Urarina - 2006 Edition (NT)

Arajiin rene turuuruha cachaaurune coaraane jaun jetaote, aina nerelanacauru aina jiniiquiin ichatane ucuuno que iniin jetao, ecu nelauriariin lauheque Jesoso. Nitohaneein ecu netiin acaauru relaain jetaote:
“Nerausiaaecuruha latiha acaauru suujuane coitucuhin nenacaauru, Cana Coaunera Cojoanonaa que neeuruhane jaun.
Nerausiaaecuruha inaderaaeriin ichaonacaauru.
Niichurute cairichaaojoaain coarae Cana Coaunera.
Nerausiaaecuruha leeochaauru amurijiriin nenaa coacuelanaala raotojoeein ichaonacaauru.
Niichuru raite, acaauru que banihateein niicha rucujuei atane tereein Cana Coaunera.
Nerausiaaecuruha corajeein esinae rauhijiriin jeriha Cana Coaunerane rijijieein leeochaneein namute cacha coaraelanaala, niheichu namute cacha cairichanaa coacuhin niha leeochane jerelanaala, naaonjoaain caohateraneein nenacaauru niicha coaana jerei coaracururichaaine jaun.
Nerausiaaecuruha cairichaaojoaain leeochaauru coaraain, chaelai lateein neeuruhane, acaauru coroatajaneein naaonjoaain nenacaauru.
Nii rijijieeinte cairichaaojoaain acaauru coaraain, jeelai amuritoheriin acaauru coroatajanereein Cana Coaunera.
Nerausiaaecuruha caohachaain suujua coaraain caohachaain ichaonacaauru.
Niichurute esinae rauhijiriin Cana Coaunera aina jiniiquiin niha cuurureein.
Nerausiaaecuruha raotojoeein jiniiquiin ichaaoruha cachaaurune coina coroatajaneein ichaonacaauru.
Niichurute rai calaohineein teein acaauru coaareein Cana Coaunera.
Nerausiaaecuruha Cana Coauneraacha jerei ichacuruhane coreniha mucunojoineein, casetecanojoineein, arinojoineein, naaonjoaain nenacaauru, Cana Coaunera cojoanonaa que neeuruhane jaun.
Nerausiajeein neeiche canu cachaneein neeichene coreniha inara nocoeje chanuhin, inara sohin, joaereein inara que ereein, naaonjoaan cachane.
Nitohaneein techu cairichaaerinojoineein rautanohinelanaala ichaaorelu Cana Coaunera ere bera inoaensihuru profeta curu, inara ajiniha nenacaaurulu.
Aihana jaun raotojoeein rachoojoeein, chaque tonajelanaala neeuche, dedeeu raoti ichaonaa que inara coreterihani Cana Coaunerane jaun.


Charijieein teeinti setuhane coataa, tebe que iniho colaain rucuheca. Nii rijijieeinte nabana nitajeeuruha cachaaurune coataa, acaauru ichao baaso rucuheraneein neeiche. Inae lenone cotebetenaa naineniha tebene, inae lenone raotono tenaa nainerihei. Nechu joaenreen atane ichoae jaonojoineein, shaonohineein nihane coinaacha nelate. Nii rijijieein inara netonai, cacha rai ichaonaa raotono coaaratelanaala cacha relaeneeichene, inara netonai nii chaque nelatelanaala neriquicheein.
Ichatane ucuuno que niha leinjiin nesene, nihei chuni coaraelanaala nainejei. Nii rijijieein techu satiin cacha notaracaae inara aina cuaain niicha jerei coaaratiha Cana Coaunerane jaan cono rijijieein neeiche.
Nii rijijieein nihei chuni cono mocohin darohe asae tera. Bujuaihu telanaalate ecuun tihaca, satiin conohanau turuuruha loreri asae turunacaaurune coina.
Nii rijijieein cacha cononeein satiin cachaauru que caohacha ichaquichene coaarateein, acaauru que coitucuerateein neeuche. Aihute esinae rauhijiriin caohacha ichaquichene coaraain Cana Coaunera coroaecuruhine cachaauru.

Coatiha inara relaain nihalu Moisesane jaan rauhi jianeein neeichene coina, cau turuhin nihaaun. Nihieichu inara relaauruha profeta curune jaan jianequichene coina turuhaaun. Nenacaaen tejian, nii inara relaauruhane jaan coitucuhiche esinae rauhijiriin jeelai amuritoheriine coina, ‘Naaonjoain quete aite’, naain inara rai biha uun. Esinae rauhijiriine inara rai aitoreeunni, jaiti niha dede, chauratane, naaonjoainurine que tiaaojoaain, coatiha aninuaerarinaai le erenaanejeein, satiin nii aitohane rijijieein situhane reentiaain, nii Cana Coaunera tenojoin Rauhi Inoaensi. Nitohanihane jaun nii rauhi inoaensi caje leinjiin leeochaauru fautaain nelatihei rijijieein nenaa rauhi tonoraelanaala nenaa, niheichu que leeochaauru relaenihane, acate Cana Coaunera Cojoanonaa que jataain nelatenereein. Nete caohachaain tonoraain, nii aitoha Cana Coaunerane rijijieein ichaohin, esinae rauhijiriin leeochaauru relaerate, jataain nelatineein nereein Cana Coaunera Cojoanonaa que. Rauhijiriine inara rai aitoreeunni, Moisesa aitoonjoan rauhi que cacha relaaurera aina fariseeocuru amurijiriin, inara rai Cana Coaunera aitoonjoan tonoraain rijijieein niicha icharatei ichaeneeichene, coatiha Cana Coaunera Cojoanonaa que ichaonaa naineriheicheein.


Inarate coitucuhiche: ‘Jiaonriha sonajaain jaohichene. Sonajaain joaerate caseteco coaareein’, naauruha inara foerateeurera rai ne. Nena laen canu inara rai aitoon. Chunocoha namute cacha aina obajei, nii obaaecane jaan jera aina rucujueein que suujua acatelanaala nenaate, caseteconeein niha cureein. Jana rai nejera que ‘Cha coitucuheei’, naain ereite, casetecaeratereein nitohanai rucuhecuruhane coina nenacaauru Junta Suprema curu. Jana, ‘Chaque nelatihei inacojoeeinte neei’, naain namute cachaauru que ereite, usi tabai jana nijiaoreein.
Aihana jaun ii que suujua acatiha Cana Coaunerane coina chaelai amaai que belaaine coina Teenforo asae nenaa rori altar ichoaene jana, ii cotaairiin niha chamute cachane que coaauquine, jauriaanejeein caohachaain neein ii cotaairicha ainane coina, nii rori acatiha nii iicha amai ratiriin, aina rucuhenihu. Inae aina caohachaain rucuhequine baihate laen nainereei jelaiha cuhin nii rori altar ichoae nii Cana Coaunera belaaine jaan teeine.
Chunocoha inara amute cacha, cocoainanacaihuri rai inara colurujueein nihane, raotojoeein aina ereein rucuhecuche, joesio rai inara colurijihane coataa. Aineeichenete folisiaa rai inara tiha joesione, caresero cuhane inara enoaaurureein. Nitohaneein ichaeneeichene nii caresero cuhane neriquicheein mituhelanaala, nii baaso ichaquichene coretequichene reentiaain. Esinae rauhijiriine aitoon inara rai.

Inarate: ‘Jiaonriha inara sinijeranelanaala nenaa ene dadaaichene’, naain inoaenlu inara relaauruhane coitucuhiche. Esinae rauhijiriine laen canu inara rai aitoon. Chunocoha suujua cuhane ene jereein coaarate, suujua cuhane nejelau ene que naosate.
Inara nota osa que inara sarunaa jerihane nii inara nota que coaraain, inaraacha jerei caje amuuche, nabana inara nota coreniha baaso ichaquichene, inara notaacha usi jana cuelanaala, satiin inara jaberoco usi jana nitajihane coataa. Jana inara biji osa que inara sarunaa jerihane, coa nii inara biji turuhache nii inara sarueratenaa jerihane jaan que. Mucuhichene ajiniha caje amuuche. Nii inara bijiicha mocohelanaala, inara jaberocone maajeein usi tabai jana nitajihane coataa.


Chaaen techu inoaenlu: ‘Chunocoha comasai joaeranihane, nii comasai jaohane jaan cocoiricha teeuche raite aina comasai jaohine’, naain inara relaaure. Esinae rauhijiriine laen canu inara rai aitoon. Leeocha cacha aina ichoaenihane jana comasai joaerate, inae osa que nesarue. Jana nii quicha jaonojoin ene raerate, jerichanejeein osa que nesarue.

Chaaen techu inara inoaensihuru rai: ‘Jiaonriha Cana Coaunera notaracae netiin, Cana Coaunera bajaain, rai chaelai benatequichene nihanatiin teneeichene’, naauruhane coitucuhiche. Esinae rauhijiriine canu inara rai aitoon. Jiaonriha joaereein inacojoeein: ‘Cana Coaunera coreniha’, naain ereeiche. Niheichu: ‘Dede coreniha’, naain erenaa nainiheeiche, Cana Coaunera nelaurianaja niha dedene jaun. Niheichu atane coreniha nihanatiin nainiheeiche, nichaauraa Cana Coaunerane jaan nihane jaun. Niheichu Jerosaleen coreniha nihanatiin, Cana Coaunera nese nihane jaun. Niheichu inara couturi coreniha chaelai ichaquichene coina erenaa nainiheeiche, inara jeriquichene que jichosiin, nesomaraain, naaonjoaain nenerihani inara coturijine jaun. Chaelai que: ‘Icharihanuhin’, naaichene ichacuche. Jana: ‘Icharihaaunni’, naaichene coa ichacaache. Nelatihei cha icharaanu rijitiin nohaneein irihacane. Niite baaso ne.


Inarate inoaenlu: ‘Chatohaneein inara soeraniha inara cunaitaaine, inara netonai cunaitaain nii inara soera sooche’, naauruhane coitucuhiche. Esinae rauhijiriine canu inara rai aitoon. Jiaonriha chatohaneein baasoneein teraquichene neurinanaa coaauquichene. Aihane jaun inara meri faohitoroanihane, rai jera netonai icharatecuche. Chunocoha cocoainanacai rai inara colurujueein inara obiri ruluhane, nii jelaronaa bana inaraacha jiai inara obirine maajeein teeuche. Inara que anajiin amaeratiha cocoainanacai, inara laurinelanaala nenaane, nii bajaane amuritoheriin amanaa nainequichene coaarateein amaauche. Inara caje niicha latei bajaain niha cachane, rai teeuche. Jana inara rai cainaane coina chaaelai bajaain niha cachane, chunaelanaala rai niicha latei teeuche.


Chaaen techu inoaenlu: ‘Inara belaichaauru belaain, inara cotaihurera cotaihuche’, naauruha inara raine coitucuhiche. Nena laen canu inara rai aitoon. Inara que nejeratenacaauru belaihuche. Inara rerohecaera rai Cana Coaunera bajaauche. Nitohaneein neeichenete, dedeeu nenaa Cana Inaca Cana Coaunera calaohineein neriquicheein. Acate enoto coaaunae, cojoanoonetojoeein nechu aansaineein nenacaauru rai, caohachaain nenacaauru rai, naaonjoainuri conaeranu que nihane coina. Chaaen techu suujua coaraelanaala nenacaauru rai, suujua coaraain nenacaauru rai, naaonjoainuri rai elo letoae acaauru rai caohachanu que. Jana acaihaniji inara belaichaauruhacha belaaichene, chatoanai que jana inara belaiche Cana Coaunera, inae cuu tihane bana. Coaracuche nachuhinti Roma curuaanaa rai impoesto nu que coriqui bajaaurera netonai jataain nechu aansaineein neeuruha natiin, nitohaneein ichaaoruhane. Jana inara belaichaauruhacha rai raotojoeein ereein, leeochaauru aina raotojoeein erelanaala, naaonjoaain neeichene, chatohaneeina jana esinae rauhijiriin inara ichao coreein neeichene coaracurure cachaauru, Cana Coaunera coitucuuruhi nihanatiinte, inara rijijieein neeure. Aihana jaun caohachaain rauhijiriin neeuche, aiha Cana Coaunerane rijijieein.

Phulaphula i Mateeocha Laenai 5