یارادیلیش 44
44
یوسئفئن ائتمئش کاساسی
1یوسئف اؤز اِو نظارتچئسئنه امر وردی: «بو آداملارین چوواللارینی گوجلری چاتانا قدر ارزاقلا دولدور و هر کسئن پولونو اؤز چووالینین آغزینا قوی. 2هامیسیندان کئچئیئنئن چووالینین آغزینا، منئم گوموش کاسامی و تاخیل عوضئنه ورئلن پولو قوی.» او، یوسئفئن ددئیی سؤزه عمل اتدی. 3سحر آچیلاندا بو آداملار اِششَکلری ائله بئرلئکده یولا سالیندیلار. 4اونلار شهردن تزه چیخمیشدیلار و اوزاق دیئلدئلر کی، یوسئف اؤز اِو نظارتچئسئنه ددی: «قالخ او آداملارین دالینجا گت و اونلارا چاتدیغین زامان بله دِه: ”نه اوچون یاخشیلیغا پئسلئکله جاواب وردئنئز؟ 5مگر بو کاسا آغامین ائچدئیی و اونونلا فال توتدوغو کاسا دیئل؟ بونو اتمکله پئسلئک ادئبسئنئز.“»
6اِو نظارتچئسی اونلارا چاتدی و بو سؤزلری ددی. 7قارداشلار اونا ددئلر: «نه اوچون آغام بله سؤزلر دانیشیر؟ بو ائش قوللاریندان اوزاق اولسون. 8باخ، بئز چوواللاریمیزین ائچئنده تاپدیغیمیز پولو کَنَعان تورپاغیندان سنه گری قایتاردیق. آغانین اِوئندن نجه قیزیل و یا گوموش اوغورلایا بئله‌رئک؟ 9بو شی قوللارینین هانسیندان تاپیلسا، قوی او آدام اؤلومه ورئلسئن، قالانیمیز دا آغامیزا قول اولاق.» 10او ددی: «یاخشی، قوی سئز دئیَن کئمی اولسون: بو کئمئن یانیندا تاپیلسا، او منه قول اولسون، لاکئن قالانلارینیز تقصئرکار ساییلمایاجاقسینیز.» 11اونلارین هر بئری تَلَسئک چووالینی یِره اِندئردی و چووالینین آغزینی آچدی. 12اِو نظارتچئسی بؤیوکدن باشلاییب کئچئیه قدر اونلاری آختاردی و کاسا بِنیامئنئن چووالیندا تاپیلدی. 13قارداشلار پالتارینی جیردیلار و هر بئری اِششه‌یئنی یوکله‌یئب شهره قاییتدی.
14یهودا قارداشلاری ائله بئرلئکده یوسئفئن اِوئنه گلدی. او حله ده اورادا ائدی. اونلار یوسئفئن قاباغیندا یِره قاپاندیلار. 15یوسئف اونلارا ددی: «بو نه ائشدئر کی، گؤروبسونوز؟ گومان اتمه‌دئنئز کی، منئم کئمی بئر آدام فال توتا بئلر؟» 16یهودا ددی: «آغاما نه دیئم، نه دانیشیم؟ اؤزوموزو نجه تمئزه چیخاردا بئله‌رئک؟ تاری اؤز قوللاریندا تقصئر گؤردو. باخ، بئز ده، یانیندا کاسا تاپیلان آدام دا آغامیزین قولویوق.» 17او ددی: «بو ائش مندن عئراق اولسون. آنجاق یانیندا کاسا تاپیلان آدام منه قول اولاجاق، لاکئن سئز صاغ-سالامات آتانیزین یانینا گدئن.»
18یهودا اونا یاخینلاشیب ددی: «ای آغام، خاهئش ادئرم کی، قولونون ددئیی سؤزلره قولاق آس و قولونا قضبئن آلوولانماسین، چونکی سن فئرعون کئمی بئر آدامسان. 19آغام قوللاریندان ”سئزئن آتانیز و یا قارداشینیز وار؟“ سوروشدو، 20بئز آغامیزا ددئک: ”بئزئم بئر قوجا آتامیز و اونون دا یاشلی زامانلاریندا دوغولان بئر کئچئک اوشاغی وار. اونون بئر قارداشی اؤلدو، آناسیندان دوغولان آنجاق او قالدی. آتاسی اونو چوخ سِوئر.“ 21سونرا سن قوللارینا ددئن: ”اونو منئم یانیما گتئرئن کی، اؤز گؤزومله گؤروم.“ 22بئز ده آغامیزا ددئک: ”اوشاق آتاسیندان آیریلا بئلمز، چونکی آتاسیندان آیریلسا، آتاسی اؤلر.“ 23آمّا سن قوللارینا ددئن: ”اگر کئچئک قارداشینیز سئزئنله گلمه‌سه، بئر داها گؤزومه گؤرونمه‌یئن.“ 24سنئن قولون آتامین یانینا گلدئیئمئز زامان آغامیزین سؤزلرئنی اونا چاتدیردیق. 25آتامیز ددی: ”گئنه گدئن، بئزه بئر آز ارزاق آلین.“ 26بئز ددئک: ”گده بئلمه‌رئک. کئچئک قارداشیمیز بئزئمله گتسه، گده‌رئک، کئچئک قارداشیمیز بئزئمله گتمه‌سه، او آدامین گؤزونه گؤرونه بئلمه‌رئک.“ 27سنئن قولون آتام بئزه ددی: ”بئلئرسئنئز کی، آروادیم منه ائکی اوغول دوغدو. 28بئر اوغلوم یانیمدان گتدی و ددئم کی، او پارچالانیب؛ ائندئیه قدر اونو گؤرمه‌مئشم. 29بو اوغلومو دا یانیمدان آپاراسینیز و اونون باشینا بئر بلا گلسه، آغ ساچلی باشیمی موصئبت ائچئنده اؤلولر دئیارینا اِندئره‌جکسئنئز.“ 30ائندی سنئن قولون آتامین یانینا قاییتدیغیم زامان اوشاق بئزئمله اولماسا و اوره‌یی اوشاغا باغلانان آتامیز 31اوشاغین اولمادیغینی گؤرسه، اؤلر. او واخت بئز قوللارین، قولون آتامیزین آغ ساچلی باشینی کَدَر ائچئنده اؤلولر دئیارینا اِندئره‌رئک. 32من قولون، آتاما اوشاق اوچون ضامئن دوروب ددئم: ”اگر اونو سنئن یانینا گتئرمه‌سم، آتامین حوضوروندا عؤمروم بویو تقصئرکار اولاجاغام.“ 33ائندی خاهئش ادئرم، قوی اوشاغین عوضئنه بو قولون، آغاما قول اولماق اوچون قالسین، و اوشاق قارداشلاریملا بئرلئکده گتسئن. 34چونکی اوشاق منئمله اولماسا، نجه آتامین یانینا گده بئله‌رم؟ آتامین باشینا گلن موصئبتی نجه گؤره بئله‌رم؟»
Currently Selected:
یارادیلیش 44: موقدس کتاب
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Elam Ministries 2013. All rights reserved.