Apa 18
18
Poloʼa Kolitiyani taonifiʼmo uno maiʼniya gemae
1Henagaʼamo Poloʼa Atenisi taonifatiʼmo ataleno uno Kolitiyani taonifiʼmo maiʼniye. 2#Lo 16:3Poloʼa uno ageyana mago Yu vekamo itaʼamoʼmo Ponitasi kotegamo alino ateʼniya vekamo agiʼamo Akuvilaʼa ani taonifiʼmo aiseʼamo akeyaʼvilagamo eno maiʼniya vekamo ageʼniye. Mago muki vayaʼaiteʼmo yagaino neʼapateya vekamo agiʼamo Kilotiyasiʼa Yu vayaʼaifeʼmo hunoʼaeʼmo, Lomu taonifatiʼmo ataletapa viyo, huno hapa paiʼnigeʼanaeʼmo Akuvilaʼe aʼamo agiʼamo Pilisilaʼeʼmo geʼamo afiteʼana ataleʼeʼana Kolitiyani taonifiʼmo maiʼnaʼageno Poloʼa uno anakaeʼeʼmo magokepi lokaeno maiʼniye. 3#Ap 20:34; 1 Ko 4:12Ani yalavelaʼmo mago selimo miya faili uʼa noʼmo kisaya yaʼmo nefakaniʼa yalavelaʼmo maiʼnaʼageno Poloʼa ani agufa aliʼyaʼmo neʼaliya vekamo maiʼniyaʼmofeʼmo anakaeʼeʼmo magokepi ani aliʼyaʼmo lokaeno alino maiʼniye. 4Poloʼa muki sapati afinaʼae afinaʼaeʼmo Yu vayaʼai mono nopiʼmo uno haino Yu vayaʼe Galiki vayaʼmogiʼeʼmo apakesa afiʼa fatago hisaya agufa gemo hapa paiʼnigeʼa ani geʼeʼmo huge afige huʼa maitale maitale huʼnae. 5#Ap 9:22; 17:14-15Sailasiʼe Timotiʼeʼmo Masetoniya kotegatiʼmo Polotegamo eʼana avaʼyi huʼnaʼagenoʼaeʼmo Poloʼa aipamoʼmo kana huʼnigenoʼaeʼmo aipafatiʼmo Yu vayaʼaifeʼmo aeno hakalo huno hapa painoʼaeʼmo, Yesuʼa Kalaisi vekamo maiʼniye, huno hapa paiʼniye. 6#Ap 13:46,51; 20:26Yu vayaʼmogimo geʼamo amagiʼa ataleteʼa huʼa faipa huʼa ateʼnagenoʼaeʼmo kukenaʼaletiʼmo mumusopamo alino kalo paeno ataletenoʼaeʼmo, Oʼafiʼnayaʼmofeʼmo lapakaemo afela hesayaʼmoʼmo nagaemo vaiʼmo oʼaligufa lapakaitapigeʼmo vaiʼmo aligae. Lapataleʼna alu nofi vayaʼaitegamo uguve, huno hapa paiteno apataleno uʼniye. 7Uno mago vekamo Gotifeʼmo mono nehiya vekamo agiʼamo Taitasi Yasiti nopiʼmo uno haino maiʼniye. Noʼamo Yu vayaʼai mono noʼmo haopaleʼmo haneʼniye. 8#1 Ko 1:14Ani afinaʼmo Yu vayaʼai monoteʼmo neʼyagaiya vekamo agiʼamo Kilisipasiʼagi afamo anagaʼagi mago Kolitiyani vayanagi huʼa ani gemo afiteʼapaeʼmo apakesamo afiʼa fatago huteʼa aniʼmo faleʼnae. 9#1 Ko 2:3Mago haniʼilagamo Poloʼa alagamuna agegekana huno ageteno afiʼniyana Ala kava neʼmoʼa, Koli osuvo. 10#Yas 1:9; Aiy 41:10; Yel 1:8; Yo 10:16Kagaeʼeʼmo lokaeʼna maiʼnovaʼmofeʼmo afaʼa oʼmaika geʼnimo aeka hakalo huka hapa paige hapa paige huka maiyo. Asole vayaʼnimo mani taonifiʼmo maiʼnayaʼmofeʼmo mago vekamoʼmo kamagisigeka kagafu yaʼmo oʼaligane, huno ha paiʼniye. 11Ha paiʼniyaʼmofeʼmo Poloʼa magoke kafugagi sigisiʼa kaigi huno Goti geʼamo alino apaya maleno maiʼniye.
12Ani afinaʼmo Akaiya kotega Lomu gamani vekamo agiʼamo Galiyoʼa maiʼnigeʼapaeʼmo Yu vayaʼmogimo magokepi he tiʼa Polofeʼmo kame huʼa ateteʼa agotileʼmo avaleliʼuʼnae. 13Apakaemo huʼapaeʼmo, Ani vekamoʼmo Gotifeʼmo mono hisayafeʼmo keʼaepa gefiʼmo ohaneʼniya kateʼmo apavalelino neʼviye, huʼa huʼnae.
14Poloʼa geʼapileʼmo aeno atagaina huno hapa paigefeʼmo aepa faino ge nehigenoʼaeʼmo Galiyoʼa Yu vayaʼaifeʼmo hunoʼaeʼmo, Yu vayaʼmogitapae, huno, Ani vekamoʼmo keʼaepa gemo amagino ataleʼnifi hosu kavaʼmo huʼnifi huʼniyesinana getapimo afaʼa afuvesine. 15#Ap 23:29; 25:18-19; Yo 18:31Hiyaʼmonanafa geʼaletinagi kavaʼaletinagi lapakae keʼaepa getapiletinagi hutapa agoti huta atesayafeʼmo nehisayana lapakaitapi yane. 16Getapimo oʼafiguvanagi afaʼa ataletapa viyo, huno hapa paiteno agoti nopatiʼmo alino hapa faino apataleʼniye. 17Galiki nofi vayaʼmogi Sosatenisiʼa Yu vayaʼai monoteʼmo neʼyagaiya vekamo agoti no kipateʼmo atafauʼa amagiʼnayaʼmonanafa Galiyoʼa ani kavafeʼmo agesa oʼafino afaʼa maiʼniye.
Poloʼa atagi neno Atiyoki taonifiʼmo eʼniya gemae
18 #
Ap 21:24
Inagi Poloʼa konagaʼamogiʼeʼmo Kolitiyani taonifiʼmo yatala afinaʼmo apakaeʼeʼmo lokaeno maiteno apataleno ugefeʼmo huʼnigenoʼaeʼmo mago yalavelaʼmo Pilisilaʼe Akuvilaʼeʼmo sipifiʼmo magokepi Siliya kotegamo uʼa avaʼyi hisayafeʼmo uʼnae. Ugefeʼmo nehunoʼaeʼmo Senekiliya taonifiʼmo maiʼnenoʼaeʼmo hogoteno Gotifeʼmo huguve, huno ha paiʼniya kavaʼmo akame huno ayokaʼmo lagauʼniye. 19#Ap 17:17Lagautegeʼapaeʼmo uʼa Efasasi taonifiʼmo avaʼyi huteʼa Poloʼa Pilisilaʼe Akuvilaʼeʼmo anatalenuno Yu vayaʼai mono nopiʼmo uno haino hapa paiʼnigeʼapaeʼmo Yu vayaʼeʼmo ani gemo huge afige huʼa maiʼnae. 20Yu vayaʼmogi huʼapaeʼmo, Lagaeʼeʼmo yatala afinaʼmo maiyo, huʼa ha paiʼnayana, haʼao, huno huteno, 21#Lo 1:10; 1 Ko 4:19; Ye 4:15Na agufa kavaʼmo Yulusalemu kotegamo afole aisifigeʼna uʼna hopa afinaʼmo maisuvafeʼmo ugesuve. Gotiʼa hauʼnisiyana halate atagineʼna eʼna lapakegauve, huno hapa paiteno apataleno Efasasi taonifatiʼmo sipifiʼmo uʼniye.
22Sisaliya taonifiʼmo uno avaʼyi huteno ataleno uno Yulusalemu taonifiʼmo uno haino siosi vayaʼmo ge apamamaeteno apataleno Atiyoki taonifiʼmo uno lamiʼniye. 23Mago afinaʼmo maiteno ataleno uno Galesiya kotegaʼe Filisiya kotegaʼeʼmo umenitata huno muki vayaʼmogi geʼamo afiʼnaya vayaʼmo Goti geʼaletiʼmo alino lokiya vaino apatemale apatemale huʼniye.
Apolosiʼa Efasasi taonifiʼe Kolitiyani taonifiʼeʼmo Goti geʼamo aeno hakalo huno hapa paiʼniya gemae
24Mago Yu vekamo agiʼamo Apolosiʼa itaʼamoʼmo Alekesani taonifiʼmo alino ateʼniya vekamo eno Efasasi taonifiʼmo maiʼniye. Agaemo Goti mukufiʼmo avoʼmo kae maleʼnaya gemo aepaʼamo alagepa huno afiʼneno alagepa huno aeno hakalo huno hapa paiʼniye. 25#Lo 12:11; Ap 19:3Ala kava neʼmo kafeʼmo ava gemo aliʼa aya maleʼnaya vekamo maiʼneno ayamukiki huno alagepa huno Efasasi vayaʼmo alino apaya maleʼniye. Agaemo Yoniʼa aniʼmo faleno neʼapateya vekamo ava geʼageʼmo afiʼniye. 26#Ap 19:8Agaemo Yu vayaʼai mono nopiʼmo aepa faino koli osuno lokiya gemo huno hapa nepaigeʼanaeʼmo Pilisilaʼe Akuvilaʼeʼmo afiteʼanaeʼmo avaleliʼeʼana noʼanifiʼmo oʼafiʼniya agufa gemo magoʼe huʼana Goti kafeʼmo ava gemo alagepa huʼana aliʼana aya maleʼnaʼae. 27#2 Ko 3:1; Kl 4:10Apolosiʼa hunoʼaeʼmo, Akaiya kotega ugesuve, huno hapa paiʼnigeʼapaeʼmo konagaʼamogimo huʼapaeʼmo, He, kanalene, huʼa huteʼa, Galiki konagaʼapimogi Goti geʼamo neʼafiya vayaʼaifeʼmo mago avoʼmo kaeʼapaeʼmo, Alita falu fala hutapa ateyo, huʼa kaeʼa amiʼnae. Uno avaʼyi hutenoʼaeʼmo Gotiʼa fiku hapa maeno apamiʼnigeʼa apakesamo afiʼa fatago nehaya vayaʼmo alagepa huno hapa maeʼniye. 28#Ap 9:22Agaemo he tino vayaʼai apaulagaleʼmo maiʼneno lokiya alagepa geʼaletiʼmo Yu vayaʼai geʼapileʼmo huno aeno ati kaeno hapa painoʼaeʼmo, Yesuʼa Mesaiya vekamo maiʼniye, huno Goti Mukufiʼmo haneʼniya geʼaletiʼmo alino apave liʼniye.
Currently Selected:
Apa 18: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.