aMatiyu 20
20
Áfe itomong riko̱
1“Rigwo̱m kaza se kyo̱ndi atekasa akak a tá wuruk nadiding bop, nong a tá se sok ánerawe nong á tá su ku nye itomong riko̱. 2Á tin sak ye, wu ta karang koangan ba itso̱m kuwoso alebura ne a ku tomong ba riko̱ anap wu.
3“Nabas itso̱m katonbo̱k a wuruk, ne a di se̱ áner ákak á tan sosok kpe̱de̱ng dar ike̱ng kunye nanu karo̱ rizhik. 4Ayong a fe̱ be ba ye, ‘Yin gip tseng yin riko̱ mi nong tá sen nye yin itomong, mi tà ka karang yin gye̱r.’ Iyong á tseng ba. 5A tá bun a wuruk nunom nabas itso̱m itaar gbak, a bun a sok áfe itomong akak gbak. 6Nabas itso̱m itoon, a bun a wuruk ne a di áner ákak tan nyeseng kpe̱de̱ng dar ike̱ng kunye, iyong a fe̱ be ba ye, ‘Akye̱ sak yin woso yin dar ike̱ng kunye e̱?’
7“Á fe̱ ye, ‘Kamok sang akak ti no̱o̱k yir itomong baꞌ.’
“Ayong a fe̱ be ba ye, ‘Yin gip, tseng yin riko̱ mi.’
8“Kawheshirim tá fa nye ne atek riko̱'me fe̱ be aner a tin sak riye̱ riko̱'me ye, ‘Yis áfe a tin nye itomong nong i tú ku karang ba ishorong ba, san kukarang áfe a tá be̱ nama ne i ma karang áfe a tá be̱ ni ime̱se̱ng'e.’
9“Áfe a tá be̱ nabas itso̱m itoon, koangan ba shan itso̱m kuwoso. 10Iyong áfe a tá be̱ ni ime̱se̱ng sor ye a tú ku no̱o̱k ba ike̱ng i ta nar anong. Amma koangan ba se̱ itso̱m kuwoso gip. 11Nizen á tá shan itso̱m'e, á fe̱ nyinye̱m be atek riko̱'me ye, 12‘Áya á tu ku sok ba nigang'e nye itomong nizen cie̱k tsek, amma wan tú ku karang ba tite̱re̱ be yir áya i tá nye yir itomong kuwoso ne kunom ni ya yir.’
13“Atek riko̱'me fe̱ be azining kaye̱e̱r ba ye, ‘Di, are̱, mi tá mo̱o̱r baꞌ. Wan fe̱ ye wan tin nye itomong nuwoso aꞌa? 14Shan itso̱m wan ta tseng. Ke mi shim riye̱ mi, mi ta karang aner mi tú ku sok nigang'e itso̱m tite̱re̱ be ike̱ng mi tá ka karang, iyong nye riye̱. 15Aser, mi ta kyem i nye be itso̱m mi kyo̱ndi mi ta shim aꞌa? Ka wan be rishishim kamok mi ta se washak e̱?’
16“Be anong,” aYeso fe̱ ye, “Áfe igang'e tà te áfe ime̱se̱ng'e ne áfe ime̱se̱ng'e tà te áfe igang'e.”
aYeso bun a nye kuzarap riku wu
(aMar 10.32-34; aLuk 18.31-34)
17Nizen iya aYeso tá sen tseng na aUshalima. A yis álimazhiri wu kuso̱k be afa'me nukim a tá fe̱ be ba ye, 18“Yir sen ngarak yir i be yir na aUshalima naro̱ a tana sok Igon Anerawe a ta re̱p ágbang atsi ne áner kubo̱so̱p itsi ne á ku to̱ amok riku. 19Ne á ku sok á ta no̱o̱k áner aya sang á ta nye áner aYahuda baꞌ, nong á ta nye be wu kye̱re̱, ne á ku whereng ne á ku tigak. Katuk afe ataar a tà dorok be kutser.”
Izong anyining aYakub be aYohana tá nye
(aMar 10.35-45)
20Ayong ango̱ inoon aZabedi be̱ nufe aYeso ame be inoon wu ne a tigbok akuur kaben a tú ku rip ike̱ng ikak.
21aYeso tú ku rip ye, “Akye̱ ne wan tse̱r e̱?”
Ne a fe̱ ye, “Mi shim inoon'i na, nafa na ta sor nubo̱k riya wan, azining nubo̱k riya ne akak nubo̱k rimen kaye̱e̱r rigwo̱m wan.”
22Amma aYeso fe̱ be ba ye, “Yin ren yin ike̱ng yin ta tse̱r yin baꞌ. Yin ta kyem i so̱ yin na ako̱p mi tanin so̱ a?”
Ba tú ku shim'e ye, “Yir ta kyem yir.”
23Ayong aYeso fe̱ be ba ye, “Yin ta so̱ yin gye̱r, amma kusor nubo̱k riya ka nubo̱k rimen, i nye karo̱ mi tana no̱o̱k akak baꞌ. Ada mi ne a nye karo̱ kayong kamok áya wu tá tsang a kasa.”
24Nizen iya ribir álimazhiri kuso̱k'e tá fok itak'e, aye̱ ba beseng be áner afa'me. 25aYeso tu yis ba naro̱ kazining a tá fe̱ be ba ye, “Yin ren yin ye, áko̱k kasho̱o̱n áner aya sang a ta nye áner aYahuda baꞌ tin nye rigwo̱m natoon ánerawe ba, ne agbang áko̱k kasho̱o̱n ba min nye rigwo̱m natoon ribir ako̱k kasho̱o̱n'e. 26I se anong be yin baꞌ. Aya a ta shim a ta te agbang'e kaye̱e̱r yin ma a te asam yin cice̱r ingya. 27Aner aya a ta shim a ta te afe ime̱se̱ng'e, i nye ye ma a te asam yin dim. 28Anong ne Igon Anerawe be̱ nong a tu ku nye itomong baꞌ, amma nong a ta nye anerawe'me, ne a no̱o̱k kutser wu kamok kashesh ánerawe whe̱re̱.”
Ákpato̱o̱n ákak áfa se̱ kudi karo̱
(aMar 10.46-52; aLuk 18.35-43)
29Nizen aYeso be álimazhiri wu ta sen won kuwo̱p aZheriko, ánerawe whe̱re̱ tú ku kuus. 30Ákpato̱o̱n afa tu se nusosok nanu iren. Nizen á tá fok ye, aYeso ne a sen gor, yong á ta kuto̱ naza ye, “Igon aDauda, ro̱ riye̱ yir.”
31Rigwo̱m anerawe'me tú zhe̱e̱r ba ye á ra tigbik, amma ákpato̱o̱n ame bun á ti barang kuta kuto̱ naza ye, “Igon aDauda, ro̱ riye̱ yir.”
32Ayong aYeso nyeseng a tú ku yis ba ne a ku rip ba ye, “Akye̱ ne yin shim yin mi tá ka nye yin'e e̱?”
33Ne á fe̱ be wu ye, “Atekasa, yir shim ta di yir karo̱.”
34aYeso fok kuro̱ riye̱ ba, yong a ra anyisi ba. Nizen izining, anyisi ba wor á karak á di karo̱ ne á kuus aYeso'me.
Currently Selected:
aMatiyu 20: izrNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc