Apa 23
23
Poloʼa kanisole vayaʼai apaulagaleʼmo he tino maiʼniya gemae
1 #
Ap 24:16
Poloʼa he tino maiʼnenoʼaeʼmo kanisole vayaʼmo aulu hapaeno apakeʼnenoʼaeʼmo, Konagaʼnimogitapae, huno, Goti aulagaleʼmo nehuva kavafeʼmo yuʼilaga vekaʼnimoʼa agoti huno noʼnate, huno hapa paiʼniye. 2#Yo 18:22-23Mono huʼa neʼapataya vayaʼaiteʼmo yagaino neʼapateya vekamo agiʼamo Ananayasiʼa Polo haopaleʼmo he tiʼa maiʼnaya vayaʼaifeʼmo hunoʼaeʼmo, Avayamo aitapa lagaiyo, huno hapa paiʼniye. 3#Mt 23:27Poloʼa hunoʼaeʼmo, Hosu yaʼmoʼa vayaʼmogi apaulagaleʼmo alagepa yakana huno hanesiyafeʼmo yaveyave anitetiʼmo faleʼa ati nekaya yakana huka maiʼnane. Gotiʼa kamagigiye. Kagaemo keʼaepa geletiʼmo agoti huka natesanafeʼmo maiʼnanaʼmonanafa kagaemo keʼaepa gemo ago amagika ataleteka amagiyo, huka huʼnane, huno ha paiʼniye. 4Polo haopaleʼmo he tiʼa maiʼnaya vayaʼmogi huʼapaeʼmo, Gotifeʼmo mono huʼa neʼapataya vayaʼaiteʼmo yagaino neʼapateya vekaeʼmo huka faipa huka neʼatapiye, huʼa afi geʼnae. 5#Hat 22:28Poloʼa geʼapileʼmo aeno atagaina huno hapa painoʼaeʼmo, Konagaʼnimogitapae, huno, Mono huʼa neʼapataya vayaʼaiteʼmo yagaino neʼapateya vekamo maiʼniye, huʼna nagaemo oʼageʼnove. Goti mukufati gemoʼmo hunoʼaeʼmo, Lapakae vayaʼaiteʼmo yagaino neʼapateya vekaeʼmo hutapa faipa huta oʼateyo, huno huʼniye, huno hapa paiʼniye. 6#Ap 4:2; 24:15,21; 26:5Poloʼa apakeyana Satiyusi vayaʼe Falasi vayaʼeʼmo eʼa maiʼnageno apaketenoʼaeʼmo kanisole vayaʼaifeʼmo, Konagaʼnimogitapae, huno, Falasi vekamo maiʼneʼna Falasi vayaʼai mafaʼnemo maiʼnove. Nagaemo agava neʼmaiya vekaeʼmo nagesamo afiʼna fatago huge faliʼnaya vayaʼmo he tigae, huʼna nagesamo afiʼna fatago huge nehuʼnaeʼmo namogaga aiʼna agava maiʼnova kavatefeʼmo agoti huʼa neʼnatae, huno hapa paiʼniye. 7Falasi vayaʼe Satiyusi vayaʼmogiʼeʼmo ani gemo afiteʼapaeʼmo aliʼa fako huʼa ge vaiʼnae. 8#Mt 22:23Satiyusi vayaʼmogi huʼapaeʼmo, faliʼnaya vayaʼmo he otigae, huʼa huge enisole vayaʼmo oʼmaiʼnae huʼa huge apauneʼapameʼe vayaʼmo oʼmaiʼnae, huʼa huge huʼnayaʼmonanafa Falasi vayaʼmogimo, haʼao, ani agufa vayaʼmo maiʼnae, huʼa hapa paiʼnae. 9#Ap 25:25Alopa gefatiʼmo magoʼe magoʼe gemo huʼa ge vaiʼnae. Mago Falasi vayaʼmo keʼaepa gemo aliʼa apaya neʼmalaya vayaʼmogimo he tiʼa lokiya gefati huʼapaeʼmo, Ani vekamo hosu kavaʼamo oʼageʼnone. Mago auneʼamoʼa eno ha paiʼnifi enisole vekamoʼmo eno ha paiʼnifigi kanalenagi Gotifeʼmo kame huta oʼategetao, huʼa hapa paiʼnae. 10Lusi kava huʼa ge vaiʼnagenoʼaeʼmo ati vayaʼaiteʼmo hogote vekamo yagaino neʼapateya vekamoʼmo hunoʼaeʼmo, Poloʼa heʼa avayu hulitata hisageno faligiye, huno agesa afitenoʼaeʼmo ati vayaʼaifeʼmo hunoʼaeʼmo, Utapa folagapatiʼmo avaletapa lapayateʼmo alita asagaulitetapa yafa nopiʼmo uta haitapa ateyo, huno hapa paiʼniye. 11#Ap 18:9; 19:21; 27:24; 28:16,23Haniʼilagamo Ala kava neʼmo afole aiteno Polo haopaleʼmo he tino maiʼnenoʼaeʼmo, Polo, huno, Koli osuka lokiya vaika maiyo. Yulusalemu taonifiʼmo nava gemo aeka hakalo huka hapa paiʼnana kava huka Lomu taonifiʼmo uka aeka hakalo huka hapa paigane, huno ha paiʼniye.
Yu vayaʼmogi kesi katetiʼmo uʼa Poloʼa amagigune, huʼa vegemo huʼnaya gemae
12Ega netepiʼmo mago Yu vayaʼmo aliʼa anupa huʼa maiʼneʼa vegemo huʼnae. Neʼyaʼe aniʼeʼmo oʼneta mosita maime maime neʼutaeʼmo Poloʼmo kamitimo amagigune. Oʼamagisunana Gotiʼa lifana huno afaʼa lategaiye, huʼa vegemo huʼnae. 13Kesi katetiʼmo uʼa vegemo huʼnaya vayaʼmo fotiʼamo ago aeno agaseno magoʼe vayaʼmogimo vegemo huʼnae. 14Ani vayaʼmogi mono huʼa neʼapataya vayaʼaiteʼmo yagaiʼa neʼapataya vayaʼaitegaʼe vayatama vayaʼaitegaʼeʼmo uʼa hapa paiʼapaeʼmo, Lagaemo lokiya gemo huta ina gemo huta hune, neʼyaʼmo oʼneta mosita maime maime neʼuta Poloʼmo kamitimo amagigune. Amagisunageno falitesigetaekeʼmo neʼyaʼmo halate negaune, huta vegemo huʼnone. 15#Ap 25:3Lapakaeʼe kanisole vayaʼeʼmo hogote Lomu vekamo yagaino neʼapateya vekaeʼmo hutapaeʼmo, lagaemo Poloʼmo magoʼe gemo hisigeta afigefesunanagi Poloʼmo avalelika eno, hutapa ha paiyo. Avaleliʼa neʼesagetaeʼmo kateʼmo kafo yagaiʼneta kamitimo amagigune, huʼa hapa paiʼnae.
16Ani gemo huʼa vegemo huʼnayaʼmonanafa Polo asaʼamo mafaʼnemoʼa vegemo huʼnaya gemo afiteno uno yafa nopiʼmo haino Polofeʼmo ha paiʼniye. 17Poloʼa ani gemo afitenoʼaeʼmo mago ati vayaʼaiteʼmo yagaino neʼapateya vekaeʼmo hunoʼaeʼmo, Ani neya vekamoʼmo mago gemo huʼnigi hogote vekamo yagaino neʼapateya vekalegamo eka avalelika uvo, huno ha paiʼnigeno 18ati vayaʼaiteʼmo yagaino neʼapateya vekamoʼmo avalelinuno hogote vekamo yagaino neʼapateya vekaeʼmo hunoʼaeʼmo, Kalavusi huta ateʼnona vekamo Poloʼa ge huʼnigeʼna eʼnogeno mago gemo naha paiʼniye. Naha painoʼaeʼmo, Ani neya vekamoʼmo mago gemo huʼnigi hogote vekamo yagaino neʼapateya vekalegamo eka avalelika uvo, huno naha paiʼniye. 19Hogote vekamo yagaino neʼapateya vekamoʼmo ayate alininuno, Na agufa gemo naha paigane, huno afi geʼnigenoʼaeʼmo, 20Yu vayaʼmogimo kagaefeʼmo huʼapaeʼmo, Poloʼa kanisole vayaʼaitegamo avalelika egetao magoʼe gemo hisigeta afigesune, huʼa hisayana aigofe gemo hugae. 21Ani gemo kaha paisagekaeʼmo oʼafiyo. Fotiʼamo ago aeno agaseno magoʼe vayaʼmo kateʼmo fala kiʼa yagaiʼa maigae. Apakaemo huʼapaeʼmo, Neʼyaʼmo oʼneta mosita maime maime neʼuta Poloʼmo amagisunageno falitesigetaekeʼmo halate neʼyaʼmo negaune. Alagi lama gemo nehune, huʼa apagoʼya ataleʼnae. Ago alo huʼa kagaefekeʼmo kagava maiʼnae, huno ha paiʼniye. 22Hogote vekamo yagaino neʼapateya vekamoʼmo hunoʼaeʼmo, Naha paiʼnana gemo mago vekaeʼmo ha opaiyo, huno ha paiteno neya vekamo alino ataleʼnigeno uʼniye.
Poloʼa aliʼa ateʼnageno mago vekamo yagaino neʼapateya vekamo agiʼamo Filikisitegamo uʼniya gemae
23Ati vayaʼaiteʼmo hogote vekamo yagaino neʼapateya vekamoʼmo ati vayaʼaiteʼmo yagaiʼana neʼapataʼa vekalafeʼmo hunoʼaeʼmo, Tu hataletiʼa ati vayanagi sevetiʼa hosileʼmo fai maiʼneʼa uʼeʼa nehaya vayanagi tu hataletiʼa hayomo aliʼnaya vayanagi hutana Sisaliya taonifiʼmo kitamo nekuna afinaʼmo visayafeʼmo alo hiʼao. 24Mago hosifiʼmo Poloʼmo avaleliʼa visaya hosimo alo hiʼao. Poloteʼmo alagepa hutana yagaitana ateʼnetana muki vayaʼaiteʼmo yagaino neʼapateya gamani vekamo agiʼamo Filikisitegamo avalelitana viʼao, huno hana paiʼniye. 25Huno hana paitenoʼaeʼmo mago avoʼmo kaeʼniye. Ani avoʼmo kaenoʼaeʼmo,
26Nagaemo Kilotiyasi Lisiyasiʼnamo muki vayaʼaiteʼmo hogote vekamo yagaika neʼapatana vekamo Filikisigaeʼmo avoʼmo kaeʼnaeʼmo alagepa huka maiʼnapiye. 27#Ap 21:30-33; 22:25-27Yu vayaʼmogimo ani vekamo amagiʼa faliʼa atesayafeʼmo amagiʼnae. Lomu vayaʼmogi yagaiʼa neʼataya vekamo maiʼniye, huʼna afiʼnovaʼmofeʼmo amagiʼnagetaeʼmo nagaeʼe ati vayaʼniʼeʼmo apayapatiʼmo agufamo alita katita ateʼnone. 28#Ap 22:30Na kava huʼniye, huʼna apafi gesuvafeʼmo kanisole vayaʼaitegamo avaleliʼna uʼna lamiʼnove. 29#Ap 18:14-15Amagisageno falisiya kavaʼmo huge kalavusi huta atesuna kavaʼmo huge huʼniya agufa kava huno oʼmaiʼniye. Yu vayaʼmogi keʼaepa geʼapiletiʼmo agoti huʼa atesayafeʼmo nehae. 30#Ap 24:5-8Mago Yu vayaʼmogi vegemo huʼapaeʼmo, amagigune, huʼa huʼnaya gemo afiʼnovaʼmofeʼmo kagaetegamo aliʼna atesugeno ugiye, huʼna nagesamo afiʼnove. Agoti huʼa atesayafeʼmo huʼnaya vayaʼaifeʼmo huʼnaeʼmo, Filikisitegamo utapa ina hosu kavaʼmo huʼniye, hutapa ha paiyo, huʼna hapa paiʼnove,
huno avoʼmo kaeʼniye. 31Ati vayaʼmogimo hapa paiʼniya gemo akame huʼnae. Apakaemo haniʼilagamo Poloʼa avaleliʼuʼa Atipatilisi taonifatiʼmo ateʼnae. 32Egaʼamo mopafiʼmo umenitata nehaya ati vayaʼmo yafa notegamo atagi neʼa eʼnageʼapaeʼmo hosileʼmo fai maiʼneʼa uʼeʼa nehaya vayaʼmogimo avaleliʼa uʼnae. 33Sisaliya taonifiʼmo avaleliʼuʼa yagaino neʼapateya vekamo ayapiʼmo Poloʼmo ateteʼa avoʼmo amiʼnae. 34Ani vekamo vayaʼaiteʼmo yagaino neʼapateya vekamoʼmo avoʼmo alino lekana paino afitenoʼaeʼmo Polofeʼmo hunoʼaeʼmo, Haiya kotega vekae, huno afi geʼnigenoʼaeʼmo, Silisiya kotega vekamo maiʼnove, huno ha paiʼniye. 35Ha paiʼnigenoʼaeʼmo, agoti huʼa katesayafeʼmo nehaya vayaʼmo eʼa avaʼyi hisageʼnaeʼmo gekamo afiguve. Helotiʼa ki maleʼniya noʼmo alopa nopiʼmo yagaitapa ateyo, huno hapa paiʼniye.
Ekhethiweyo ngoku:
Apa 23: kyg2013
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.