Apa 4
4
Pitaʼe Yoniʼeʼmo kanisole vayaʼai apaulagaleʼmo he tiʼana maiʼnaʼageʼa loka huʼana anafi geʼnaya gemae
1 #
Lu 22:4,52 Pitaʼe Yoniʼeʼmo ani gemo vayaʼaifeʼmo hapa nepaiʼageʼapaeʼmo mono huʼa neʼapataya vayanagi alopa mono noteʼmo neʼyagaiya ati vayaʼaiteʼmo yagaino neʼapateya vekagi Satiyusi mono vayanagi huʼa malage huʼa anakaetegamo eʼnae. 2#Ap 23:8Lole apa vekalaʼmoganimo hapa paiʼanaeʼmo, Yesuʼmo faliʼniyatetiʼmo ago he tiʼniyaʼmofeʼmo muki faliʼnaya vayaʼmo he tigae, huʼana aliʼana apaya maleʼnaʼageʼapaeʼmo hosu apaipamo kaliʼa anateʼnae. 3#Ap 3:1Anateteʼapaeʼmo kalavusi huʼana anateʼnae. Yegemo uno lamino falegefe huʼniyaʼmofeʼmo egamo maisaʼafeʼmo kalavusi huʼana anateʼnae. 4#Ap 2:41Ani kavaʼmo huʼnayaʼmonanafa asole vayaʼmogimo geʼamo afiteʼapaeʼmo apakesamo afiʼa fatago huʼnageno vayaʼe ani afinaʼmo apakesamo afiʼa fatago huʼnaya vayaʼeʼmo napaʼapimo faefu tauseniʼa vayaʼmo maiʼnae. 5Egaʼamo Yu vayaʼaiteʼmo yagaiʼa neʼapataya vayanagi vayatama vayanagi keʼaepa gemo avoʼmo kaeʼa aliʼa apaya neʼmalaya vayanagi huʼa Yulusalemu kotegamo magokepi aliʼa anupa huʼa maiʼnae. 6Apakaegi Anasiʼa mono huʼa neʼapataya vayaʼaiteʼmo yagaino neʼapateya vekagi Kaiyafasiʼagi Yoniʼagi Alekasanaʼagi magoʼe vayanagi mono huʼa neʼapataya vayaʼaiteʼmo yagaiʼa neʼapataya vayanagi huʼa aliʼa anupa huʼa maiʼnae. 7#Mt 21:23Maiʼneʼapaeʼmo apa vekalaʼmo folagapiʼmo aliʼana he tiʼana anateʼneʼapaeʼmo, Haiya agufa himamutaniletiʼe ina la agiʼaletiʼeʼmo ani kavaʼmo huʼnaʼae, huʼa anafi geʼnagenoʼaeʼmo 8#Mt 10:19-20Goti Aunemeʼamoʼmo Pita aipafiʼmo haino havai teʼnigenoʼaeʼmo Pitaʼa geʼapileʼmo aeno atagaina huno hapa painoʼaeʼmo, Ala vayaʼmo neʼyagaiya vayaʼmogitapaʼe vayatama vayaʼmogitapaʼene, huno, 9Lapakaemo alagepa kavaʼmo hutaʼa aiyalaʼmo hosuʼniya vekamo alitaʼa api aitaʼa ateʼnoʼa kavatefeʼmo ge hutapa laʼafi nekesayaʼmoʼmo lapakaeʼe muki Isaleli vayaʼmogiʼeʼmo hisuva gemo afaʼa afigae. 10#Ap 3:6,13-16Inagi afiyo, huʼna, Yesu Kalaisiʼa Nasalasa taonifi vekamo himamuʼaletiʼe agiʼaletiʼeʼmo ani vekamo alitaʼa api aitaʼa ateʼnoʼageno lapaulagaleʼmo he tino maiʼniye. Lapakaemo malipu yosaleʼmo nili aiʼnageno faliʼniyaʼmonanafa Gotiʼa ago alino he tino ateʼniye. 11#Sam 118:22; Mt 21:42Goti mukufi gemoʼa hunoʼaeʼmo, Lapakaemo yafatetiʼmo no nekiya vayaʼmo maiʼnetapaeʼmo mago noʼmo nekiya yafafeʼmo hutapaeʼmo, afa yafane, huta hutetapa alita ataleʼnayaʼmonanafa noʼmo nekiya yafaʼmo hogote lokiya yafaʼmo afole aiʼniye, huno avoʼmo kae maleʼniye. 12#Mt 1:21Mago alu vekamoʼmo lapakufamo alino katino lapatesiya vekamo oʼmaiʼnifa agaekeʼmo magokeʼage maiʼniye. Mago alu agiʼe vekamo oʼmaiʼniyaʼmofeʼmo Gotiʼa magoke vekamo agiʼamo ma mopafi vayaʼaina apamiʼniyanageʼa agimo aeʼa ge hisageno hapa maeno, huno hapa paiʼniye. 13Kanisole vayaʼmogimo anakayana Pitaʼe Yoniʼeʼmo sukulu osuʼnaʼa vekalaʼmo maiʼnaʼaʼmonanafa lokiya gefatiʼmo huʼana hapa paiteʼanaeʼmo koli osuʼana afaʼa maiʼnaʼageʼapaeʼmo anaketeʼanaeʼmo, ae, huʼa, hogoteʼana Yesuʼeʼmo lokaeʼana maiʼnaʼa vekalane, huʼa apakesa afiteʼa hapau aiʼnae. 14Agayana aliʼana api aiʼana ateʼnaʼa vekamo anakaeʼeʼmo eno magokepi he tino maiʼnigeʼa ageʼnayaʼmofeʼmo geʼapimo alagi ohaneʼnigeʼa ge osuʼa maiʼnae. 15Inagi anakaefeʼmo huʼapaeʼmo, kumatega utana lamiʼao, huʼa hana paiteʼapaeʼmo, 16#Yo 11:47Mani vekalaʼanitegamo na kava hisune, huʼa apakaiʼapi apakaiʼapimo ge huge afige huʼa maiʼnae. Apakaemo huʼapaeʼmo, Muki Yulusalemu kotega maiʼnaya vayaʼmogimo anakeʼnageʼana noʼagaya agufa lokiya anaune kavaʼmo huʼnaʼageʼa ageʼnayaʼmonanafa osuʼnaʼae, huta afaʼa osugune. 17Ani gemo magoʼe huno aino atagu ofaesiyafeʼmo lokiya gemo huta hana paigune. Halate Yesu agiʼamo aetana hapa opaiʼao, huta hana paigune, huʼa huʼnae. 18#Ap 5:28,40Huteʼa ge huʼnageʼana hai eʼana maiʼnaʼageʼapaeʼmo, Lanakaemo magoʼe hutana Yesu agiʼamo alagi aetana hapa opaige alitana apaya oʼmalege hiʼao, huʼa hana paiʼnae. 19#Ap 5:29Huʼa hana paiʼnayaʼmonanafa Pitaʼe Yoniʼeʼmo geʼapileʼmo aeʼana atagaina huʼana hapa paiʼanaeʼmo, Laʼagaemo Goti geʼamo amagitaʼa ataletetaʼa lapakae gemo akame hisuʼa kavaʼmoʼa Goti aulagaleʼmo alagepa kavapi hosu kavane. Lapakaitapimo alita fako huta lapatetetapa alagepa hutapa lapakesamo afiyo. 20Ageʼnoʼa kavaʼe afiʼnoʼa geʼeʼmo hapa paitaʼa hano huguʼae, huʼana hapa paiʼnaʼae. 21Kanisole vayaʼmogi ani gemo afiteʼapaeʼmo anamagisayafe huʼnayana muki vayaʼmogi afole aiʼniya kavafeʼmo Goti agiʼaleʼmo aliʼa asaga huʼnayaʼmofeʼmo anakufaleʼmo mago hosu hanageke yaʼmo anamisaya kaʼmo oʼageʼa anataleʼnageʼana uʼnaʼae. 22Ani aliʼana api aiʼana ateʼnaʼa vekamoʼmo fotiʼa kafugamo aeno agaseno maiʼniye.
Apakesamo afiʼa fatago huʼnaya vayaʼmogimo, lokiya vaika lato, huʼa nunumuʼmo huʼnaya gemae
23Anateʼnageʼanaeʼmo Pitaʼe Yoniʼeʼmo vayaʼanilegamo atagi neʼuʼana mono huʼa neʼapataya vayaʼaiteʼmo yagaiʼa neʼapataya vayaʼe yagaiʼa neʼapataya vayatama vayaʼmogiʼeʼmo hana paiʼnaya gemo hapa paiʼnaʼae. 24#Hat 20:11; Niy 9:6; Sam 146:6Ani gemo afiteʼapaeʼmo magoke apaipa apakesamo aliʼneʼa Gotifeʼmo nunumuʼmo huʼapaeʼmo, Ala kava nene, huʼa, kokuʼnanagi mopagi solovala aninagi kokuʼnapi haneʼniya yanagi ma mopafi haneʼniya yanagi solovala anipi haneʼniya yanagi huka alo huʼnana vekae, huʼa, 25#Sam 2:1-2Akeyaʼvilagamo Kaunekameʼmoʼa laginago vekamo Neviniʼa aliʼyakamo neʼaliya vekamo avayafatiʼmo ge hunoʼaeʼmo,
Na kava hisayafeʼmo malaga alu nofi vaya alu nofi vayaʼmogimo apavamusamo valeteʼa apano aeʼnae. Apakaemo huʼapaeʼmo, ani kavaʼmo hugune, huʼa apakesamo afiʼnayaʼmonanafa afaʼa osuʼnae. 26Ala vayaʼe kini vayaʼapiʼeʼmo Ala kava netegaʼe uveliletiʼmo lekana paino ateʼniya vekalegaʼeʼmo kame huʼa anatesayafeʼmo aliʼa anupa huʼa maiʼnae,
huno huʼniye. 27#Mt 27:1-2; Lu 23:7-11; Ap 3:13He, lama gemo huʼniye. Helotiʼagi Ponitiyasi Pailatiʼagi alu nofi vayanagi Isaleli vayanagi huʼa aliʼyakamo alisiyafeʼmo lekana paika ateʼnanageno alagepa kavaʼageʼmo huʼniya vekaʼeʼmo kame huʼa atesayafeʼmo aliʼa anupa huʼa maiʼnae. 28#Ap 2:23Kagesa afiteka himamukaletiʼmo alika afole aika ateʼnana kavaʼmo hisayafeʼmo aliʼa anupa huʼa maiʼnae. 29#Ef 6:19Ala kava nene, huʼa, Hemenimo lokiya gemo lamagisaya kavafeʼmo laha paiʼnaya gemo afiyo. Afiteka lokiya vaika lategetao aliʼyakamo neʼaluna vayaʼmogita gekamo aeta hakalo huta hapa paino. 30Himamukamo alika apave liteka kaita hapauʼniya vayaʼmo alika hapageka apato. Alagepa kavaʼageʼmo huʼniya vekamo aliʼyakamo neʼaliya vekamo Yesu agiʼaletiʼmo noʼagaya agufa lokiya aune kavaʼmo hisunafeʼmo alagepa huka laha mao, huʼa nunumuʼmo huʼnae. 31#Ap 2:4Nunumuʼmo huʼnagenoʼaeʼmo aliʼa anupa huʼa maiʼnaya noʼmoʼa uti uti aiʼniye. Goti Aunemeʼamo aote Aunemeʼamoʼmo apaipafiʼmo haino maiʼnigeʼapaeʼmo koli osuʼa aepa faiʼa Goti geʼamo lokiya vaiʼa aeʼa hakalo huʼnae.
Goti mafaʼnemogi magoke apaipa apakesamo aliʼnaya gemae
32 #
Ap 2:44
Muki apakesamo afiʼa fatago nehaya vayaʼmogimo magoke apaipa apakesamo aliʼneʼapaeʼmo mago vekamoʼmo aliʼniya yafeʼmo, nagaiʼni yane, huno osuʼnifa mukiʼamogimo muki aliʼnaya yafeʼmo, lagaiti yane, huʼa huʼnae. 33#Ap 2:47Apa vayaʼmogimo Ala kava neʼmo Yesuʼa faliʼniyatetiʼmo he tiʼniya kavafeʼmo magoʼe huʼa himamuʼaletiʼmo ava gemo huʼnagenoʼaeʼmo Gotiʼa alagepa huno fiku hapa maeno apamiʼnigeʼapaeʼmo apakiʼapileʼmo aliʼa asaga huʼa apateʼnae. 34#Ap 2:45Magoʼamogimo mopaʼapiʼe noʼapiʼeʼmo maketi huʼnageʼa miya faiʼnageʼapaeʼmo monimo alini eʼa apa vayaʼmo apamiʼnageʼapaeʼmo aliʼa fako huʼa kagemi yaʼapimo ohaneʼniya vayaʼmo apamiʼnae. 35Apamiʼnayaʼmofeʼmo ani vayapatiʼmo mago vayaʼamogimo kafu osuʼnae. 36#Ap 11:22-26; 13:2-3Magoke vekamo agiʼamo Yosefeʼa Livai nofi vayapati vekamo Saipalasi ani agoʼnanenafi vekamo maiʼniye. Apa vayaʼmogimo agiʼamo Manamasiʼae huʼa ateʼnae. Manamasiʼae agimo aepaʼamo ina kavaʼmo huno alino lokiya vaino neʼapateya vekamae. 37Agae mopamo maketi huʼnigeʼa miya faiʼnageno monimo alinineno apa vayaʼmo apamiʼniye.
Currently Selected:
Apa 4: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.