Uphawu lweYouVersion
Khetha Uphawu

मत्ती 1

1
येशू ख्रीष्‍टजे वंशयू
लूका ३:२३-३८
1अब्राहाम मेस्‍ये दाऊदजे छगूम्-पूर्‌गूम् येशू ख्रीष्‍टजे वंशजे मीन्‌यू येरे छीप्-छीप् ख्‍यङ्:
2अब्राहामजे च इसहाक ख्‍य।
इसहाकजे च याकूब ख्‍य,
याकूबजे च यहूदा मेस्‍ये ङूजे
अत च्योन्‌यूये ख्‍य,
3यहूदाजे च फारेस मेस्ये जाहेर ख्‍य। थमयूजे म तामार ख्‍य।
फारेसजे च हेस्रोन ख्‍य,
हेस्रोनजे च आराम ख्‍य,
4आरामजे च अम्‍मीनादाब ख्‍य,
अम्‍मीनादाबजे च नहशोन ख्‍य,
नहशोनजे च सल्‍मोन ख्‍य।
5सल्‍मोनजे च बोअज ख्‍य।
ङूजे मजे मीन् राहाब ख्‍य।
बोअजजे च ओबेद ख्‍य। ङूजे
मजे मीन् रूथ ख्‍य। ओबेदजे च यिशै ख्‍य,
6 # २ राजा 24:14,15; 2 इतिहास 36:10; यर्मिया 27:20 यिशैजे च मूरूम् दाऊद ख्‍य। दाऊदजे च सोलोमन ख्‍य। सोलोमनजे म उरियाहजे मज ख्‍य।
7सोलोमनजे च रहबाम ख्‍य,
रहबामजे च अबिया ख्‍य,
अबियाजे च आसा ख्‍य,
8आसाजे च यहोशापात ख्‍य,
यहोशापातजे च यहोराम ख्‍य,
यहोरामजे च उज्‍जियाह ख्‍य,
9उज्‍जियाहजे च योताम ख्‍य,
योतामजे च आहाज ख्‍य,
आहाजजे च हिजकिया ख्‍य,
10हिजकियाजे च मनश्‍शे ख्‍य,
मनश्‍शेजे च अमोन ख्‍य,
अमोनजे च योशियाह ख्‍य,
11योशियाहजे च यकोनियास मेस्‍ये ङूजे च्‍योन्‌यूये ख्‍य। बेबिलोनने यहूदीयू स्‍योप्देबे कूदे खूम्‍ने थमयू प्रेक्‍क ख्‍य।
12बेबिलोनने स्‍योप्‍देबे कूदेङ्येदे:
यकोनियासजे च शालतिएल,
शालतिएलजे च यरूबाबेल,
13यरूबाबेलजे च अबिउद,
अबिउदजे च एल्‍याकीम् ख्‍य,
एल्‍याकीम्जे च आजोर ख्‍य,
14आजोरजे च सादोक ख्‍य,
सादोकजे च आखिम ख्‍य,
आखिमजे च एलिउद ख्‍य,
15एलिउदजे च एलाजार ख्‍य,
एलाजारजे च मत्तान ख्‍य,
मत्तानजे च याकूब ख्‍य।
16याकूबजे च योसेफ ख्‍य। हम्‍ब योसेफजे मज मरियम ख्‍य। अम्‍ब मरियमदेने येशू प्रेत्‍दे, ङूने ख्रीष्‍ट यीय।
17येर्‌बेने अब्राहामदेमेस्‍ये दाऊदसेमे जम्‍मा चौध पुस्ता क्‍यूत्‍दे, मेस्‍ये दाऊदजे पोलोदेमेस्ये यहूदीयू बेबिलोनने कूतेब पोलोसेमे चौध पुस्ता, होर्‌दे हम्‍ब पोलोदे ती ख्रीष्‍टजे बीलसेमे चौध पुस्ता क्‍यूत्दे।
येशू ख्रीष्‍ट जन्मेदेब
लूका २:१-७
18 # लूका 1:27 येशू ख्रीष्‍ट येर्‌बे जन्मेदीदे: येशूजे म मरियम योसेफप्रे ङ्येन् चेब पो छीन्तीकजन ख्‍य, तर थम ङ्‍हीजे ङ्‍येन् चे यली खूम्‍ने मरियम ब पवित्र आत्मादे पीच रेकब थाप्रेत्‍दे। 19तर ङूजे प्‍ल्‍यङ् योसेफ धार्मिक मी क्‍यूत्देबे, मरियमने मीजे खूम्‍ने त्‍वालाबे चेब सेम् अन्‍चील्‍लाबे नङ्सूने क्‍याबेब सेम् चीत्दे।
20तर कन्‍छ्वाब ङूदे येर पोयू ह्‍वे चीन्‍न ख्‍य, मून्‍दे मोङ्ने परमप्रभुजे दूत तङ्‌रदेबे ङूने येरे यदे, “योसेफ, दाऊदजे च, मरियमने नैजे कीम्‍म चेने अम्‍फलाची, चेनेयलो ङूजे ख्‍वाजेने ख्‍यब पीच, पवीत्र आत्मादे केलब ख्‍यङ्। 21#लूका 1:31मरियमदे च त्‍या प्रेक्क्य, मेस्‍ये नदे ङूजे मीन् येशू येक्क्‍य, चेनेयलो येशूदे रङ्से मीयूने थमयूदे चीक्‍कब पापदे जूक्‍तीमीय।”
22अगमवक्ता क्‍यूत्‍देबे परमप्रभुदे क्‍यमब वचन पूरा क्‍यूरने अम्‍ब क्वाने क्‍यूर ख्‍यङ्: 23#यशैया 7:14“ले, कन्‍या मदी त्‍या पीच रीय, मेस्‍ये ङूदे च त्‍या प्रेक्‍क्‍य, ङूजे मीन् इम्‍मानुएल येक्‍क्‍य”, अम्‍बजे अर्थ, “परमेश्‍वर ङीनयूप्रे ख्‍यङ्।”
24योसेफ ङ्‍यूम्‍म्‍यादे थेल्‍लदे, मेस्‍ये परमप्रभुजे दूतदे ङूने यप्रने ङूदे मरियमने रङ्से कीम्‍मजे रूप्‍ने स्वीकार चीत्‍दे। 25#लूका 2:21मरियमदे च अम्‍प्रेत्‍दासेमे योसेफदे रङ्से कीम्‍मप्रे अन्‍ङ्‍यूम्। मरियमदे च जन्मेदेङ्‍येदे योसेफदे ङूजे मीन् येशू येत्‍दे।

Qaqambisa

Share

Copy

None

Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena