Lúkà 12
12
Ká máa sá fú ɔ̀nyà, ká sá fú Ɔ̀ɖáyé
(Màtéwò 10:26-33)
1Ńǹwèrè nyɛ̀ŋɛ̀#ɛ́, ɔ̀nyà yèé kpérí wà bɛ̀ si ŋa#á kò tsi ɔ̀nyà-ɔma ni. À kpɔ̀ títí wà kĩ́rĩ ara-ŋa, tsí wà tɛ ara-ŋa nɛ́sɛ̀. Tsí Yèésù tsɛ̃̀tsɛ̃̀ wà wí fú ɔmatsɛ́‐ɛ̀ ŋa ní: Ká wà tsɔ́ éwo-ara-ŋa rere nára-ɔ̀tsɛ̃̀-ɔma-ɛgbɛ́-Fàrísì† ŋa. À náa tse ore nódzú gé ni.
2Ó ɖi, iŋɛ́ ɔ̀kã̀lɔ́ɔ̀kã̀ yèé ɔ̀nyà mú iŋɛ́ bò si#ɛ́, à nákó wáa tsí atsɔ nódzú‐ɛ̀, tsí iŋɛ́ ɔ̀kã̀lɔ́ɔ̀kã̀ yèé wà ńǹɖúkù si#ɛ́, ɔ̀nyà kpó nákó wáa màá. 3Ó ɖi, iŋɛ́ yèé è wà fɔ̀ ńǹɖòɖò-ilé#ɛ́, ilɛ̀‐ɛ̀ nákó wáa má, tsí èrò nákó gbɔ́ɔ kpó náàbɔ̀ɔ́mɛ̀. Tsí bí è ɖìkpá fú ɔ̀nyà-kã̀ ńnɔlé, à nákó wáa kpaŋgo‐ɛ̀ fú ìlú kpó.
4Tsí ó wà wí fú ŋa ró ní: Ídzà-mi ŋa, òŋu wà wí fú ŋa ní fee, ká máa wà sá fú ɔ̀nyà ŋa, ɔ̀nyà gé ní à nákó nyáa kpa nóòkú#ɛ́, tsí náànyì-nyɛ̀ŋɛ̀#ɛ́, à kàkó nyáa tse iŋɛ́-kã̀ kpókpó lárè bɛ́ɛ̀ ró. 5Ó ɖi, ɛnɛ yèé à nákó wà sá fú#ɛ́, òŋu nákó ɖíreé fú ŋa. Ɛnɛ nyɛ̀ŋɛ̀#ɛ́, Ɔ̀ɖáyé ni. Òŋu gé ní bí ó kpanɛ nóòkú tã́ ni, nákó nyáa kɛ́nɛ si ńná-àrìtã́ gbo#ɛ́. Ɛ̃ɛ̃, òŋu wà wí fú ŋa ní fee, Ɔ̀ɖáyé gé ní ó wà ní ká wà sá fú#ɛ́.
6Egbèló à náa ta ɛ̀gã̀ mɛ́ɛrú ná? Kò tsi bìyéè méèdzìì? Tsí ɔ̀kã̀-ŋa-kã̀ kpókpó kò sì wà, tsí Ɔ̀ɖáyé kà tédzú‐ɛ̀. 7Tsí yèé yɔ#ɛ́, àŋa òŋu, irɔ̃-éwo-ŋa gìɖì#ɛ́, Ɔ̀ɖáyé ma mɛ́ɛló yèé ó dzɛ́#ɛ́. Ó ɖi, ká máa sá fú iŋɛ́-kã̀ kpókpó, à fɛ́ fú Ɔ̀ɖáyé láre ɛ̀gã̀ ŋa kpó.
8Òŋu wà wí fú ŋa ní fee, bí ɔ̀nyà-kã̀ fɔ̀ náàwùdzɔ ní òŋu dzɛ́ tòŋu, òŋu, Ɛnɛ yèé ɔ̀nyà bí#ɛ́†, òŋu gbo, òŋu nákó fɔ̀ nódzú-adzítsɛ́-ɔ̀rɔ̃† ŋa ńɖi-Ɔ̀ɖáyé ní ɛnɛ nyɛ̀ŋɛ̀ dzɛ́ tòŋu. 9Ó ɖi, ɛnɛ yèé nákó fɔ̀ náàwùdzɔ ní òŋu kò ma òŋu#ɛ́, òŋu gbo, òŋu nákó fɔ̀ nódzú-adzítsɛ́-ɔ̀rɔ̃ ŋa ńɖi-Ɔ̀ɖáyé ní òŋu kò màá. 10Tsí ɔ̀nyà ɔ̀kã̀lɔ́ɔ̀kã̀ yèé nákó wíìnyɛ̀ nára-òŋu, Ɛnɛ yèé ɔ̀nyà bí#ɛ́, Ɔ̀ɖáyé nákó ń tɔrɛ fúu. Ó ɖi, ɛnɛ yèé nákó bú Mímí-Ɔ̀ɖáyé†#ɛ́, Ɔ̀ɖáyé kàkó ń tɔrɛ fúu.
11Bí à gbɛ̃́ ŋa lɔ ńlé-ìkpàɖé-ɔma-Ìyúɖà ŋa†, tsí ká kpɛdzɔ́ fú ŋa nàmí bí à gbɛ̃́ ŋa lɔ ńɖi-onùgbó-ìlú ŋa òŋu ólú-ìlú ŋa, ká máa ɖíìhã̀ŋù-kíbí à nákó tse gbà, tsí gba ara-ŋa dzɔ̀ɔ́#ɛ́ òŋu afɔ̀ yèé à nákó fɔ̀#ɛ́. 12Ó ɖi, Mímí-Ɔ̀ɖáyé nákó kɔ́ ŋa, tsí à nákó ma afɔ̀ yèé ká fɔ̀#ɛ́ ńǹɖì-bɛ̀ gbòkã́.
Ká máa wà wò ní iŋɛ́ kpíkpɔ̀ kó dzɛ́ tiwa
13Ɔ̀nyà-kã̀ wà náàŋírĩ-èrò#ɛ́, tsí ó wà wí fú Yèésù ní: Akɔ́nɛ, kó fɔ̀ fú ìfó-òŋu ní fee, iŋɛ́-ogú-àŋa#á, ó wà ní kó kpɛ̃́ tòŋu fú òŋu.
14Tsí Yèésù wà dzɔ́ŋù fúu ní: Ídzà yèé! Nɛ̀ɛ́ mú òŋu dzɛ ólú fú ŋa ní òŋu kó wà kpɛ̃́ ogú-ŋà ŋa fú ŋa?
15Tsí ó nyí, tsí wà wí fú ŋa ní: Ká tsɔ́ éwo ara-ŋa rere! Odzú-ŋa kó máa bilà si ńǹtá-iŋɛ́-kã̀ kpókpó! Ó ɖi, kò tsi kpíkpɔ̀-iŋɛ́ yèé à náa nɛ́#ɛ́ ní náa fúnɛ náàyɛ̀#ɛ́.
16Tsí ó wà kpòwe-kã̀ fú ŋa ní: Olówó-kã̀ wà, tsí ó tsoko, tsí dzídzɛ-oko‐ɛ̀#ɛ́ sã̀ tó bɛ́ɛ̀, 17tsí ó wà fɔ̀ ńnɔ́-ara‐ɛ̀ ní: Bí òŋu kó tse fáà báàyí? Ìɖì kò wà fú òŋu, tsí òŋu kó kpaɖí dzídzɛ-òŋu ŋa si ró. 18Tsí ó tsèsérè, tsí ó ní: Òŋu rí iŋɛ́ yèé òŋu nákó tse#ɛ́ ná. Ó wà ní òŋu kó ɖíwó àgɔ́-òŋu ŋa, tsí tsí ŋa máa lárè bɛ́ɛ̀, tsí òŋu kó kpaɖí dzídzɛ-òŋu ŋa kpó òŋu iŋɛ́-òŋu ŋa si ńnɛ̀. 19Tsí òŋu nákó wà nyɛ ara-òŋu ní: Òŋu ɖìgírí héŋú! Òŋu nɛ́ iŋɛ́ kpíkpɔ̀ ńǹkɛ̀ɛ́. Tsí nákó gbɛ̃́ òŋu fú ɔɖɔ̃́ kpíkpɔ̀. Ó bɔ òŋu kó míra, tsí òŋu kó wà dzɛ, tsí wà mɔ, tsí wà táyè ńǹkɛ̀ɛ́ gé ni.
20Ó ɖi, Ɔ̀ɖáyé wà wí fúu ní: Ɔ̀nyà nákpo ní ó dzɛ́#ɛ́! Nóoru yèé gìɖì#ɛ́, òŋu nákó gba mímí-òŋu nɔ́wɔ́‐ɛ̀, tsí ká rí káyí ní iŋɛ́ yèé ó kpaɖí si fú ara‐ɛ̀ si ŋa#á fee, ti nɛ̀ɛ́ nákó dzɛ́.
21Tsí Yèésù ní: Bɛ́ɛ̀ ní ɛnɛ yèé wà kpaɖí iŋɛ́-owó ŋa si fú ara‐ɛ̀ gé, tsí itsɛ́‐ɛ̀ kò nɛ́ ényì nódzú-Ɔ̀ɖáyé#ɛ́, ɔ̀nyà-ìrɔ́ nyɛ̀ŋɛ̀ ní òŋu gbo dzɛ́#ɛ́.
Ká máa wà ɖíìhã̀ŋù
(Màtéwò 6:25-33)
22Tsí Yèésù wà wí fú ɔmatsɛ́‐ɛ̀ ŋa ní: Àŋa òŋu, ká máa wà ɖíìhã̀ŋù-ayé-ŋa, tsí wà rã́ã̀bo ní: Kí àŋa nákó dzɛ báàyí nàmí kí gìɖì àŋa nákó wɔ̀? 23Ó ɖi, àyɛ̀ kpã́dzú láre dzídzɛ, tsí ara gbo kpã́dzú láre èbò-ara.
24Tsí ó ní: Ká rí tíyoŋgo ŋa gé! Àŋa òŋu, à kò wà tsoko, tsí ká kpaɖí dzídzɛ ŋa si náàgɔ́ nàmí náàká gbo, tsí Ɔ̀ɖáyé náa sì wà sɛ̃̀ ŋá. Tsí ɛ̀ŋɛ òŋu fe, è fɛ́ láre ɛyɛ ŋa nɔ̀! 25Nɛ̀ɛ́ wà náàŋírĩ-ŋɛ́, tsí nákó nyáa wà ɖíìhã̀ŋù títí nyáa sɔ́ ɔdzɔ́-ikú‐ɛ̀ lɔ ńwádzú oɖé máa ná? Ɔ̀nyà-kã̀ kò wà. 26Kíbí è kò bòkó nyáa tse iŋɛ́ oɖé tsígíɖí nyɛ̀ŋɛ̀ gìɖì#ɛ́ fee, kí tse tsí è wà ɖíìhã̀ŋù-iŋɛ́-àtíbɔ̀ ŋa ńǹkɛ̀ɛ́?
27Tsí ó wà wí fú ŋa ró ní: Ká rí ìbóbó ŋa gbo gé! À kò wà tsitsɛ́, tsí à kò wà rã okù gbo, tsí à náa sì tsàfɛ́ŋú si. Ó ɖi, òŋu wà fɔ̀ fú ŋa ní fee, ólú Sàlòmɔ́† gìɖì#ɛ́, kíbí ó rí owó tó gbà#á, kò wɔ ìwɔ̀ra-kã̀, tsí kó tsàfɛ́ŋú tó ìbóbó nyɛ̀ŋɛ̀ ŋa wòrí. 28Ɔ̀ɖáyé wà tɔ́dzú ìbóbó ŋa ńkóko, tsí à tsàfɛ́ŋú si nɔ́mbɛ́, tsí ɔ̀la òŋu ɔ̀tɔ́ɔla, à nákó wáa tãná gú ŋa. Ó ɖi, kíbí ó wà tɔ́dzú ìbóbó ŋa gbà#á, tiŋɛ́ nákó yɔ nɔ̀! Àkaralé-ŋɛ́ kò lákṹ nɛ́! 29Kíbí ó dzɛ́ bɛ́ɛ̀#ɛ́, ɛ̀ŋɛ òŋu, iŋɛ́ yèé è nákó dzɛ, tsí mɔ#ɛ́ kó máa dzɛ́ ìsérè fú ŋɛ́, tsí e wà tse, tsí e wà ɖíìhã̀ŋù gbo. 30Ɛnɛ yèé ŋa kò ma Ɔ̀ɖáyé náàdzàkáyé#ɛ́ ní náa wà wo iŋɛ́-ìrɔ́ nyɛ̀ŋɛ̀ ŋa#á. Ó ɖi, ɛ̀ŋɛ òŋu, Ɔ̀ɖáyé Boba-ŋɛ́ gìɖì ti mà ní iŋɛ́ nyɛ̀ŋɛ̀ ŋa wà hã́ ŋɛ́. 31Kà kàa bɛ́ɛ̀#ɛ́, è wò ní Ɔ̀ɖáyé kó dzoyè si ńǹtá-ŋɛ́, tsí nákó mú iŋɛ́-àtíbɔ̀ ŋa gbo, tsí ń máa fú ŋɛ́.
32Tsí ó wà wí fú ŋa ró ní: Ńnɔ́-ɛgbɛ́-ŋɛ́#ɛ́, è kò kpɔ̀. Ó ɖi, è máa sá! Iŋɛ́ yèé tse#ɛ́, ó ɖé ńnɔ́-Ɔ̀ɖáyé Boba-ŋɛ́ ní ɛ̀ŋɛ kó dzoyè bá òŋu, tsí ó dzɔdzú‐ɛ̀ bɛ́ɛ̀. 33Ńbɛ̀ɛ́, è náa ta iŋɛ́-ŋɛ́ ŋa, tsí e kɛ́ owó‐ɛ̀ tsɔ̀yà fú adzìyàkú ŋa. È kpaɖí iŋɛ́-ɛ̀fɛ́-ŋɛ́ ŋa ɖà náàkpò-Ɔ̀ɖáyé nɔ́ɔ̀rɔ̃. Àkpò#ɛ́ kà ya láyé, tsí olè ŋa kà nyáa sɔ́má‐ɛ̀, tsí àmùlɛ̀ ŋa gbo kà nyáa mɔɔ́. 34Ó ɖi, ńbí iŋɛ́-ɛ̀fɛ́-ɛ̀ɛ ŋa wà#á, odzú-ɛ̀ɛ kà nyà bɛ̀.
Ká wà nódzúfò si, tsí ká gba olílé
(Màtéwò 24:43-51)
35Tsí Yèésù wà wí fú ŋa ní: È kpaɖí ara-ŋɛ́ si, tsí e wà ɖíìdzáyè gbo. 36Ó ɖi, ó wà ní e wà tse kíbí àtsìtsɛ́-ilé ŋa náa tse#ɛ́. Bí olílé-ŋa lɔ káà dzɛ ɔɖɔ̃́-aya nínɛ́ ńɖi-ídza‐ɛ̀ ŋa, à náa wà ɖóro ɖe àbɔ̀wá‐ɛ̀, àtsùgbée bí ó tó, tsí kpɛ̀kũ̀ gé ná, ni ká yáa tsí èkũ̀ fúu. 37Ó ɖi, àtsìtsɛ́ yèé ŋa nákó wáa bá nódzúfò bɛ́ɛ̀#ɛ́, à wɛ éwo-ire. Ǹ wà fɔ̀ fú ŋɛ́ ní fee, olílé#ɛ́ nákó kparɔ ìwɔ̀ra‐ɛ̀, tsí nákó gbɛ̃́ ŋa lɔ nóòkpì-ìdzɛ, tsí nákó kpɛ̃́ dzídzɛ bɔwɔ́-ŋa. 38Bí ó dzɛ́ ńǹŋàáŋà nàmí ńǹɖádzá gìɖì ní ó wá, tsí bá ŋa nódzúfò bɛ́ɛ̀#ɛ́, à wɛ éwo-ire.
39Ká mà si ní fee, bí ó dzɛ́ ní olílé-kã̀ ma ńǹwèrè yèé olè nákó wáa tsolèé#ɛ́, kàkó dzɛ́ ní olè#ɛ́ kó wɔlé-òŋu gìɖì. 40Àŋa gbo, ká kpaɖí si, iŋɛ́ yèé tse#ɛ́, òŋu, Ɛnɛ yèé ɔ̀nyà bí#ɛ́†, òŋu nákó wá ńǹwèrè yèé à kò módzúlé#ɛ́ ni.
41Tsí Òkúta wà bèrèé ní: Ɔ̀gá! Àwa ɔmatsɛ́-ɛ̀ɛ ŋa ní ò wà kpòwe yèé fú#ɛ́ nàmí ɔ̀nyà kpó ni?
42Tsí Ɔlá-wa ní: Ká fɔ̀ ní àtsìtsɛ́-kã̀ wà, tsí náa tse òtítɔ́, tsí ó nɛ́ ìrã̀ã́mà gbo, tsí ɔ̀gá‐ɛ̀ kɛ́ɛ si nárũ-ɔ̀nyà-kpáfɛ‐ɛ̀ ŋa ní kó wà fú ŋa ńdzídzɛ si ńǹwèrè. 43Àtsìtsɛ́ nyɛ̀ŋɛ̀#ɛ́, bí ɔ̀gá#á wáa báa, tsí ó wà tsitsɛ́#ɛ́ si ńǹɖì‐ɛ̀#ɛ́, ó wɛ éwo-ire. 44Tsí òŋu wà wí fú ŋa ní fee, ɔ̀gá#á nákó mú àtsìtsɛ́ nyɛ̀ŋɛ̀#ɛ́, tsí ń si nárũ-iŋɛ́‐ɛ̀ ŋa kpó, tsí kó wà rí ìtá-ŋa.
45Ó ɖi, bí àtsìtsɛ́#ɛ́ wà fɔ̀ ńnɔ́-ara‐ɛ̀ ní ɔ̀gá-òŋu kò sɛ̃̀ bàa kóyá, tsí ó kpé enìkéèdzì‐ɛ̀ ŋa kpíkpa, ɔnɔkɛ̃̀ɛ̃ gbo, ɔnɔbɛ̃̀ɛ̃ gbo, ó kpé àŋa kpó kpíkpa, tsí ó wà dzɛ gé, tsí wà mɔ títí wà ŋɔ́#ɛ́, 46ɔ̀gá‐ɛ̀#ɛ́ nákó wáa wá nɔ́dzɔ́ yèé kàkó mà si#ɛ́. Náàsòkò yèé kàkó módzúlé si gìɖì#ɛ́ ní nákó wá#á. Tsí nákó kĩ́rĩ iŋɛ́ báa, tsí nákó tse gbo, tsí nákó dzɛ èrè-òtítɔ́-àrìmáa tse.
47Tsí bí àtsìtsɛ́-kã̀ wà, tsí ma iŋɛ́ yèé ɔ̀gá‐ɛ̀ wà wò ní kó tse#ɛ́, tsí kò tseé, tsí kò kpaɖí iŋɛ́-kã̀ kpókpó gbo si#ɛ́, ɔ̀gá‐ɛ̀ nákó tsɔ̀ɔ́ náàtàmì kpíkpɔ̀ lárè. 48Tsí bí ó dzɛ́ ní àtsìtsɛ́-kã̀ òŋu wà, tsí kò ma iŋɛ́ yèé ɔ̀gá‐ɛ̀ wà wò ní kó tse#ɛ́, tsí ó káà tse iŋɛ́ yèé kò sã̀#á, tsí ó bèrè ní ká fɛtí fúu, ɔ̀gá‐ɛ̀ nákó tsɔ̀ɔ́ náàtàmì oɖé gé ni. Ó ɖi, ɛnɛ yèé à mú iŋɛ́ kpíkpɔ̀ bɔwɔ́#ɛ́, iŋɛ́ kpíkpɔ̀ ké ní à nákó sɛ̃̀ bèrè nɔ́wɔ́‐ɛ̀#ɛ́. Tsí ɛnɛ yèé gbo à mú si nárũ-iŋɛ́ kpíkpɔ̀#ɛ́, à nákó bere òŋu gbo ńŋɛ́ kpíkpɔ̀.
Yèésù wáa bàdzɛ́ àŋírĩ-ɔ̀nyà ŋa
(Màtéwò 10:34-39)
49Tsí Yèésù ní: Iná ní òŋu kɛ́ wáa ɖà ńǹtá-ilɛ̀#ɛ́. Ó ɖi, iŋɛ́-kã̀ kò le òŋu si láre iná#á kó ti wà gbã̀ ná. 50Ó ɖi, à bòkó mú òŋu réré, tsí tsoró bá òŋu tó bɛ́ɛ̀. Ó ɖi fee, odzú-òŋu kpã́ si ní ńǹwèrè yèé iŋɛ́ ŋa#á kó tsɛ#ɛ́, kó yáa tó fú òŋu. 51À ɖédzú òŋu wá ńǹtalɛ̀ bí ní ɔ̀nyà ŋa ká ɖɔ̃̀ niì? Kpɛ́rɛ́! Òŋu wà wí fú ŋa ní fee, òŋu wá ní òŋu kó wáa bàdzɛ́ àŋírĩ-ɔ̀nyà ŋa ni. 52Ó ɖi, ti nɔ́mbɛ́#ɛ́, bí ó dzɛ́ ní ɔ̀nyà mɛ́ɛrú wà ńkpàtá-kã̀, ɔ̀nyà mɛ́ɛta kàkó rí ɔ̀nyà méèdzì nódzú, tsí ɔ̀nyà méèdzì gbo kàkó rí ɔ̀nyà mɛ́ɛta ŋa#á nódzú. 53Boba nákó kɔ ɔma‐ɛ̀ ɔnɔkɛ̃̀ɛ̃, tsí ɔma ɔnɔkɛ̃̀ɛ̃ gbo kàkó kpe boba‐ɛ̀ ní boba ró, tsí ínà nákó kɔ ɔma‐ɛ̀ ɔnɔbɛ̃̀ɛ̃, tsí ɔma ɔnɔbɛ̃̀ɛ̃ gbo kàkó kpe ìná‐ɛ̀ ní ínà ró, tsí arɔkɔ ɔnɔbɛ̃̀ɛ̃ nákó kɔ aya-ɔma‐ɛ̀, tsí aya-ɔma gbo kàkó kpe arɔkɔ‐ɛ̀ ɔnɔbɛ̃̀ɛ̃ ní arɔkɔ ró.
Ɛ̀ŋɛ ká-ŋɛ́, è rí iŋɛ́-ire mà, tsí e tseé
(Màtéwò 16:2-3)
54Tsí Yèésù nyí, tsí wà wí fú èrò#ɛ́ ní: Bí òdzò tsú si nɔ́wɔ́-bùkúù, è náa fɔ̀ gbòkã́ ní òdzò bòkó rɔ̀, tsí náa rɔ̀ ìɖéǹɖè. 55Tsí bí ɔyɛ́ tã́, è náa fɔ̀ ní òruku bàa, tsí náa wá bɛ́ɛ̀ ìɖéǹɖè. 56Ɔ̀nyà-atsendzɔdzú ŋa yèé è dzɛ́ si#ɛ́! Bí è kɛ́ odzú fú ìgbèrí, è náa ma ìwèrè-òdzò òŋu ìwèrè-òruku níìkã̀. Tsí kí tse tsí iŋɛ́ yèé wà tse báàyí ŋa#á, è kò wà rí àŋa òŋu mà níìkã̀ níìkã̀ ná?
57Kí tse tsí ɛ̀ŋɛ ká-ŋɛ́, è kò wà rí iŋɛ́-ire mà, tsí e tseé ná? 58Ká fɔ̀ ní ìwɔ ɔ̀nyà-kã̀ méèdzì nɛ́ afɔ̀, tsí ɛnɛ nyɛ̀ŋɛ̀ fàɛ́ làkóò ńlé-ɛdzɔ́. Bí è wà nɔ́ɔ̀nà làkóò#ɛ́, ó wà ní o ɖìgírí, tsí o mú ìkálɛ̀ fúu, tsí e fɔ̀ɔ́ si nɔ́ɔ̀kã̀ gbòkã́, àtóoríi kó máa gbɛ̃́ɛ̃ lɔ fú àkpɛ̀dzɔ́, tsí àkpɛ̀dzɔ́#ɛ́ kó múɛ bɔwɔ́-sɔ́dzà ŋa, tsí sɔ́dzà ŋa kó múɛ lɔ káà sé nɛ́ɛ̀ŋà. 59Ó ɖi, ǹ wà fɔ̀ fɛ́ɛ ní fee, bí ò kò sɛ̃ŋɛ̀ yèé ò dzɛ#ɛ́ kpó títí bìyéè-kã̀ gìɖì kó máa bɔ̀#ɛ́, à kàkó kɔ̀ɛ́ dzɔ̀ɔ́.
Currently Selected:
Lúkà 12: ngl
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active), Wycliffe Bible Translators, Inc. All rights reserved.