Apa 15
15
Yulusalemu taonifiʼmo aliʼa anupa huʼa maiʼnaya gemae
1 #
Ga 5:2
Henagaʼamo mago vayaʼmo Yutiya kotegatiʼmo eʼa Atiyoki taonifiʼmo mago konaga vayaʼaifeʼmo aliʼa apaya maleʼapaeʼmo, Mosese keʼaepa gemoʼa hunoʼaeʼmo, lapakufamo lagauʼa lapateyo, huno huʼniya gemo akame osisayana Gotiʼa lapakufamo alino katino lapategaiye, huʼa hapa paiʼnae. 2#Ap 11:30; Ga 2:1Hapa nepaigeʼana Poloʼe Manamasiʼeʼmo afiteʼanaeʼmo, haʼao, huʼana, lapakaemo hosu gemo nehae, huʼana hapa paiteʼana lusi kava huʼana ge hapauʼnaʼae. Apakaemo Poloʼagi Manamasiʼagi mago Atiyoki kotega vayapatinagi huʼa lekana paiteʼa aliʼa apaya maleʼnaya gemo aliʼa alagepa huʼa atesayafeʼmo huʼapaeʼmo, Apa vayaʼaitegaʼe yagaiʼa neʼapataya vayatama vayaʼaitegaʼeʼmo utapa hapa paiyo, huʼa hapa paiteʼa aliʼa apateʼnageʼa Yulusalemu kotegamo uʼnae. 3Inagi aliʼa apateʼnageʼa Yulusalemu kotega kateʼmo uʼa Fonisiya kotegaʼe Sameliya kotegaʼeʼmo umenitata huʼapaeʼmo, Asole alu nofi vayaʼmogimo aiʼa afe leʼa Gotitegamo eʼnae, huʼa hapa paimale hapa paimale huʼnageʼapaeʼmo muki konaga vayaʼmogimo lusi kava huʼa apamogaga aiʼnae. 4#Ap 14:27Yulusalemu taonifiʼmo uʼa avaʼyi huʼnageʼapaeʼmo siosi vayanagi apa vayanagi yagaiʼa neʼapataya vayatama vayanagi huʼa aliʼa falu fala huʼa apateʼnageʼanaeʼmo Poloʼe Manamasiʼeʼmo Gotiʼa anakaetetiʼmo muki huʼniya kavafeʼmo ava gemo huʼana hapa paiʼnaʼae. 5Hapa paiʼnaʼageʼa afiteʼapaeʼmo mago Falasi vayapatiʼmo apakesamo afiʼa fatago huʼnaya vayaʼmogi he tiʼa huʼapaeʼmo, Haʼao, huʼa, Lapakufamo lagauʼa lapatetesagetapaekeʼmo Mosese keʼaepa gemo akame hiyo, hutapa hapa paiyo, huʼa hapa paiʼnae.
6Apa vayaʼe yagaiʼa neʼapataya vayatama vayaʼmogiʼeʼmo ani gemo aliʼa alagepa huʼa atesayafeʼmo aliʼa anupa huʼa maiʼnae. 7#Ap 10:1-43Lusi kava huʼa ge huge afige huʼa maiʼneʼapaeʼmo Pitaʼa he tino, konagaʼnimogitapae, huno, Akeyaʼvilagamo Gotiʼa alagepa faigoko geʼamo alu nofi vayaʼaifeʼmo aeʼna hakalo huʼna hapa paisugeʼa afiteʼapaeʼmo apakesamo afiʼa fatago hisayafeʼmo lapakaepatiʼmo nagaemo lekana paino nateʼniye. 8#Ap 10:44; 11:15Gotiʼa muki vayaʼai apaipafiʼmo neʼapakeya vekamoʼa kanalene, huno huteno Aunemeʼamo lamiʼniya agufa kavaʼmo huno apamiʼniye. 9#Ap 10:34-35Gotiʼa lagaetegamo mago alu kavaʼmo huge alu nofi vayaʼaitegamo mago alu kavaʼmo huge nosifa magoke aiyaya kavakeʼmo nehunoʼaeʼmo apakesamo afiʼa fatago nehaya kavatetikeʼmo apaipafatiʼmo aeno kalo paeno ataleʼniye. 10#Mt 11:30; Ga 3:10; 5:1Gotiʼa ani kavaʼmo nehiyaʼmofeʼmo na kava higetapa Gotiʼmo amalageka hugefe nehae. Mosese keʼaepa gemo akame hisaya kavaʼmo lusi kava huno kana huʼniya gemo haneʼniye. Laginago vayaʼmogiʼe lagaeʼeʼmo afaʼa akame osuʼnone. Fiku yanageta kana huʼniya gemo geʼamo neʼafiya vayaʼaifeʼmo hapa paigune. 11#Ga 2:16; Ef 2:5-8Gotiʼa apakufamo alino katino apatesiya agufa kavaʼmo huno Ala kava neʼmo Yesu Kalaisiʼa fiku laha maeno lamiʼniya kavatetiʼmo lagufamo alino katino lategaiye, huta lagesamo afita fatago nehune, huno hapa paiʼniye. 12#Ap 14:27Hapa paiʼnigeʼa afiteʼapaeʼmo muki vayaʼmogimo ge osuʼa afaʼa maiʼneʼapaeʼmo Manamasiʼe Poloʼeʼmo Gotiʼa anakaetetiʼmo alu nofi vayaʼaitegamo noʼagaya agufa lokiya aune kavaʼmo huʼniya kavafeʼmo ava gemo huʼana hapa paiʼnaʼae. 13#Ga 2:9Gemo hapa paiʼana hano nehaʼagenoʼaeʼmo Yemisiʼa he tino hapa painoʼaeʼmo, Konagaʼnimogitapae, huno, geʼnimo afiyo. 14#Ap 15:7-9Saimoniʼa ago laha painoʼaeʼmo, Gotiʼa hogoteno alu nofi vayapatiʼmo mago vayaʼmo agaiʼa vayaʼamo maiʼneʼa agiʼaleʼmo aliʼa asaga huʼa atesayafeʼmo apavaleʼniye. 15#Emo 9:11-12Ani kava huʼa Gotitegati gemo alini eʼa aeʼa hakalo huʼa hapa nepaiya vayaʼmogi ani gemo huʼa avoʼmo kae maleʼnae. 16Avoʼmo kaeʼapaeʼmo,
Ala kava neʼmoʼa hunoʼaeʼmo, Henagaʼamo atagi neʼna eʼna Nevini seli noʼmo aino halagape vaiʼniya noʼmo halate aliʼna alagepa huʼna kiʼna ategauve. Asagauno aiteno haneʼniya yaʼamo halate aliʼna alagepa huʼna kiʼna ategauve. 17Muki alu nofi vaya alu nofi vayaʼmogimo vayaʼnimo maigae, huʼna lekana paiʼna apateʼnova vayaʼmogi Ala kava nefeʼmo kahauya huʼa agesayafeʼmo kiʼna ategauve. Ala kava neʼmoʼa ani kavaʼmo nehiya vekamoʼmo ani gemo huʼniye,
huʼa avoʼmo kae maleʼnae. 18Gotiʼa akeyaʼvilaga aliguve, huno hu maleʼniya aliʼyaʼamo ago ageʼniyaʼmofeʼmae, huno huteno, 19Yemisiʼa magoʼe gemo hunoʼaeʼmo, Nagesa afuvana lagaemo alu nofi vayaʼmogi Gotitegamo aiʼa afe leʼa neʼaya vayaʼmo kana yaʼmo alita apamisunana kanale osugiye. 20#Aep 9:4; Hat 34:15-17; Mon 17:10-16Mago avoʼmo kaeta atalegaune. Avoʼmo kaetaeʼmo, Neʼyaʼmo aigofe gotiʼapimogi neʼapamiya neʼyaʼmo oʼneyo. Kumai kavaʼmo osiyo. Lugoʼafiʼmo nofi aesageno falisiya afumoʼa agufafatiʼmo kola osuʼnisiya afumo oʼneyo. Muki yaʼmo kolaʼamo oʼneyo, huta avoʼmo kaegaune. 21#Ap 13:15Lagaemo ani Mosese keʼaepa gemo muki Yu vayaʼai taonifiʼmo uteta huta mono nopiʼe nopiʼeʼmo yatala afinaʼmo muki sapati afinaʼae afinaʼaeʼmo lekana paiteta alita apaya neʼmalone, huno hapa paiʼniye.
Avoʼmo kaeʼa ataleʼnageno uʼniya gemae
22Apa vayanagi yagaiʼa neʼapataya vayatama vayanagi muki siosi vayanagi huʼa ani gemo afiteʼapaeʼmo, Mago vayaʼmo lekana paita apateteta Poloʼe Manamasiʼeʼmo alita apatesunageʼa Atiyoki taonifiʼmo lokaeʼa ugae, huʼa huteʼa Yutasiʼa alu agiʼamo Masamasiʼe Sailasiʼeʼmo lekana paiʼa anateʼnae. Ani vekalaʼmo muki konaga vayapatiʼmo hogote vekalane. 23Ani gemo avoʼmo kaeʼapaeʼmo,
Konagatimogitapae, huta, Alu nofi vayane. Atiyoki taonifiʼmo maiʼnaya vayaʼe Silisiya kotegamo maiʼnaya vayaʼmogitapaʼeʼmo ge lapamamaeʼnone. Lagaemo konagatapimogitamo apa vayaʼmogitaʼe yagaita neʼapatona vayatama vayaʼmogitaʼeʼmo avoʼmo kaeʼnone. 24#Ap 15:1Lagaemo mago gemo afiʼnonana mago lagaepati vayaʼmogimo lapakaetegamo uʼa hosu gemo kana huʼniya agufa gemo lapa paiʼapaeʼmo, lapakufamo lagautetapa keʼaepa gemo akame hiyo, huʼa lapa paiʼnagetapaeʼmo afitetapa atete huʼnae. Ani agufa gemo hutapa hapa paiyo, huta osuʼnonanafa apakaiʼapimo ani gemo lapa paiʼnae. 25-26Lagaemo alita anupa huta maiʼneta magoke laipa lagesamo aliʼneta lole vekalaʼmo lekana paita anateteta alita anateʼnonageʼana uʼnaʼae. Manamasiʼe Poloʼefeʼmo lahau layamopafiʼmo nelahaiya vekalaʼmo Ala kava neʼmo Yesu Kalaisi agiʼalefeʼmo vayaʼmogimo anamagisayafeʼmo huʼnayategamo uʼnaʼae. Anakaeʼe lekana paita anateʼnona vekalaʼeʼmo lapakaetegamo magokepi lokaeʼa ugae. 27Lagaemo ani lole vekalaʼmo Yutasiʼe Sailasiʼeʼmo alita anateʼnonanageʼana uʼana avoʼmo kaeʼnona gemo magoke agufa gemo lapa paigaʼae. 28#Mt 23:4Goti Aunemeʼamoʼe lagaeʼeʼmo magoke laipa lagesamo aliʼneta magoʼe huno kana huʼniya gemo lapa opaita ani kavaʼageʼmo hiyo, huta nehune. 29#Ap 15:20Nehutaeʼmo, Neʼyaʼmo aigofe gotiʼapimogi neʼapamiya neʼyaʼmo oʼneyo. Lugoʼafiʼmo nofi aesageno falisiya afumoʼa agufafatiʼmo kola osuʼnisiya afumo oʼneyo. Muki yaʼmo kolaʼamo oʼneyo. Kumai kavaʼmo osiyo, huta nehune. Ani kavaʼmo osisayana kanale hugiye. Maitalafiye, huʼa avoʼmo kaeʼnae.
30Aliʼa apateʼnageʼapaeʼmo alini uʼa Atiyoki taonifiʼmo avaʼyi huteʼa eyo huʼa huʼnageʼa muki vayaʼmo eʼa aliʼa anupa huʼa maiʼnae. 31Ani hapa maesiya avoʼmo apamiʼnageʼa lekana paiʼa afiteʼapaeʼmo lusi kava huʼa apamogaga aiʼnae. 32#Ap 11:27; 13:1; 14:22Yutasiʼe Sailasiʼeʼmo Gotitegati gemo alini eʼana aeʼana hakalo huʼana hapa nepaiʼa vekalaʼmo maiʼnaʼaʼmofeʼmo muki gemo hapa paiteʼana aliʼana lokiya vaiʼana apateʼnaʼae. 33Magoʼe afinaʼmo maiʼnaʼageʼapaeʼmo konagaʼanimogi hana paiʼanaeʼmo, apa vayaʼaifeʼmo ge apamamaeʼnona gemo utana hapa paiʼao, huʼa hana paiteʼana aliʼa anateʼnageʼana uʼnaʼae. 34Uʼnaʼaʼmonanafa Sailasiʼa Atiyoki taonifiʼmo maisiyafeʼmo hauʼniye.
35Poloʼe Manamasiʼeʼmo Atiyoki taonifiʼmo mago afinaʼmo maiʼnaʼae. Anakaeʼe muki vayaʼeʼmo Ala kava neʼmo gemo aliʼa apaya malege aeʼa hakalo huʼa hapa paige huʼa maiʼnae.
Poloʼmo alu kateʼmo uʼnigeno Manamasiʼa alu kateʼmo uʼnigeno huʼnaʼa gemae
36Mago afinaʼmo utegeno Poloʼa Manamasifeʼmo hunoʼaeʼmo, Halate muki taoniʼafiʼmo Ala kava neʼmo geʼamo aetaʼa hakalo hutaʼa hapa paiʼnoʼa taonifiʼmo ugetaʼao. Konagatiʼamogi alagepa huʼa maiʼnafigetaʼa utaʼa apakegauʼae, huno ha paiʼnigenoʼaeʼmo, 37#Ap 12:12,25He, huno, Laʼagaemo Yoni Makiʼa avalelitaʼa uguʼae, huno ha paiʼniye. 38#Ap 13:13; Kl 4:10Huno huʼniyana Poloʼa hunoʼaeʼmo, Haʼao, aliʼyatiʼamo alitaʼa hano osuʼnoʼageno Pamifiliya taonifatiʼmo ago laʼataleno aino atagi neno uʼniya vekae, huno huʼnigeʼana 39lusi kava huʼana ge vaiteʼana aliʼana fako huʼana Manamasiʼa Makiʼmo avalelino sipifiʼmo uno haino Saipalasi ani agoʼnanenafiʼmo uno maiʼniye. 40#Ap 4:36; 13:4; 14:26Poloʼa Sailasiʼmo lekana paino ateʼniye. Konagaʼanimogi Gotiʼa fikumo hana maeteno alagepa huno yagaino anatesiyafeʼmo aliʼa ayapiʼmo anateʼnageʼana uʼnaʼae. 41Poloʼe Sailasiʼeʼmo muki Siliya kotegaʼe Silisiya kotegaʼeʼmo u eʼana huʼana siosi vayaʼmo aliʼana lokiya vaiʼana apatemale apatemale huliʼana uʼnaʼae.
Currently Selected:
Apa 15: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.