Yakkha 2023 WBT/NEBS  (NT) Drama

येसुङा उका एहिच चेलाचि काचिहोङ् इसिॽहा मुइचि लोन्‍नाहाङ्‌माहा नुङ् घाक खाले तुक्‍मा-छाक्‍माभाङ् नुमेॽमाहा चोक्‍तोक पिचि॥
एहिच सेगुम्‍पाकचि खाचिमाङ् ओम्‍चि– पात्‍तुरुस (न्‍ना ओन्‍दाङ् सिमोन चा न्‍लु) न्‍हाङा उनुन्‍छा आन्‍दिरियास, जाब्‍दियागा उच्‍या याकुब नुङ् उनुन्‍छा युहान्‍ना, फिलिप नुङ् बार्थोलोमाइ, थोमा, तिरो पोक्‍खुबा मात्‍ति, आल्‍फायासका उच्‍या याकुब, थेदियास, न्‍हाङ् खाम्‍युकभाक्‍ता छुमबेॽना सिमोन न्‍हाङा याहुदा इस्‍कारियोत न्‍नाङामाङ् हेक्‍साङ् येसु लाप्‍मेतुचि॥
येसुङा ङ्‌खा एहिच जाना सेगुम्‍पाकचि खाॽला लुचिहोङ् पाक्‍सुचि, “न्‍निङ्‌दा हेकोहा जातिचिगाबे नुङ् सामारि जातिचिगा साहारचिबे ङ्‌ख्‍यानिन॥ ङ्‌खाॽनिङ्‌गो म्‍मासाब्‍याहा सामुङ्‌चि लोॽवा न्‍लेक्‍सानेसाहा इजिरेलि जातिचिगाबे ख्‍यानि॥ न्‍हाङा ‘वालोक्‍का राज्‍या न्‍निङ्‌युम्‍बे तायाब्‍यामाना’ लुसाङ् पार्चार चोगानुम्‍चिम॥ तुखाबाङ्‌चि नुमेतानुम्‍चिम, न्‍स्‍याहाचि हिङ्‌गिलिक चोगानुम्‍चिम, कोरङा याक्‍सुचिहा सुद्‌दा चोगानुम्‍चिम न्‍हाङ् इसिॽहा मुइचि लोन्‍धाक्‍सानुम्‍चिम॥ न्‍निङ्‌दा ओमेन मेॽनिङ् तोक्‍तुम्‍गा, ओमेन मेॽनिङ् पियानुम्‍चिम॥ न्‍निङ्‌दा न्‍निङ् फोखिमाबे साम्‍मेङ्, युप्‍पा नुङ् ताम्‍बागा एको याङ् चा ङ्‌खुयानुम्‍निन॥ न्‍हाङा न्‍निङ्‌दा लाम्‍बुबे चाहाचोङ्‌मेहा लोप्‍पिभोङ् खेसुप, लेक्‍माहा तेफेन, लाङ्‌खोप नुङ् डाङ्‌गाक चा ङ्‌खुयानुम्‍निन, इजाङ्‌बाङ्‌निङ् काम चोक्‍खुबाङा उका चाम्‍योङ्‌बा तोक्‍मायि पोर्छो॥
“न्‍निङ्‌दा तेन कि साहारचिबे उइवागानिङ् न्‍नाबे न्‍निङ्‌दा स्‍वागात चोक्‍खुबा याॽमि योगानुम, न्‍हाङा न्‍नाभाङ् मेङ्‌खेॽले सोम्‍मा न्‍नागाबे वायानि॥ न्‍ना पाङ्‌बे उइवागानिङ् ‘ना पाङ्‌बे हाङ्‌हाङ् लेङ्‌नि’ लुयानुम्‍चिम॥ न्‍ना पाङ्‌बेॽहा याॽमिचि न्‍निङ्‌गा हाङ्‌हाङ् तोक्‍मा थेन्‍सिखुबा न्‍सायाभोङ्, न्‍ना पाङ्‌बे हाङ्‌हाङ् लेङ्‌नि॥ ङ्‌खाॽनिङ्‌गो थेन्‍सिखुबा म्‍मेतासानिन्‍भोङ् न्‍निङ्‌गा हाङ्‌हाङ् न्‍निङ्‌दाबेॽमाङ् लानि॥ न्‍निङ्‌दा हेॽना पाङ्‌बे स्‍वागात न्‍जोगिॽवागान न्‍हाङ् न्‍निङ्‌गा चेॽया ङ्‌खेप्‍स्‍वानिन, न्‍ना पाङ् कि साहारभाङ् लोन्‍दिॽवागानिङ् न्‍निङ्‌लाङ्‌बेॽहा धुलो आप्‍साबियानुम्‍चिम॥ जेप्‍पा का न्‍निङ्‌दा लुमेॽनेनिन, निरिक्‍का लेनबे न्‍ना साहारगा तुखि हाक्‍निङ्‌गो सादोम नुङ् गामोरा साहारचिगा तुखि आङ्‌मा यामाहा लेङ्‌मेहा॥


“सोयानुम, का न्‍निङ्‌दा ब्‍वासो लोॽवाहा याॽमिचिगा उलुम्‍बे सामुङ्‌चि लोॽवा पाङ्‌मासिम्‍मेॽनेनिन, न्‍हाङामाङ् न्‍निङ्‌दा पुछाक लोॽवा चोम्‍बु नुङ् ढुकुवा लोॽवा सोझो लेक्‍सानि॥ ङ्‌खाॽनिङ्‌गो याॽमिचिभाङ् थाङ्‌थाङ् वायानि॥ इजाङ्‌बाङ्‌निङ् ङ्‌खाचिङा न्‍निङ्‌दा लाबिॽवागाहोङ् निरिक्‍पाङ्‌बे खेतिॽवागा, न्‍हाङ् याहुदि छुम्‍पाङ्‌चिबे खेतिॽवागाहोङ् कोर्रा एन्‍दिॽवागा॥ न्‍निङ्‌दा आका चेला लेक्‍सिघाङा माम्‍माहा खाङ्‌खाङ्‌बाचि नुङ् हाङ्‌चिगा ओन्‍दाङ् येप्‍मेतिॽवागा॥ ङ्‌खिङ्‌बेला ङ्‌खाचि नुङ् हेकोहा जातिगा याॽमिचिगा लागि आका साचि लेङ्‌माना माउका तोक्‍त्‍वाम्‍गा॥ ङ्‌खाॽनिङ्‌गो न्‍निङ्‌दा ङ्‌खाचिङा लाप्‍मेतिइवागानिङ् ‘हाकु कानिङ् इहा लुॽमाहाचि, इमिन चेक्‍माहा लोप्‍पि’ भोङ् चिन्‍ता न्‍जोगानिन॥ न्‍निङ्‌दा इहा चेक्‍मा पोर्ने ओम, ङ्‌खिङ्‌बेलामाङ् तोक्‍त्‍वाम्‍घा॥ इजाङ्‌बाङ्‌निङ् ङ्‌खिङ्‌बेला चेक्‍खुबा न्‍निङ्‌दा आफाइ मेन्‍ना, ङ्‌खाॽनिङ्‌गो न्‍निङ्‌गा निङ्‌वाफुमा पागा आत्‍मा न्‍निङ्‌दाभाङ् चेङ्‌मेॽना॥
“याॽमिचिङा उङ्‌चि फुनुन्‍छाचि सिमागा न्‍लाप्‍मेत्‍वाचि॥ पा-माचि च्‍याचिगा बिरुद्‌दाबे, न्‍हाङा च्‍याचि पा-माचिगा बिरुद्‌दाबे म्‍बोङ्‌मेहोङ् सिमेखुसा न्‍जामे॥ का बिस्‍वास चोगाघाङा घाक याॽमिचिङा न्‍निङ्‌दा इसितिॽवागा, ङ्‌खाॽनिङ्‌गो इसाचिङा का हेक्‍साङ् सोम्‍मा बिस्‍वास चोङ्‌नुङ्‌मे, ङ्‌खाचि च्‍हेन ङ्‌हिङ्‌मेमेहा॥ न्‍निङ्‌दा याॽमिचिङा एको साहारबे तुखि पिइगाभोङ् हेकोनाबे खुसाख्‍यानि॥ जेप्‍पा का न्‍निङ्‌दा लुमेॽनेनिन, याॽमिगा उच्‍या तामाहाक्‍निङ् ओन्‍दाङ् न्‍निङ्‌दा इजिरेलबेॽहा घाक साहारचिबे न्‍निङ्‌गा काम ङ्‌याइनेस्‍वाम्‍गान्‍हा॥
“चेला चिन्‍खुबा हाक्‍निङ् नुङ् नोकोर उका मालिक हाक्‍निङ् माडा न्‍लेङ्‌मेन्‍ना॥ न्‍हाङामाङ् चेला उङ् चिन्‍खुबा लोॽवा न्‍हाङ् नोकोर उका मालिक लोॽवा लेङ्‌मा तोक्‍तुनाबे सोन्‍तोक एॽनि॥ हाकु ङ्‌खाचिङा मालिक माङ् इसिॽहा मुइचिगा हाङ् बाल्‍जिबुल न्‍ल्‍वाना भोङ्, उका पाङ्‌बेॽहाचि गो झान इखिङ् प्‍याक इसिॽनुङ् न्‍ल्‍वाचिहा लोप्‍पि?


“न्‍हाङामाङ् याॽमिचिनुङ् ङ्‌गिसितानिन, इजाङ्‌बाङ्‌निङ् एम्‍नुङ्‌मानिङ् मेओखुबा न्‍हाङ् चुम्‍नुङ्‌मानिङ् था मेलेङ्‌माहा इहाचा मान्‍हा॥ कुइम्‍नाबे का न्‍निङ्‌दा इहा लुमेॽनेनिन, ङ्‌खा चेॽया न्‍निङ्‌दा ओम्‍नाबे लुयानुम्‍चिम, न्‍हाङा का नाभाकपे स्‍वाक लुॽनेनिन्‍हा चेॽया पाङ्‌गा चुलिभाङ् पार्चार चोगानुम॥ न्‍निङ्‌दा न्‍निङ्‌गा सालुङ् सिखुबाचिनुङ् ङ्‌गिसितानिन, इजाङ्‌बाङ्‌निङ् ङ्‌खाचिङा न्‍निङ्‌गा आत्‍मा गो सिमा ङ्‌यास्‍वानिन्‍बा! ङ्‌खाॽनिङ्‌गो सालुङ् नुङ् आत्‍मा हिचिचि नाराकपे नास चोक्‍मा याखुबा निङ्‌वाफुमानुङ् किसितानि॥ इना हिच्‍चि पेचिरिॽवाचि याङ्एकोबे न्‍छुङ्‌मेनाहाचि? ङ्‌खाॽनिङ्‌गो ङ्‌खाचिबे न्‍निङ्‌गा निङ्‌वाफुमा पागा उनिङ्‌वा मेॽनिङ् एको चा खामबे ङ्‌ङाॽनुङ्‌मेन्‍ना॥ न्‍निङ्‌गा गो झान टुखुरुकपेॽहा घाक ताम्‍फोक चा निङ्‌वाफुमाङा निरुक्‍सुहा॥ न्‍हाङामाङ् न्‍निङ्‌दा ङ्‌गिसितानिन! न्‍निङ्‌दा प्‍याक पेचिरिॽवाचि हाक्‍निङ्‌चा प्‍याक ओमेन आखुबासिगान॥
“खेप्‍सानुम, इसाङा याॽमिचिगा उयुम्‍बे आका हाङ्‌बा ओमभोङ् का सुइकार चोङ्‌मेङ्, का चा न्‍ना वालोकपे वाखुबा निङ्‌वाफुमा आप्‍पागा उयुम्‍बे सुइकार चोग्‍वाङ्॥ ङ्‌खाॽनिङ्‌गो इसाङा याॽमिचिगा उयुम्‍बे का इन्‍कार चोङ्‌मेङ्, का चा न्‍ना वालोकपे वाखुबा निङ्‌वाफुमा आप्‍पागा उयुम्‍बे इन्‍कार चोग्‍वाङ्‌ना॥


“का ताम्‍दाङ्‌फुमाबे हाङ्‌हाङ् पिसे तायाङ्‌ना ओमभोङ् म्‍मितानिन॥ का हाङ्‌हाङ् पिसे मेन्‍ना, ङ्‌खाॽनिङ्‌गो साम्‍बेक चालाचोक्‍से तायाङ्‌ना ओम॥ इजाङ्‌बाङ्‌निङ् उप्‍पागा बिरुद्‌दाबे उच्‍या बाबु, उमागा बिरुद्‌दाबे उच्‍या मामु, न्‍हाङा उनाम्‍मागा बिरुद्‌दाबे उताङ्‌मेक पोक्‍मेमागा तायाङ्‌ना ओम॥ याॽमिगा सात्‍तुरचि गो उपाङ्‌बेॽहा याॽमि न्‍लेङ्‌मेहा॥ इसाङा का हाक्‍निङ् प्‍याक उप्‍पा-उमा उलुङ्‌मा तुक्‍त्‍वाचि, न्‍ना आका चेला लेङ्‌मा न्‍थेन्‍दिसिॽवान्‍ना॥ ङ्‌खाॽलामाङ् इसाङा का हाक्‍निङ् प्‍याक उच्‍याचि उलुङ्‌मा तुक्‍त्‍वाचि, न्‍ना चा आका चेला लेङ्‌मा न्‍थेन्‍दिसिॽवान्‍ना॥ न्‍हाङा इसाङा उका कुरुस ख्‍वाहोङ् आका हेक्‍साङ् न्‍लाम्‍मेन, न्‍ना आका चेला लेङ्‌मा न्‍थेन्‍दिसिॽवान्‍ना॥ इसाङा उका हिङ्‌लुङ् हिङ्‌मेॽमा योग्‍वा न्‍नाङा जेप्‍पागा हिङ्‌लुङ् मासिॽवा, ङ्‌खाॽनिङ्‌गो इसाङा उका हिङ्‌लुङ् आका लागि पिवा, न्‍नाङा च्‍हेन मेन्‍सिमाना हिङ्‌लुङ् तोक्‍त्‍वाना॥


“इसाङा न्‍निङ्‌दा स्‍वागात चोगिॽवागा, न्‍नाङा का चा स्‍वागात चोङ्‌मेङ्, न्‍हाङा इसाङा का स्‍वागात चोङ्‌मेङ्, न्‍नाङा का पाङ्‌खुबा स्‍वागात चोग्‍वाना॥ इसाङा निङ्‌वाफुमाभाङ् चेक्‍खुबा ‘निङ्‌वाफुमाभाङ् चेक्‍खुबा ओम’ भोङ् स्‍वागात चोग्‍वा, न्‍नाङा निङ्‌वाफुमाभाङ् चेक्‍खुबाङा लोॽवा इनाम तोक्‍त्‍वाहा॥ ङ्‌खाॽलामाङ् इसाङा धार्मोति याॽमि ‘धार्मोति ओम’ भोङ् स्‍वागात चोग्‍वा, न्‍नाङा धार्मोतिगा लोॽवा इनाम तोक्‍त्‍वाहा॥ इसाङा खा मिमिॽहाचिबे एको ‘ना उका चेला ओम’ भोङ् ए गिलास चिहा माङ्‌च्‍वा से होङ्‌चा उङ्‌मा पिवा, न्‍नाङा जेप्‍पा इनाम तोक्‍त्‍वाहा॥”

Phulaphula i मात्‍ति 10