиим болв. 8Тер ормд Бурхн «теңгр» гидг нер өгв.
Тиигәд асхн болв, өрүн болв. Эн хойрдгч өдрнь.
9Бурхн келв:
– Цуг усн теңгр дор хурад, хүүрә һазр һартха.
Келснь күцв. 10Хүүрә һазрт Бурхн «һазр» гидг нер өгв, хурсн уснд «теңгсмүд» гидг нер өгв. Эннь сән болсиг Бурхн үзв. 11Бурхн келв:
– Һазр урһмл һарһтха: һазр деер эктә урһмл, дотран эктә темс өгдг модд зүс-зүсәрнь һартха.
Келснь күцв. 12Һазр урһмл һарһв: эк өгдг зүсн-зүүл урһмл, дотран эктә темс өгдг моддыг зүс-зүсәрнь. Эннь сән болсиг Бурхн үзв.
13Тиигәд асхн болв, өрүн болв. Эн һурвдгч өдрнь.
14Бурхн келв:
– Өдриг сөөһәс салһх нарн, сар, одд теңгрин орад һартха. Тедн цаг, өдрмүд, җилмүд тоолх темдгүд болтха. 15Тедн һазр тал герл илгәдг теңгрин орад бәәх герлин гегән болтха.
Келснь күцв. 16Бурхн хойр ик алдр гегә үүдәв – өдриг залхин төлә нар, сөөг залхин төлә сар үүдәв, бас одд үүдәв. 17-18Һазрт герл өгхин төлә, өдр, сөөг залхин төлә, гегәг харңһуһас салһхин төлә Бурхн тедниг теңгрт тәвв. Эннь сән болсиг Бурхн үзв.
19Асхн болв, өрүн болв. Эн дөрвдгч өдрнь.
20Бурхн келв:
– Әмтә-киитә юмар усн бигштхә, һазр деерәһүр шовуд теңгрт нистхә.
21Бурхн теңгсин ик гидг адусд үүдәв, уснд бигшх цуг әмтә-киитә юмиг болн нисдг җивртә зүсн-зүүл шовудыг үүдәв. Эннь сән болсиг Бурхн үзв. 22Теднд Бурхн әдс өгәд иигҗ келв:
– Түргәр өстн, олн болтн, теңгсмүдин ус дүүргтн, шовуд һазр деер түргәр өстхә.
23Асхн болв, өрүн болв. Эн тавдгч өдрнь.
24Бурхн келв:
– Зүсн-зүүл зүстә әмтә-киитә юм һазр һарһтха: мал, мөлкдгүд болн зерлг аңгуд.
Келснь күцв. 25Бурхн зүсн-зүүл зүстә зерлг аңгуд, мал, цуг мөлкдг юм һазр деер зүс-зүсәрнь үүдәв. Эннь сән болсиг Бурхн үзв.
26Дарунь Бурхн келв:
– Мана дүртә болн бәәдлтә кү үүдәхмн. Тиигәд тер теңгсин заһсдт болн теңгрин шовудт, малмудт, цуг һазр дееркд, цуг мөлкдг юмнд бас нойлг.
27Тиигәд Бурхн Эврәннь дүртә кү үүдәв.
Терүг Бурхна дүртәһәр Тер үүдәв.
Залу болн күүкд кү
Тедниг Бурхн үүдәв.
28Теднд Бурхн әдс өгәд, иигҗ келв:
– Өстн, олн болтн, һазр дүүргәд энүг эзлтн. Теңгсин заһсдт, теңгрин шовудт, мөлкдг юмнд цугтаднь нойрхтн.
29Терүнә дару Бурхн келв:
– Һазр деерк эктә цуг урһмлмудыг, дотран эктә темс өгдг цуг моддыг Би таднд өгчәнәв. Эдн таднд эдлвр болх. 30Һазр деерк цуг аңгудт, теңгрин цуг шовудт, цуг мөлкдгүд, әмтә-киитә юмнд хот кетхә гиһәд, Би ноһа өгчәнәв.
Келснь күцв. 31Үүдәсн юман Бурхн цугтаһинь үзв, тегәд цугнь йир сән болв.
Асхн болв, өрүн болв. Эн зурһадгч өдрнь.
Currently Selected:
Эклц 1: ХКО_ӘБ
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Институт перевода Библии, 2002-2023