នាវនតើម 14
14
អាប់រាមតឹមលើសទើយដាសមាកាដាច់អេងៗ
1នោកនៃគែសទូហ្វេកាដាច់ក្វ៝ង់រាញាកេដោលោមើរជេងកាដាច់តាឞ្រីអេលាម ពាង់តឹមរាង្លាប់ដាសពែនុយ្សកាដាច់ កាដាច់តាឞ្រីឆីនើររាញាអាម់រាផែល កាដាច់តាឞ្រីអេលាឆាររាញាអារយុក នទ្រែលមាកាដាច់តាឞ្រីកោយីមរាញាថីដាល។ 2លែៈព្វាន់នុយ្សកាដាច់អីនៃលែវឞាល់ហាន់តឹមលើសដាសព្រាម់នុយ្សកាដាច់ កាដាច់តាប៝នឆោដុមរាញាបេរា កាដាច់តាប៝នកោមោរារាញាបីរឆា កាដាច់តាប៝នអាតមារាញាឆីនាប កាដាច់តាប៝នឆេប៝យីមរាញាឆេមេបើរ នទ្រែលមាកាដាច់តាប៝នបេលាអីឞូក្វាល់ដ៝ង់ប៝នឆោអារ។ 3លែៈរាងោចព្រាម់នុយ្សកាដាច់អីនៃ រាគូមតាហែនខាន់ពាង់នើមហាន់តឹមរាង្លាប់នទ្រែលតារាដុងយោកឆីដីមទាទេ នតុកទាកវាច់ទាកវារ់ឞ៝សអាបៃរី។ 4លែៈគែស ១២ នាម់ជេស លែៈព្រាម់នុយ្សកាដាច់អីនៃគុតាន៝ម់កាដាច់ក្វ៝ង់កេដោលោមើរ ត៝ត់នាម់ ១៣ ខាន់ពាង់លែវឞាល់ឞាសអ្យាត់នាវដាសកាដាច់អីនៃ។ 5យើនមាត៝ត់នាម់ ១៤ កាដាច់កេដោលោមើរ នទ្រែលមាលែៈកាដាច់អីគុនទ្រែលពាង់ លែវឞាល់ហាន់តឹមលើសដាសមពោលកាដាច់អីឞាសអ្យាត់នាវពាង់។ ទោលហាន់រ៝ៈត្រ៝ងនៃ ខាន់ពាង់តឹមលើសដាសផូងរេផែមតាប៝នអាសថោរោត-ការនែម ផូងឆោឆីមតាប៝នហាម់ ផូងអេមីមតានតុកឞ្រីល៝ង់ខិរយាថែម 6នទ្រែលមាផូងហោរីរ៝ៈយោកឆេអីរ នហ៝មាត៝ត់តាប៝នអែលបារានទាច់មាឞ្រីរាទាសរី។ 7ជេសទើយខាន់ពាង់តឹមលើសដាសផូងអីនៃ ខាន់ពាង់ព្លឹឆឹតឞើសនៃត៝ត់តាប៝នអេន-មីសផាត អីឞូក្វាល់ប៝នកាដែសដ៝ង់ ខាន់ពាង់តឹមលើសដាសផូងអាមាលេកតាឞ្រីនៃ នទ្រែលមាដាសផូងអាមោរីគុតាឞ្រីហាឆាឆោន-តាមារនៃទើយខាន់ពាង់ដ៝ង់។
8ផូងកាដាច់ព្រាម់នុយ្សអីឞាសអ្យាត់នាវកាដាច់ក្វ៝ង់កេដោលោមើរនើស ជេងកាដាច់ប៝នឆោដុម កាដាច់ប៝នកោមោរា កាដាច់ប៝នអាតមា កាដាច់ប៝នឆេប៝យីម នទ្រែលមាកាដាច់ប៝នបេលា ខាន់ពាង់លែវឞាល់តឹមលើសតារាដុងយោកឆីដីម។ ប៝នបេលាអីនៃឞូក្វាល់ប៝នឆោអារដ៝ង់។ 9តារាដុងយោកឆីដីមនៃ ខាន់ពាង់តឹមលើសដាសកាដាច់កេដោលោមើរជេងកាដាច់ឞ្រីអេលាម កាដាច់ថីដាលជេងកាដាច់ឞ្រីកោយីម កាដាច់អាម់រាផែលជេងកាដាច់ឞ្រីឆីនើរ នទ្រែលមាកាដាច់អារយុកជេងកាដាច់ឞ្រីអេលាឆារ នទ្រីគែសព្វាន់កាដាច់តឹមលើសដាសព្រាម់កាដាច់។ 10តារាដុងយោកឆីដីមនៃគែសនតូទាកព្រីងក្រាក់អ៝ក់ងាន់។ ទើយកាដាច់កេដោលោមើរ ជេសរីកាដាច់ប៝នឆោដុម នទ្រែលមាកាដាច់ប៝នកោមោរាញច្វាត់ចាសច្រាយតុបតានតូព្រីងរីខឹតលែៈផ្យៅនទ្រែលតាហែនខាន់ពាង់នើម ជេសរីកាដាច់អីហោមពែនុយ្សរីញច្វាត់ជឹតយោករី។ 11កាដាច់អីទើយលើសឞូនៃ ខាន់ពាង់ឆ៝ៈលែៈទ្រាប់នទើតាប៝នឆោដុម នទ្រែលមាតាប៝នកោមោរារី នអ៝ប់មានទើឆោងឆាដ៝ង់ ជេសរីទូឆឹតឞើសនតុកនៃ។ 12លុត អីម៝នអាប់រាមគុតាប៝នឆោដុមរី ឞូញុបរាទូពាង់ដ៝ង់ នទ្រែលមាលែៈទ្រាប់នទើពាង់។
13គែសទូហ្វេឞូនុយ្សក្លាយ្ស ហាន់ញច្វាត់មឞើសមាអាប់រាមអីផូងហេឞ្រើ នោកពាង់ហោមគុតានតុកតើមជ្រីមាម់រេ។ មាម់រេជេងឞូក្លោផូងអាមោរី ជេងអ៝សនោមាអែសកុល នទ្រែលមាអានើរដ៝ង់។ អែសកុល នទ្រែលមាអានើរនៃលែៈតឹមរាង្លាប់មាអាប់រាម។ 14ត៝ត់អាប់រាមតាង់លាសម៝នពាង់លែៈឞូញុបរាទូ ពាង់លែវឞាល់ ៣១៨ នុយ្ស ជេងឞូនុយ្សអីឞ្លាវតឹមលើសអីទែសតាជៃពាង់នើម ខាន់ពាង់តឹងផូងរាលាង់ត៝ត់តាប៝នដាន់។ 15អាប់រាមតឹមពាៈមពោលតាផូងពាង់នើមនៃ ជេសរីលើសផូងកាដាច់អីនៃតានោកមាង់ នហ៝មាតឹងលើសត៝ត់តាប៝នហោបាមពែសឞើសលើប៝នដាមាសរី។ 16ខាន់ពាង់ឆ៝ៈឆឹតទាទេលែៈទ្រាប់នទើ ឆ៝ៈអីម៝នលុត ពាង់រី នទ្រែលមាទ្រាប់នទើពាង់ដ៝ង់ ឆ៝ៈផូងឞូអូរ នទ្រែលមាលែៈរាងោចឞូនុយ្សអេងៗអីឞូញុបដ៝ង់។
អាប់រាម នទ្រែលមាកាដាច់មិលកីឆាដែក
17ជេសអាប់រាមឆឹតទើយតឹមលើសដាសកាដាច់កេដោលោមើរ នទ្រែលមាកាដាច់អាបាៈអេងអីគុតឹមរាង្លាប់នទ្រែលកាដាច់នៃ កាដាច់ប៝នឆោដុមហាន់ច្វាៈពាង់តារាដុងយោកឆាវេ អីឞូក្វាល់ដ៝ង់«រាដុងយោកកាដាច់»។ 18ជេសរីកាដាច់ប៝នឆាលេមរាញាមិលកីឆាដែកញអោតនុមពាង់ នទ្រែលមានទ្រាញ់ព្លៃយុងយារប៝នមាអ៝ន់អាប់រាម កាដាច់នៃជេងឞូនុយ្សជានឞ្រាសមាកោរាញឞ្រាសអីទុតព្រេស។#នម ១១០:៤; ហេឞ ៥:៦, ១០; ៧:១-១០ 19ពាង់លាសនាវគែសជេងអ៝ន់មាអាប់រាម៖
“ទាន់កោរាញឞ្រាសអីទុតព្រេសតាកាលើ នើមតើមញជេងត្រោក នទ្រែលមានែសនតូ អ៝ន់នាវគែសជេងមាមៃ។
20រានេមាកោរាញឞ្រាសអីទុតព្រេសតាកាលើ ឞ្រាសអីអ៝ន់មៃទើយដាសផូងរាលាង់មៃ”។
ជេសរីអាប់រាមអ៝ន់មាកាដាច់អីនៃទូកោៈតឹមជឹត លែៈទ្រាប់នទើអីពាង់ឆ៝ៈលើសឞូរីនើស។#២៨:២២; កល ២៧:៣០-៣៣
21ជេសរីកាដាច់ប៝នឆោដុមលាសមាអាប់រាម៖ “មៃមព្លឹប៝នលានគ៝ប់នើមមាគ៝ប់គាប់ហើយ្ស ទ្រាប់នទើអីនៃមៃឆ៝ៈទោស”។ 22យើនមាអាប់រាមលាសមាកាដាច់ប៝នឆោដុមនៃ៖ “គ៝ប់ត៝នតាឞើសនាប់ឞ្រាសយេហោវាអីកោរាញឞ្រាសទុតព្រេស នើមតើមញជេងត្រោក នទ្រែលមានែសនតូ 23គ៝ប់មោអោសឆ៝ៈទ្រាប់នទើមៃទូមល៝ម់ ឞ៝លលាសទូមល៝ម់រាឆែឞ្រាយ មោលាសទូមល៝ម់រាឆែនតោជ៝តក៝ៈគ៝ប់មោឆ៝ៈដ៝ង់ លើយអ៝ន់មៃលាស៖ «គ៝ប់យាឆើមនហើមនទ្រ៝ង់អ៝ន់អាប់រាម»។ 24គ៝ប់មោអោសឆ៝ៈនទើ គ៝ប់ទាន់មៃអ៝ន់នទើឆោងឆាអីផូងហាន់តឹមលើសនទ្រែលគ៝ប់ជេងផូងអីគុតាជៃគ៝ប់នើមលែៈជេសឆានើសគាប់ហើយ្ស។ យើនមាអានើរ អែសកុល នទ្រែលមាមាម់រេ ខាន់ពាង់ជេងឞូនុយ្សតឹមរាង្លាប់នទ្រែលគ៝ប់ អ៝ន់ខាន់ពាង់នៃឆ៝ៈអេងទ្រាប់នទើមាខាន់ពាង់នើម”។
Currently Selected:
នាវនតើម 14: cmoK
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active) Wycliffe Bible Translators, Inc. All rights reserved.