Matyu 12
12
Sabat pre krapeglkwa kamo
(Mak 2:23-28; Luk 6:1-5)
1Sabat yongwa enge Yesus disaipelma wagle bogl wit yaglkwa moglmara igle suna eingwa. Ana ye disaipelma wagle kindan gogl wit tau uro ana pogl mongo neingwa. 2Ye yegl erikwa i Parisi wagle kandre Yesus diteingwa, “Kanno! Ene disaipelma ye Sabat enge nono lono mane dumara yegl erikwa.”#12:2 Juda yomba lono mina Sabat enge kongun erekriyo dungwa. Kisim Bek 34:21 mina kano. Lo suwara ta kongun erekriyo dungwa i yegl, kaiya mokna mongo bogl yenambuka imakai sikraglkwa. Parisi wagle eremogl disaipel wagle lomo i sendime dingwa.
3Ana Yesus yegl di ikine ende tongwa, “Ene okuna Devit yombama bogl kindan gogl sragl erikwa i ene kere pirkrimo? 4Ye God yungumo mina yungugl pindre, God pre bret yeitengwa i igo yombama bogl akiye neingwa. Ana bret iwe ye ninaglkwa paikrukwa. Pris keme ninaglkwa pamara ye i neingwa. 5Mo ene Moses lomo mina beglkwa pangwa i kere kankrimo? God holi yungumo mina Sabat enge pris kongun erikwa i ta aglau erekrikwa. 6Na ene yegl diteinga, mangigl i yomba ta moglkwa ye kande mogl-mitna ende God holi yungumo kande engre tongwa. 7Ka ta yegl God pepamo mina beglko pangwa, ‘Na kombuglange gagl naraglkwa pre manga, na ene yomba mitno goraglmedi pirka.’ #Hosea 6:6 Tandaglme erekrikwa yomba ene dikinde yeikraglkwa. 8Sraglpre Yomba Wam ye Sabat i nemyagl moglkwa.”
Yagl ta ongo kembra sungwa Sabat enge Yesus erewakai orkwa
(Mak 3:1-6; Luk 6:6-11)
9Ana Yesus kamun igle kondo endpi, ye yene makaino yungu ta yomara yungugl ongwa. 10Ana igle yagl ta ongo kembra sungwa moglkwa. Yomba tau Yesus ta eran kandre ana ka-tange tenamnedi pre krapeglkwa, “Sabat enge yomba erewakai ere teiyo dingwa lo mina ta pamo?”
11Ye di ikine ende tongwa, “Ene meglmara yomba ta sipsipmo suwarata moran, ana Sabat enge yange murmaugl atne i panan, ye boglo ere imenda endekrambo? 12Yomba mogl-mitna ende sipsip engre teingwa. Ipre nono Sabat enge lo pamere mere yomba akepledi tenamga.”
13Ana ye yagl i ditongwa, “Ene ongun duglo suwo.” Ye ongo duglo sungo ana wakai ere ongo koglo pamere yegl kokunkuno pangwa. 14Ba Parisi wagle ye ende menda pindre ana Yesus sigoramnedi pre ka dikeglkwa.#12:14 Parisi wagle yegl pirkwa, yomba kinde sungwa ere wakai erikwa i kongun mereyegl erimedi pirkwa. Yegl pre ye Sabat enge mambuno i erekraglme dingwa. Ba Yesus eremogl Sabat enge, yomba kinde sungwa ere wakai orkwa. Ana ipre Parisi wagle kinde pir Yesus teingwa. Yegl pre, ye Yesus sigora pre konbauna dokingwa. Luk 13:14 ya Jon 5:16-18 mina kano.
Yesus yene God kongunmo yomba kaima moglkwa
15Parisi wagle ka dingwa i Yesus pirtre, ana dumo igle kindekondo endongwa. Ana yomba merkinde kinde sungwa ye omara mokomugl eingo, ana ye kindeno erewakai ere tongwa. 16Ana Yesus mambunona yomba tau ditembi pir dinaglmedi pre mane ditongwa. 17Ye yegl orkwa i God kamo propet Aisaia ka pandum ta dungwa i paiyungwa:
18“Kaniyo, i na konguna
yomba, na ye morambedi
pinde i kondiga. Ye pre
suwara munduna pangwa,
te ye wakai kaninga.
Nana Spiritna di ye mina
endinaglka, ana ye yomba
makan koglkoglo mambuno
du-wakai eraglmedi pre,
dipendigl ende tenambuka.
19Ye nongasi kaglkane ta
erekrambuka, te konbauna
ka kande ta dinan yomba pirkraglkwa.
20Ken engre ta kunambu ere
parkidi pangwa i ye ta
simbuko dikrambuka, ana
endi bauglo kembra orkwa
i ye ta sigongokrambuka.
Ye kongun wakai ere auro ipi
du-wakai moraglkwa,
yombuglo i-pene endinambuka.
21Ana ye kangiye mina
yomba makan koglkoglo
pirngi dinaglkwa ana ye
akepledi norambedi pre suglmo moraglkwa.”#Aisaia 42:1-4
Yesus ya Belsebul
(Mak 3:20-30; Luk 11:14-23; 12:10)
22Enge igle yomba tau eremogl yagl ta spirit kinde ye mina suna moglko, auro yu Yesus moglmara wingwa. Yagl iwe ongumuglo kin yei te dra aketongwa. Ana Yesus erewakai ere tongo, ye ka dindre ana pinedi kangwa. 23Yesus yegl orko yomba merkinde akaindi meglkwa, ye i kandre alaglsi krapogl yegl dingwa, “Ye Devit wam moglum kana?”#12:23 Ka Matyu 9:27 mina pangwa i kano.
24Enge igle Parisi wagle ye ka i pirtre, yegl di ikine endingwa, “Ye spirit kinde wagle sendungwa, i ye Belsebul#12:24 Belsebul i Satan kangiye ta pangwa. ye spirit kinde wagle yaglkandeno taragl yegl erambedi yombuglomo tongo yegl orkwa.”
25Yomba nomano suna pirkwa i Yesus kan-kondo yegl ditongwa, “Makan bange tau yomba ye yene ikine ikine kogl kunda beglmbi dumo kamun wilekole enambuka. Te yungu ombuno suwarata ye yene ikine ikine kogl kunda beglmbi yungu togl ta yeikrambuka. 26Yeglpre Satan eremogl Satan yene dimenda endinan, ye yene mina poim sungwa; okuwo ye yene sragl mere wakai morambe? 27Na spirit kinde sibina endinga i Belsebul yombuglo tongo yegl ormiwo dingwa, ana ene yombano spirit kinde simenda endingwa, i ira akepledi yombuglo tongo sendim? Yeglpre, enene yombano ye kanno ene yumbu sinaglkwa. 28Ba na God Spiritmo mina spirit kinde sendiga panan ana ene kanaglkwa, God kingdomo i ene meglmara wu plau dungwa.
29“Ta ama yegl, yomba ta srambre ere yagl giglekui dungwa yungumo mina pi si-arusi bonamo inambe? Okuna kana yagl giglekui dungwa i kanesi pandigl, okuwo ye yaglmo i bonamo yungugl yongwa i wausi inambuka.
30“Yomba ta na bogl moglkrambuka, ye na kundana ikine moglkwa, te yomba ta na konguna mina akepledi yomba imakai sikrambuka, ye yomba si perepere endungwa. 31Ipre na ene diteinga, yomba tandaglmeno prapra ya te ka kinde dingwa i prapra God koko endinambuka. Ba Holi Spirit yomba ta kenaglmo sinaglkwa, God ye tandaglmeno i prapra ta koko ende tekrambuka. 32Yomba ta eremogl Yomba Wam dikinde yenambuka, ye tandaglmemo God koko ende tenambuka. Ba yomba ta ye Holi Spirit kenaglmo sinambuka, ye tandaglmeno kinde i etne ya te okuwo imbo, ama akiye ta koko ende tekrambuka.”
Endi ya te mongomo
(Luk 6:43-45)
33Yesus ka yegl dungwa, “Endi wakai ta panambuka i mongomo wakai keunde korambuka. Te endi kinde ta panambuka i mongomo kinde korambuka. Yomba ende mongomo i kandre pandigl ye pirkwa, endi kinde mo wakai i ye kanpogl singwa. 34Ene yomba toki kinde nangiglma meglkwa, ene mambuno kinde beglkwa pre ka wakai dikrikwa. Yomba nomanemo suna taragl kinde kausi pamere mere, i dra mina dimenda endungwa. 35Yomba wakai ye nomanemo mina suna taragl wakai kausi pangwa pre ye embriye wakai keme erikwa. Te yomba kinde ye nomanemo mina taragl kinde kausi pamere mere embriye kinde erikwa. 36Ba na ene i diteinga, God yomba prapra ka-tange tenambuka enge baglkwa, enge igle yomba ka kinde kanekane dimere yumbu sinambuka. 37Enene kanno mina, God ene ka-tange te, ene yomba du-wakai we dinambuka. Te enene kanno mina, God ene yomba kinde we dinambuka.”
Yesus kimagl ta erambedi pre krapeglkwa
(Mak 8:11-12; Luk 11:29-32)
38Ana lo beke teingwa yomba tau ya te Parisi tau ye Yesus diteingwa, “Ka beke notnga yagle, ene kimagl ta etn no kanamnedi punga.”
39Ana Yesus di ikine endungwa, “Yagl ambu enge erme meglkwa i ene taragl kinde erikwa yomba, ene God nomano kaima tekrikwa yomba. Na kimagl ta erimbo kanamnedi pre dimo? Ba na ta erekraglka. Tamanga. Propet Jona mina kimagl plau dungwa i keme ene kanaglkwa. 40Jona fis kande dane mina suna ande enge suwota, te enduwer enge suwota pangwa.#12:40 Ka Jona 1:17 mina pangwa i kano. Yegl mere Yomba Wam ye makan atne ande enge suwota, te enduwer enge suwota panambuka. 41God yomba ka-tange tenambuka enge, Niniwe yomba ye andigl mogl yagl ambu enge etne meglkwa i ye mambunono kinde dipene ende enaglkwa. Sraglpre, Niniwe yomba ye Jona kamambuno dipene ende tongo pirtre, nomano yake teingwa. Ana ene piryo. Yomba ta mangigl ya moglkwa, ye kande mogl-mitna ende Jona tongwa. 42Te God yomba ka-tange tenambuka enge, Ambu Kuwin Makan Yoglmbo kra moglkwa ye andigl mogl yomba etne meglkwa i mambunono kinde ditenambuka. Ye King Solomon nomane pai pogl sungwa kamo piragledi pre ye makan yoglmbo uglomugl kondo eglke kuri mogl ungwa. Ana ene piryo. Yomba ta erme mangigl ya moglkwa, ye kande mogl-mitna ende King Solomon tongwa.
Spirit kinde aglke ende ikine ungwa
(Luk 11:24-26)
43“Spirit kinde yagl ta mina ende menda unambuka enge, ye endpi dumo kugla dumara ta mogl ir sinambuka ba dumo i ta doko kan ikrukwa. 44Yene yegl dinambuka, ‘Na ende ikine yungu okuna kondimara igle enaglka.’ Yegl dindre pi kangwa yunguna i yoko yongo, wiglki kuro ende ake wakai kaima ere endigo yongwa. 45Ana ye ende ikine pi spirit kinde 7 yene mereyegl manga, ye kinde kaima meglkwa auro ipi yungu yungugl igle suna ongo meglkwa. Ana yombamo i okuna kurita wu kinde ongwa ba erme ye wu kinde kaima enambuka. Embriye yeglmere, yomba kinde geke beglkwa ye enge etne meglmara i plaudi panambuka.”
Yesus mam ya te angiglma wagle
(Mak 3:31-35; Luk 8:19-21)
46Yesus yomba ka dite moglko, mam ya angiglma wagle ye wu mendakra andigl mogl, ka ditenamnedi pre sugl mogl krapeglkwa. 47Ana yomba meglkwa ikra suwarata di Yesus tongwa, “Kanno! Man ya angitnma wagle ene ka ditena pre wingwa mendakra andigl sugl meglkwa.”#12:47 Erme pirpogl singwa yomba tau yegl pirkwa, ka i Matyu yene muno boglkruko ana yomba ta okuwo boglmedi pirkwa. Sraglpre, ye prukwa yegl boglmbo ana Mak 3:32 ya te Luk 8:20 mina ka pamere i kuno panambedi pre orkwa.
48Yesus yegl di ikine ende tongwa, “Na mana irane? Te na angrima irane?” 49Yegl dindre ongo buglosi yene disaipelma meglmara ende ana dungwa, “Kaniyo, magl meglkwa iwe, na mana ya te na angrima wagle. 50Yomba ta na Nina heven suna moglkwa, ye prumere pinande orkwa yomba i ye na angra ya na ambara ya te na mana meglkwa.”
Currently Selected:
Matyu 12: kue
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2008, Wycliffe Bible Translators, Inc. All rights reserved.